Luke 4
4
Jesus Ze et Thuakna
(Matthew 4:1-11; Mark 1:12-13)
1Jordan ngun panin, Jesus sia Thaa Thiangtho taw kidim in, hong heak kik a, tua Thaa in senneal ngamsung dong lampui in paisak hi, 2tua munah Doaimangpa in ni sawmli ze et hi. Tua hun sung teng theampo bangma neak nei ngawl ahikom, tua hun a bo ciangin a ngilkial hi.
3Doaimangpa in “Pathian Tapa na hi le, suang hi sia anluum a sua natu in thupia in,” ci hi.
4Ahizong Jesus in, “Mihingte sia anluum bek taw nungta thei hi ngawl hi, ci in Laithiangtho sungah ki at hi,” ci in zo kik hi.#Thkna 8:3
5Tuasia ciangin Doaimangpa in ama la to a, thakhat thu in leitung ngam theampo lak hi. 6“Hi vaangletna le hi hauna theampo kong pia tu hi. Hite theampo keima khut sung a hong ki aapsa hi a, ka piak nop po ii tungah ka pia thei hi. 7Kei hong bia lete hite theampo nangma ii neisa suak tu hi,” ci hi.
8Jesus in “Laithiangtho in na Topa Pathian bek na bia tu a, ama atu bekma na seam tu hi ci hi!” ci in zo kik hi.#Thkna 6:13
9Tuaciang Doaimangpa in ama Jerusalem ah paipui a, Biakinn khuvum a saangbelna ah suanhto in, ama tungah, “Pathian Tapa na hile hi sung panin nangma le nangma kilawn suk in. 10Banghang ziam cile, ‘Pathian in nang hong keam tu in, a vantunglalangte sawl tu hi,’ laithiangtho in ci hi.#Ps 91:11-12 11‘Amate in a khut uh taw hong domto tu a, na peang beak zongh suang taw a kithutha buatu hi,’ ci lai hi,” ci hi.
12Ahizong Jesus in, “Laithiangtho in, ‘Na Topa Pathian na ze et heak in’ ci hi,” ci in zo kik hi.#Thkna 6:16
13Doaimangpa in Jesus a nanam in a ze et zawkciang, tawm vei sung nusia hi.
Jesus in Galilee ngam ah Nasep Kipan
(Matthew 4:12-17; Mark 1:14-15)
14Tua zawkciangin Jesus Galilee ngam ah heak kik a, tuaciangin Thaa Thiangtho vaangletna sia, ama taw omkhawm hi. Ngamkhen sung bup ah, ama thu hong thang hi. 15Ama in synagogue sungah hilna nei a, a kuama po in pok hon uh hi.
Nazareth ah Jesus Kinial
(Matthew 13:53-58; Mark 6:1-6)
16Tuaciang in Jesus Nazareth khua ama khanna munah cia kik a, Sabbath ni in synagogue ah a pai ngei bangin pai hi. Ama dingin Laithiangtho sim tu in kithoai a, 17tuaciangin kamsaang Isaiah ii laibu aap uh hi. Laizial phel a, hi bang a ki atna mun mu hi.
18“Topa ii Thaa
kei tungah hong om hi,
banghang ziam cile
mizawngte tungah
lungdamna thupha puak tu in
kei hong teal hi.
A kimante suatakna a pia tu le,
mittawte khua a mu kik natu,
nencip a thuakte
suatakna thu a thangsak tu,
19Topa in amate a ngup natu hun
hong theng zo hi,
ci in thangsak tu in kei
hong kisawl hi,” ci hi.#Is 61:1-2
20Jesus in laizial zialin, a keampa tungah a aap kik zawkciang ama to hi. Synagogue sungah a to theampo in, ama lamdang et tek uh a, 21“Hi laithiangtho kammal hong kisim teng na zaak uh bangin, tuni in hi thu teng hong taangtung zo hi,” a ci hu in, lamdang et tek ahi uh hi.
22Kammal taknei taw a pau thiam hu in mihingte thinsung hong suu hi. “Ama sia, Joseph ii tapa hi kana ngawl ziam?” ci uh hi.
23Amate munah, “ ‘Syavuan pa awng, nangma le nangma kidamsak phot in,’ ci paunak sia kei tungah hong zangh tu ci in kong up nginge ma ahi hi. Tua bek dom ngawlin, Capernaum khua ah a kivawt na zaak uhte hi lai ka khua zongh ah vawtin hong sawl lai tu nu hi. 24A tatakin kong ci ciang, kamsaangte sia, amate khua ah kisaang ngeingawl hi,” Jesus in ci lai hi.#Jn 4:44
25“Hong ngai tavun: Elijah hun sung kum thum le kum lang nguatui kang a, ngam bup kialpi a tun laitakin Israel ngam sungah meingong tam mama om hi.#1 Kum 17:1 26Ahitazong Elijah sia Israel ngam sungah meingongte khat beak ii kungah a kipaisak bua hi, ahihang Sidon ngamkhen Zarephath khua ah teang meingong khat ii kungah, kipaisak hi.#1 Kum 17:8-16 27Tuaciangin kamsaangpa Elisha hun ciangin Israel ngam sungah a lauhuai vun natna vei tam mama om hi; ahitazong Syria mi Naaman simngawl khat beak zongh a kidamsak bua hi,” ci hi.#2 Kum 5:1-14
28Synagogue sung om mihingte in, hi thu a zaak uh ciang thin uuk uh hi. 29Amate dingin Jesus khua pua sangah kai a, a khuamual liang tung pan lotsuk sawmin paipui uh hi. 30Ahihang ama mihonte kaantan in paisuak hi.
Thaa Ngilo khat A vei Pasal khat
(Mark 1:21-28)
31Tua zawkciangin Jesus Galilee ngam Capernaum khua ah pai a, Sabbath ni in mihingte tungah thuhil hi. 32Ama thuhil zia lamdang sa uh hi, banghang ziam cile ama in thuneina taw pau hi.#Mt 7:28-29 33Synagogue sungah doai ngilo khat ii thaa a vei pasal khat om a, ama in nging takin ciik au hi. 34“Aw Nazareth mi Jesus awng, ko bang hong law nuam ni ziam? Hong susiacip tu in hong pai ni ziam? Nang akua ci in hong he khu hi; nang sia Pathian ii a thiangtho kamtaipa ni hi!” ci hi.
35Jesus in thaa tungah thupia a, “Thim in, pasalpa sung pan pusuak in!” ci hi. Doai in mihingpa sia amate mai ah lei denna in nei a, bangma dang tatsak ngawlin a sung pan pusuak hi.
36Mihing theampo in lamdang sa uh a, khat le khat hi bangin kici uh hi. “Tu a kammalte bangbang kammal ziam? Thuneina le vaangletna taw hisia pa in, thaa ngilote thupia a, tuaciang amate pusuak hi!” ci uh hi. 37Jesus huvau thu kipuakte, tua ngamsung mun theampo ah kizel hi.
Jesus in Mihing Tam mama Damsak
(Matthew 8:14-17; Mark 1:29-34)
38Jesus in synagogue nusia in Simon inn ah pai hi. Simon sunghnu a cisa in suk a, amate in Jesus munah tua thu son uh hi. 39Ama lupna ah Jesus pai in, ciina nu kungah ding a, ciina nu ciisuk natna pan a dam natu in thupia hi. A ciisuk hong thai a, thakhatin tho in, amate zindo hi.
40Ni a tum zawkciangin, natna satna a tuatuam a veite peuma a lawmte in Jesus kungah hong paipui uh hi; mihing sim tungah a khut nga a, damsak siat hi. 41Mipite sung panin, doaite pusuak a, “Nang sia Pathian Tapa na hi hi,” ci in au uh hi.
Jesus in doaite a pau ngawl natu thupia hi, banghang ziam cile ama sia Messiah ahi hunlam doaite in he uh hi.
Jesus in Synagogue sungah Thuhil
(Mark 1:35-39)
42Khua hong vak ciangin, Jesus in khuapi nusia in, a ngamkhingna mun khat zuan hi. Mipite in, ama zong tu in kipan uh a, a mu ciangin, a taam lai natu in tho uh hi. 43Ahihang, amate tungah, “Pathian Ngam huvau, Lungdamna Thupha sia khuapi dangte zongh ah, ka hil kul tu hi, banghang ziam cile tua nasep seam tu ma in, Pathian ii hong sawlpa ka hi hi,” ci hi.
44Tuasia bangma in, ama in ngam bup sung synagogue te ah thuhil hi.
Айни замон обунашуда:
Luke 4: SCB2
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016