Matayo 18
18
1Kyasia saa ilya sheni vaseṛo valya va Yesu vakasha na io akai vakamwuṛa veenumbuaa: Nuungau akee nnini ifo umangiń lwa iṛuvewu? 2Nae kavaanga kamwana io akai kanseṛeesa kari kawo. 3Kanumbua: Nkya dede namuia: Kwakooya kitaare mweelashika muve va mikae ya fivana, nta mwakaa ifo umangiń lwa iṛuvewu kutu ndi. 4Kyasia ulya woose akunyiisaa ye muni ave wa mikae ya kamwana sha ika, ito yye avaa nnini umangiń lwa iṛuvewu. 5Na nndu awariaa kamwana sha ika akuvavye nań, anshiwaria niń. 6Kake ulya akasheesaa iva vannya na akwaa ni umwi tubu, kyawara afingyo isewe sungoń yamwi na yeeṛwa eeṛwa kirunduminy kya nruva. 7Ushi isanga kiimba kya misindaṛa iifo. Kyawara misindaṛa ive-fo, kake ushi nndu ulya ainnde. 8Na kwakooya uko lwafo ana urende lwafo fikwendee misindaṛa, fiminyi-fo kwalikumba neefo! Llyo ńwana ifika muuń kukee kisaya kitawore uko ana urende, kita ifi kuvaa na maako avili ana marende avili kweeṛwa muroń utakisiaa.
9Na kwakooya iriso lyafo fikwendee nsindaṛa, liiṛue-fo kwalikumba neefo. Llyo ńwana ifika muuń kukee ndoń, kita ifi kuvaa na miso avili na numa kweeṛwa iriniń lya muro. 10Lleń nnu kaaṛa mutaile nta umwi wa iva vakee vannya! Nań namuia: Vamalaika vawo ifo iṛuvewu vakee illa kisangu kya Nde yakwa wa iṛuvewu mikonu yoose. 11Amu Mwana wa nndu andesha ishekiṛa kilya kirekye. 12Mwalolya are? Kwakooya eefo nndu awore mburu iyana na imwi ikareka-wo, nae are atatia-wo tilya makumi kyeenda na kyeenda ifo fiduruń na yenda eende andeṛuya ilya irekye? 13Ikava bule yamwi kaikooya, nkue namuia kya dede, afuraa kya mmwasi kita tilya makumi kyeenda na kyeenda titarekye. 14Mfo kuro kikai na mbele ya Nde yanu wa iṛuvewu, nae da akundye nta umwi wa iwo vannya vareke ndi.
15Mwanamae wafo kankurekyo, anderereń muli vavili kyaanya kyanu. Kakwirikya, kyankuvia bule, kwankooya lingi mwanamaa. 16Kallea ikwirikya, enda na nndu umwi ana vavili, naamu kindo kyoose kirerwa vvandu vavili ana vararu. 17Kallea iirikya iwo, enda andeongoya siṛi. Kallea iirikya na siṛi deń, akuvie sha muyavaṛumu ana nsańiṛya kyaalo. 18Nkue namuia: Kindo kyoose mwankifinga kunu isangeń, na kulya iṛuvewu kyammaa ifingwa. Na kindo kyoose mwankiboṛomua kunu isangeń, na kulya iṛuvewu kyamboṛomulwa. 19Lingi namuia: Kindo kyoose vaaroe vanu vavili kunu isangeń vanrekyana ikitereva kwa Iṛuva, vaniingwaa nNde yakwa akee iṛuvewu. 20Amu alya vandu vavili ana vararu vakusaandi vakuvavye na irina lyakwa, wwo nań nkaa karikari kawo.
21Llyo Petiro anshea kamwia: A le Nndumi, nsha keenga mwanamae wakwa ashirekyoe niillilyaa? Nkamfungare naań? 22Yesu kamwia: Nakwia: Nkamfungare da ndi, kake llilye kamakumi mfungare kamfungare. 23Amu na akwaa ni Iṛuva atanaa kuro da. Ye avakye mangi ya vandu kunu isangeń yafura itala sile tamwi na vaṛundi vamwi tilya eewaakuyaa. 24Ili andebooka itala, kaendewa umwi eeworee sile ya rupia mayana mayana. 25Ili nsile ulya atuṛa kya intaa, mangi ikavavasa: Akumbwa ye na nka wamwi na vana vamwi na foose awore, amu sile yakwa itaike. 26Nsile ulya kawwoya ṅundeń kaiya nae eemwiaa: Anna Mbee, shirwaa mbuṅṅwa Mbee, nkaa nkutaa! 27Ili mangi indella kasa akee iiyaiya nae kuro, ikamwiria ndewu ya makyema kamwotoṛa kantia na sile ilya yoose deń. 28Kyasia ili nsile ulya andesomuka kaenda kandekwania na ndundi ungi veeṛundaa andu emwi kulya kwa mangi eemmwakuyaa rupia iyana limwi. Kantambukya kawara kanrwa uṛoo kamwia: Shitaa sile ilya yakwa nnu da! 29Nndu ulya kawwoya ńundeń kaiyaiya nae eemwiaa: Anna Mbee, shirwaa mbuṅṅwa, nkaa nkutaa da! 30Nae kalea fukyu kankurika kandenrwaa kifingyoń kumande amaa itaa sile ilya yamwi yoose. 31Neeli vaṛundi valya vengi vandelolya kilya nsile ulya andetanya ulya ungi, vakaṛiika koṛoń vakandeongoya mangi filya foose findeva. 32Na mangi kawaanga kamwia: Iwe kukee nndu nkasha kutu. Lia kwiyaiya nań, nakutia sile ilya yakwa iifilee fulya se? 33A iwe kyeenkuwaraa se kulilye nndu ito ungi sha lia niń nndekulilya? 34Llyo nndumi wamwi atuṛuka nnu kanrambikya ngyama yamwi kumande amaa itaa sile ilya yoose. 35Na Yesu kanumbua: Mfo kuro Nde yakwa wa iṛuvewu amutanyaa da neeni, kwakooya kitaare mukutiyanaa mareko anu na ngoo toore witanu ini mu veni na mu veni.
Айни замон обунашуда:
Matayo 18: RWK72
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.