Lukàrzɛ̀ 7
7
Yerzù à mà wɔ̀wìrzɛ̀ è mòkutu wà è Mòkànèlì hwà hwàànà njùma
(Mat 8.5-13)
1Nà òmà Yerzù à mà kulɛ lì òhwìrzɛ̀nɛ̀ hwatò à mà tìmba ò mbòwà yà Kàpɛ̀nàwɔ̀mì. 2Ò èŋge mbòwà ò mà hwɛ mòkànèlì mɔ̀kɔ wà hwàànèlì hwa njùma wà Ròmànì ema à mà kànèyà egbe yɔ̀kɔ yà rzònja. À mà òhva mògbèèlì wà èni ema, à mà lìŋgàne rzìi, òŋgò mògbèèlì à mà ɔ̀kirzɛ̀ natɛ̀ɛ à mà hvɛ lì ŋwa. 3Nà òmà òŋgò mòkànèlì à mà hwèye lì hvòmɛ̀nɛ̀ hwègbèèlì hwe mànyakà hwe ama Yerzù, rzìi à òma hwàkànèlì hwa èŋge mbòwà ò lì ɛ̀ndɛ lì hwɛlɛ Yerzù ema à jèe à wɔ̀wìrzɛ̀ è mògbèèlì wà eni. 4Hwa mà mò àtɛ̀kɛ nà ŋginyà nanù ema, “À jèe nà wɔ̀ ò lì òŋgòwàna òŋgò mòtò. Ònò mòtò à hwèlì ndi mòtò ema à hwɛnì lì lùwa lì òŋgòwanɛ là aŋgɔ̀. 5À lìŋgàni hwatò hwa arzu hwa èkòmè natɛ̀ɛ à jò òŋgèlì è ndawò yà màkanɛ̀.”
6Yerzù rzìi à ɛ̀ndɛ nà wɔ̀, ndèŋgàna hwe uka ò ndawò yà ama òŋgò mòkànèlì rzìi à òma ì mbunda jà eni ò lì òhweyà Yerzù nanù ema, “Ì Rzàŋgò ò rzà atàkìrzɛ̀, nà rza uki hvɛ tɔ̀ òŋgò ema à tànɛyi lì ò karzɛ nàa ŋmɛ̀nì ò ndawò yà ami. 7Nà rza ukì hvɛ tɔ̀ nàa mɔ̀kɔ ema à tanɛ lì ò jèeya. Ohwa ndi eyà yɔ̀kɔ mɛnɛ aŋga nanù, e mògbèèlì wa amì à mà wɔ̀wɔ̀. 8Imba mbiti na hwèlì ndi mòtò ò rze ya lìkànèyà. Nà kànèyà hvɛ hwàànà njùma. Nà òhweyà ŋmànèlì mɔ̀kɔ wa njuma nanù ema, ‘Ɛ̀ndɛ,’ ndèŋgànɛ̀lɛ̀ a ɛ̀ndɛ. Nà òhweyà hvɛ ɔ̀nɛyi nanù ema, ‘Jà,’ mɔ̀ hvɛ a jà. Nà òhweyà hvɛ e mògbèèlì wa ami nanù ema, ‘Gbeyà ene eyà,’ mɔ̀ hvɛ à è gbeyà.”
9Nà òmà Yerzù a mà hweye nanù, à mà tàmà. Rzìi à ayeŋgòwɛ̀lɛ̀lɛ̀ è ŋgìndì rzìi a òhwa nanù ema, “Nà rzi ɛni tɔ̀ mòtò tɔ̀ mɔ̀kɔ ò enè èkòmè ya Irzàyɛ̀lì ema à òhvi enè tumba ya lìlòkɛ̀ ema ònò ŋmɛ̀nì a òhvi.” 10Nà òmà hwaŋga hwatò ema hwà mà òmahwa hwà mà tìmbe ò ndawò, rzìi hwa ùŋmanɛlɛ ema òŋgò mògbèèlì a mà wɔ̀wɔ̀.
Yerzù à hvùmule è ŋmanà wà ama mòkurze mò mòlanà
11O mburzà hvònda Yerzù à mà ɛ̀ndɛ mbòwà hvɔ̀kɔ nà hwà-òkòwèlì wa eni ema è ma hwɛ̀lɛ̀hwɛ̀ Nàyènɛ̀. Ŋgindi ndɛnɛ̀ hvɛ yà hwatò è mà mò òŋgama. 12Nà òmà a mà kòmbɛ̀nɛ̀ hwe kpèelì hwe èŋge mbòwà, hwatò hwà mà wurzana èembe yà mòtò ema, e ma hwɛ ndi ehvòwa ya ŋmanà ya mòŋgò mòkurze mò mòlanà. Èŋge ŋgìndì ema è ma wurza ò èŋge mbòwà è mà hwɛ nà òŋgò mòlanà. 13Nà òmà Yerzù a mà ɛ̀nɛ mòŋgò mòkurze mò mòlanà, à mà mò òkeyà ììlì, rzìi a mò òhweyà nanù ema, “Ò rza eyà hvɛ!” 14Yerzù à mà arzurzuhwɛlɛ ò wòrzò rzìi a hwàkɛ lìya la eni ò iŋgi iwòŋgò ja ŋmìmbà. Hwatò hvɛ ema hwà mà ji hwanɛ̀ hwà mà tɛ̀mɛ̀. Yerzù rzìi a òhwa nanù ema, “Ìi mbèrzà, na òhwèlì ema imòwa.” 15Òŋgò ŋmanà rzìi a imòwa rzìi a wòteya lì òhwà, aŋga ndi Yerzù a à mò tìmbìrzɛ̀lɛ̀lɛ̀ nyàŋgɛ.
16Wɔ̀ hwa arzɛ hwa mà lɛ̀mbeya mòkambiya rzìi hwa eka Lohwɛ̀ nanù ema, “Mòòhwèlì wà èlìŋgɛ̀ à jò wurzelì ò ìtììtènì jà arzu,” rzìi hwa òhwa hvɛ nanù ema, “Lohwɛ̀ à ma jà ò lì rzùŋgà hwatò hwa eni.”
17Mònò ŋmɛ̀ndi mò lì hvomɛ̀nɛ̀ mamɛ Yerzù a mà gbèye mò mà hweyàhwà ò èŋge erzòòkà ya àrzɛ ya Jùdeyà na ò hwèkòmè hwe arzɛ ema hwe ma kòmbɛ̀nɛ̀.
Yòwanìrzɛ̀ è Mòlùhwìrzèlì à òmi hwà-òkòwèlì wa eni ò mà Yerzù
(Mat 11.2-19)
18Hwà-òkòwèlì hwà amà Yòwanìrzɛ̀ è Mòlùhwìrzèlì hwa mà òhweyà Yòwanìrzɛ̀ mamɛ ya arzɛ ema Yerzù a mà gbèye, aŋga ndi Yòwanìrzɛ̀ à hwɛlɛ hwà-òkòwèlì wa eni hwaahwàkɛ. 19À mà hwa òma ema hwa ɛ̀ndɛ̀ hwa ijòwè Yerzù nanù ema, “O wa ndi ò hwèlì è mɔ̀ ema Lohwɛ̀ à mà òhwe ema a òma, ŋgà ja ambɛ̀lɛ ò hvɛhvɛ e?”
20Nà òmà hwaŋga hwà-òkòwèlì hwa mà ùke lì ɛnɛ̀ Yerzù hwà mà òhwa nanù ema, “Yòwanìrzɛ̀ è Mòlùhwìrzèlì a jò òmì ò mba aŋgɔ̀ ema jò ò ijòwe nanù ema, ‘Ò wa ndi ò hwèlì è mɔ̀ ema Lohwɛ̀ à mà òhwe nanù ema à òmà, ŋgà ja ambɛ̀lɛ ò hvɛhvɛ e?’”
21Lirzàkò ema hwà mà ùke aŋga, à mà hwɛ lì wɔ̀wìrzɛ̀ rzayì-rzayì jà hwatò ema hwà mà ɔ̀kirzɛ merziyò na ì nyàmbɛ, na è wɔ̀ hwà mà òhva hwèlìŋgɛ̀ hwe wòhwe rzìi a wɔ̀wìrzɛ̀ hvɛ è wɔ̀ hwa ndima. 22Yerzù à mà tìmbìrzɛ̀lɛ̀ hwà-òkòwèlì hwa ama Yòwanìrzɛ̀ nanù ema, “È tìmbè e òhweyà Yòwanìrzɛ̀ mamɛ ema e ɛnì nà mamɛ ema e hweyi. È mò òhweyà nanù ema, hwatò ema hwà mà hwɛ ndima hwa ɛnɛ̀, è wɔ̀ hvɛ ema hwà mà hwɛ mbòkò wɔ̀ hvɛ hwa ɛ̀ndɛ, hwaŋga hwatò hvɛ ema hwà mà hwɛ̀nɛ̀ e nyàmbɛ ya mɛ̀lɔ̀ŋgɔ̀ wɔ̀ hvɛ hwà mà tànìrzɛ̀hwɛ̀. Hwàŋga hwatò hwa hwètòòtò wɔ̀ hvɛ hwa hweya, è wɔ̀ hwa ŋwelì hwa tìmbì hvɛ ò lòŋgɛ, ndèŋgànɛlɛ Ŋmɛ̀ndì mò Gbamù mò òhwàyɛ̀lɛ̀hwɛ̀yi mèlìrzà me hwatò. 23Mònàmɛ̀ na òŋgò mòtò ema a rza àyèŋgòwɛ̀ ŋmèma mò eni lì nò hvòmɛ̀nɛ̀.”
Yerzù a òhwèlì hwatò njɛnɛ Yòwanìrzɛ̀ a hwèlì
24Nà òmà mèŋge mèrzènjà mè ama Yòwanìrzɛ̀ mè mà tìmbe, Yerzù rzìi à wòteyà lì òhweyà è ŋgìndì lì hvòmɛ̀nɛ̀ Yòwanìrzɛ̀. À ma hwa ijòwa nanù ema, “È hvònda ema e ma anjiye lì ɛndɛ lì ùŋma Yòwanìrzɛ̀ ò mòrzànjɛ̀, mamɛ inyɔ e mà ɔ̀ŋgɛ̀lɛ̀ nanù ema è ma ɛnɛ e? È mà ɛnɛ ndi yàlì ema è mbɛ̀hvɛ̀nì e nyìŋgìrzɛ̀nɛ̀ e? 25Mamɛ ema inyɔ e ma ɛ̀ndɛ lì ɔ̀ŋgɔ e? Mòtò ema à mà wɔ̀tɔ̀ lìwɔtì la gbamù e? Hwatò ema hwa wɔ̀tɔ̀ iŋgi nyayi ja màwɔ̀tì, ema hwa hwi hvɛ lì a òhvɛ̀lɛ̀ la awu, hwa lìya ndi ò màndawò ma hwàkànèlì. 26È na òhweyà rzɔ mamɛ ema inyɔ e ma wurze ò lì ɛndɛ lì ɛnɛ e? Mòòhwèlì wà Èlìŋgɛ̀ ndi e ma arze lì ɛnɛ e? Ò jɔ̀kɛ̀ inyɔ e ma ɛnɛ mòtò ema a akayi Mòòhwèlì wà Èlìŋgɛ̀. 27Yòwanìrzɛ̀ ndi à hwèlì e mɔ̀ ema hwà mà hwɛ lì òhwa lìrzakò ema hwà mà tìle e mbɔrzi ema Lohwɛ̀ a òhwi nanù ema,
‘Ɔ̀ŋgɔ tɛ, na òmà mèèrzènjà me ami ò lì ɛ̀ndɛ ò wòrzò wò aŋgɔ̀
a ò rzèkeyà e njiya ya aŋgɔ̀.’
28Ò jɔ̀kɛ̀ ò rza ènje tɔ̀ mòtò tɔ̀ mɔ̀kɔ à ŋyààhwì lùùŋgà la mòlanà anù rze, ema à akayi Yòwanìrzɛ̀. Ndi tɔ̀ nanù, e mòtò ema mɔ̀ ndi à hwèlì e wa lìrzùkù ò ìtììtènì ja lìkànèyà la ama Lohwɛ̀, mɔ̀ à akayi Yòwanìrzɛ̀.”
29(È ŋgìndì ya àrzɛ, nà hwàrzàŋgèlì hwa njàŋge yà lìkànèyà ema hwa mà hwèya nanù, hwa mà emeyà ema Lohwɛ̀ à hvòmɛ̀nɛ̀yi. Wɔ̀ hvɛ ndi hwà mà hwɛ hwaŋga ema hwà mà emeyà lì lùhwìrzɛ̀ lì ama Yòwanìrzɛ̀. 30Ndi Ì Hvàlìrzàyì nà hwà-òkòlèlì hwa mbenda hwa rzi emeyà lìkàkɛ̀nɛ la ama Lohwɛ̀ èhwanja hwà mà rzɔ̀rzɔ̀ lì lùhwìrzɛ̀ lì ama Yòwanìrzɛ̀).
31Yerzù à mà hwa ijòwa hvɛ nanù ema, “Mamɛ na tànɛyi lì mɛnɛnɛ na hwanù hwatò hwa ene nyɔ̀ŋgɔ̀nì ya yawònò e? Wɔ̀ hwa hwèlì ndi nàa mamɛ e? 32È hwèlì ndi nàa jùma hwanà, ema hwa lìyayi ò èki ya èlùwà, rzìi hwa tɛɛ ò lì òhwìrzɛ̀nɛ̀ mɔ̀kɔ nà ɔ̀nɛ̀yi nanù ema,
‘Irzɔ ì ma è tòŋgeya ì hvòle ndi e rzi rza ŋgɔ̀mɔ̀.
Ì mà embeya hvɛ mèrzɔ̀kɔ̀ me kpelì ndi è rzi èye lùwa.’
33Yòwanìrzɛ̀ è Mòlùhwìrzèlì a mà jèe, a rzi hwɛ lì làa mòlelì ì hvònda ja arzɛ, nà lì nyɔ hvɛ tɔ̀ mimba. Hwa mà wòteya lì òhwa nanù ema, ‘À òhvì èlìŋgɛ̀ ya wòhwe!’ 34È Ŋmanà wà e Mòtò wà Hwènàmà, à jelì, à làa mòlelì, à nyɔ mììmba, inyɔ ema, ‘È mò ɔ̀ŋgɔ aŋga, à òndì njɔ̀ŋgu. À òndi mbòma, à hwèlì hvɛ ndi è mbunda yà hwàrzàŋgèlì hwa njàŋge ya lìkànèyà, nà hwatò hwa wòhwe.’ 35Ndi ò lìrzukù tɔ̀ ima mòtò ema à hwɛnì lìhwiyè, a òhwa nanù ema e njiya ya ama Lohwɛ̀ è hvòmɛ̀nɛ̀yi.”
È mòlanà ema wòhwe wò eni wò làkìrzɛ̀hwɛ̀yi
36Mòtò mɔ̀kɔ wà Hvàlìrzàyì à mà yòwɛ Yerzù ò ndawò yà eni, ò lì làa nà mɔ̀. Yerzù à mà ɛ̀ndɛ ò ndawò yà ama òŋgò mòtò, rzìi a lìya ò hwèleèlì. 37Mòlanà mɔ̀kɔ ema à mà ònda nà wòhwe ò èŋge mbòwà, à mà hwèye nanù ema Yerzù à lèeyà ò èŋge ndawò yà ama èŋge Hvàlìrzàyì, à mà jànà kòhwà ema è ma ònda nà lìyɔki là hvɛ̀ɛ̀hvɛ̀. 38Òŋgò mòlanà à mà nòŋgama lì kòmbɛ̀nɛ̀ matàŋga mà ama Yerzù, rzìi à èya. Rzìi mììrzɔ̀lì mà eni mà à tìtìrzɛ̀ màtàŋgà mà ama Yerzù. Òŋgò mòlanà rzìi à tìtòwànà matàŋga mà ama Yerzù nà lìhvùmbu là eni là mòhvò. Òŋgò mòlanà rzìi a mà nyɔmbɔ matàŋgà ma amà Yerzù ò lì mò ŋgba èluhwe, rzìi a wòwa lìŋgi lìyɔ̀ki la hvɛ̀ɛ̀hvɛ̀ a mò nyàlɛ è lɔ ò màtàŋgà.
39Nà òmà òŋgò mòtò wà Hvàlìrzàyì ema à ma yòwɛ Yerzù, a mà ɛ̀nɛ nanù, rzìi à òhwa ò ŋmèma mò eni nanù ema, “Ò nò mòtò à mà hwɛ tɛ mòòhwèlì wà èlìŋgɛ̀ wà jɔ̀kɛ̀, ò ma à mà hwiya njɛnɛ ò nò mòlanà ema à mò lɛ̀mbɛ a hwèlì na ɛ̀ɛ̀mɛ̀ ema a hwɛnì. O ma à ma hwiya hvɛ ama ò nò mòlanà a gbeyà wòhwe.” 40Yerzù rzìi a mò òhweyà nanù ema, “Rzìmɔ̀nì nà òhvì eyà ò lì ò òhweyà.” Rzìi èŋge Hvàlìrzàyì hvɛ a mò alàhwɛ̀ nanù ema, “Mòòkòlèlì, ò nò òhweyà.” 41Yerzù à mà mò òhweyà nanù ema, “O ma hwɛ mòtò mɔ̀kɔ à mà hwɛ lì hwalɛ hwatò wòlì. O mà hwɛ hwatò hwàhwàkɛ̀, ema hwa me èta òŋgò mòtò wòlì wa eni. Mɔ̀kɔ à mà òŋgà mènìmeta me hwèkòlì, ɔ̀nɛ̀yi mɔ̀ hvɛ hwèkòlì hweta. 42Tɔ̀ mɔ̀kɔ hwà àwu à rzi òhvè maŋga màŋgilìmànì, ò lì mò tìmbìrzɛ̀lɛ̀lɛ̀ wòlì wò eni. Òŋgò mòtò rzìi à hwa làkìrzɛ̀, rzìi a tìtòwa mayɛmɛ ma awu. O hwaŋga hwatò hwahwàkɛ, ima mɔ̀ à mò lìŋgànà lì akà e?” 43Rzìmɔ̀nì à mà tìmbirzɛlɛlɛ nanù ema, “Òŋgò ema à ma hwɛnɛ lìyɛmɛ lì ndɛnɛ̀.” Yerzù à mà mò alàhwɛ̀ nanù ema, “Ò hvòmɛ̀nɛ̀yi.”
44À mà àyèŋgòwɛ̀lɛ̀lɛ̀ òŋgò mòlanà, rzìi a òhweyà Rzìmɔ̀nì nanù ema, “Rzeke ò ɛnɛ̀ ònò mòlanà e? Nà kpèelì ò ndawò ya aŋgɔ̀, ò rza nò ŋgbèlì tɔ̀ màlìhwa ò lì rzòrza màtàŋgà ma amì. Ndi ònò mòlanà mɔ̀, a rzòrzi matàŋgà ma ami, nà mììrzɔ̀lì ma eni. À mà ɛmbirzɛnɛ hvɛ nà lìhvùmbu la eni. 45Ò rza nò arzàŋgànɛ̀lɛ̀ hvɛ tɔ̀, ndi ò nò ŋmanà mòlanà, à rzi hwɛmi ò lì nò nyàlɛ matàŋgà ma ami, lì wòteya na e jèeyà anù. 46Ò rza nò nyàlɛ̀ tɔ̀ lìyɔ̀ki ò mòòhvò mò ami, ndi mɔ̀ à nyààlɛ̀ matàŋgà ma ami nà lìyɔ̀ki la hvɛ̀ɛ̀hvɛ̀. 47O lì òhwà la jɔ̀kɛ̀, è ndìŋgɛ ema ò nò mòlanà a nò uŋmɛ̀lɛ̀, e mò jànelì lì làkìrzɛ̀nɛ̀ la wòhwe wa eni wa àrzɛ. Tɔ̀ njɛnɛ ema a lù lìlàkìrzɛ̀nɛ̀ lìrzàlì a uŋmɛ̀lɛ̀ hvɛ ndi ndìŋgɛ rzàlì.”
48Yerzù rzìi, a òhweyà òŋgò mòlanà nanù ema, “Wòhwe wò aŋgɔ̀ wò làkìrzɛ̀hwɛ̀yi.”
49Hwàŋga ema hwà mà làalɛnɛ, rzìi hwa wòteya lì àyijòwànɛ̀ mɔ̀kɔ nà ɔnɛ̀yi nanù ema, “Njɛnɛ hvɛ ònò ema a hwɛnì wònjà ò lì làkirzɛ wòhwe e?”
50Yerzù rzìi à òhweyà òŋgò mòlanà nanù ema, “Lìlòkɛ̀ lì aŋgɔ̀, lì ò òŋgirzɛyi. O ɛ̀ndɛ nà ɛ̀yɔ̀lɛ̀.”
Айни замон обунашуда:
Lukàrzɛ̀ 7: bri
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in