متى 6
6
صَّذَقَا
1غَارْوم اَذ تݣّم ڒْخِير زَّاث إِ يِوْذَان حمَا اَكنِّيو ࢲرن، أَتَاف وَار غَارْوم يتِيڒِي بُو لْأَجَار زِي بَابَاثْوم يدْجَان ذݣ وجنَّا. 2عْلَاحْسَاب مَانَايَا، خْمِي غَا ثْصدّْقذ إِ شَان ن يِجّن، وَار زَّايس تْبرَّاح شَا ذِي ڒْبُوْق اَمشْنَاو مَامّش تݣّن لْمُنَافِقِين ذِي ثمْزِيذَاوِين ذ زْنَاقِي بَاش اَزَّايسن سمْغَارن يِوْذَان. أَقَا تسْڒَام ڒْحَقّ: وَار غَارْسن يتِيڒِي بُو لْأَجَار. 3وَلَكِن شك خْمِي غَا ثْصدّْقذ إِ شَان ن يِجّن، ئِتْخصَّا فُوْس نّش اَࢲڒْمَاض وَار يتسّن مِين يتِيشّ فُوْس اَفُوْسِي نّش. 4حمَا صَّذَقَا نّش اَذ تْوَاݣّ س ثْنُوْفْرَا. ذ بَابَاش أَربِّـي إِݣ يࢲرّن مِين يتْوَاݣّن س ثْنُوْفْرَا اَتَاف اَذَاش يُوْش لْأَجَار.
ثْࢲَادْجِيث
5خْمِي غَا ثࢲَّادْجم، وَار تِيڒِيم شَا اَم لْمُنَافِقِين إِي تخْسن اَذ ࢲَّادْجن اَمن بدّن ذِي ثمْزِيذَاوِين ذ ثْغمُّوْرَا ن زْنَاقِي حمَا اَثن ࢲرن يِوْذَان. أَقَا تسْڒَام ڒْحَقّ: وَار غَارْسن يتِيڒِي بُو لْأَجَار. 6وَلَكِن شك خْمِي غَا ثࢲَّادْجذ، أَذف غَار وخَّام نّش قّن خَاك ثَوَّارْث، ࢲَّادْج إِ بَابَاش يدْجَان مَانِي وَار ث يتْوِيڒِي حَدّ. بَابَاش إِݣ يࢲرّن مِين يتْوَاݣّن س ثْنُوْفْرَا اَتَاف اَش يجَازَا.
7وَار تْࢲَادْجَام شَا س وَاوَاڒن وَار غَارْسن بُو ڒْمَعْنَا اَمشْنَاو مَامّش تݣّن ڒݣْنُوْس. حسّْبن مڒَا قَّارن اَوَاڒن اَطَّاس، أَتَاف أَربِّـي اَذَاسن يسْتَاجب. 8لَّا، وَار تݣّم شَا اَم نِثْنِي ڒَاحقَّاش أَربِّـي يسّن مِين ثحْذَاجم قْبڒ مَا ذَاس ت ثتَّارم. 9هَا مَامّش إِي غَا ثࢲَّادْجم:
آ بَابَاثْنغ يدْجَان ذݣ وجنَّا،
ذ اَمقّْرَان إِݣ يدْجَا يِسم نّش.
10أَذ د يَاس ڒْمُلْك نّش،
أَذ ݣّن ڒْخَاضَر نّش ذِي ثْمُوْرْث،
مَامش تݣّن ذݣ وجنَّا.
11ؤُش-اَنغ كُڒ نْهَار اَغْرُوْم إِي غَا نحْذَاج.
12غْفَر-اَنغ ڒْمُعْصِيَاث نّغ إِ نشِّين،
مَامّش نْسمّح إِ يِنِّي إِي كِذْنغ يخطَّان.
13وَار ذَانغ تݣّ شَا ذِي ڒمْحَاين،
سنْجم-اَنغ زِي شَّرّْ.
{ڒَاحقَّاش ڒْمُلْك يدْجَان نّش، ذ ثِزمَّار،
ذ لْعَظَمَا إِ شك إِ ڒبْدَا. آمِين.}
14مڒَا ثْسمّْحم إِ يِوْذَان ذݣ ؤُخطِّي نِّي إِي كِذْوم يخطَّان، أَتَاف بَابَاثْوم يدْجَان ذݣ وجنَّا ؤُڒَا ذ نتَّا اَذَاوم يغْفَر. 15مڒَا وَار ثْسمّْحم شَا إِ يِوْذَان ذݣ ؤُخطِّي نِّي إِي كِذْوم يخطَّان، أَتَاف بَابَاثْوم ؤُڒَا ذ نتَّا وَار ذَاوم يغفَّر شَا خ دّْنُوْب نْوم.
أَࢲُوْمِّي
16خْمِي غَا ثْࢲُوْمّم، وَار تݣّم شَا اَمشْنَاو مَامّش تݣّن لْمُنَافِقِين. تْخيَّاقن حمَا مَارَّا يوْذَان اَثن سّْنن بلِّي ࢲُوْمّن. أَقَا تسْڒَام ڒْحَقّ: أَتَاف وَار غَارْسن يتِيڒِي بُو لْأَجَار. 17وَلَكِن شك خْمِي غَا ثْࢲُوْمّذ، سِيْرذ اَغمْبُوْب نّش مْشض اَشوَّاف نّش، 18حمَا يوْذَان وَار تسّْنن شَا قَا شك ثْࢲُوْمّذ. وَلَكِن سِيذِي أَربِّـي يدْجَان مَانِي وَار ث يتْوِيڒِي حَدّ، نتَّا إِݣ يسّْنن. أُو سِيذِي أَربِّـي إِݣ يࢲرّن مِين يتْوَاݣّن س ثْنُوْفْرَا اَتَاف اَش يجَازَا.
وَار كسِّيم شَا اَمْنُوْس
19وَار سْنُوْفُّوْرث شَا ڒْكنْز نْوم ذِي دُّنشْت-أَ مَانِي يَرشَّا تتّنْت-ث ثْكشَّاوِين ذ مَانِي دْجَان يشفَّارن شَّاثن نْقَابث#6.19 شَّاثن نْقَابث، يعْنِي سْنُوْقُّوْبن ڒْحِيض حمَا اَذ اَذْفن اَڒ ذَاخڒ إِ ثدَّارْث. تَاشَارن-ث. 20وَلَكِن سْنُوْفَّرث ڒْكنْز نْوم ذݣ وجنَّا مَانِي وَار يَرشِّي شَا وَار ث تتّنْت شَا ثْكشَّاوِين ذ مَانِي وَار دْجِين شَا يشفَّارن شَّاثن نْقَابث تَاشَارن-ث. 21أَقَا مَانِي يدْجَا ڒْكنْز نّش، ذِنِّي إِي غَا يِيڒِي وُوْڒ نّش.
22ثِيطَّاوِين اَم ثْفَاوْث إِ ثُوْذَارْث نّش. مڒَا غَارك ثِيطَّاوِين صحَّانْت، أَتَاف اَغَارك ثِيڒِي ثْفَاوْث مَارَّا ذِي ثُوْذَارْث نّش. 23وَلَكِن مڒَا ثِيطَّاوِين نّش وَار دْجِينْت شَا مْلِيح، أَتَاف مَارَّا ثُوْذَارْث نّش اَذَايس ثِيڒِي ثَادْجسْت. مڒَا ثْفَاوْث إِي ذَايش ثذْوڒ ذ ثَادْجسْت، شْحَاڒ ذ ثُوْبَّارشنْت إِي تِيڒِي ذ ثَادْجسْت نِّي إِي ذَايش.
24وَار يزمَّر شَان يِجّن اَذ يِيڒِي ذ اَخدَّام غَار ثْنَاين ن سِيَاذِيس. مَايمِّي؟ إِمَا يجّن اَث يعِيفّ، ئِجّن اَث يخس. نِغ يجّن اَذَايس يطّف، ئِجّن اَث يحݣَّر. أَذ تْخذْمم إِ أَربِّـي نِغ اَذ تْخذْمم إِ ڒوْسخ ن دُّنشْت-أَ، وَار يدْجِي بُو س ثْنَاين.
25خ مَانَايَا اَذَاوم ينِيغ: وَار كسِّيم شَا س ومْنُوْس إِ ثُوْذَارْث نْوم عْلَاحْسَاب مِين غَا ثشّم نِغ ذ مِين غَا ثسْوم نِغ ذ اَرُّوْض إِي غَا ثحْذَاجم إِ دَّات نْوم. مِينْزِي ثُوْذَارْث-أَ تْسݣّْوَا كْتَار زِي مَشَّا. دَّات-أَ تْسݣّْوَا كْتَار زݣ وَارُّوْض. 26خْزَرث مْلِيح غَار يِجْضَاض وجنَّا. وَار زرّْعن، وَار مجَّارن، وَار خزّْنن ذِي ثسْڒَافِين. وَلَكِن بَابَاثْوم إِي يدْجَان ذݣ وجنَّا إِي ذَاسن يتِّيشّن اَذ شّن. كنِّيو، مَا وَار تْسݣّْوِيم شَا اَطَّاس س وَاطَّاس خ يِجْضَاض؟ 27أُوْݣ يزمَّرن زَّايْوم اَذ يَرْنِي س ومْنُوْس نّس غِير ثْسَعَّات وَاهَا ذِي ڒْعُمُوْر نّس؟
28مَايمِّي ثْكسِّيم اَمْنُوْس إِ وَارُّوْض؟ خْزَرث ذِي نْوَار ن ڒخْڒَا مَامّش يݣَّا، وَار يَربّڒ وَار يتْخيِّيض. 29قَّارغ-اَوم نش: ؤُڒَا ذ اَزدْجِيذ سُلِيمَان مشْحَاڒ غَارس ذ اَݣْڒَا وَار يزمَّر شَا اَذ يَرض شَا ن وَارُّوْض يݣَّا اَم نْوَار-أَ وَانِيتَا. 30مڒَا أَربِّـي يتِيشّ اَرُّوْض زَعْمَا إِ اَرْبِيع ن ڒخْڒَا إِݣ يدْجَان نْهَارَا اَذ يحَرق ثِيوشَّا ذݣ وفَرَّان، مَا وَار يتݣّ اَكِذْوم كنِّيو كْتَار؟ ذَايْوم لْإِيمَان نْوم ذ ؤُقْلِيل. 31وَار كسِّيث بُو س ومْنُوْس اَذ تِينِيم، مِين غَا نشّ؟ نِغ ذ مِين غَا نْسو؟ نِغ ذ مِين غَا نَرض ذ اَرُّوْض؟ 32مَارَّا مَانَايَا رزُّوْن-ث ڒݣْنُوْس. أَقَا بَابَاثْوم يدْجَان ذݣ وجنَّا يسّن بلِّي تحْذَاجِيم ثِمسْڒَايِين-أَ. 33رزُّوْث ذ اَمزْوَارُو خ ڒْمُلْك ن أَربِّـي ذ ثُوْذَارْث إِݣ يدْجَان نِيشَان، سّنِّي ثِمسْڒَايِين-أَ مَارَّا اَذَاوم مَارْنِينْت. 34وَار كسِّيث بُو س ومْنُوْس إِ مِين غَا يوقْعن ثِيوشَّا، أَقَا ثِيوشَّا اَذ ييْسِي نِّيث س ومْنُوْس إِ يِيخف نّس. ڒْهمّْ إِي د يمظهَّارن نْهَار نِّي اَذ يكْفَا نْهَار نِّي.
Айни замон обунашуда:
متى 6: ريف
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in