Luka 7
7
Yesuw a mbəl à mala meslire Əbay gà sliwdze gà Ruma duwa
Mata 8:5-13
1Yesuw a ndəv a tar aba à mifefile ŋgar ata ya tsara ka, a hitse i fataya, a da a kwite Kafarnahum. 2Ama i fata ka, Əbay gà sliwdze gà Ruma duwa a riŋ, mala meslire ŋgar ana mandərkwasla ŋgar a, ŋgwala tsa hinne, à mìtiŋa. 3Əbay gà sliwdze ata a tsaraka miɓizle Yesuw ana a riŋ i fataya ka, a slər aakaha gà bàba gà Yahuda duwa, aà ma daha, mə mbəl à mala meslire ŋgar ata.
4Aləka gà mburma ata ti ndzeha a təv Yesuw ka, tə dza ba aà mehemer hinne, ta gwaɗar: «Əbay gà sliwdze duwa na a slərra mər a, aɗaba mala meslire ŋgar duwa a riŋ ŋgwala tsa ka, dara, zlak ŋgat, mbəlar dər te, na mì dara ya. 5Aɗaba sliwdze ata ka, a waya gà gwala kwa. Dite ŋgat asa na a ge a mər ga mahàmà a Mbulum a.»
6Aləka i dəba ŋa ya, Yesuw a tsaraka kataya tsara ka, a dəɗ aka gà mburma ata, tə da nda gà ŋgat tserdze. Aka təv ana Yesuw aka à mendze a bəra wele ata ya ka, Əbay gà sliwdze ata a slərra gà masla ŋgar a təv ŋgar a, dite ta màr ahəm, ta gwaɗar ka: «Əbay gà, ka slebara za aà madàra tsikw a ma gà ya dze tsa. Iye ka, i sle biy na ki dere a a ma gà ya tsik a tsa. 7Aɗaba taŋa na iye nda ahər gà ŋa ka, hwarwa a giŋaha aà madaha a təv yak a. Ama tsikera bazlam a ilik i faka ya pəra ka, mala meslire gà aaha a mbiliŋa. 8Aɗaba iye tekeɗe, gà bàba gà ŋa a riŋ mbaŋa, dite i kwere a gà sliwdze mbaŋa asa. I sle aà megweɗe a a biy ŋgiɗ ilik: <Da a faka> ka, a diŋa. Dite i gweɗe a a biy ŋgiɗ asa: <Dara> ka, a deriŋa. Dite bəla i gweɗe a a mala meslire gà: <Giŋ naha> ka, a giŋ a mbaŋa asa.»
9Yesuw a tsaraka gà bazlam ata ka, a ge ahər kamala dukw mene aà mburma ya. A mbəɗ aba a təv gà mburma ata tə dəɗ aakaha ya, a gwaɗa a tar: «Iye ihər i gweɗe a kurum a nda ndzer, pàrsa iɗəm tsa, Yàa ŋgat a mala megìsè iye nda gəzləŋ kamala wele aaha ya ilik tsidze, ku mege i gwala gà gà Isərayel tekeɗe ya.» 10Aləka gà mburma ana tə slər tar a, ta mbəɗ gər a ga a bəra Əbay gà sliwdze gà Ruma ata. Tə daha ka, ti leha aà mala meslire Əbay ata, aka mbəl, a riŋ mandza ŋa zayzay lele kuɗa.
Yesuw a mbəl à kəla madakwa məkəs duwa
11I dəba ŋa ya, Yesuw a de a a kwite ŋa a riŋ tə zalar Nayin. Gà ɓəzla mazazama ŋgat nda gà asiŋ gà mburma ŋgiɗ hinne, ti zezemehe a ŋgat a fata. 12Aləka i təv ana ti ndze bise aka vatwa mada a huɗ kwite ata ya ka, tàa lə̀ma nda gà mburma ti zlere a məməta i kwite ata ya, ti de a dər a biye. Wele ata a mət a ka, kəla madakwa məkəs duwa ilik bata ŋa. Gà mburma hinne na tə dəɗ aka məməta ata ya. 13Ama Əbay Yesuw a ŋgataha a madakwa məkəs ata à dìɗ a aka kəla ŋgar a ka, a ndzer are tsehe hinne. A gwaɗar: «Ka tuwa tsa.» 14I dəba ŋa ya, Yesuw a sìrìkaha a təv tar, a daha, a ləm aà slə̀làh ana ti ndìwìɗ ahər məməta ata ya. Gà mburma ata ti zle a ya ka, ta hitse a fata tsara. Yesuw a gwaɗa a məməta aaha: «Iye ihər i gweɗekiŋa: Hitse, gawla.» 15Wele ata məməta ŋa ya, a hitse, a dza ba aà mifefile tsara. I dəba ŋa ya, Yesuw a vəl a mama ŋgar. 16Dukw ata Yesuw a ge ya ka, a ge magəɗa a gà mburma ata i fata tserdze ya hinne. Tə zàmbaɗa aà Mbulum. Ta gwaɗawa: «Batsah mala məma à guma Mbulum aka dara aka magər kwa ya. Dite Mbulum aka dara, aà mazlàkà gà mburma ŋgar a mbaŋa asa.» 17Aləka gà mburma ana ika ahəɗ Yuda ya, nda gà na i gà kwite ana ta mberaha ya fit, tə tsaraka dukw ata Yesuw a ge ya.
Yuhana a slər gà ɓəzla mazazama ŋgat a təv Yesuw
Mata 11:2-19
18I dəba ŋa ya, gà ɓəzla mazazama Yuhana tə daha a təv ŋgar. Tə daha, tə ɗamar dukw ana Yesuw a ge ya fit. Yuhana a tsaraka kataya ka, a zal a gà mburma sula ika magər tar a, 19dite a slər tar a təv Əbay Yesuw, aà mewize ahər ka: «Wànà kər ana, mala məmbàlà à mburma ana, mì sər ka, a riŋ a dere a ya ya, tsəna, mìi veve a biy ŋgiɗ a?» 20I dəba ŋa ya, gà mburma ata ta mah ba. Ti ndzeha a təv Yesuw tsara ka, ta gwaɗar: «Na a slərra mər a təv yak a ka, Yuhana metsìlwìɓè à mburma a yam, aà mewize aà kər: <Wànà kər ana, mala məmbàlà mburma ana, mì sər ka, ŋgat a riŋ a dere a ya ya, tsəna, mìi veve a biy ŋgiɗ a?> « 21I təv ana tə daha, ti tsiker bazlam ata ya ka, Yesuw a riŋ a mbele a à gà ɓəzla dukw məməta nda gà ɓəzla magàha a bəɗ, nda gà ɓəzla sitene hinne, a hendeke a ika are a gà ɓəzla guluf a hinne dukw ŋgar. 22I dəba ŋa ya, a gwaɗa a gà ɓəzla mazazama Yuhana ata: «Mbəɗum gər, ti tsikwim a Yuhana, na dukw ana kə̀ ŋgatumar a, ndəna kà tsarakum a. Gwaɗumar ka: Gà ɓəzla guluf tàa ŋgat are tar. Dite gà ɓəzla magàha a bəɗ ibam, ti de a lele, nda gà ɓəzla mbəlak ba tekeɗe, suwuɗ suwuɗ tàa mbala. Gà ɓəzla mandakazləm tekeɗe ibam asa, pìɗek tàa tsaraka zləm, nda gà məməta ibam asa, hùrùm tàa mbəlara i məməta ya. Gà ɓəzla matawak mbaŋa, tàa tsaraka bazlam ŋgwal ŋa ana i tsik a ya. 23Ama ki gweɗwimer a asa ka: Maŋgayaba ika gər wur ana aka məsak à megìse iye i gəzləŋ ŋgar tsiye.»
Yesuw a fàfəl aka gər Yuhana
24Aləka gà ɓəzla meslire Yuhana ata, tə da iɗəm a ka, Yesuw a dza ba aà metsìkè bazlam a gà mburma ana a riŋ i təv ŋgar a, aka gər Yuhana. A gwaɗa a tar: «Kà dum a təv ŋgar a kusak ana, kà ta fə̀rumara ana, aàla ya? Kà fə̀rum ana, aà kwizir ana himbiɗ a ɓezle a dər wàkit wàkit a ya? 25Dite kà ta fə̀rumara ana, aàla ya kəla ya? Wànà aà wele ana a dza akaba ŋgwal petek a ya? Ama gà na tə dzawa akaba ŋgwal petek a ka, gà ɓəzla limana ana hinne ya. Mendze tar ka, i ga i bəra gà Əbay asa mbaŋa. 26Dite ka ta fə̀rumara dze ana, aàla ya kəla ya? Wànà aà mala məma à guma Mbulum a ya? Iye ihər i gweɗe a kurum a nda ndzer: Wele ana, kà fə̀rum ahərra ya ka, a za mala məma à guma Mbulum fit kweleŋ. 27Aɗaba ŋgat ka, wele ana Mbulum a tsik ahər i wakita ŋgar, a gwa:
<Araha, i slirehe a mala meslire gà naha
aka miɗ yak, dite mà làmbaɗak à vatwa yak> a.*fa*
28Iye ihər i gweɗe a kurum a nda ndzer kaɗəŋ, pàrsa iɗəm tsa: Wur a a riŋ tàa wa ka, a za Yuhana ka, a riŋ tsa. Ama kəla ka, wur ana aka həna à gər a bəɗ, a ne à ba ŋgar kə̀la ŋa i *mekwere Mbulum a ka, a zè a ŋgat ana kinehe ya.
29Gà mburma tserdze, ku mege gà ɓəzla dùwan tekeɗe, tə dza zləm a bazlam Yuhana ata a tsik a tar a lele. Aɗaba tə sər dukw ana a tsik a ka, bazlam Mbulum ndzer. Dite Yuhana a tsilwiɓewa à tar a yam. 30Ama gà *Farisa nda gà ɓəzla medzeŋge məpala ahəm Mbulum, tar ka, tàa dza zləm a dukw ana a sàs a Mbulum aà mege a tar a tsa. Dite a sàs a tar Yuhana ma tsilwiɓ à tar a yam tsa asa.»
31Yesuw a gwaɗa a tar asa: «I sle a aà megeye akaba à gà mburma ana kinehe ya dze ana, nda weke? 32Ti ndzikiɗ ba ka, gà ɓəza ana ta ge a màhaw ika dàɓa ya, dite gà mìsle ŋgiɗ ti zel a a gà biy ŋgiɗ, ta gweɗe a ter a: <Maa vàt a kurum vagam, ama kurum dzìrìkke kàa gə̀rə̀vum a mər aaka tsa. Maa lah a kurum dimis məməta mbaŋa. Ama kurum kàa tuwum aaka ɓav tsa asa.> 33Aɗaba Yuhana metsìlwìɓè à mburma a yam a dara ka, a gewa ndəra, a sawa makwàsà duwa tsa asa. Ama kurum kù gwaɗum ahər ka: <Sitene i ba ŋgar, tsàkə̀kka a be a a dala.> 34Ama iye, *wur ana a dara i təv Mbulum a, i dara ka, i zəmawa ɗaf, i sawa dukw ana makwàsà ŋa ya. Kù gwaɗum aà iye asa ka: <Fə̀rum aà wele aaha ŋgat mala hitwis a. A dzele a i ŋgar ka, dukw mezime nda masà dukw ana makwàsà ŋa ɗekɗek a, a kweye a dər a kwaŋ. Taŋa ŋgat i ŋgar ka, masla gà ɓəzla dùwan, nda gà ɓəzla bakal.> 35Ama gà na tə sər Mbulum a ka, ta gis a gà dukw ata fit dze lele. Aɗaba tar ka, tə sər, metsehe ŋgar iɗəm.»
Yesuw i ga i bəra Simun gà *Farisa
36Wele duwa a riŋ, gà Farisa, zləm ŋgar Simun, a zal a Yesuw aà mazəma ɗaf a ga a ma ŋgar. Aləka Yesuw a daha ka, tə dza ba aà mazəma ɗaf nda wele ata, zləzlalaslas tə ndzaya ahər a bəɗ. 37Məkəs duwa a riŋ i kwite ata, mala bakal, meɗè zləm ŋgar ŋgwala tsa hinne. A tsaraka Yesuw ana a riŋ i ga, a zim a ɗaf i bəra gà Farisa ata ya ka, a zlaha wirdè ŋa, a ze hwaŋŋà lele, à sìkim a ba tsa, maràhà ŋa i kwalaba. 38A daha, a dza dər aà dəba a Yesuw aà gùva sik ŋgar. Ŋgat ŋa a dza ba aà tuwa. Tuwa ŋgar ata a bara dəba sik Yesuw. Məkəs ata a tàpàɗ ihər a nda ambəz ŋgar a. A gəs aaba sik Yesuw, a ndzìwìɗer ahəm, dite a dza ahər à wirdè ata kuɗa. 39Farisa ana a zal a Yesuw a, a ŋgat a məkəs ata a leme ahər a ya tsara ka, a gwa i gər ŋgar ka: «Na wele aaha ka, mala məma à guma Mbulum ndzer ka, a sir a məkəs aaha a ləm ahər a ka, mala bakal, a delewe a aba ŋgat a.» 40Ama Yesuw aka səraraha aka madzala gà gər ŋgar ata tsara. A gwaɗar: «Simun, duwa a riŋ ilik i tsikikiŋa.» Simun a gwaɗar aaka: «Haya, fàfəl, Əbay gà.» 41I dəba ŋa ya, Yesuw a gwaɗar: «Gà wur duwa a riŋ sula, gwèdèrè mburma aà tar. I malahalah ŋana ka, kur siŋgwe dərməka ə̀zləm. I masula ŋana ka, kur siŋgwe dzik ə̀zləm pəra. 42Mala siŋgwe a fə̀r aà tar ata sula ya ka, wura a riŋ ika magər tar a sle a aà mipìle siŋgwe ata tsa. I dəba ŋa ya, a məsak à tar à siŋgwe ata. Taŋa dze ana, weke na i liwiŋ gà mburma ata sula ya, a weye a mala siŋgwe aaha hinne ya?» 43Simun a gwaɗar aaka: «I dzala ka, mala gwèdèrè ana siŋgwe ihər hinne ya, na a weye a wele ata ya.» Yesuw a gwaɗar: «Kà sər kaɗəŋ ndzer.» 44I dəba bazlam ata ya ka, Yesuw a mbəɗ aba a təv məkəs ata, a gwaɗa a Simun: «Kə̀ ŋgat a məkəs aaha te tsiye? Iye ana i dara a ga a ma yak a dzə̀bak ka, kàa tìfiŋ yam aà məbàrà sik gà tsa. Ama məkəs aaha ka, aka beriŋ sik nda tuwa ŋgar, aka tàpàɗ aà iye ya nda ambəz ŋgar a asa mbaŋa. 45Kər ka, kàa gəs iye lele, kàa giŋ wusa nda mendzìwìɗèba ahəm tsa. Ama ŋgat ka, à gər ana i pə̀tsàra a ga a ma yak a ka, ŋgat a gəs aaba sik gà lele nda mendzìwìɗè ŋa hiywe pəra. 46Kàa dzaya aà iye wirdè aka gər tsa. Ama ŋgat ka, aka dzaya à wirdè aka sik gà. 47Aɗaba taŋa na iye ihər i gweɗek a nda ndzer: Məkəs aaha ka, bakal ŋgar a riŋ hinne, ama ka, aka pəl. A sər ba, aka pəl ka, aɗaba ana a waya iye hinne ya. Wur ana Mbulum aka pə̀lar à bakal hinne tsəka, a waya iye hinne tsa mbeete.»
48I dəba ŋa ya, Yesuw a gwaɗa a məkəs ata: «Bakal yak aka pəl kweleŋ.» 49Gà mburma ana tar riŋ ti zim a ɗaf tserdze ya, tə dzala i gà gər tar ka, ta gwa: «Wele aaha i ŋgar dze ana, weke, na ku mege bakal tekeɗe ka, à pìl a dər a mburma asa ya?» 50Ama Yesuw a gwaɗa a məkəs ata: «Kàa mbəl, agəra ana kàa gəs iye nda gəzləŋ ilik a. Daba nda zay.»
Айни замон обунашуда:
Luka 7: gnd
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.