Luka 14
14
Yesuw a mbəl à mala dukw məməta duwa a pat mesìfìkà ba
1-2A pat mesìfìkà ba duwa, Yesuw a da a ga a bəra Əbay gà *Farisa duwa, aà mazəma ɗaf. A daha ka, a leha aà wele duwa, kwiye ba ŋgar fit meslesle ŋa gùvgùvuvva a riŋ ika miɗ ŋgar i fata. Ama gà asiŋ gà mburma ana tar riŋ i fataya, tseŋgikkè ta ge a metsehe lele aà dukw ana Yesuw a riŋ a ge a ya. 3I fataya tsara ka, Yesuw a dza ba aà magwàɗà a gà ɓəzla medzeŋge məpala ahəm Mbulum, nda gà Farisa ana a riŋ i fataya: «Wànà məpala ahəm Mbulum dze ana, aka vəl vatwa aà məmbə̀là à mburma a pat mesìfìkà ba ya, tsəna aka vəl tsiye?» 4Ama a sàs a tar aà mifèfiler aaka tsa. I dəba ŋa ya, Yesuw a gəs wele ata ŋgwala tsiye i ahər a, a mbəl dər lele. A gwaɗar: «Daba a ma kuɗa.» 5I dəba ŋa ya asa, a gwaɗa a tar: «Weke na i liwiŋ kurum aaha, bəla kəla ŋgar a riŋ, kige tsa, sla ŋgar aka dəɗ a sùwà a pat mesìfìkà ba ka, a dehe a, a zlere a iɗəm a tsara tsiye?» 6Ama tə tsaraka taŋa ka, wura ilik a sle a aà mifèfiler aaka tsa asa.
Mandza a təv mendze ana ŋgwal ŋa tsiye
7Yesuw a fə̀r aà gà mburma ana tə zal a tar à dukw mezime ya tserdze, dite ka, meme na ti yehe a təv mendze ana ŋgwal ŋa ya. Aɗaba taŋa, a gwaɗa a gà mburma ata tserdze ya ndaka bazlam minew: 8«Na wura aka zalak à ɗaf daala ka, ka tə ndza a təv mendze ana ŋgwal ŋa lele ya tsa, na kàa daha ya. Biy tsa tàa zal a wele ana batsah yak ŋa ya mbaŋa. 9Dite wele ana a zal a mburma ya, a dehe a, a gweɗek a: <Hitse i təv mendze ŋgwal ŋa aaha ya, ka vəl a wele batsah ŋa aaha.> Ama kər, ki hitse a iɗəm a ka, nda hwarwa ŋa kuɗa. 10Kataya tsa ivaɗ, i təv ana tàa zalak, kàa daha tsara ya ka, ka ndza a təv mendze ana ŋgwal ŋa ya tsa. I dəba ŋa ya, mala ga aka daha aləka ka, a zelek a mezele, a gweɗek a: <Masla gà, dara, ndza a təv mendze aaha ŋgwal ŋa ya.> Kər gà taŋa ya, kər tekeɗe, ki ne a ŋgwal mburma ika miɗ gà mburma ata tə zal a tar à dukw mezime ya, tì zlibe a à kər a kuɗa. 11Aɗaba na wura a sasar, tə zalar batsah ŋa ka, Mbulum a ne a ŋgat kəla ŋa ivaɗ. Ama wur ana aka ne à ba ŋgar kwizikw ika miɗ mburma ya ka, Mbulum a ne a ŋgat batsah ŋa asa mbaŋa.»
Ki zel a à dukw mezime ana, a weke?
12I dəba ŋa ya, Yesuw a gwaɗa a wele ana a zal a mburma à dukw mezime ya: «Na kàa de dukw mezime i mèkwède, kige tsa i hawa ka, ka tə zal a gà masla yak, nda gà damər yak ana bise ya, nda gà gwala yak, kige tsa a gà ɓəzla hərmaga yak ana limana tar a riŋ hinne ya tsa. Aɗaba tar ka, ti ti zelek a dər aɗəm a pat ŋgiɗ mbaŋa. Kər gà taŋa ya, na kataya ka, tàa vəlak dukw mayaba yak aka ndəv. 13Ama kàa de dukw mezime a bəɗ a mburma ka, ŋgulum ki zel a dər ka, a gà ɓəzla matawak nda gà ɓəzla videl, nda gà ɓəzla magàha a bəɗ, dite nda gà ɓəzla guluf ivaɗ. 14Na kàa ge dər kataya ka, ki ta ŋgeye a ba mba. Aɗaba tar ka, ti sle aà mimèk a dər aɗəm tsa. Mbulum na a ta mèk a dər aɗəm i təv ana gà na tàa ger ŋgwal ŋa, ti ta mbilere a i məməta a mesife ya.»
Bazlam minew batsah ɗaf
Mata 22:1-10
15Ama wura a riŋ ilik ika magər gà mburma ana tə zəm akaba ɗaf tserdze ya, a tsaraka bazlam Yesuw ata tsara ka, a gwaɗar: «Wur ana a ti zim a ɗaf i *mekwere Mbulum a ka, ma ŋgaya ba.» 16Yesuw a tsaraka taŋa ka, a fàfəlar ndaka bazlam minew. A gwaɗar: «Wele duwa a de ɗaf batsah ŋa, a tsikeye a a mburma hinne. 17Aləka i təv ana tits medzibe aà mazəma ɗaf ide ya ka, a slər mala meslire ŋgar ilik aà magwàɗaha a gà mburma ana a de a tar ɗaf a ka: <Dumara, aɗaba ɗaf aka nah na kinehe ya.> 18Ama i dəba ŋa ya, tar ata tserdze ya, tə dza ba aà məmàr aba ahəm a nda məpəla à bakal. Wele ana tə lah mezeler a, a gwaɗa a mala meslire aaha: <Yàa səkəm gùvàh ga duwa ka, i ti fir ahər a dzekwiŋ, tsəka, a ge a ba tsa. Kamkam, piliŋ à bakal gà.> 19Mìsle ŋgiɗ a gwaɗar: <Gà sla gà duwa i sakama biy medile ə̀zləm ka, i de a, i ti sìsèl a tar dzekwiŋ. Kamkam, piliŋ à bakal gà.> 20Mìsle ŋgiɗ pam asa a gwaɗar: <Iye ka, Yàa zla daala kinkin, aɗaba taŋa na i sle aà medeha a tsiye.>
21Aləka, mala meslire ata a mbəɗ gər a ma, a daha, a mà à bazlam gà mburma ata a mala ga ŋgar. Mala ga a tsaraka kataya ka, a ge arəv hinne. A gwaɗa a mala meslire ŋgar ata: <Tsəma, daha, daya a təv mayahaba gər gà mburma ana aà vatwa i huɗ kwite ya. Na kàa daha ka, ka zalara a gà ɓəzla matawak a, nda gà ɓəzla videl a, nda gà ɓəzla guluf a, dite nda gà ɓəzla magàha a bəɗ a tserdze, tə dara a faha ya.> I fataya ka, wele ata a da tsara. 22A ndze riŋ zaakwa ka, a mbəɗara gər a. A dara, a gwaɗar: <Əbay gà, Yàa zal a tar tserdze, tàa gəs, ama ka, təv riŋ hiywe, mburma a sle aɗəm tsa.> 23Mala ga ata a gwaɗar asa: <Daya aà gùva vatwa ana ndàra i dala ya, nda gà vatwa ana a daya i liwiŋ gà metseke ya. Gà na kàa le aà tar i fataya tserdze, gwaɗa a tar: Tə dara te, ti niwera tsa. Dite ka, təv mendze ata, mburma ti sle aɗəm kuɗa. 24Ama iye ihər i gweɗe a kurum ŋa: Wura ilik ika magər gà mburma ata ndeɗiŋa tə zal a tar à dukw mezime ya, a ta mìndzir a ɗaf gà tsidze.> «
Dukw ana Yesuw a sasar gà ɓəzla mazazama ŋgat
ta miyak dər a
Mata 10:37-39
25Aləka i dəba ŋa ya, Yesuw a hitse i fataya, a de a aka miɗ. I təv ana a riŋ a de a ya ka, gà mburma hinne tə dəɗ aaka, tə da akaba tserdze. Yesuw a ŋgat a tar kataya ka, a mbəɗ aba a təv tar. A gwaɗa a tar: 26«Wur ana a waya madə̀ɗà aka iye ka, ma waya tsir ŋgar bə̀ba ŋa ika iye ya tsa, kige tsa məmər ŋgar, nda gà daala ŋgar, nda gà ɓəza ŋgar, nda gà damər ŋgar gà asləka ŋana, nda gà damər ŋgar gà dəm ŋana. Ku mege kwiye ba ŋgar tekeɗe ya tsa, tsəka, a sle a aà mene mala mezezeme iye tsa. 27Na wura a zle a dizl magə̀làwà ŋana, dite a zezem a dər iye, kamala ana i ti zle a dər mba ya tsəka, a sle a aà mene mala mazazama iye tsa asa mbaŋa.
28Na wura ilik ika magər kurum a, a sasar mazlazla ga ka, a ndze a a bəɗ, a kwire a siŋgwe ŋa ana a ge a dər a lele dzekwiŋ. A sir a dər ka, wànà siŋgwe ata ana, a sle a aà megemir ŋa, à ndìv a dər tsiye. 29Na aka kura siŋgwe ŋa tsa, zləməŋa à dzèhe a pəra, aləka ka, megemir ŋa à ndìv aaka a tsa. Ga ata tekeɗe ka, bàlàmtàzza kataya dze ana, mburma a ŋgeter ana, ti sewle ahər a tsiye? 30Ta gweɗe a: <Wele aaha a dza ba aà mege ga lele ka, ama a sle aà mendìve à megemir ŋa tsa dze ana, meme?> 31Kər gà taŋa ya mbaŋa, Əbay ana gà mburma ŋgar a riŋ dəbuw kurwa, a ge a gùvəl nda Əbay ŋgiɗ ana gà mburma ŋgar a riŋ dəbuw dzik səla ya. A de a ana, kataya pəra ya? A sir a dər ka, mìi sle a aà mege gùvəl nda gà mburma aaha tsəna meme, a ge a metsehe tsiye? 32Na aka sər kataya, i sle a tsəka, a slir a mburma a təv batsah Əbay ŋgiɗ aaha, gà mburma ŋgar tə za gà biy ŋgar a, i təv ana tar i gà ma mba, tàa dza ba aà gùvəl zukw tsiye. A dehe a, a wiz a ihər himmè ahəm a, aà masəra ba tsiye?» 33I dəba ŋa ya, Yesuw a ndəv à bazlam ŋgar, nda megweɗe a tar: «Kərga taŋa ya mbaŋa, wura ilik ika magər kurum a, a sle a aà mene mala mezèzèmè iye tsa, na aka miyak à gà dukw ŋgar ana tserdze ya tsiye.»
Liwir ana a və̀ɗ tsiye
Mata 5:13; Markus 9:50
34I dəba ŋa ya, a tsik a tar bazlam minew ŋgiɗ pam asa. A gwaɗa a tar: «Liwir ka, dukw ŋgwal ŋa, ama na aka və̀ɗ tsəna, ki ge a dər ana, meme, na dite à vìɗ a ya? 35A riŋ tsa. Ku mege kà ndà a gùvàh kamala dàràɓa ya tekeɗe, a ge a ŋgulum tsa. Ki nde a dər ka, dùf a dala. Dzùmar zləm lele, na gər kurum aka ge aà metsereke ya.»
Айни замон обунашуда:
Luka 14: gnd
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.