Matayo 22
22
1Yesu kaaṛua vandu kavarerya lingi na sumu eevaiaa: 2Umangi lwa Iṛuva luvakani na mangi indeorisya nseṛo wamwi nka. 3Nae karuma vaseṛo vamwi vavaange valya veevvaangwaa waliń. Nawo nta ikunda isha. 4Karuma lingi vaseṛo vengi kavaia: Andeień vandu valya vakee vaaṛye nrumi: Nammaa isongosya shoonga takwa. Nguleta na nrasa takwa tammaa isikyo. Foose fammaa ideeṛyo. Oṛeshoń waliń! 5Kake wo vakaila vakaenda nndu woose kikwamwi, ulya umwi nremiń yamwi na ulya ungi mbusheń yamwi. 6Na valya vandesaa-wo vakawara vaseṛo valya vamwi vakavatuṛua na iwaa vakavawaa. 7Ili mangi andeita mboni ii, kaliwa nngoo karuma vaseṛo vamwi vandereta vawaa valya vakakoṛa na muṛi wawo. 8Numa kaia vaseṛo vamwi: Wali lwavva da, kake vandu valya vakee vaaṛye nrumi vakivaa ndi. 9Kyasia endeń alya malakanuń a shia muvaange woose muvalolyaa-fo vashe waliń! 10Vaseṛo vakakwimboo vakaenda kulya shień vaka-sańiṛya woose vandevalolya vakasha na vanuru. Wali lukaishua vandu veeni bele. 11Numa mangi kaaka numba indeisana vandu valya. Kakooya-fo nndu umwi kitaare aṛee isaṛa lya wali. 12Kamwia: Ndoo yakwa, naare kwaaka kunu kutaṛee isaṛa lya wali? Nae kasia do. 13Llyo mangi aia vaseṛo vamwi: Mfingeń marende na maako munkumbe ifo wooṛo llemiń. Ifo mfo kivaa kiiyo na ifura kitaku. 14Amu vveengi vakee vavaange, kake waangu tubu vasaulwaa.
15Kyasia Vafarisayo vakaenda vakandeliya Yesu kyama kya iwwara na firero famwi. 16Vakarumya Yesu vandu vawo andu emwi na vandu va Herode vakamwia: Llosha nnini, tikwishi sheeli kukee nndu awore firero fa dede na shia ya Iṛuva kwaiorusa kisumani. Nawe kwafo kuwore wa mungo ana wa kivari ndi. 17Tiie kukusaṛye are iwe? Nkisumani iniingya mangi kyaalo ana wode? 18Yesu kamanya ntambwe wawo kavaia: Nkiki ili mukee ishireya, ini vamakavili? Shooruseń shilingi yo ya kyaalo te! Vakamwendee shilingi. 19Kavaia: A fwana ii iiyo na mitisine yya i? 20Vakamwia: Mfa mangi. 21Llyo avaia: Niingeń mangi kilya kisumani nae, na kilya kisumani na Iṛuva niingeń Iṛuva! 22Ili vandeita kuro, vaka-ṛiika vakantia-wo vakaenda.
23Nkonu ulya muni kashewa vVasadukayo. Wwo vandu vanumbuaa, sheeli liteefo iṛuka lya vafu. Vakamwuṛa veenumbuaa: 24A le llosha, Mose anumbua: Nndu kafwa atawore vana, mwanamae aore nka ulya wamwi, amu airye mwanamae vana. 25Kyasia kunu kweru veeifoo vana va nka umwi mfungare. Ulya wa mbele kaalika kafwa. Na fulya ateeworee mwana, kareya mwanamae nka ulya wamwi. 26Mfo kuro na ulya wa kavili na wa kararu. Kikava kuro kwa woose mfungare. 27Ifurumya lyawo woose nka ulya nae kafwa. 28Kyasia ili vaṛutwaa kwa vafu, avaa nka wa i karikari ka iwo woose mfungare? Amu woose veekee nae. 29Yesu kaaṛua kavaia: Mwanrekwa, fulya muteeshi mitisiṛie ana nta finya ya Iṛuva. 30Amu ili ufikaa nkonu wa iṛutwa kwa vafu, vakyalikaa ana vakyalikwaa ndi. Kake vavaa sha vamalaika vakee ifo iṛuvewu. 31Kake kwa kiimba kya iṛuka lya vafu mwansoma nta ikyo Iṛuva ammuia eenumbuaa: 32Niń nkee Iṛuva wa Abraamu na Iṛuva wa Isaki na Iṛuva wa Yakobo? Kyasia Iṛuva wwa vafu ndi, kake wwa valya veefo na muu. 33Neeli vandu vandeita, vakaṛiikiswa mmiloshye yamwi.
34Ili Vafarisayo vandeita sheeli Yesu avvinga Vasadukayo valya, nawo vakakusandya andu emwi. 35Na umwi wawo eekufundyee mavavaso kamwelelya eemwuṛaa: 36A le llosha, ni ivavaso lingali likee inini ifo mavavasoń kita engi? 37Na Yesu kamwia: Llyo ili: Kukunde Nndumi Iṛuva wafo na ngoo yafo yoose na nrima wafo woose na makusaṛo afo woose! 38Ili llyo ivavaso inini na likee kwa ule. Liifo na ivavaso lingi livakani nalyo. 39Llyo ili: Kukunde vandu vengi sheeli kukukundye ku muni! 40Na mavavaso iva avili wwo arie mavavaso engi woose na akwaa mmiloshye ya vaauya fisuku.
41Neeli Vafarisayo vandekusandya andu emwi, Yesu kavauṛa 42eereraa: Mukusaṛye are kya Kristo? Munumbuaa mMwana wa i? Vakamwia: Mmwana wa Davidi. 43Kavaia: A Davidi avvaangaań are Nndumi kwa finya ya Mumuyo eereraa: 44Nndumi aia Nndumi wakwa: Kaa rembo taari ya uko usha lwakwa kumande nrwaa fituva fafo kwa si ya marende afo? 45Kyasia kwakooya Davidi awaanga Ndumi, naareń akee mwana wamwi? 46Nta umwi andemakii imwaṛua kirero, na kuuka nkonu to nndu akikaṛya imwuṛa lingi kirero ndi.
Айни замон обунашуда:
Matayo 22: RWK72
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.