Metumo ge Watumwa 7
7
U wuganule wa Sitefano
1Nayo Mukohani muwaha yakamuwuza Sitefano yakatya, “Ati wule izinghani zizi za mbeka?” 2Nayo Sitefano yakapitula yakatya, “Hulicizenyi, nye wandugu zangu, nanye mo wasogo zangu, u Mulungu wo lukumyo yamulawila u sogo yetu Abulahamu, lono yali ku Mesopotamiya, lono yali yakali si yanekala ku Halani. 3Mulungu yakamutya, ‘Wuwuce mu yisi yako, wuwalekaje wanduguzo, wubite ku yisi yono nokulajila.’ 4Baho Abulahamu yakawakuhama ku yisi ya Wakalidayo, yakawa kubita kwikala ku Halani. No sogwe yaza kuwa yatajika, u Mulungu yakamuhamya kanyhi kuko ku Halani, yakamuleta sunga mu yisi yiyi yono mwikaye nyenye alu. 5Hamba u Mulungu si yamupela hanhu hanji ho hose mu yisi yiyi, hawe sawo yakwe ngʼo. Ninga hamba nhavivyo, yamwihuwiza vyono komupela yisi yiyi yiwe yakwe, na yo lulelo lwakwe hanyuma yo mwene, hamba yiwe mu cipango cico, yali yakali yasina mwana. 6Mulungu yamulonjela yakatya nhavi, ‘I wanago wolotegulwa ku yisi yono yitemigwe ne wanhu wanji, na kuko wonozwa wawanda no kutendelwa vibi myaka magana mane. 7Ninga nane nololilipiciza likungugo lilyo lyono lyolowafuga. Hanyuma ninga, nolowahamya mu yisi yiyo, ho waze wanyitumamile hanhu bahano.’ 8Hanyuma u Mulungu yakawunoza u walame, ciwe co citanjilo ce cilagane. Holeka Abulahamu yamutegula ku calamo mwanagwe Isaka lono yali yafika vilo munana vyo wulelwe wakwe. Nayo Isaka nhavivyo, yamutegula ku calamo Yakobo, nayo Yakobo vyo yawatendela nha vivyo wawalya iwasetu wawaha ikumi na wejete.
9“Ne wasetu wawo, wakamuwonela Yusufu wivu, wakamuguza, yakategulwa ku Misili ku wuwanda. Ninga Mulungu yali yali hamonga nayo. 10Yamuponya mu magayo gakwe gose. U Mulungu yakamupela lihewa ne mahala hali Falawo u mutemi wa Misili, sunga Falawo yakamuwika yawe muwaha mu yisi yiyilya, sunga na mu nyumba yakwe yo wutemi. 11Yikagwa nzala mu yisi yose ya Misili na Kanani, nayo yikaleta wugaye wuwaha muno muno, ne wasetu hamba si wasuma kutuga ndigwa yo yose. 12Ninga Yakobo yaza kuhulika vyono ku Misili koyili ndigwa, yakawatuma wasetu wabite kuko ku Misili lulongozi. 13Mu muhinzo we kejete, wanduguze za Yusufu, wakamutanga, nayo Yusufu yakemanyiza kuli wanduguze, sunga na Falawo yakawamanya wanduguze za Yusufu. 14Yusufu yakawalajiliza wamuceme sogwe Yakobo ne mhuga yakwe yose, wanhu makumi mupunghati na wahano. 15Na Yakobo yakawa kubita ku Misili na kuko ko yafwila, hamonga ne wasetu wanji. 16Ne miwili yawo, yikategulwa sunga ku Shekemu, yikazikwa mu citenjelo cono Abulahamu yacigula kwa mapesa, kuli wana wa Hamoli ku Shekemu.
17“Ninga lidaha lyaza fika, ho Mulungu yacifisilize icilagane cono yamupela Abulahamu iliwalo lye wanhu lyali lyonjezeka muno ku Misili. 18Hanyuma, yakatema mutemi yunji mu Misili mono si yali yamumanyile Yusufu. 19Yuyo yakawagaza muno wasetu, no kuwatendela vibi, ko kuwatya, wawataje kunze wana wawo wagalika walece kuwumipa. 20Na mu mapango gago, ho yalelelwa Musa, nayo yakawa mwana muswanu hali Mulungu, yakadimwa myezi midatu mu nyumba yo sogwe. 21Nayo yaza kuwikwa kunze, u mwana we cicekulu wa Falawo yakamusola, yakamudima nha mwanagwe yamulelile. 22Musa yakafundwa zinghani zose ze mahala ge Wamisili, yakawa yali vilungo mu zinghani na mu milimo yakwe. 23Ninga Musa yaza kuwa yaficila myaka makumi mane, cisukwa cikamwinjila mu nhumbula, yabite yakawalanje wanduguze iwana wa Isilayeli. 24Na kuko, yakamuwona yunji muyawo yakugazwa vibi no Mumisili, yakabita yakamutaza, Musa yakamulipiciza yuyulya Mumisili, yakamuwulaga. 25(Yehwesaga vyono wanduguze Wayisilayeli, wotanga mba vyono u Mulungu komwitumamila mwene, kuwaponya, ninga hamba si wayitanga i nghani yiyi ngʼo.) 26Imitondo yaco yakawagana Wayisilayeli wejete wakwitowa, yakasaka yawalamule, yakutya, ‘Nye walume anye, nha muli ndugu, alo so cici mukwinozeza vibi nyenye wose?’ 27Ayulya mono yamutowaga muyagwe, yakamukumhila Musa kutali, yakutya, ‘Alo nani mono yakuwicile gwegwe wuwe muwaha, na mulamuzi wetu? 28Alo wukusaka wumbulaje nane nha vyono wamuwulaga ayulya Mumisili igolo?’ 29Musa yaza kuhulika zizo, yakatiza, yakabita kwikala mu yisi ya Midiyani, na kuko yakalela wana we cilume wejete.
30“Yaza malika myaka makumi mane, Malayika wo Muwaha yakamulawila Musa mu cititika cono cakaga moto kunyika, behi ne litunda lya Sinayi. 31Musa yakezina muno, yaza kuyiwona nghani yiyo, yakasejelela behi ho yawone, ninga yakahulika lizi lyo Muwaha, likutya, 32‘Ane yo nene u Mulungu we wasogo, u Mulungu wa Abulahamu, na wa Isaka, na wa Yakobo!’ Musa yakacicima so woga, hamba si yejelela kujendelela kulanga. 33U Muwaha yakamutya, ‘Wugavulaje imalatu gako, hambi aha hono wimile nha hanhu helile. 34Ane, nawuwona mbeka u wugaye we wanhu wangu wono wali ku Misili. Nicihulika ne cililo cawo, nane niza ho niwaponye. Holeka wuze hano, nghutume ku Misili.’
35“Yuyu Musa, yo yuyo mono wana wa Isilayeli wamulema, wakutya, ‘Alo nani mono yakuwicile wuwe muwaha na mulamuzi wetu?’ Yo mwene Musa mono Mulungu yamutuma yawe muwaha, kanyhi na mukombozi, mu nzila ya Malayika mono yamulawila mu cititika cono cakaga moto. 36Yo yuyo yo yawawusa ku yisi ya Misili, mu nzila yo kunoza mapoto, na mezino mu yisi ya Misili, na mwilenga lya Shamu na mu nyika, myaka makumi mane. 37Yo mwene yuyo Musa mono yawatya wana wa Isilayeli, ‘U Mulungu kolomwinulilenyi Muwizi kulawa mu wandugu zenyu yenha nene.’ 38Mwipango lyono wana wa Isilayeli wetangʼanila ku nyika, yo Musa mono yali yali kuko, hamonga nawo. Yali yali kuko hamonga ne wasetu, hamonga na ayulya malayika mono vyalongana nayo mwitunda lye Sinayi, yo yuyo mono yazibocela zinghani zo wumi, ho yacipele ase.
39“Ninga, yo mwene mono wasetu walema kumuhulika, wakamukumhila kutali, wakasulumila kuwuya ku Misili. 40Wakamulonjela Haluni, ‘Ucinozeze milungu yono yocilongolela kumwande, hambi nha si cimanyile yono yimutujile Musa, mono yacitonjile kuwulawa ku Misili!’ 41Baho ho wenozeza cihwani ca ndama, wakacikumbika, wakacisecelela cinhu cono wacinoza kwe miwoko yawo weneco. 42Ninga Mulungu yakawuka muli wene, yakawaleka wahembe zi nyelezi zo wulanga, nha vyono yandikwa mu citabu ce wawizi,
‘Anye mo wana wa Isilayeli!
Yo si nene mono mwambulajila zimitugo no kunghumbika
mu myaka makumi mane ku nyika!
43Nanye mukalidinghula lihema lyo mulungu Moloki,
ne cihwani ce nyelezi yo mulungu wenyu Lafani.
Ivihwani vyono wavinoza, vyo vivyo vyono wavihemba.
Ku soko yiyo nane, nokutegula kutali,
ku wuwanda, kupuluta Babiloni.’
44“Kuko ku nyika, iwasetu wali wena ilihema lyono lyahomelelaga vyono Mulungu yali baho. Nalyo lyanozwa nha vyono Mulungu yamulajiliza Musa yalinoze, liwe mu hwani yiyilya yono yawona. 45Nawo wasetu webocezaga, sunga mu cipango ca Yoshuwa, lono wenjliila kutema mu yisi yono wayiboka kuli makungugo gono yagawinga Mulungu hali wene. Baho likekala sunga mu vilo vya Dawudi. 46Dawudi yakatuga lihewa hali Mulungu, yakamulomba Mulungu yamukombole, ho yamuzenjele wikalo, mwene mono Mulungu wa Yakobo. 47Ninga Solomona yo yamuzenjelo Mulungu nyumba. 48Ninga hamba nha vivyo u Mulungu Mono yalawiliciye Muli vyose, nha si kekalaga mu zinyumba zono zizenjigwe ne wanhu, nha vyono yakutya muwizi,
49‘U Muwaha yakutya,
Wulanga lye goda lyangu, lyo lukumyo
Ne yinze wo wukanyago we magulu gangu,
50Alo nyumbaci yono mosuma kunzejela?
Vinhu vivi vyose, yo nene mono navinoza, hamba ngʼo?’
51“Anye mo wakamu ku wuhulice! Izinhumbula ne makutu genyu vinha vye wanhu we makungugo. Anye mwinha iwasogo zenyu. Nhondo zose mumwimilaga u Muhe Mono Yelile. 52Wahayi muyagwe ne wawizi, mono si wamugaza iwasenyu? Wakawawulaga awalya wono Mulungu yawatuma wawalonjele wanhu zo wuze wa Mono yali lingʼani, alu nanye mukamugaluka, no kumuwulaga. 53Yo nyenye mono mwawubocela Wulajilize wono waletwa kuliʼnye na Wamalayika, nanye hamba si mwawukamisa ngʼo.”
Sitefano yakuwulagwa
54Wawo wanyamhala we libalaza, waza kuzihulika zizi, wakahomeka muno mu zinhumbula, wakamwikangʼanhilila kwe kuwo. 55Ninga Sitefano vyono yali yamemilo Muhe Mono Yelile, yakagalamila ku wulanga, yakawona lukumyo lo Mulungu na Yesu yemile u kulume ko Mulungu. 56Yakatya, “Lanjenyi ta! Nghuwona wulanga wugubuce, no Mwana wo Munhu yemile u kulume ko Mulungu.”
57Ninga iwanhu wose wono wali wali baho he balaza wakazoza muno, no kudinda imakutu gawo ne miwoko yawo. Hanyuma wakawa kumuzumhilila wose hamonga, 58wakamulavyaniza kunze ye kaya, wakamutowanga ne mabwe. Na awalya i wahomelezi, wakagawika makoti gawo hasi yo wulanjilizi wa muzelelo litagwa lyakwe Sawulo. 59Wakajendelela kumutowanga Sitefano ne mabwe, akuno u mwene yakulomba yakutya, “Go Muwaha Yesu, ubocele Muhe wangu!” 60Yakafugama yakabalaluka kwe izi iwaha, yakutya “Gwe Muwaha wulece kuwahosa so wubi wuwu.” Yaza kondya kulonga zizi, hodu ho baho yakawa kufwa. Na Sawulo nayo yawona viswanu vyono wamuwulaje.
Айни замон обунашуда:
Metumo ge Watumwa 7: GOG91
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.