Uñedye' 6
6
Yụꞌtacsi in yävätidyeꞌ nọ́taquity in
1Aty dayi in anicjetety Jenꞌ in. Päräꞌ ñuruꞌ in, pạrej griegosĉan p̂eyacdyeꞌ p̂eyaqui in, pạrej na ĉụiꞌsiꞌĉan p̂eyaqui in. Chimeꞌdye daiꞌ mọꞌyaꞌ säntaquis vämtyiꞌ in muñemunsiꞌ in, räjĉan mạyedyeꞌ soꞌmacsi tsạꞌ buꞌyedyes mọꞌin. Muꞌin na griegosĉan p̂eyaquity in ñinacsi muꞌin in p̂eyaquity ĉụiꞌsiꞌĉan in. Yi in: Tsunĉan säntaquis vämtyiꞌ in jam jämꞌ soꞌmac in, jam jeñej yocsiꞌ in", yi in. 2Mọꞌdyes qui muꞌin yiriꞌtac päräꞌ jiyity jutactyiꞌ Jenꞌtyiꞌ muꞌ vajmuꞌyaꞌjeyacsi in muꞌin anicjetety Jenꞌ in. Jéyacsi in:
—Tsun jam tupuj farajjeꞌ voroꞌtacdyeꞌ Jenꞌsiꞌ muꞌ, jam raꞌ tsun meꞌchuiꞌ mọꞌ carijtacdyeꞌ jiꞌchetacdyeꞌ jedyeꞌ in mọꞌin säntaquis vämtyiꞌ in. 3Damꞌdye jämꞌ miꞌinĉantyiꞌ tsimꞌtacsi miꞌin muntyiꞌ in, yävätidyeꞌ rụiꞌcuꞌ in, jụꞌñity chuc miꞌin chị́yacsity dyijyedyeꞌtumtyiꞌ in judyeyaꞌ Jenꞌsiꞌtumtyiꞌ Ạꞌedyeꞌ bäꞌyity in. Aty tsimꞌtacsiyaꞌ miꞌin, tsun qui raꞌ yụꞌtacsi paj qui muꞌin ĉọjcaiꞌtyiꞌ jedyeꞌ in. 4Tsun raꞌ jẹjcaiꞌ cọdyevaꞌte Jenꞌ judyeyaꞌ voroꞌtacsi Jenꞌsiꞌ p̂eyacdyeꞌ tsun —jéyacsi in muꞌin jutactyiꞌ Jenꞌtyiꞌ muꞌ.
5Muꞌin anicjetety Jenꞌ in räj maꞌjotacsebi p̂eyacdyeꞌ muꞌin. Chat qui tsimꞌte in muꞌ Esteban, fer anicjetety Jenꞌ, judyeyaꞌ Jenꞌsiꞌtum Ạꞌedyeꞌ bäꞌyity muꞌ. Chitsimꞌtacdye yoctyiꞌ in meꞌ meꞌ in: muꞌ Felipe judyeyaꞌ muꞌ Prócoro judyeyaꞌ muꞌ Nicanor judyeyaꞌ muꞌ Timón judyeyaꞌ muꞌ Parmenas judyeyaꞌ muꞌ Nicolás. Muꞌ Nicolás Antioquíaĉantyiꞌ muꞌ, jam muꞌ judío naꞌi, uts na muꞌ meꞌchucsebi judíos jiꞌchäyitidyeꞌ muꞌin. 6Aty tsimꞌtacsiyaꞌ in, chat qui muꞌinsiꞌyaꞌ vej cạcsi in, aty jutactyiꞌyaꞌ Jenꞌtyiꞌ muꞌ. Muꞌin qui cọdyete Jenꞌ in chat qui yụꞌtaqui un in, meꞌ buꞌyi yụꞌtacsi in.
7Yejĉoiꞌ jiꞌtseꞌepte in Jenꞌsiꞌ p̂eyacdyeꞌ muꞌ, yejĉoij dayi in muꞌin anicjetety Jenꞌ in Jerusalénĉantyiꞌ in. Chimeꞌdye muꞌin in cudyitity Jenꞌcheꞌ in anic muꞌin daiꞌ jụjtyeꞌ in mọꞌ p̂eyacdyeꞌ Jenꞌsiꞌ muꞌ.
Tapjete in muꞌ Esteban
8Esteban anic Jenꞌsiꞌtumtyiꞌ nọ́tacdyeꞌ judyeyaꞌ ferdyeꞌ jịꞌcaveyacsi muntyiꞌ därsiꞌ äjyedyes. 9Pạrej muꞌyaꞌ muntyiꞌ judío in, yocsiꞌĉantyiꞌ vajmuꞌyadyeꞌ in, tịj muꞌin "C̣hoñity Úñity in", meꞌ jéyacsi muꞌĉantyiꞌ in. Meꞌdye muꞌĉantyiꞌ in penꞌdyetucsi yoctyiꞌ judío in Cireneĉantyiꞌ in judyeyaꞌ Alejandríaĉantyiꞌ in judyeyaꞌ Ciciliaĉantyiꞌ in, judyeyaꞌ Asiaĉantyiꞌ chimeꞌ in, meꞌ meꞌ ĉọshte Esteban in, chuti p̂eyacdyeꞌyaꞌ muꞌtum in. 10Mọꞌ na Jenꞌsiꞌ Ạꞌedyeꞌ muꞌ jasoꞌmiti muꞌ dyijyedyeꞌ, mọꞌdyes muꞌin jam junꞌ jiꞌpente in p̂eyacdyeꞌyaꞌ. 11Mọꞌdyes qui muꞌin yaꞌitacsi yoctyiꞌ muntyiꞌ in paj qui väñädyeꞌtum p̂eyaqui p̂eijteyaꞌ in, paj qui yi in: "Tsun uts seꞌvete Esteban p̂eijte Moisésvun judyeyaꞌ Jenꞌ chimeꞌ, aꞌc̣histum p̂eyacdyeꞌ jiꞌshupqueꞌ", yi in jiꞌmeꞌte Esteban in. 12Mọꞌyaꞌdye p̂eyacdyeꞌyaꞌ fạ́coij jiꞌtacsi muntyiꞌ in, räjtumdye tashcheꞌ buꞌyity in judyeyaꞌ muꞌin jịꞌchiyacsity yụꞌtacdyeꞌ chimeꞌ in. Mọꞌdyes qui muꞌin tapjete in muꞌ Esteban, ayoꞌyaꞌ cạte in. 13Jéyacsi muntyiꞌ in paj qui väñädyeꞌyaꞌ jiꞌmeꞌte in. Yi jéyacsi ayoꞌ in:
—Uts muntyiꞌ räjĉan aꞌc̣hisyaꞌ p̂eyacdyeꞌ p̂eijbite Jenꞌsiꞌ acaꞌ muꞌ, judyeyaꞌ yụꞌtacdyeꞌ chimeꞌ muꞌ. 14Anic tsun seꞌvete uts yi muꞌ: "Jesús Nazaretĉantyiꞌ tas ca raꞌ morocjepte ọij Jenꞌsiꞌ acaꞌ muꞌ, judyeyaꞌ ca raꞌ chimeꞌ yoc yụꞌtac räj yụꞌtacdyeꞌ tsun, yuꞌtyiyisinꞌsiꞌ Moisésvun jiquej", yi nash uts Esteban seꞌvete tsun —yi muꞌin väñäijtyiꞌ in jiꞌmeꞌte in.
15Räj ayoꞌ muꞌĉantyiꞌ in judyeyaꞌ yoctyiꞌ muntyiꞌ chimeꞌ in vaj mọꞌcheꞌ jeꞌ vej in cạvete in Esteban, pashyi vatyquej vejyaꞌ muꞌ cäts anjer vejyaꞌ jiꞌĉuti.
Айни замон обунашуда:
Uñedye' 6: CAS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'