Mataayo 1
1
Orwibhoro ro Yesu Kirisito
(Ruuka 3:23–38)
1Ghano nigho amariina gha rwibhoro ro Yesu Kirisito#1:1 Kirisito n‑angʼana e Keyunaani, egheteemoro keeche n‑uno ahakuru amaghuta. Mo‑Kebhuraaniya mbakomobherekera, Masiya. Kwo Bhayahuuti neere asughara yaabho kubha omuchaama naare aramuhaka amaghuta a‑mutu omooto uno Eryobha ryahwire kubha omutëmi waabho. Kino nkeere ekyërëkërëri ghe komotoora mo‑moremo. Abhayahuuti mbaare bhariitëngʼëra kubha Eryobha ndekomotoma Kirisito, uyo niwe akobhatoori koru mo‑nyaako. uno arweriire mo‑rwibhoro ro mutëmi Tawuti o mo‑rwibhoro ro Abhurahamu.
2Abhurahamu namwibhwire Isaka,
Isaka akiibhora Yakobho,
Yakobho akiibhora Yuuta na bhaömööbhö.
3Yuuta akiibhora Bhereesi na Seera gho Tamaari,
Bhereesi akiibhora Hesirooni,
Hesirooni akiibhora Araamu,
4Araamu akiibhora Aminataabhu,
Aminataabhu akiibhora Nashooni,
Nashooni akiibhora Sarimooni,
5Sarimooni akiibhora Bhowaasi kwo Rahaabhu,
Bhowaasi akiibhora Obheeti kwo Ruutu,
Obheeti akiibhora Yeese,
6na Yeese akiibhora omutëmi Tawuti.
Tawuti akiibhora Seremaani kwo mukari uno are muka Huriya.#1:6 Mööhi 2 Samweri 11:2–4, 12:24–25.
7Seremaani akiibhora Rehobhowamu,
Rehobhowamu akiibhora Abhiya,
Abhiya akiibhora Asa,
8Asa akiibhora Yehoshabhaati,
Yehoshabhaati akiibhora Yoraamu,
Yoraamu akiibhora Usiya,
9Usiya akiibhora Yotaamu,
Yotaamu akiibhora Ahaasi,
Ahaasi akiibhora Hesekiya,
10Hesekiya akiibhora Manase,
Manase akiibhora Amooni,#1:10 Amooni. Amandëkö aghande gha Keyunaani ngakobhugha kubha, Amoosi.
na Amooni akiibhora Yosiya,
11Yosiya akiibhora Yekoniya na bhaömööbhö,
eriibhagha riyo niryo Abhayahuuti bhaahiruru mo‑saama iyo Bhabheeri.
12Wiiki, hano bhaare iyo,
Yekoniya akiibhora Sherateeri,
Sherateeri akiibhora Serubhabheeri,
13Serubhabheeri akiibhora Abhihuuti,
Abhihuuti akiibhora Eriyaakimu,
Eriyaakimu akiibhora Asoori,
14Asoori akiibhora Satooki,
Satooki akiibhora Akimu,
Akimu akiibhora Eriwuti,
15Eriwuti akiibhora Ereyasaari,
Ereyasaari akiibhora Matani,
na Matani akiibhora Yakobho,
16Yakobho akiibhora Yusubhu, omosubhe o Mariyamu.
Mariyamu akiibhora Yesu uno akobherekeru Kirisito.
17Mbe, koru kwo Abhurahamu kohika kwo mutëmi Tawuti ncheere chanyiibhoro ikomi ni inye. Wiiki, koru kwo Tawuti kohika kwo riibhagha rino Abhayahuuti bhaahiruru mo‑saama iyo Bhabheeri, ncheere chanyiibhoro echende ikomi ni inye. Wiiki, korwera eriibhagha rino bhabhasaamiri mbagha kohika kwibhoru gho Kirisito, ncheere chanyiibhoro echende ikomi ni inye.
Okwibhoru kwo Yesu Kirisito
(Ruuka 2:1–7)
18Ghano nigho amangʼana gha kwibhoru kwo Yesu Kirisito. Mariyamu nyina Yesu, naare arwachiiru obhuku na Yusubhu. Amare hano bhaare bhakeere komisi haghirohamu, Mariyamu akarighibhu n‑inda anyi kwo bhotoro bho Körö Ahörëëru. 19Amare gho kubha Yusubhu, omosubhe waache naare omooto omuhëënë ambërë e Ryobha, tëëndiri amosooki Mariyamu. Niho ihëëbhiri komotigha gho kebhisere.
20Eriibhagha Yusubhu are ariihëëbha ghayo, mööhi marayika o Mutëmi akamorwera mo‑riröötö, akamobhoorera akabhugha, “Yusubhu, omoona o Tawuti, otatiina komokwira Mariyamu, gho kubha anda yaache nayebhwine kwo bhotoro bho Körö Ahörëëru. 21Nakwibhora omoona o ghesiite, niiye omoroke eriina reeche Yesu,#1:21 Eriina re Yesu gho Keyunaani ne Ekebhuraaniya n‑Yoshuwa, egheteemoro keeche Omutëmi Waryobha naghotoori. gho kubha niwe akobhatoori abhaato bhaache koru mo‑masari ghaabho.”
22Ghoose ghayo ꞉ngaaköruru kubha ehikeerane angʼana ino Omutëmi Waryobha abhughiri gho nchëra e murööti waache kubha,
23“Mööhi! Omuukë uno ataamara amënya omosubhe
naghughëgha anda, nawe nakwibhora omoona o ghesiite!
Nabho mbakomoroka eriina reeche Emanweri.”#1:23 Mööhi Isaaya 7:14.
Egheteemoro keeche, “Eryobha ndeenyi haghirohamu na niitu.”
24Hano Yusubhu abhookiri koru mo‑chandöörö, aghaköra kinya marayika o Mutëmi are amobhooriire. Yusubhu akamokwira Mariyamu, 25amare taamisiri nawe mbagha hano Mariyamu ꞉ibhwire omoona uyo o ghesubhe. Yusubhu akamoroka omoona uyo Yesu.
Айни замон обунашуда:
Mataayo 1: ntk
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved