लुका 17
17
पापीत क्षमा पीन्थोब
(मत्ती १८:६-७,२१-२२; मर्कुस् ९:४२)
1येसुचे थेङ्की डबमात सुङ्ज्यी, “म्हीत पाप् स्य्हेङ्न लबे तम्मा खब। तर पाप् स्य्हेङ्नलबरी परीक्षा बबे म्हीत धीक्कार्! 2खजु म्हीचे चु ज्यीद कोलमान्हङ्री गीत पाप् स्य्हेङ्नलब। थेइ खारीरी र्हन्द च्योज्यीम् समुन्द्रन्हङ् युलाब ज्यब तब। 3होत्तज्यीम् होसीयार्ले टीउ।
“एइ अलेचे पाप् स्य्हेङ्ज्यी पङ्सम् थेत बरागो। ओसेम् थेचे पस्चताप् स्य्हेङ्ज्यी पङ्सम् एचे थेत क्षमा पीनो। 4थेचे एइ बीरुद्दरी दीन्ल ङ्यीस् ख्यप् पाप् स्य्हेङ्ज्यी। ओसेम् ङ्यीस् ख्यप्नो एज खज्यीम् ‘ङ पस्चताप् स्य्हेङ्ब’ पङ्ज्यी पङ्सम्म्, एचे थेत क्षमा पीनो।”
5प्रेरीत्माचे प्रभुत, “प्रभु ङ्यीमाइ बीस्वास्त ङ्हच्छ्यङ् तनलजेतो” बी पङ्ज्यी। 6प्रभुचे थेङ्यीमात, “एङ्यीमातेङ् नम्नम्की ब्लुइ फुम् गी गदे बीस्वास् मुब पङ्सम् चु बोस्योरोइ दोङ्बोत ‘ए र्हङ्नो ओर्ज्यीम् समुन्द्ररी सुः ङ्यीउ’ पङ्ज्यी पङ्सम् थेचे ङ्येन्स्ये मुब बी सुङ्ज्यी।”
योक्पोचे स्य्हेङ्थोबे लक्
7 “एङ्यीमान्हङ्री खल्ल पङ्लेनो योक्पो म्रङ् मोइज्यीम् वुइ ग्युः छब बुत्ज्यीम् ता स्य्हेङ्ज्यीम् खलेएनो योक्पोत ‘एचे ग्योने खज्यीम् चबरी टीउ’ बी पङ्ब? 8अय्हीन्, एचे योक्पोत चोले पङ्ब, ‘ङ्यीज्यीम् ङइ लागीरी योप्त स्य्हेङो। ओसेम् ङचे चबथुङ्ब अबुत्गदे सम्म ङत क्योङो, हुजु लीप्चे एचे चउ।’ 9ओसेम् कुल्ब र्हङ्ले स्य्हेङ्बल तज्यीम् योक्पोत थेचे व्होर्छ्ये पीन्ब स्यीम्? 10होलेनो एङ्यीमाचेएनो र्हङ्त कुल्बे जम्म लक्मा स्य्हेङ्ब बुत्प बीसेम्, पङो, ‘ङ्यीमामी तोप्परी जेःबे योक्पोमा अय्हीन्, ङ्यीमाचे स्य्हेङ्थोबे लक्कीनो स्य्हेङ्बल य्हीन्ब।’”
येसुचे पुन् स्यप्पे म्ही च्यीत फेन्न लजेत्पल
11येसु गालील् प्रदेस्तेङ् सामरीया प्रदेस्की सान् ग्यम्से तज्यीम् यरुस्लेम्क्योर् स्येःटीब मुबल। 12थेङ् नम्स गीरी वङ्यम्बे बेलोरी पुन् स्यप्पे म्हीमा च्यी थेङ्तेङ् खतु तज्यी। ओसेम् थारीङ्नो रप्ज्यीम्#१७:१२ थारीङ्नो रप्ज्यीम्- मोसाचे ब्रीबे नीयम् अनुसार् यहुदीमा न्हङ्री पुन् स्यप्पे म्हीचे ल्हो-ल्हो म्हीमाकी रेइरी ङ्यीब अतब मुबल। लेबी १३:४६ थेङ्यीमाचे 13क्रीङ्ज्यीम्, “प्रभु येसु, ङ्यीमात क्रीपा स्य्हेङ्जेतो!” बी पङ्ज्यी। 14येसुचे थेङ्यीमात स्हीःज्यीम् सुङ्ज्यी, “य्हरो, लम्बुमाज ङ्यीज्यीम् र्हङ्त ङोनो।” ओसेम् थेङ्यीमा य्हर्टीन य्हर्टीननो फेन्ज्यी। 15थेङ्यीमाचे र्हङ्त फेन्बल म्रङ्ज्यी। तर थेङ्यीमान्हङ्री गीकीनो केत् ङ्हच्छ्यङ् तेत्ज्यीम् पर्मेस्वर्त तोप्ज्यीम् दोःज्यीम् खज्यी। 16ओसेम् येसुइ स्य्हब्री पब्लु लज्यीम् थेचे व्होर्छ्ये पीन्ज्यी। हुजु म्ही सामरी मुबल। 17येसुचे ङ्योत्जेत्ज्यी, “फेन्बे म्हीमा च्यी अय्हीन्? ल्हो-ल्हो कु खन मुब? 18चु सामरी बीम ल्हो-ल्हो दोःखज्यीम् पर्मेस्वर्त तोप्परी खलेनो अख?” 19ओसेम् येसुचे हुजु सामरीत सुङ्ज्यी, “रेःगो ओसेम् य्हरो, एइ बीस्वास्चे एत फेन्न लबल मुब।”
पर्मेस्वर्की य्हुल्
(मत्ती २४:२३-२८,३७-४१)
20तीरेत् फरीसीमाचे येसुत पर्मेस्वर्की य्हुल् खेमा खब बी ङ्योत्ज्यी। येसुचे थेङ्यीमात, “पर्मेस्वर्की य्हुल् म्रङ्नले अख। 21खल्चेएनो, ‘च्याको, चुरी मुब’, वुइ ‘क्युजुरी मुब’ पङ्स्ये अरे। तलेपङ्सम् पर्मेस्वर्की य्हुल् एङ्यीमाकी न्हङ्रीनो मुब” बी सुङ्ज्यी।
22ओसेम् येसुचे थेङ्की डबमात सुङ्ज्यी, “चोतेबे बेलोएनो खस्ये मुब, एङ्यीमाचे म्हीइ जइ तीरेत् च्याबे सेम् लस्ये मुब। तर एङ्यीमाचे च्याम्यङ्स्ये अरे। 23म्हीमाचे एङ्यीमात पङ्स्ये मुब, ‘च्याको, म्हीइ ज चुरी मुब’, वुइ ‘क्युजुरी मुब।’ तर थेङ्यीमाकी लीप्चे थङ्यीउ। 24तलेपङ्सम् मुरी तीप्लीक् फ्लीक्पतेङ् गुः गीचे गीब गुःसम्म य्हल् तब र्हङ्ले म्हीइ ज युबे दीन्री जम्म म्हीमाचे थेङ्त म्रङ्स्ये मुब। 25तर ङोन्ग्यम् थेचे य्हक्को दुख नाथोस्ये मुब। ओसेम् चु पुस्तइ म्हीमाचे अखोस्ये मुब। 26नोआइ बेलोरी तब र्हङ्ले म्हीइ ज युबे बेलोरी तस्ये मुब। 27नोआ दोङ्गरी वङ्बे बेलोसम्म म्हीमा चटीब, थुङ्टीब ओसेम् भ्या स्य्हेङ्टीबल मुबल। हुजु बेलोरी ङ्हच्छ्यङ् नम्तेङ् भल् युज्यीम् थेङ्यीमा जम्मत नास् स्य्हेङ्ज्यी। 28लोत्की बेलोरीएनो होलेनो म्हीमा चटीब, थुङ्टीब, चुङ्टीब, ग्लुटीब, सुःटीब ओसेम् दीम् स्य्हेङ्टीबल मुबल। 29तर लोत्चे सदोम् पीत्थेन्बे दीन्रीनो स्वर्गचे मे ल्हम् तइयुज्यीम् थेङ्यीमा जम्मत नास् लज्यी। 30म्हीइ ज म्रङ्स्येकी दीन्रीएनो होलेनो तस्ये मुब।
31 “हुजु दीन्री दोरी मुबे म्ही स्हेःमा कीन्बरी दीम्न्हङ् अङ्यीखइ, होलेनो म्रङ्री मुबे म्ही दोःज्यीम् स्हेःमा कीन्बरी दीम्री अङ्यीखइ। 32लोत्की म्रीङ्त#ठुङ्ब १९:२६ व्हल् लो! 33खल्चे र्हङ्की जीवन् थर्नलब म्हइज्यी थेइ खेमेनो अबेबे जीवन् म्हस्ये मुब। तर खल्चे र्हङ्की जीवन् म्हनलज्यी थेचे खेमेनो अबेबे जीवन् यङ्स्ये मुब। 34ङ एङ्यीमात पङ्ब, हुजु म्हुन्री म्ही ङ्य्ही तीत्स गीरी न्हुटीबल तस्ये मुब। गीत बोर्स्ये मुब ओसेम् गीबत ख्लेथेन्स्ये मुब। 35अमकोल ङ्य्ही र्हन्दरी ब्रा ब्राटीबल तस्ये मुब। गीत बोर्स्ये मुब ओसेम् गीबतम् ख्लेथेन्स्ये मुब। 36होलेनो म्रङ्री मुबे म्ही ङ्य्ही न्हङ्री गीत बोर्स्ये मुब ओसेम् गीबत ख्लेथेन्स्ये मुब।”#१७:३६ चु पद् य्हक्को बर्स ङोन्ग्यम्की बाइबल्मारी ब्रीबल अरे।
37डबमाचे थेङ्त, “चु खन तस्ये प्रभु?” बी ङ्योत्ज्यी। ओसेम् येसुचे, “खन सीनु तब, हुजुरी गीद्दमा र्हुब् तब” बी सुङ्ज्यी।
Айни замон обунашуда:
लुका 17: WTDG
Лаҳзаҳои махсус
Нусха
Муқоиса
Паҳн кунед
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.