GENESIS 4
4
Kain le Abel
1Cun Adam nih a nupi Evi cu a hngalh i fa a pawi. Fapa pakhat a hrin i, “Bawipa bawmhnak thawngin fapa pakhat ka hmuh,” tiah a ti. Cucaah a min ah Kain a sak. 2Cun hnu deuh ah a nau Abel zong kha a hun hrin. Abel cu tuukhal a si i Kain cu lothlo a si. 3Kain nih cun a lochung chuak cu Bawipa sinah laksawng ah a rak put hna.
4Cun Abel zong nih khan a saṭil nih an hrin hmasa bikmi hna kha a rak put ve hna i a thah hna i an sa a ṭhatnak bik kha Bawipa sinah cun laksawng ah a pek ve hna. Bawipa cu Abel le a laksawng cungah khan a lung a si, #Heb 11.4 5sihmanhsehlaw Kain le a laksawng cungah khan cun a lung a si lo. Kain cu a thin a hung i a hmai a chia. 6Cu tikah Bawipa nih Kain cu a thawh i, “Zeicahdah na thin a hun i na hmai a chiat? 7Ṭhatnak kha rak tuah law cu na merh ko hnga; sihmanhsehlaw ṭhat lonak kha na rak tuah caah sualnak nih cun nangmah tei awkah sahrang bantukin an bawh ko. Nangmah kha uk an duh, sihmanhsehlaw nangmah nih na tei awk a si,” a ti.
8Cun Kain nih a nau Abel kha a thawh i, “I chawk tuah u sih,” a ti. Lo an va phak tikah khan Kain nih a nau cu a thah. #Mat 23.35; Luk 11.51; 1John 3.12
9 Bawipa nih Kain cu, “Na nau Abel tah, khuazei ah dah a um?” tiah a hal. Kain nih cun, “Ka hngal lo. Ka nau cawngtu maw ka si awk a si?” tiah a leh. 10Cun Bawipa nih cun, “Zeicahdah hi thil ṭhalo hi na tuah? Ngai hmanh! Nangmah nih na chuahmi na nau thisen nih khan vawlei in a ka auh lengmang ko. #Heb 12.24 11Nangmah cu chiatserh na si cang i hi hmun hin ṭhawl na si lai. Hi hmun vawlei hi na nau thisen na chuahmi dolh awkah a kaa a rak angmi kha a si. 12Lo na thlawh tikah vawlei nih rawl zeihmanh an chuahpiak lai lo; vawlei cungah inn ngei loin a vak lengmangmi na si lai,” a ti. 13Cun Kain nih khan Bawipa cu: “Hi dantatnak hi ka caah a fak tuk. 14Hi ram le nangmah hmaika in na ka ṭhawl i kei cu mivakvai ka si cang lai i a ka hmumi paoh nih an ka thah lai,” tiah a leh. 15Cun Bawipa nih Kain cu, “Cuticun a si lai lo, nangmah an thatmi paoh cu a let sarih in teirul cham a si lai,” tiah a ti. Cucaah Bawipa nih Kain cungah cun, a hmumi paoh nih that hna hlah seh tiah hmelchunhnak pakhat a chiah. 16Kain nih cun Bawipa cu a kaltak i Eden nichuahlei i a ummi ram “Vahvaihnak ram” timi ah cun a va um.
Kain Tefa
17Kain nih a nupi cu a hngalh i fa a pawi i fapa pakhat a hrin i a min ah Enok a sak. Cun Kain nih cun khua pakhat a ser i cu khua cu a min ah a fapa min chuankhan in Enok a sak. 18Enok nih fapa pakhat a ngeih i a min cu Irad a si; Irad cu Mehujael pa a si, Mehujael cu Methusael pa a si i Methusael cu Lamek pa a si. 19Lamek cu nupi pahnih a ngei, pakhat cu Adah a si i a dang pakhat cu Zillah a si. 20Adah nih cun Jabal a hrin i Jabal cu, caw a khal i thlam chung i khua a sami pawl, a hringsortu hna a si. 21Jabal nau cu a min ah Jubal a si, amah cu tingtang le thonglawi tum a thiammi hna a hringsortu hna a si. 22Cun Zillah nih Tubal-Kain a hrin i amah cu thir le dar hreihriam vialte a sertu hna a hringsortu a si. Tubal-Kain far cu Naamah a si. 23Lamek nih khan a nupile cu a thawh hna i,
“Ka nupi Adah le Zillah, ka bia
ngai tuah u.
Mipa pakhat cu, amah nih
a ka tuk caah ka thah,
Tlangval pakhat cu, amah nih
a ka hliam caah ka thah.
24Kain a tutu paoh cu a let sarih in
phuhlam an si ahcun,
Keimah a ka tutu chinchin cu
let sawm sarih let sarih in
phuhlam an si lai,” a ti. #Mat 18.22
Seth Tefa Hna
25Cun Adam nih khan a nupi cu a hngalh ṭhan i fapa a hrin. A nupi nih cun, “Kain nih a thahmi Abel airawltu ah khan Pathian nih fapa pakhat a ka pek,” a ti i a min ah Seth a sak. 26Seth nih cun fapa pakhat a ngeih i a min ah Enosh a sak. Cu caan cun mi nih Bawipa kha a min in biak hram an thawk.
Айни замон обунашуда:
GENESIS 4: HCL06
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006