லூக்கா 9
9
யேசு அன்னெரடு சீஷருகோளுன கெளுசுவுது
1ஒந்து தினா யேசு அவுரோட அன்னெரடு சீஷருகோளுனவு கூங்கி, எல்லா பேய்கோளுன ஓடுசுவுக்குவு, சீக்கு பந்து இருவோருன சென்னங்க மாடுவுக்குவு அவுருகோளியெ பெலாவு அதிகாராவு கொட்டு, 2தேவரோட ஆட்சின பத்தி ஜனகோளியெ ஏளிகொடுவுக்குவு, சீக்கு பந்துயிருவோருன சென்னங்க மாடுவுக்குவு அவுருகோளுன கெளுசிரு. 3ஆக யேசு அவுருகோளொத்ர, “நீமு பயணவாயி ஓவாங்க நெடைவுக்கு ஒதவி மாடுவுது குச்சினவோ இல்லாந்துர பையினவோ இல்லாந்துர கூளுனவோ இல்லாந்துர அணானவோ எத்திகோண்டு ஓகுபேடரி. ஆக்குவுக்கு எரடு நீட்டவாத ஜிப்பாவுனவோ எத்திகோண்டு ஓகுபேடரி. 4நீமு ஏ மனெயொழக ஓவுரியோ அல்லியே தங்கி இருரி. நீமு ஆ ஊருனபுட்டு ஓவுது வரெக்குவு ஆ மனெலயே தங்கி இருரி. 5ஏ ஊருகோளுல நிம்முன ஜனகோளு வரவேற்சுலாங்க இத்துரோ ஆ ஊருகோளுன புட்டுகோட்டு நீமு பொறபடுவாங்க நிம்மு காலுகோளுல இருவுது தூசின அல்லியே ஒதறிகோட்டு ஓகுரி” அந்தேளிரு. 6அப்பறா ஆ சீஷருகோளு பொறபட்டு ஒவ்வொந்து ஊருகோளியெ ஓயி தேவரோட ஒள்ளிமாத்துன ஏளிகொட்டு சீக்கு பந்தோருனவு சென்னங்க மாடிரு.
ஏரோதோட கொழப்பா
(மத்தேயு 14:1–12; மாற்கு 6:14–29)
7ஆக தேசதோட கால்வாசி பாகக்கு ராஜாவாத ஏரோது யேசு மாடித காரியகோளுன பத்தி கேள்விபட்டா. கொஞ்ச ஆளுகோளு யோவானு சத்தோதோருல இத்து திருசி உசுரோட எத்துரிதா அந்து ஏளிகோண்டு இத்துரு. 8கொஞ்ச ஆளுகோளு தேவரொத்ர இத்து பருவுது மாத்துன ஏளுவோனாத எலியா திருசி பந்து இத்தான அந்து ஏளிகோண்டு இத்துரு. பேற கொஞ்ச ஆளுகோளு, முந்தால காலதுல இத்த தேவரொத்ர இத்து பருவுது மாத்துன ஏளுவோருல ஒந்தொப்பா திருசி உசுரோட பந்துபுட்டா அந்துவு ஏளிகோண்டு இத்துரு. அதுனால ஏரோது கலக்கவாயி, 9“நானு யோவானோட தலென பெட்டி சாய்கொலுசிதே. ஆதர ஈ காரியகோளுன மாடுத்தான அந்து நானு கேள்விபடுவுது இவ யாரு?” அந்து ஏளி அவ யேசுன நோடுவுக்கு விரும்பிதா.
10கிறிஸ்துவோட விசேஷவாத தூதாளுகோளாத சீஷருகோளு திருசி பந்து அவுருகோளு மாடித எல்லாத்துனவு யேசுவொத்ர வெவரவாங்க ஏளிரு. அப்பறா அவுரு அவுருகோளுன கூங்கிகோண்டு தனியாங்க இருவுக்காக பெத்சாயிதா பட்டணக்கு ஒத்ர இருவுது வனாந்தரவாத ஒந்து எடக்கு ஓதுரு. 11ஜனகோளு அதுன தெளுகோண்டு, அவுரியெ இந்தால ஓதுரு. யேசு இத்த எடக்கு அவுருகோளு பருவாங்க அவுரு அவுருகோளுன வரவேற்சி, அவுருகோளியெ தேவரோட ஆட்சின பத்தி ஏளிகொட்டுரு. சீக்கு பந்து சென்னங்காபேக்கு அந்து இத்தோருன சென்னங்க மாடிரு.
யேசு ஐதாயிரா ஆளுகோளியெ கூளு கொடுவுது
(மத்தேயு 14:13–21; மாற்கு 6:30–44; யோவானு 6:1–15)
12ஒத்துபுளா ஒத்தாவாங்க, கிறிஸ்துவோட அன்னெரடு விசேஷவாத தூதாளுகோளுவு யேசுவொத்ர பந்து, “நாமு இருவுது ஈ எடா வனாந்தரவாத எடவாங்க இத்தாத. அதுனால ஜனகோளு ஒத்ர இருவுது ஊருகோளியெவு, மத்த எடகோளியெவு ஓயி, கூளுன ஈசிகோம்புக்குவு, அவுருகோளு தங்குவுக்கு எடான தேடுவுக்குவு ஈ ஜனகோளுன கெளுசிபுடுரி” அந்தேளிரு. 13ஆதர யேசு அவுருகோளொத்ர, “இல்லா, நீமே அவுருகோளு உண்ணுவுக்கு ஏதாசி கொடுரி.” அந்தேளிரு. அதுக்கு அவுருகோளு, “நம்மொத்ர ஐது ரொட்டிகோளுவு, எரடு மீனுகோளு மட்டுத்தா இத்தாத. ஈ ஜனகோளு எல்லாரியெவு கூளு கொடுபேக்கு அந்துரெ, நாமு ஓயி, கூளுன ஈசிகோண்டு பருபேக்கே?” அந்து பதுலு ஏளிரு. 14அல்லி சுமாரு ஐதாயிரா கண்டாளுகோளு இத்துரு. அவுருகோளுன ஐவத்து ஐவத்து ஆளுகோளாங்க குத்துயிருவுக்கு ஏள்ரி அந்து அவுரோட சீஷருகோளொத்ர ஏளிரு. 15சீஷருகோளு ஆங்கேயே ஜனகோளு எல்லாருனவு குத்துயிருவுக்கு மாடிரு. 16ஆக யேசு ஆ ஐது ரொட்டிகோளுனவு, எரடு மீனுகோளுனவு எத்தி, பானான அண்ணாந்து நோடி, அதுகோளியாக தேவரியெ நன்றி ஏளிரு. அப்பறா அதுகோளுன பிச்சி, ஜனகோளியெ கொடுவுக்கு சீஷருகோளொத்ர கொட்டுரு. 17ஜனகோளு எல்லாருவு உண்டு திருப்தியாங்காதுரு. அப்பறா சீஷருகோளு மிச்சவாங்க இத்துதுன அன்னெரடு கூடெகோளு தும்புசி எத்திரு.
பேதுரு யேசுன கிறிஸ்து அந்து ஏளுவுது
(மத்தேயு 16:13–20; மாற்கு 8:27–30)
18ஒந்து தினா யேசு அவுரோட சீஷருகோளுகூட தனியாங்க இத்து தேவரொத்ர வேண்டிகோண்டு இத்துரு. ஆக சீஷருகோளொத்ர, “ஜனகோளு நன்னுன யாரு அந்து ஏளுத்தார?” அந்து கேளிரு. 19அதுக்கு அவுருகோளு, “கொஞ்ச ஆளுகோளு நீமு யோவானு ஸ்நானனு அந்து ஏளுத்தார. கொஞ்ச ஆளுகோளு எலியா அந்துவு, பேற கொஞ்ச ஆளுகோளு முந்தால காலதுல இத்த தேவரொத்ர இத்து பருவுது மாத்துன ஏளுவோருல ஒந்தொப்புரு திருசி உசுரோட பந்து இத்தார அந்துவு ஏளுத்தார” அந்து ஏளிரு. 20ஆக யேசு அவுருகோளொத்ர, “நீமு நன்னுன யாரு அந்து ஏளுத்தாரி?” அந்து கேளிரு. அதுக்கு பேதுரு, “தேவரொத்ர இத்து பந்துயிருவுது கிறிஸ்து நீமுத்தா” அந்து பதுலு ஏளிதா. 21ஆக யேசு அதுன பேற ஒந்தொப்புரொத்ரவு ஏளுபேடா அந்து தும்ப கண்டிப்பாங்க கட்டளெ கொட்டுரு.
யேசு அவுரோட சாவுன பத்தி முந்தாலயே ஏளுவுது
(மத்தேயு 16:21–28; மாற்கு 8:31–38)
22அப்பறா அவுரு, “சொர்கதுல இத்து மனுஷனாங்க பந்தவரு தும்ப கஷ்டகோளுன அனுபவுசுபேக்கு. தொட்டோருவு, தொட்டு பூஜேரிகோளுவு, யூதமத சட்டான ஏளிகொடுவோருவு அவுருன ஏத்துகோலாங்க சாய்கொலுசுபேக்கு. அதுக்கு இந்தால மூறாவுது தினதுல அவுரு திருசி உசுரோட எத்துருபேக்கு” அந்தேளிரு.
23அப்பறா யேசு அவுருகோளு எல்லாரொத்ரவு, “ஒந்தொப்பா நன்னு சீஷனாங்க ஆவுக்கு விரும்பிரெ, அவ அவுனோட விருப்பகோளுன வெறுத்துகோட்டு, தினாவு அவுனோட சிலுவென எத்திகோண்டு#9:23 ஆ காலதுல ரோமரு சிலுவெல படுது சாய்கொலுசுவுது தண்டனென கொடுவுக்காக ஒந்தொப்புன்ன கொண்டுகோண்டு ஓவாங்க அவுனோட சிலுவென அவுனே எத்திகோண்டு ஓவுக்கு மாடி அவுன்ன கஷ்டபடுசுவுரு. நன்னு இந்தால பருபேக்கு. 24அவுனோட உசுருன காப்பாத்திகோம்புக்கு விரும்புவோனு அதுன எழந்தோவா. ஆதர நனியாக அவுனோட உசுருன எழந்தோவோனு அதுன காப்பாத்திகோம்பா 25ஒந்து மனுஷா ஈ ஒலகா முழுசுனவு சொந்தவாங்க மாடிகோண்டுரிவு, அவ அவுன்னவே கெடுசி நஷ்டபடுசிகோண்டுரெ அவுனியெ ஏனு லாபா? 26நன்னுன பத்திவு, நன்னு மாத்துன பத்திவு ஏளுவுக்கு எவ வெக்கபடுத்தானையோ அவுன்ன பத்தி சொர்கதுல இத்து மனுஷனாங்க பந்தவரு அவுரோட பிரகாசவாத பெளுசதோடைவு, அப்பாவாத தேவரோட பிரகாசவாத பெளுசதோடைவு, தேவரோட தூதாளுகோளோட பிரகாசவாத பெளுசதோடைவு பருவாங்க வெக்கபடுவுரு. 27ஈக இல்லி நிந்துகோண்டு இருவோருல கொஞ்ச ஆளுகோளு தேவரோட ஆட்சின நோடுவுக்கு முந்தால சாய்னார்ரு அந்து நெஜவாங்கவே நிமியெ ஏளுத்தினி” அந்தேளிரு.
யேசு பேற உருவவாங்க மாறுவுது
(மத்தேயு 17:1–13; மாற்கு 9:2–13)
28யேசு ஈ காரியகோளுன ஏளி சுமாரு எட்டு தினக்கு இந்தால, அவுரு பேதுருனவு, யோவான்னவு, யாக்கோபுனவு கூங்கிகோண்டு தேவரொத்ர வேண்டுவுக்காக ஒந்து பெட்டது மேல ஏறி ஓதுரு. 29அவுரு தேவரொத்ர வேண்டிகோண்டு இருவாங்க, அவுரோட மொக்கா பேற மாதர மாறிகோத்து. அவுரோட துணி புளிதாங்காயி பிரகாசவாங்க இத்துத்து. 30திடீரெந்து அல்லி மோசே, எலியா அம்புது எரடு ஆளுகோளுவு பிரகாசவாத பெளுசதோட காட்சி கொட்டு அவுருகூட மாத்தாடிரு. 31அவுருகோளு யேசு எருசலேமுல சாய்வாங்க, தேவரு முடுவுமாடி இத்துதுன ஏங்கே நெறெவேறுசுவுரு அம்புதுன பத்தி யேசுகூட மாத்தாடிகோண்டு இத்துரு. 32பேதுருவு, அவுனுகூட இத்த மத்த சீஷருகோளுவு நித்தெ மயக்கவாங்க இத்துரு. அவுருகோளு கண்ணு முழுச்சு யேசுவோட பிரகாசவாத பெளுசானவு, அவுருகூட நிந்துகோண்டு இத்த ஆ எரடு ஆளுகோளுனவு நோடிரு. 33மோசேவு, எலியாவு யேசுனபுட்டு பொறபட்டு ஓவாங்க, பேதுரு யேசுவொத்ர, “ஐயா, நாமு இல்லி இருவுது ஒள்ளிது. அதுனால நிமியெ ஒந்து கூடாரவு, மோசேவியெ ஒந்து கூடாரவு, எலியாவியெ ஒந்து கூடாரவாங்க மூறு கூடாரகோளுன ஆக்குவாரி” அந்தேளிதா. ஆதர, அவ ஏனு ஏளுத்தான அந்து அவுனியெ தெளிலாங்க ஏளிதா. 34ஈங்கே அவ ஏளிகோண்டு இருவாங்கவே ஒந்து மேகா பந்து அவுருகோளுன முச்சிகோத்து. அவுருகோளுன முச்சித ஆ மேகதொழக ஓவாங்க சீஷருகோளு அஞ்சிகோண்டுரு. 35ஆக, “இவுரு நன்னு மகா. இவுரு ஏளுவுதுன கேள்ரி” அந்து மேகதுல இத்து ஒந்து சத்து கேளித்து. 36ஆ சத்து பருவாங்க யேசு ஒந்தொப்புரு மட்டுத்தா அல்லி இருவுதுன அவுருகோளு நோடிரு. அவுருகோளு நோடிதுன பத்தி ஆ தினகோளுல ஒந்தொப்புரொத்ரவு ஏளுலாங்க அமெதியாங்க இத்துரு.
பேய்யிடுத ஒந்து ஐதன்ன யேசு சென்னங்க மாடுவுது
(மத்தேயு 17:14–21; மாற்கு 9:14–29)
37அடுத்த தினா அவுருகோளு பெட்டதுல இத்து எறங்கி பருவாங்க, தும்ப ஜனகோளு யேசுவியெ எதுருல பந்து அவுருன நோடிரு. 38ஆ ஜனகூட்டதுல இத்த ஒந்தொப்பா தொட்டு சத்தவாங்க, “ஏளிகொடுவோரே, நன்னு மகனு மேல எரக்கா தோர்சுரி அந்து நிம்முன கெஞ்சிகேளுத்தினி. இவ நனியெ ஒந்தே மகா. 39தும்ப தடவெ ஒந்து பேய்யி அவுன்ன இடித்தாத. ஆக திடீரெந்து அவுன்ன தும்ப சத்தவாக்குவுக்கு மாடுத்தாத. ஆ பேய்யி அவுன்ன தும்ப பயங்கரவாங்க குலுக்கி, அவுனோட பாயில நொரெ தள்ளுவுக்கு மாடுத்தாத. அவ முழுசாங்க சோந்தோவுக்கு மாடிவு அவுன்னபுட்டு ஓவுக்கு அது கஷ்டபடுத்தாத. 40ஆ பேய்யின ஓடுசுவுக்கு, நிம்மு சீஷருகோளொத்ர கெஞ்சி கேளிதே. ஆதர அவுருகோளுனால அதுன ஓடுசுவுக்கு முடுஞ்சுலா” அந்தேளிதா. 41“நம்பிக்கெயே இருனார்த பிடிவாதவாங்க இருவுது தலெகட்டே, எது வரெக்குவு நானு பொறுமெயாங்க இத்து நிம்முகூடவே இருவே? நின்னு மகன்ன இல்லி கொண்டுகோண்டு பா” அந்து யேசு பதுலு ஏளிரு. 42அவுருகோளு ஆ ஐதன்ன யேசுவொத்ர கொண்டுபருவாங்கவே, பேய்யி ஆ ஐதன்ன கெழக தள்ளி அவுனியெ வலிப்பு பருவுக்கு மாடித்து. ஆதர யேசு ஆ பேய்யின பெதர்சி ஆ ஐதன்ன சென்னங்க மாடி அவுனோட அப்பனொத்ர அவுன்ன ஒப்படெசிரு. 43தேவரோட தும்ப தொட்டு பெலான பத்தி அல்லி இத்த ஜனகோளு எல்லாருவு தும்ப ஆச்சரியபட்டுரு.
யேசு திருசிவு அவுரோட சாவுன பத்தி முந்தாலயே ஏளுவுது
(மத்தேயு 17:22–23; மாற்கு 9:30–32)
யேசு மாடித எல்லாத்துனவு பத்தி ஜனகோளு எல்லாருவு ஆச்சரியபடுவாங்க, யேசு அவுரோட சீஷருகோளொத்ர, 44“நானு நிமியெ ஏளுவுது மாத்துன கவனவாங்க கேள்ரி. சொர்கதுல இத்து மனுஷனாங்க பந்தவருன ஜனகோளொத்ர ஒப்புகொடுவுக்கு ஓகுத்தார” அந்தேளிரு. 45ஆதர அவுரு ஏளிதோட அர்த்தான அவுருகோளு புருஞ்சுகோலா. அவுருகோளு அதுன புருஞ்சுலாங்க இருவுக்கு தேவரு மாடிரு. அவுரு ஏளிதுன பத்தி அவுரொத்ர கேளுவுக்குவு அவுருகோளு அஞ்சிரு.
தேவரியெ தும்ப முக்கியவாதோனு யாரு?
(மத்தேயு 18:1–5; மாற்கு 9:33–37)
46அப்பறா யேசுவோட சீஷருகோளுல யாரு தொட்டோனாங்க இருவா அந்து அவுருகோளொழக பாய்ஜகள பந்துத்து. 47ஆதர யேசு அவுருகோளு மனசுல ஏனு நெனசுத்தார அந்து தெளுகோண்டு, ஒந்து மொகுன தூக்கி அதுன அவுரொத்ர நிலுசிரு. 48யேசு அவுருகோளொத்ர, “நனியாக யாரு ஈ மொகுன ஏத்துகோத்தானையோ அவ நன்னுன ஏத்துகோத்தான. நன்னுன ஏத்துகோம்போனு நன்னுன கெளுசிதவருனவு ஏத்துகோத்தான. நிம்முல யாரு முக்கியா இல்லாதோனாங்க இத்தானையோ அவத்தா முக்கியவாதோனாங்க இருவா” அந்தேளிரு.
நமியெ எதுராளியாங்க இருனார்தோனு நம்மு பக்கா இத்தான
(மாற்கு 9:38–40)
49ஆக யோவானு யேசுவொத்ர, “ஐயா, ஒந்தொப்பா நீமு அவுனியெ அதிகாரா கொட்டுதாங்க ஏளிகோண்டு ஜனகோளொத்ர இத்து பேய்கோளுன ஓடுசிகோண்டு இத்துதுன நோடிரி. அவ நம்முன சேந்தோனாங்க இருனார்துனால அவ அதுன மாடுகூடாது அந்து அவுன்ன தடுத்துபுட்டுரி” அந்தேளிதா. 50ஆதர யேசு அவுனொத்ர, “ஆங்கே தடுத்துபேடரி. ஏக்கந்துர நமியெ எதுராளியாங்க இருனார்தோரு நம்மு பக்கா இத்தார” அந்தேளிரு.
ஒந்து ஊருல இருவோரு யேசுன ஏத்துகோம்புக்கு மறுத்துபுடுவுது
51யேசுன தேவரு திருசி சொர்கக்கு எத்திகோம்புது ஒத்து நெருங்கிகோண்டு இத்துதுனால யேசு கண்டிப்பாங்க எருசலேமியெ ஓவுக்கு முடுவுமாடிரு. 52அவுரு அல்லி ஓவுக்கு முந்தாலயே கொஞ்ச தூதாளுகோளுன கெளுசிரு. அவுருகோளு ஓயி அவுரியாக ஒந்து எடான தயாருமாடுவுக்காக அவுருகோளு சமாரியா ஜில்லாவுல இருவுது ஒந்து ஊரொழக ஓதுரு. 53யேசு எருசலேமியெ ஓவுதுனால ஆ ஊருல இத்த ஜனகோளு அவுருன ஏத்துகோலா.#9:53 எருசலேமுலத்தா தேவருன கும்புடுபேக்கு அந்து யூதருகோளு கண்டிப்பாங்க ஏளுத்தார. இது சமாரியருகோளியெ விருப்பவில்லா. அதுனால அவுருகோளு யேசு எருசலேமியெ ஓவுக்கு முடுவுமாடி பருவாங்க, அவுருன அவுருகோளோட ஊரு வழியாங்க பருவுக்கு புடுலா. 54அவுரோட சீஷருகோளாத யாக்கோபுவு, யோவானுவு அதுன நோடுவாங்க, அவுரொத்ர, “ஆண்டவரே, எலியா#9:54 கிரேக்கு மாத்துல இருவுது கையில எழுதித கொஞ்ச பிரதிகோளுல எலியா மாடிது மாதர அம்புதுன எழுதுலா. மாடிது மாதர, பானதுல இத்து கிச்சுன எறங்குசி ஈ ஜனகோளுன அழுசுவுக்கு நாமு கட்டளெ கொடுவுக்கு நீமு விரும்புத்தாரியா?” அந்து கேளிரு. 55ஆதர யேசு அவுருகோளுன திருகி நோடி, “நீமு ஏ ஆவி இருவோரு அந்து நிமியெ தெளிலா” அந்து அவுருகோளுன பெதர்சி,#9:55 கிரேக்கு மாத்துல இருவுது கையில எழுதித கொஞ்ச பிரதிகோளுல யேசு திருகி நோடி, “நீமு ஏ ஆவி இருவோருந்து நிமியெ தெளிலா அந்து அவுருகோளுன பெதர்சி, சொர்கதுல இத்து மனுஷனாங்க பந்தவரு மனுஷருன அழுசுவுக்கு இல்லா காப்பாத்துவுக்குத்தா பந்துரு” அந்தேளிரு அந்து எழுதுலா. 56“சொர்கதுல இத்து மனுஷனாங்க பந்தவரு மனுஷருன அழுசுவுக்கு இல்லா காப்பாத்துவுக்குத்தா பந்துரு” அந்தேளிரு. அப்பறா அவுருகோளு பேற ஊரியெ ஓதுரு.
யேசுவோட சீஷருகோளாங்க ஆவுக்கு விரும்பிதோரு
57யேசுவு, அவுரோட சீஷருகோளுவு ஓய்கோண்டு இருவாங்க, ஒந்தொப்பா யேசுவொத்ர, “நீமு எல்லி ஓதுரிவு நானுவு நிம்முகூட பருவே” அந்தேளிதா. 58அதுக்கு யேசு அவுனொத்ர, “நரிகோளியெ தங்குவுக்கு குழிகோளு இத்தாத; பானதுல பறைவுது பறவெகோளியெ தங்குவுக்கு கூடுகோளு இத்தாத; ஆதர சொர்கதுல இத்து மனுஷனாங்க பந்தவரியெ நித்தெ மளகுவுக்குகூட ஒந்து எடா இல்லா” அந்தேளிரு. 59யேசு இன்னொந்தொப்புனொத்ர, “நன்னு இந்தால பா” அந்தேளிரு. ஆதர அவ, “ஆண்டவரே, மொதல்ல நானு நன்னு மனெயெ ஓயி, நன்னு அப்பா சத்ததுக்கு இந்தால அவுருன அடக்கமாடிகோட்டு பருவுக்கு நனியெ அனுமதி கொடுபேக்கு” அந்தேளிதா. 60அதுக்கு யேசு அவுனொத்ர, “ஏவாங்குவு பதுக்குவுது பதுக்கு இருனார்தோரு தேவரோட பார்வெல சத்தோதோராங்க இத்தார. ஆங்கே இருவோரு சத்தோதோருன அடக்கமாடாட்டு. ஆதர நிய்யி ஓயி, தேவரோட ஆட்சின பத்தி ஜனகோளியெ ஏளிகொடு” அந்தேளிரு. 61இன்னொந்தொப்பா, “ஆண்டவரே, நானு நிம்முகூட பந்து நிம்மு சீஷனாங்க இருவே. ஆதர மொதல்ல நானு நன்னு மனெல இருவோரொத்ர ஏளிகோட்டு பருவுக்கு நனியெ அனுமதி கொடுரி” அந்தேளிதா. 62யேசு அவுனொத்ர, “கெத்தெல ஒழவு ஒடக்கோண்டு இருவுது ஒந்தொப்பா, இந்தால இருவுதுன நோடுவுக்கு திருகுவுது ஒள்ளிது இல்லா. அது மாதர நன்னுகூட பருவோனு அவ புட்டுகோட்டு பந்ததுன திருகி நோடிரெ அவ தேவரோட ஆட்சியெ தகுதியிருவோனு இல்லா” அந்தேளிரு.
Айни замон обунашуда:
லூக்கா 9: KFI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@New Life Computer Institute