Matayo 20
20
1Umangi lwa iṛuvewu luvakani na nndumi andekwimboo ngama aṛuye vandu va indundya nremiń yamwi. 2Ili andemaa irekyana na vaṛundi, nkonu umwi nshilingi, kavarwaa nremiń yamwi. 3Kakwimboo lingi kyeeri kya saa isaru kalolya vengi veeselelee soṛeń kitaare veeworee mashoṛa. 4Kavaia: Neeni endeń nremiń yakwa, na maṛe anu mmuniingaa sheeli kisumani. Nawo vakaenda. 5Kakwimboo lingi kyeeri kya saa isasaru na kya saa kyeenda katana sha lia. 6Ili andekwimboo kyeeri kya kyoṛuuva, kakooya vengi veeselelee vataare mashoṛa kavaia: Nki ili muselele kunu nsanyiń uu woose kitaare mukee iṛunda: 7Vakamwia: Eefo nndu antivaanga ndi. Kavaia: Neeni endeń nremiń yakwa. 8Ili kundeila, nndumi ulya kaia nshili wamwi: Vaanga vaṛundi valya kuvaniinge maṛe awo. Kubooke iniinga valya vafurumya isha kumande valya vabooka isha. 9Kyasia valya vandevaangwa kyeeri kya kyoṛuuva vakasha vakaniingwa maṛe awo nndu woose shilingi yamwi. 10Ili valya va mbele vandesha, vakakusaṛa vaniingwaa kya mmwasi. Nawo vakaniingwa maṛe awo nndu woose shilingi yamwi da. 11Ili vandewaria shilingi yo sheni, vakańuńurya nndumi ulya vakanumbua: 12A le mbee, iva va numa vandunda mashoṛa saa imwi tubu se? Ili iwe kwaveeńańanisa neese tandunda mashoṛa na nrike nsanyiń woose. 13Karerya umwi wawo kamwia: Ndoo yakwa, nankulemba ndi. Teenrekyanaa shilingi se? 14Wariań kilya kikee kyafo kwende kyeń kwafo! Mfurie iniinga uu wa numa kiińańiani na kyafo. 15Ana mmakii itana na masaa akwa sheeli mfurie se? Ana kwashiirya iriso, fulya niń noore maako? 16Na Yesu kaia vandu: Kyasia valya va numa vavaa va mbele na valya va mbele vave va numa. Amu valya vakee vavaange vveengi, kake valya vasaulwaa vvaangu.
17Neeli Yesu eekee irwa eendaa Yerusalemu, kakurika vanalosho valya ikumi na vavili kyaanya kyawo. Neeli veekee shień, kavaia: 18Lleń tikee irwa na ule Yerusalemu, na Mwana wa nndu arambikyoo maakoń a vakohani vanini na vaaṛia va mitisine, nawo vamwumisyaa awalwa. 19Nawo vanrwaa maakoń a vayavaṛumu vanteende na inkaba na ngova na inkabya nsalabeń. Na nkonu wa kararu aṛukaa.
20Llyo ashewa mmae wa vana va Sebedayo andu emwi na vana vamwi. Kawwoya eenterevaa kindo. 21Nae kamwia: Nkiki kufurie? Kamwia: Numbua, vana va vakwa vavili vakaa umwi taari ya uko usha lwafo na ungi taari ya uko umbuyo lwafo ifo umangiń lwafo. 22Yesu kaaṛua kanumbua: Mwishi kilya mukee itereva ndi. A naań, mumakii inwa umbata lu niń nnwaa? Vakamwia: Timakii da. 23Nae kavaia: Inwa umbata lwakwa munwaa da. Kake irwaa vandu taari ya uko usha lwakwa na uko umbuyo lwakwa iwo mmashoṛa akwa ndi. Vandu vaniingwaa vvalya vammaa ideeṛyo nNde yakwa. 24Na valya ikumi ili vandeita, vakatuṛukya valya vavili. 25Na Yesu kavavaanga io akai kavaia: Mwishi sheeli iwo vashilyaa vandu vashilyaa na finya. Na vanini vawo vakavalamya. 26Kake kari kanu ini kitave kuro. Kake ulya woose, afurie iva nnini kwanu, ave mumuṛundya. 27Na ulya woose, afurie iva wa mbele kwanu, ave iketi lyanu. 28Sheeli na Mwana wa nndu atashe, amu aṛundyo, kake ashe aṛundye vengi na iniingya muu wamwi, amu uve kirasyo kya veengi.
29Neeli eeukaa kulya Yeriko, isyamu iingi likansoṛa. 30Neefo mfo midoń ivili iikee rembo mbaai ya shia. Neeli vandeita, sheeli Yesu akee iira, vakarosa ngyununga tawo veenumbuaa: Wui Nndumi Mwana wa Davidi, tililye! 31Isyamu lia likavanaya vasie do. Kake wo vakaengeṛya irosa ngyununga tawo veenumbuaa: Wui Nndumi Mwana wa Davidi, tililye! 32Yesu kasalala kavavaanga kavaia: Mufurie mmutanye ki? 33Vakamwia: Nndumi, tifurie miso eru alolye. 34Yesu kavavavyo mmuu kavabaana miso awo. Lia eni vakalolya vakansoṛa.
Айни замон обунашуда:
Matayo 20: RWK72
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.