Matayo 9
9
1Yesu kaaṛukya ngalaveń kaṛuka kwa kulya ya nruva kafika muṛiń wamwi. 2Lia eni vakamwendye nndu atoṛokombye meengo eeriwaa na kiraa. Neeli Yesu alolya sheeli vakusurani nae, kaia nndu ulya atoṛokombye: Uyo mmuu, mwanakwa, kwammaa itio mareko afo! 3Na kiindi kya vaaṛia va mitisine vakakurera ifo ngooń tawo veenumbuaa: Uu anruma Iṛuva. 4Yesu kamanya ma-kusaṛo awo kavaia: Naamu ki ili mukee ikusaṛa fikasha kuro? 5Nkingaki kikee kyaangu, ni inumbua: Kwantio mareko afo, ana ni inumbua: Kwimboo kuṛue? 6Na alli mumanyaań sheeli Mwana wa nndu awore finya ya itia vandu mareko kunu isangeń. Lia eni kaia nndu ulya atoṛokombye: Salala, imboo kiraa kyafo kukwendye kyeń! 7Na nndu ulya kakwimboo kaenda kyeń. 8Ili vandu vandelolya kive kuro, vakariika koṛoń vakaitikisa Iniva, ili anniinga vandu finya ya mikae ii.
9Ili Yesu andeuka Kaperinaumu, kalolya nndu eekee rembo numba ya kyaalo, avaangwaa irina lyamwi Matayo. Kamwia: Shisoṛa! Nae kakwimboo kansoṛa. 10Ili Yesu eekee numba ya nndu ulya eelyaa-fo shoonga, vakasha vasańiṛya kyaalo veengi na vandu varekwa va-kalya shoonga andu emwi na Yesu na vaseṛo vamwi. 11Ili Vafarisayo vandelolya, vakauṛa vanalosha vamwi: Nki ili llosha wanu akee ilya shoonga andu emwi na vasańiṛya kyaalo wo na vandu varekwa? 12Yesu kaita firero fawo kanumbua: Vandu vesha vafurie iraya mwaanga ndi kita valya valole. 13Endeń mundekulosha imanya kirero kilya: ”Kilya kishisenye niń ni ililya vandu, nta ni iraswa ndi“. Fulya niń nansha ivaanga valya vakee vasumani ndi kita valya vakee varekwa.
14Kyeeri kilya vanalosho va Yohane vakanshea vakamwia: Naamu ki ise na Vafarisayo tisindaa kuro, kake vanalosho vafo vatasindaa kuro? 15Yesu kavaia: Valya vakee vavaange waliń naare vaiyaa kyeeri kyo nndumi wa wali akee andu emwi nawo? Kake mikonu ishaa vasokwa muni wali, llyoń vasindaa kuro. 16Nta eefo nndu avevyaa kirami kiiya nsetoń nkuu ndi. Amu kilya kyavevyo kiiṛuaa kirami kya nseto ulya, na alya arandukye akwengeṛyaa mmwasi. 17Nta vafisaa mfinyo mwiya ifo mbolokoń ta masaṛa makuu ndi. Kwakooya vatanaa kuro, mboloko to tirandukaa. Na mfinyo wirikyaa si. Kake mfinyo mwiya ufiswaa mbolokoń shiya, naamu fikie foose fili fivili.
18Ili Yesu eereraa kuri na vandu, kashewa ni nshili umwi. Kawwoya ńundeń kamwia: wui Mbee, noore mwana wakwa wa sambuṛa afwa alli kuri. Anna Mbee, nakutereva kunndefo kundemwekeṛya uko lwafo, nae aṛukaa. 19Llyo Yesu akwimboo andu emwi na vaseṛo vamwi vakaenda na nshili ulya. 20Ili vakirekye shień kitaare vamfika kwa nshili ulya, kashewa ni nndu nka eelolee saka ya kika andu a myaka ikumi na ivili. Kasha numa ya Yesu kabaana nkyendu wa nseto wamwi. 21Fulya nka to eenkureraa ngooń yamwi eenumbuaa: Kwakooya mbaanaa nkyendu wa nseto wamwi, vvaa nsha buṛu. 22Llyo Yesu aaṛuka kallolya kamwia: Uyo mmuu, mwana wakwa! Fulya kwashikusura, nkyo kyankukiṛa. Na nka ulya kava nsha kyeeri kyo kyeni. 23Neeli Yesu andefika kulya kwa nshili ulya, kakooya-fo iṛoṛonda lya vandu, kiindi veejvilyaa mbembe na kiindi veekabaa kiṛoṛongyo kya kiiyo. 24Na Yesu kavaia: Iwukeń, amu mwana uu amfwa ndi, niikai arekye raoń da. Nawo vakanseka. 25Ili vandu valya vandemaa isomutwa, Yesu kaaka numba ilya mwana akai kawwara uko na mwana kakwimboo. 26Na mboni tilya tikakwana urukeń lua loose.
27Ili Yesu eeiraa auka ifo, vandu vavili veekee midoń vakallatya vakarosa ununga veenumbuaa: Wui Mwana wa Davidi, tililye! 28Neeli andemaa ifika numba, valya veekee midoń vakanshea. Yesu kavaia: Mukusurye sheeli mmakii itana kuro? Vakamwia: Ee Nndumi. 29Llyo avabaana miso awo kanumbua: Kimuvie sheeli mwankusura. 30Miso awo akaruuka. Yesu kavakandara kavaia: Lleń nnu manya nndu amanyaa iki nammutanya. 31Nawo vakaenda vakakwanisa mboni ii urukeń lua loose. 32Neeli iwo vaendaa, lia eni vakamwendye nndu ateeshi irera aworwa mmumuyo nkasha. 33Ili mumuyo ulya nkasha undeumbutwa, nndu ulya ateeshi irera karera. Isyamu lia likaṛiika likanumbua: Kunu Isiraeli koose kuuka mbele kyallolika kindo sha iki ndi. 34Kake Vafarisayo vakanumbua: Mfinya ya nnini wa mimuyo mikasha yyo akee yumbuta nayo mimuyo mikasha.
35Yesu asengetya miṛiń minini na minnya yoose eeloshaa-fo vandu ifo numba tawo ta iterevya eeongoyaa vandu mboni shinuru ya umangi na ikiṛa vandu saka ta mikae yoose na ngyutanyaṛi ta mikae yoose. 36Neeli andelolya isyamu iingi, kalivavyo mmuu, fulya veekee vaṛaaṛaa sha mburu titawore mwisi. 37Llyo aia vaseṛo vamwi: Iilula ni iingi, kake vaṛundi waangu. 38Kyasia tereveń muyanrema arume vaṛundi ifo iilulyoń lyamwi.
Айни замон обунашуда:
Matayo 9: RWK72
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.