ወንጌል ዘማቴዎስ 7
7
ምዕራፍ 7
ዘከመ ኢይደሉ ኰንኖ ካልኣን
1 #
ሮሜ 2፥1፤ 1ቆሮ. 4፥5፤ ሉቃ. 6፥37። ኢትኰንኑ ከመ ኢትትኰነኑ። 2#ማር. 4፥24። እስመ በኵነኔ ዘኰነንክሙ ትትኴነኑ አንትሙ ወበመስፈርት ዘሰፈርክሙ ይሰፍሩ ለክሙ። 3ለምንት ትሬኢ ሐሠረ ዘውስተ ዐይነ እኁከ ወኢትሬኢ ሠርዌ ዘውስተ ዐይንከ ኢታቤይንኑ። 4ወእፎ ትብሎ ለእኁከ ኅድገኒ አውፅእ ሐሠረ እምውስተ ዐይንከ ወናሁ ሠርዌ ውስተ ዐይንከ። 5ኦ መደልው አውፅእ ቅድመ ሠርዌ እምውስተ ዐይንከ ወእምዝ ትሬኢ ለአውፅኦ ሐሠር ዘውስተ ዐይነ እኁከ። 6#ሐጌ 2፥12-16። ኢተሀቡ ቅድሳተ ለከለባት ወኢትደዩ ባሕርየክሙ ቅድመ አሕርው ከመ ኢይኪድዎ በእገሪሆሙ ወተመዪጦሙ ይነፅኁክሙ። 7#ማር. 11፥24፤ ሉቃ. 11፥9-13። ሰአሉ ወይትወሀበክሙ ኅሡ ወትረክቡ ጐድጕዱ ወይትረኀወክሙ። 8እስመ ኵሉ ዘሰአለ ይነሥእ ወዘሂ ኀሠሠ ይረክብ ወለዘሂ ጐድጐደ ይትረኀዎ። 9መኑ ውእቱ እምኔክሙ ብእሲ ዘይስእሎ ወልዱ ኅብስተ ወእብነ ይሁቦ። 10ወእመሂ ዓሣ ሰአሎ አርዌ ምድርኑ ይሁቦ።#ቦ ዘይዌስክ «ወእመሂ አንቆቅሖ ሰአሎ አቅራበኑ ይሁቦ» 11#ሉቃ. 11፥11-14፤ ያዕ. 1፥17። ወሶበ እንከ እንዘ እኩያን አንትሙ ተአምሩ ሠናየ ሀብተ ውሂበ ለውሉድክሙ እፎ ፈድፋደ አቡክሙ ዘበሰማያት ይሁብ ሠናየ ለእለ ይስእልዎ። 12#22፥40፤ ሮሜ 13፥8። ኵሎኬ ዘትፈቅዱ ይግበሩ ለክሙ ሰብእ ከማሁ ግበሩ ሎሙ አንትሙኒ እስመ ከማሁ ውእቱ ኦሪትኒ ወነቢያትኒ። 13#ሉቃ. 13፥24። ባኡ እንተ ጸባብ አንቀጽ እስመ ረሓብ አንቀጽ ወስፍሕት ፍኖት እንተ ትወስድ ውስተ ኀጕል ወብዙኃን እሙንቱ እለ ይበውኡ ውስቴታ። 14#ግብረ ሐዋ. 14፥22። ጥቀ ጸባብ አንቀጽ ወጽዕቅት ፍኖት እንተ ትወስድ ውስተ ሕይወት ወውኁዳን እሙንቱ እለ ይበውእዋ። 15#24፥4-5፤ ግብረ ሐዋ. 20፥29። ተዐቀቡኬ እምሐሳውያን ነቢያት እለ ይመጽኡ ኀቤክሙ በአልባሰ አባግዕ ወእንተ ውስጦሙሰ ተኵላት መሠጥ እሙንቱ። 16#ገላ. 5፥19-21፤ ያዕ. 3፥12። ወእምፍሬሆሙ ተአምርዎሙ ይቀሥሙሁ እምአሥዋክ አስካለ ወእምአሜከላ በለሰ። 17ከማሁኬ ኵሉ ዕፅ ሠናይ ፍሬ ሠናየ ይፈሪ ወእኩይሰ ዕፅ ፍሬ እኩየ ይፈሪ። 18ኢይክል ዕፅ ሠናይ ፍሬ እኩየ ፈርየ ወኢዕፅ እኩይ ፍሬ ሠናየ ፈርየ። 19#3፥10፤ ዮሐ. 15፥2-6። ኵሉ ዕፅ ዘኢይፈሪ ፍሬ ሠናየ ይገዝምዎ ወውስተ እሳት ይወድይዎ። 20ወእምፍሬሆሙ እንከ ተአምርዎሙ። 21#ሮሜ 2፥13፤ ያዕ. 1፥22-25። አኮ ኵሉ ዘይብለኒ እግዚኦ እግዚኦ ዘይበውእ ውስተ መንግሥተ ሰማያት ዘእንበለ ዘይገብር ፈቃዶ ለአቡየ ዘበሰማያት። 22#ሉቃ. 13፥25-27። ወብዙኃን ይብሉኒ በይእቲ ዕለት እግዚኦ እግዚኦ አኮኑ በስምከ ተነበይነ ወበስምከ አጋንንተ አውፃእነ ወበስምከ ኀይላተ ብዙኀ ገበርነ። 23#25፥41፤ 2ጢሞ. 2፥19። ወይእተ ጊዜ እብሎሙ ግሙራ ኢየአምረክሙ ረኀቁ እምኔየ ኵልክሙ እለ ትገብሩ ዐመፃ። 24#ዮሐ. 13፥17። ኵሉኬ ዘይሰምዕ ዘንተ ቃልየ ወይገብሮ ይመስል ብእሴ ጠቢበ ዘሐነጸ ቤቶ ዲበ ኰኵሕ። 25ዘንሙ ዝናማት ወውኅዙ ወኀይዝት ወነፍሑ ነፋሳት ወገፍዕዎ ለውእቱ ቤት ወኢወድቀ እስመ ዲበ ኰኵሕ ተሣረረ። 26ወኵሉ ዘይሰምዕ ዘንተ ቃልየ ወኢይገብሮ ይመስል ብእሴ አብደ ዘሐነጸ ቤቶ ዲበ ኆፃ። 27#ሕዝ. 13፥10-11። ዘንሙ ዝናማት ወውኅዙ ወኀይዝት ወነፍሑ ነፋሳት ወገፍዕዎ ለውእቱ ቤት ወወድቀ ወኮነ ድቀቱ ዐቢየ። 28#ማር. 1፥22፤ ሉቃ. 4፥32። ወሶበ ፈጸመ እግዚእ ኢየሱስ ዘንተ ነገረ ተደሙ አሕዛብ ወአንከሩ ምህሮቶ። 29#ዮሐ. 7፥46። እስመ ከመ መኰንን ይሜህሮሙ ወአኮ ከመ ጸሐፍቶሙ።
Айни замон обунашуда:
ወንጌል ዘማቴዎስ 7: ሐኪግ
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in