Yohanes 3
3
Yesus bokisah agatn Nikodemus
(3:1-21)
1Ado siku' pomimpitn agama Yahudi doi' kolompok Farisi, damonyo Nikodemus. 2Watu malapm, io datakng ko Yesus. Katonyo, “Guru, koi tohu obai Duatn ninam guru inyo diutus Allah. Obai, Duatn molabuhan boko mujisat nantai. Conyiant urakng inyo mampu molabuhan lou' sama'an nantai aman co ado potulukan doi' Allah.”
3Timbas Yesus, “Porotiancam! Bobondar inyo Ku pandiran ni'in: Conyiant ado urakng inyo ulih moniant Koraja'an Allah aman io co dilahiran agi'.”
4Kato Nikodemus ko Sio, “Ubo apo siku' urakng ulih dilahiran agi' aman io udah tuho? Ubo apo io bobali' mansu' ko dalapm kandukan indainyo lalu dilahiran sokali agi'?”
5Timbas Yesus, “Porotiancam! Bobondar inyo Ku pandiran ni'in: Conyiant ado urakng inyo ulih monjadi anggota Koraja'an Allah aman io co dilahiran doi' ara'i agatn Roh Allah. 6La'apo inyo dilahiran socaro jasmani bosipat jasmani huatan la'apo inyo dilahiran doi' Roh Allah bosipat Rohani. 7Jangan kolai hiratn obai aku bopandir ko kolai, kolai gola' dilahiran agi'. 8Angin muput ko mono aja' io kohonda'i. Urakng ulih mondinga' bunyinyo, apo co dapat mongotohu'i doi' mono angin nantai datakng damo ko mono angin nantai botula'. Ubo nian jam agatn urakng inyo dilahiran doi' Roh Allah.”#3:8: Yesus momakai angin pakai' monjolasan sosuatu inyo tojadi socaro rohani. Ado boboropo kosama'an: 1) Koduonyo sosuatu inyo nyata biar pan kinyo kotiat'an. 2) Angin agatn Roh Allah nianam duo hal inyo bokuaso. 3) Urakng ulih moosoannyo biar pan co tohu agatn jolas. 4) Angin agatn Roh Allah bebas molabuhan la'apo pan inyo dikohonda'inyo.
9Nikodemus bopandir ko Sio, “Ubo apo nantai ulih tojadi?”
10Timbas Yesus, “Kolai ninam guru urakng Israel. Hibo kolai co mongotohu'inyo? 11Porotian cam! Koi bopandir mongona'i boko hal inyo koi kotohu'i. Koi momadahan mongona'i boko hal inyo udah koi tiat. Apo kaitn co honda' monorima' kosasian koi nantai. 12Kaitn co pocayo watu Aku mongajar mongona'i boko hal doi' dunia ni'in. Aman ubo nian, ubo apo kaitn pocayo aman Aku mongajar mongona'i boko hal doi' sorugo? 13Conyiant ado siku' pan inyo kalo noi' ko sorugo solaitn Ana' Monsio, inyo turutn doi' sorugo ko dunia ni'in.
14Samo sama'an komai Musa moninggian ular tombago ditihakng kayu dipadakng pasir. Samo ubo nantai jam agatn Ana' Monsio paca'an ditinggian#3:14: Yesus ditinggian di si'itn rotinyo watu Sio di kayu salib DAMO watu Sio ditinggian ko tompat inyo bokuaso di sorugo.#3:14: Joman komai, di padakng pasir Musa bulah sobuti' lompatukng samo sama'an ular. Sio monoi'an lompatukng nantai di pucu' tihakng kayu oca' urakng inyo moniantnyo kinyo dipatu' ular. 15oca' somuo urakng inyo pocayo ko Sio, sia' mondapat'an kohidupan somanah-manahnyo.
16Obai, Allah kotakng mongasihi boko urakng di dunia ni'in. Sampai, Sio udah monyorahan Ana'-Nyo inyo tunggal. Allah molabuhan nantai, oca' somuo urakng inyo pocayo ko Ana'-Nyo, sia' co bonaso di noraka, apo sia' dapat hidup somanah-manahnyo di sorugo. 17Obai, Allah moutus Ana'-Nyo ko dunia ni'in pakai' monyolamant'an boko urakng, bukainyo pakai' mohukupm boko urakng. 18Boko urakng inyo pocayo ko Sio, sia' co dihukupm. Apo boko urakng inyo co pocayo ko Sio, udah ado koputusan sia' paca'an dihukupm, obai sia' co pocayo ko damo Ana' Allah inyo tunggal. 19Hukupan nantai tojadi obai ni'in: Torakng#3:19: Kato ‘torakng’ di si'itan rotinyo Yesus nantai am inyo bondar. udah datakng ko dunia. Apo monsio lobih sonang agatn golap daripado torakng. Sia' lobih sonang agatn golap obai boko porbuatan sia' jahat. 20Somuo urakng inyo bulah kojahatan, sia' bonci'an torakng. Sia' co datakng ko torakng obai torakng bulah porbuatan sia' inyo jahat kotiat'an. 21Apo, somuo urakng inyo bulah boko hal inyo bondar, sia' datakng ko torakng. Oca' kotiat'an obai porbuatan sia' sosuai agatn la'apo inyo dikohonda'i Allah.”
Yohanes Pombaptis momadahan obai Yesus nam Rajo Inyo Dijanjian Allah
(3:22-36)
22Lopas jadi nantai, Yesus agatn boko murid-Nyo botula' ko tanah Yudea. Di santai, Sio diapm bosamo agatn sia'. Sio mombaptis boko urakng, 23apo Yohanes mombaptis boko urakng di Ainon, dampikng Salim. Io mombaptis di santai obai ado ara'i. Boko urakng datakng ko io minto dibaptis. 24(Watu nantai, Yohanes bolupm ditamoan ko dalapm ponjara.)#3:24: Yohanes Pombaptis monogur Gubernur Herodes obai Herodes bodosa. Obai nantaiam, Herodes momansu'an Yohanes ko dalapm ponjara huatan mombunuhnyo. Mat. 14:1-12, Mrk. 6:14-29, Luk. 3:19-20.
25Boko murid Yohanes botikakng agatn siku' urakng Yahudi mongona'i poraturan agama mongona'i pomborosihan. 26Jadi, sia' datakng ko Yohanes. Kato sia' ko io, “Guru, ija' ingant cadoai Urakng nantai inyo bosamo agatn duatn di soborakng Sungai Yordan, ia'an Sio inyo duatn padahan. Porotian cam. Ni'in, Sio mombaptis jam. Somuo urakng monuju ko Sio.”
27Timbas Yohanes, “Conyiant siku' urakng pan inyo ulih monguti' la'apo pan aman Allah kinyo moonju'nyo. 28Kaitn udah mondinga' aku bopandir, ‘Aku bukainyo Rajo Ponyolamant. Aku diutus mondoholu'i Sio.’ 29Pongantitn botina' ia'an umputn pongantitn lolaki. Kawal pongantitn lolaki nantai bayo bodiritn mondampiki huatan mondinga'an, huatan io sonang aman mondinga'an saro pongantitn lolaki. Sama'an nian jam agatn aku. Watu ni'in aku sonang bondar. 30Sio gola' mongkitn dipontikan, apo aku mongkitn co pontikng.
31Urakng inyo datakng doi' sorugo urakng nanam inyo bokuaso doi' la'apo pan. Urakng inyo boasal doi' dunia ninam monsio biaso, ongkah bopandir mongona'i boko hal duniaam. Yesus datakng doi' sorugo. Sionam inyo bokuaso doi' la'apo pan. 32Sio momadahan mongona'i somuo inyo Sio tiat huatan Sio dinga'. Apo, conyiant ado urakng inyo pocayo agatn pomandiran-Nyo. 33Apo, somuo urakng inyo pocayo agatn pomandiran-Nyo, sia' moaku'i obai Allah bondar. 34Obai urakng inyo diutus Allah monyampaian boko pomandiran Allah, obai Roh Allah udah dionju' ko Sio soponuhnyo. 35Allah, Bopai mongasihi Ana'-Nyo. Allah udah moonju' ko Sio kuaso dipucu' la'apo pan. 36Boko urakng inyo pocayo ko Ana' Allah, mondapat'an kohidupan somanah-manahnyo. Apo boko urakng inyo kinyo monaati Ana' Allah, co mondapat'an kohidupan nantai. Sia' ija' kona' hukupan doi' Allah.”#3:36: Porotian dalapm ayat ni'in kato ‘pocayo’ bolawatan agatn ‘co monaati’. Kito culih ‘pocayo’ bayo agatn pikiran damo pomandiran aja'am. Kito gola' monaati huatan monuruti Yesus, Rajo kito.
Айни замон обунашуда:
Yohanes 3: TBDS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in