Kisah Boko Rasul 3
3
Petrus monyamani siku' urakng inyo lumpuh
(3:1-10)
1Timpu japm tigo babahari, Petrus huatan Yohanes honda' tuyut sombayakng babahari.#3:1: Duo kali soari (japm sombilatn sunsukng huatan japm tigo babahari) boko imam momposombahan kurbatn huatan boko urakng bodoa di Rumah Allah. Watu doa inyo bukai nantai timpu matoari tonggolapm Jadi sia' duo botula' ko tongahlamanan Rumah Allah. 2Sia' duo sampai ko lawakng tembok Rumah Allah bodamo “Gerbakng Kotakng Boi'”. Watu sia' duo honda' mansu', di santai ado urakng inyo kakinyo lumpuh tangga'i io lahir. Sotiap ari io dibaba' ko pintu gerbakng nantai pakai' mominto-minto ko boko urakng inyo koluar mansu' tongahlamanan Rumah Allah.
3Pas io moniant Petrus ongko Yohanes, io mominto-minto doi' sia' jam. 4Sia' moncorona'i urakng lumpuh nantai ongko Petrus bopandir, “Tiatbo koi.”
5Jadi io borotian sia', boharap sia' paca'an moonji'inyo la'apo aja'. 6Apo Petrus bopandir, “Aku co nyiant duit omas ongko pira' pakai' monulukng kolai. Apo ado caro bukai aku ulih monulukng kolai: Agatn kuaso Yesus Kristus,#3:6: Torjomahan ni'in monerjemahan roti doi' kato ‘Kristus’ agatn ‘Rajo Inyo Dijanjian Allah’. Apo, obai somuo rasul ongko murid pocayo Yesus nantai Rajo Inyo Dijanjian Allah, co nyiant bukainyo, damo Yesus huatan golar Kristus opat monjadi sobuti' sobut'an. Jadi, torjomahan ni'in pakai ‘Yesus Kristus’ pakai' sobut'an nantai. doi' laman Nazaret, bojalatncam!”
7Ongko Petrus moncanggapm longan kanan urakng lumpuh nantai. Petrus monulukng io bodiritn. Lansukng kakinyo monjadi kuat. 8Io copat bodiritn ongko mula'i bojalatn konuang-konaing. Io tuyut Petrus huatan Yohanes mansu' ko tongahlamanan Rumah Allah kapikng bojalatn huatan morunjakng-runjakng kapikng momuji-muji Allah.
9-10Watu somuo urakng moniant io, sia' konal agatn io. Io nantai urakng inyo hala dudu' mominto-minto di Gerbakng Kotakng Boi' nantai. Hiratn bondar sia', obai tontainyo io lumpuh apo watu ni'in io uliham bojalatn kapikng momuji Allah.
Petrus bopandir ko urakng banya' mongona'i kuaso Yesus
(3:11-26)
11Urakng inyo dinyamani nantai totap tuyut Petrus ongko Yohanes obai io kotakan bosukur. Sia' ado di salah sobuti' polantaran Rumah Allah inyo bodamoan ‘Polantaran Salomo’. Jadi somuo urakng inyo topocongo huatan hiratn nantai bonggidi'an mondataki sia' di santai. 12Petrus moniant obai somuo sia' nantai hiratn. Ongko, io bopandir, “Boko somadikanku urakng Israel! Jangan kaitn hiratn obai kojadian ni'in. Jangan kaitn borotian koi duo. Jangan kaitn bopikir koi duo bisi koboi'an husus di hadapan Allah sampai urakng lumpuh ni'in nyamanam. Jangan kaitn bopikir koi duo bisi kuaso siku' pakai' monyamani urakng ni'in.
13-16Urakng inyo kaitn tiat huatan udah kaitn konal ni'in nyamanam agatn kuaso Yesus. Io nyamanam obai io huatan koi samo-samo pocayo ko kuaso Yesus. Allah udah bulah Yesus sangant tohormat. Yesus nantai Hulutn Allah, Allah inyo disombah angki-bayatn kito Abrahapm, Ishak ongko Yakub. Apo kaitn mombaba' Yesus ko gubernur Pilatus oca' Sio dihukupm mati. Pilatus nantai udah momotusan pakai' mombebasan Sio. Apo kaitn monula' Sio ongko minto oca' Pilatus mombebasan siku' urakng pombunuh#3:13-16: Pombunuh nantai Barabas. Tiat Lukas 23:18. pakai' kaitn daripado mombebasan Yesus. Sio nantai Inyo Suci huatan Inyo Bondar.#3:13-16: Ado banya' golar doi' Porjanjian Manah pakai' monyobut'an urakng inyo samo, urakng inyo paca'an diutus Allah pakai' momimpitn umant-Nyo. Di antaro bukai ado ‘Kristus/Mesias’ = Rajo Inyo Dijanjian Allah; ‘Inyo Suci’ = Urakng inyo kinyo bodosa huatan inyo molayati Allah agatn sotia; huatannyo ‘Bondar’ = Urakng inyo hala molabuhan inyo bondar huatan hala taat ko Allah. Golar ‘Inyo Bondar’ doi' Yesaya 53:11. Jadi, sobondarnyo kaitn mombunuh Sio inyo Puku' hidup.#3:13-16: ‘Puku' hidup’ ado duo makna: Yesus moonji'i hidup inyo somombondarnyo di dunia ni'in huatan hidup inyo somanah-manahnyo. Apo Allah udah bulah Sio hidup agi' doi' komatian. Koi duo udah tohu hal nantai bondar obai koi tiat agatn mato kopala' koi siku'.
17Boko somadikan! Kaitn huatan boko pomimpitn kaitn molabuhan kojahatan nantai ko Yesus. Apo aku sadar kaitn co tohu sopo Sio sobondarnyo. 18Apo agatn caro nantai, Allah monopat'i pomandiran-Nyo inyo udah disampaian ko boko nabi watu joman komai. Boko nabi nantai udah monulis obai Rajo Inyo Dijanjian Allah nantai gola' ajab sonsaro sampai mati.#3:18: Nabi Yesaya monulis mongona'i ajab sonsaro Rajo Inyo Dijanjian Allah (Yesaya 53:1-12). 19Obai nantai am, tongga'ancam kaitn bulah dosa huatan bobali' taat agatn Allah. Labuhancam nantai oca' boko dosa kaitn diamputi. 20Jadi Tuhatn paca'an moonji'i sonang-nyaman ko dalapm hati kaitn.#3:20: ‘Kosehatan rohani’ ado duo tapsiran: Yesus mongkongkanti'i watu kito moalapi ajab sonsaro huatan Yesus mongkongkanti'i kito watu Sio moonji'i kito hidup somanah-manahnyo di sorugo. Ongko pan, Allah paca'an moutus Yesus Kristus, inyo Allah udah tontuan doi' mulonyo pakai' kaitn.#3:20: Ado duo tapsiran mongona'i sombilo Allah paca'an moutus Yesus. 1) Lopas jadi sia' moninggalan dosa huatan monaati Allah, pado watu nantai jam Allah paca'an moutus Yesus ko sia'. Sia' paca'an diamputi. DAMO, 2) Di watu nononyo Allah paca'an moutus Yesus bobali' ko dunia ni'in pakai' monyolamant'an urakng inyo pocayo ko Sio, huatan mohukupm urakng inyo kinyo pocayo ko Sio. 21Apo Yesus gola' bodiapm di sorugo holu'ai. Sio paca'an datakng agi', watu Allah bulah dunia monjadi boharu. Allah udah bojanji mongona'i hal nantai. Janji-Nyo ditulis boko nabi-Nyo watu joman komai.
22Sama'an Nabi Musa inyo bopandir ko urakng Israel, bunyi ni'inan katonyo, ‘Tuhatn Allah kaitn tajahan moutus siku' urakng doi' banso kaitn. Sio monjadi Nabi inyo monyampaian pomandiran Allah ko kaitn inyo samo ubo aku jam.#3:22: Nabi nantai Yesus. Allah moutus Musa ko urakng Israel pakai' monyolamant'an sia' doi' hulutn-pacal di Mesir. Musa jam monjadi urakng inyo monyampaian pomandiran Allah ko sia' (nabi) huatan urakng inyo bodoa ko Allah pakai' sia' (imam). Jadi, Yesus samo sama'an Musa obai Sio jam monjadi Pomimpitn, Ponyolamant, Nabi huatan Imam kito. Kaitn gola' taat ko somuo hal inyo dipandiran ulih Nabi nantai. 23Aman ado urakng inyo kinyo monaati pomandiran-Nyo, urakng nantai tajahan dikoluaran doi' umant Allah ongko dibonasoan.’#3:22-23: Doi' Ulangan 18:15, 19
24Somuo nabi bukai pan udah momboritoan mongona'i boko kojadian inyo tojadi joman ni'in,#3:24: Masudnyo, boko poristiwa mongona'i Yesus (doi' kolahiran-Nyo, komatian-Nyo, Sio bobali' hidup doi' komatian, sampai Sio datakng bobali' ko dunia). tomansu' Nabi Samuel huatan somuo nabi bukai lopas jadi Samuel. 25Boko nabi nantai monyampaian janji Allah ko angki-bayatn kito. Apo somuo janji-Nyo nantai pakai' kito jam. Allah bopandir ko Abrahapm, Bopai angki-bayatn kito. Kato-Nyo, ‘Somuo banso di dunia paca'an diborokati ulih koturutan kolai.’#3:25: Doi' Kojadian 22:18; 26:24. Kato ‘koturutan’ tunggal, jadi masudnyo Yesus nantai koturutan Abrahapm nantai. Kito diborokati obai Yesus mombuka' jalatn pakai' kito disolamant'an doi' hukupan dosa. Yesus koturutan Abrahapm nantai am. 26Apo Allah moutus Yesus pakai' monjadi Hulutn-Nyo ko kito banso Yahudi tolobih doholu. Allah udah bulah Sio hidup agi' doi' komatian oca' kito diborokati. Ninam caronyo Allah momborokati kito, ia'an agatn monulukng kito oca' kito masikng-masikng botongga' bulah dosa ongko monaati Sio.”
Айни замон обунашуда:
Kisah Boko Rasul 3: TBDS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in