Génesis 7
7
Bänedyeꞌ
1Yi muꞌ Ayoꞌ jéte Noé:
—Mimꞌ yirity rụijtyity yụ́siꞌyaꞌ vej, mijam yoctyiꞌ muꞌyaꞌ meꞌtyity q̂uinꞌ in yojtyitydyemꞌ mi u. Q̂uinꞌ chat aty sisva covambaĉan chätidyeꞌtum mi. 2Jiꞌsitacseva jiꞌcoꞌshayacdyes jebacdyeꞌ chimeꞌ in, yävätidyeꞌ sonꞌ in chiyävätidyeꞌdye p̂en in. Mọꞌin na yocsiꞌ jam jiꞌcoꞌshayacdyes jebacdyeꞌ in, cäts raꞌ pärämꞌ cạcsi mi, yirity sonꞌ yiris p̂en. 3Chimeꞌdye raꞌ jiꞌsitacsim jaijtyiꞌ in, yävätidyeꞌ sonꞌ in chiyävätidyeꞌdye p̂en in. Meꞌ raꞌ mi paj qui jam säñiꞌ in, paj qui quivij shashunꞌve in jacches jebacdyeꞌ in. 4Yocsiꞌ raꞌ mạyedyeꞌ yävätidyeꞌ yụ raꞌ juteꞌ añej jaccheꞌ, vạjpedyeꞌ quiꞌtac raꞌ mạyedyeꞌ, dyutsetsenꞌ raꞌ tŝọiꞌ añej, mạij judyeyaꞌ tsedyedyeꞌ. Yụ raꞌ tasjeyacsi jịꞌmotsacsi räj úcheꞌ bäꞌyity jämꞌtacdyeꞌ yụ, muntyiꞌ in judyeyaꞌ jebacdyeꞌ in —yi jajiti Noé muꞌ Jenꞌ.
5Noé räj chiquepte p̂eyacdyeꞌ jasoꞌmitis muꞌ Ayoꞌ.
6Noé jäbän quiꞌ ciendyemꞌ yómodyeꞌ tyiti yoquiꞌdyemꞌ ayijyaꞌ mọꞌ bänedyeꞌ. 7Noé siti covambaĉan, p̂en muꞌ judyeyaꞌ ạvaꞌ muꞌ judyeyaꞌ jäp muꞌ, muꞌĉan jiꞌcajñeꞌ bänedyeꞌ in. 8-9Meꞌdye jebacdyeꞌ ayij in Noétum sitiꞌ in, jiꞌcoꞌshayacdyes in judyeyaꞌ jam jiꞌcoꞌshayacdyes in, yoyoquin jebacdyeꞌ in chimeꞌ, chimeꞌdye jaijtyiꞌ in. Cäts päräꞌ jịjcaiꞌ sitiꞌ in, sonꞌ judyeyaꞌ p̂en, jiꞌsitacsi muꞌ Noé, yoj jajitidyemꞌ Jenꞌ u.
10Anicdye meꞌ, chaꞌsheꞌ yävätidyeꞌ mạyedyeꞌ, chat tiyacchutiꞌ mọꞌ bänedyeꞌ. 11Mọꞌdye mạyedyeꞌ yiriꞌtac yävätidyeꞌ jiyiꞌ mạyedyeꞌ päräꞌyity ịvaj, meꞌ tiyacchutiꞌ mọꞌ bänedyeꞌ. Noé aty jäbän quiꞌ ciendyemꞌ yómodyeꞌ tyiti muꞌ cạveꞌ mọꞌ bänedyeꞌ. Mọꞌdye mạyedyeꞌ jacĉansiꞌmun ojñiꞌ shupquiꞌ, anic maj, judyeyaꞌ vanacyiꞌ jeꞌñes chụiꞌdyeꞌ mạyedyeꞌcheꞌ anic näräꞌ tŝọiꞌ añej. 12Maj añeiꞌ, vạjpedyeꞌ quiꞌtac mạyedyeꞌ dyutsetsenꞌ añeiꞌ, mạij judyeyaꞌ tsedyedyeꞌ, meꞌ tŝọiꞌ añej. 13Mọꞌdye mạyedyeꞌ siti muꞌ Noé covambaĉan, p̂en muꞌ judyeyaꞌ jäp muꞌ judyeyaꞌ ạvaꞌ muꞌ, Sem, judyeyaꞌ Cam judyeyaꞌ Jafet. 14Yiriꞌyaꞌ jebacdyeꞌtum siti in, yoyoquin jebacdyeꞌ in, tsemsiꞌ in judyeyaꞌ jam tsemsiꞌ in, chimeꞌ jaijtyiꞌ yoyoquin sitiꞌ in. 15Cäts päräꞌ jịjcaiꞌ ayij jụ́tyis in, Noétum sitiꞌ in, 16sonꞌ judyeyaꞌ p̂en yoj jajitidyemꞌ Jenꞌ u. Chat q̂uinꞌdyemꞌ muꞌ Ayoꞌ ĉärꞌjajibuti chụiꞌdyeꞌ covambas muꞌ.
17Vạjpedyeꞌ quiꞌtac mạyedyeꞌ yejĉoiꞌ mọmoꞌ bojviꞌ ojñiꞌ. Chijämꞌ covamba chijämꞌ dujrenꞌti ojñiꞌcheꞌ jatänenꞌti ojñiꞌ. 18Jẹjcaiꞌ mọmoꞌ majyiꞌ ojñiꞌ judyeyaꞌ qui muꞌ covamba tänenꞌti. 19Yejĉoiꞌ mọꞌ majyiꞌ ojñiꞌ chijämꞌ räj jemonyejoij därmuntyiꞌ mụcuꞌ in, 20yävätidyeꞌ metro cajñete ojñiꞌ muꞌ mochety mụcuꞌ. 21Tas säñi in jacchety muntyiꞌ in judyeyaꞌ jaijtyiꞌ in judyeyaꞌ jebacdyeꞌ in, tsemsiꞌ in judyeyaꞌ jam tsemsiꞌ in, 22räj jacches jụ́tyis in säñiꞌ in. 23Noédyety tsạꞌ chätidyeꞌtum muꞌ judyeyaꞌ covambaĉansiꞌ yocsiꞌ in, mọꞌindyety jam säñiꞌ in mọꞌin na jam covambaĉansiꞌ in tas p̂utiꞌ in, judyeyaꞌ jacchety muntyiꞌ in, judyeyaꞌ jaijtyiꞌ in judyeyaꞌ jebacdyeꞌ in, tsemsiꞌ in judyeyaꞌ jam tsemsiꞌ in, räj mọꞌin chimeꞌ säñiꞌ in. 24Yiriꞌ cien ĉanamꞌ quiꞌtac mạyedyeꞌ meꞌquiꞌ dujruꞌ buꞌyiꞌ ojñiꞌ.
Айни замон обунашуда:
Génesis 7: CAS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'