मत्ती 11
11
येसुतेङ् बप्तीस्मा पीन्बे युहन्न
(लुका ७:१८-३५)
1येसुचे र्हङ्की चुङ्ङ्य्ही डबमात चु तम्मा लोप्जेत्प बीसेम् हुजु ग्लाकी रेइ-रेइकी ज्यीद सहर्मारी म्हीमात लोप्पतेङ् प्रचार् स्य्हेङ्बरी स्येःजेत्ज्यी।
2बप्तीस्मा पीन्बे युहन्नचे थे जेल्न्हङ् मुबे बेलोरी मुक्ती न्हङ्बे ख्रीस्ट्चे स्य्हेङ्जेत्पे लक्माकी बारेरी थ्येःज्यी। होत्तज्यीम् युहन्नचे थेइ डेत्-डेत् डबमात, 3चु तम् ङ्योत्परी येसुज पीत्ज्यी, “ब्योन्खजेत्स्येकी मुक्ती न्हङ्बे ख्रीस्ट् थेङ्नो य्हीन्ब वुइ ङ्यीमाचे ल्हो-ल्होत ब्रेन्थोब?” 4येसुचे थेङ्यीमात सुङ्ज्यी, “एङ्यीमाचे थ्येःबतेङ् म्रङ्बे तम्मा ङ्यीज्यीम् युहन्नत स्येतो, 5कनमाचे म्रङ्ब, खोरमा ब्रब खम्ब, पुन् स्यप्पलमा फेन्बल मुब, न्हादीङ्माचे थ्येःब, स्यीबलमा सोब, ओसेम् प्रङ्नमात ज्यबे सम्तर् स्येत्टीब मुब। 6ङत बीस्वास् स्य्हेङ्ब अपीत्पलमा मोलम् यङ्बलमा य्हीन्ब।”
7युहन्नइ डबमा य्हर्ब बीसेम् येसुचे म्हीमात युहन्नइ बारेरी सुङ्ब तीप्ज्यी, “एङ्यीमा उजाड् ग्लारी ता च्याबरी ङ्यीज्यी? लाबचे य्होङ्टीबे म दोङ्बोत च्याबरी? 8एङ्यीमा ता च्याबरी ङ्यीज्यी? ज्यब-ज्यबे गोइल येन्बे म्हीत च्याबरी य्हीन्ब? ज्यब-ज्यब गोइल येन्बे म्हीम् ग्यल्बोइ दर्बार्मारी टीब। 9ङत पङो, देमेन्नो एङ्यीमा ता च्याबरी डोङ्ज्यी? ता अगम्बक्तत च्याबरी? य्हीन्ब, ङ एङ्यीमात देमेन्नो पङ्ब, ओसेम् एङ्यीमाचे अगम्बक्त बीमएनो ङ्हच्छ्यङ् गीत म्रङ्बल मुब। 10तलेपङ्सम् धर्म छ्येःरी पर्मेस्वर्चे चोले सुङ्बल मुब-
‘च्याको, ङ ङइ चवत एइ ङोन्ग्यम् पीत्स्ये मुब,
ओसेम् थेचे एइ ग्यम् टोप् लस्ये मुब।’ #
मलाकी ३:१
11 “देमेन्नो ङ एङ्यीमात पङ्ब, बप्तीस्मा पीन्बे युहन्न बीम ङ्हच्छ्यङ् म्ही न्हबल अरे। होलेतलेनो स्वर्गइ य्हुल्री खल जम्मन्हङ्री ज्यीद मुब, थे युहन्न बीमएनो ङ्हच्छ्यङ् य्हीन्ब। 12बप्तीस्मा पीन्बे युहन्नचे प्रचार् स्य्हेङ्बे बेलो य्हङ्से देरेसम्म स्वर्गइ य्हुल् झेन् य्हक्को तबोर्टीबल मुब। ओसेम् बीरोद् स्य्हेङ्बलमाम् हुजुइ बीरुद्दरी छेत्टीब। 13बप्तीस्मा पीन्बे युहन्नइ बेलोसम्म मोसाचे ब्रीबे पर्मेस्वर्की नीयम्तेङ् जम्म अगम्बक्तमाचे स्वर्गइ य्हुल्की बारेरी अगम्बानी पङ्बल मुबल। 14ओसेम् एङ्यीमाचे ङत बीस्वास् स्य्हेङ्बे सेम् लबनो पङ्सम्, थेङ्यीमाचे खस्ये मुब पङ्बे एलीया युहन्ननो य्हीन्ब। 15खल्ल थ्येःबे न्हबीङ् मुब हुजुचे थ्येःखइ!
16 “चु पुस्ताइ म्हीमात ङ तातेङ् व्हब? थेङ्यीमा बजार्री क्लङ्ज्यीम् टीबे कोलमा र्हङ्ब य्हीन्ब, ओसेम् ल्हो-ल्हो र्होमात ङ्होत्ज्यीम् पङ्ब-
17 ‘ङ्यीमाचे एङ्यीमाकी लागीरी पुली र्हब्ज्यी,
तर एङ्यीमा अस्य,
ओसेम् ङ्यीमाचे एङ्यीमाकी लागीरी दुखइ व्हइ कोज्यी, तर एङ्यीमा अक्रा।’
18 “तलेपङ्सम् युहन्न चबथुङ्ब लज्यीम् अख, ओसेम् एङ्यीमाचे पङ्ब, ‘थेत म्हङ् स्यप्पल मुब।’ 19ओसेम् म्हीइ ज चबथुङ्ब लज्यीम् खज्यी, ओसेम् एङ्यीमाचे पङ्ब, ‘च्याको चु म्हीत! थेचे य्हक्को चबथुङ्ब स्य्हेङ्ब, ओसेम् तीरो दुत्पे म्हीमातेङ् पापीमाकी र्हो’ बी पङ्ब। तर बुद्दीत थेइ लक्मा ग्यम्सेनो ठीक् ङोन्ब।”
बीस्वास् अस्य्हेङ्बे सहर्मा
(लुका १०:१३-१५)
20हुजु लीप्चे येसुचे खजु-खजु ज्यीद सहर्मारी य्हक्को तेःङेन्की लक्मा स्य्हेङ्जेत्ज्यी, हुजु सहर्माकी म्हीमात धीक्कर्तीजेत्ज्यी। तलेपङ्सम् थेङ्यीमाचे र्हङ्-र्हङ्की पाप्मा ग्यम्स्ये पस्चताप् अस्य्हेङ्। 21थेङ्चे सुङ्ज्यी, “खोराजीन्तेङ् बेथ्सेदाकी म्हीमा, एङ्यीमात धीक्कार्! एङ्यीमाकी गुङ्री स्य्हेङ्बे तेःङेन्की लक्मा टुरोस्तेङ् सीदोन् सहर्री स्य्हेङ्बल य्हीन्सम् हुजु ग्लाकी म्हीमाचे थेङ्यीमाकी पाप्मा ग्यम्से य्हक्को ङोन्नो गल्द य्हुर्ज्यीम् ओसेम् मेफ्र स्य्हल्ज्यीम् पस्चताप् स्य्हेङ्स्ये मुबल। 22तर ङ एङ्यीमात पङ्ब, न्यायकी दीन्री एङ्यीमाल बीमम् टुरोस्तेङ् सीदोन्की म्हीमाकी सजाय नाखम्बल तस्ये मुब।
23 “ओसेम् कफर्नहुम्की म्हीमा, एङ्यीमा स्वर्गरी दोःब बी म्हेन्ब? एङ्यीमा नर्करी ख्लास्ये मुब। तलेपङ्सम् एङ्यीमात ङोन्ब र्हङ्बे तेःङेन्की लक्मा सदोम्रीएनो ङोन्बल पङ्सम् सदोम सहर् तीङ्यी सम्मनो टीस्येल। 24तर ङ एङ्यीमात पङ्ब, न्यायकी दीन्री एङ्यीमाल बीमम् सदोम् य्हुल्की म्हीमाकी सजाय नाखम्बल तस्ये मुब।”
दुःबलमाचे येसुरी दुःब न्हम्यङ्ब
(लुका १०:२१-२२)
25हुजु बेलोरी येसुचे चोले प्रार्थना स्य्हेङ्जेत्ज्यी, “अप, स्वर्गतेङ् जम्बुलीङ्की प्रभु, ङ थेङ्त व्होर्छ्ये पीन्ब, तलेपङ्सम् बुद्दी मुबे म्हीमातेङ् स्येःब खेःबे म्हीमा ग्यम्से छुम्ज्यीम् थेन्जेत्पे तम् ज्यीद कोलमा र्हङ्बे ङ्यीमात गोनलजेत्ज्यी। 26अप, थेङ्त चोलेनो स्य्हेङ्बे थुः तज्यी।
27 “ङइ अपचे जम्म स्हेःमा ङत सोप्तीजेत्पल मुब। अपचे बीम खल्चेएनो जत अस्ये, ओसेम् जचे बीम खल्चेएनो अपत अस्ये, तर जचे अपत स्येनलपीन्बे म्हीमाचे अपत स्येःब।
28 “ल्हीबे दोत्चे प्लेबलमातेङ् दुःबलमा जम्मनो ङइज खोउ, ङ एङ्यीमात दुःब न्हपुङ्स्ये मुब। 29ङइ कुम् नागो, ओसेम् ङ ग्यम्से लोपो, तलेपङ्सम् ङइ सेम् नम्रतेङ् दयाचे प्लीङ्बल मुब। ओसेम् एङ्यीमाचे र्हङ्की आत्मारी दुःब न्हम्यङ्स्ये मुब। 30ङइ कुम् देबल मुब, ओसेम् ङइ दोत् यङ्ज मुब।”
Айни замон обунашуда:
मत्ती 11: WTDG
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.