Metumo ge Watumwa 12
12
I likanisa likutendelwa vibi
1Behi ya mu vilo vivyo baho, u mutemi Helode yakamula kuwagaza wakilisito wanji. 2Yakamuwulaga Yakobo u muwahawe wa Yohana, no mumaje. 3Yaza wona vyono i litumo lilyo liwendeze Wayahudi, yakacila, sunga yakamwibata Petelo. Yiyo yiketumwa mu vilo vye mikate yono siyisasize. 4Petelo yaza kwibatwa, yakawikwa mu jela, yakamuwika hasi ya vipuga vine vye wasilikale wane wane wamwikalize. Helode yahilaga yamulavye cagalanze kuli wanhu, i Pasaka kolo yeza kupuluta. 5Na lono Petelo yali yali mu jela, ilikanisa si lyadilaga kumulombela hali Mulungu.
Malayika yakumulavya Petelo kulawa mu jela
6Mu cilo cono cali cileceye lizuwa lyono Helode yali yamulavye Petelo cagalanze kuli wanhu, Petelo yali yagonile hagati ye wasilikale wejete, yali muwopwe ne minyolo myejete, ne walindilizi wali walindilize ha mulango we jela. 7Kumbe, Malayika wo Muwaha yakema nhinicizo hali mwene, no wuzelu wukabulila mu nyumba yiyilya ye jela. Malayika yakamusinhusa Petelo, yakamutya “Winuce mbela.” Ho baho imanyolo gakadumuka mu mawoko gakwe. 8Malayika yakamutya, “Wi-tunje wuvwale malatu gako.” Nayo yakanoza nhavivyo. Hanyuma yuyo Malayika yakamutya, “Vwale likoti lyako, unhyatye.” 9Petelo yakamutyatya kunze, ninga si yamanya vyono zizo zono zinozigwe na Malayika zali za mbeka, langa yaganicizaga nha vyono yakulota ndoto. 10Nawo waza kupuluta ha wugozezo wulongozi na we kejete, wakafika ku mulango wa cuma wo kwinjilila mwikaya, u mulango wuwo wukawadigucila wuli wene, nawo wakalawaniza kunze. Wakajendana mu nzila monga, hanyuma Malayika yakamuleka lwa kamonga Petelo yali wene.
11Nayo Petelo ho yezucila baho zono zijeye, yakatya, “Alu he mbeka, ho namanya vyono u Muwaha katuma Malayika wakwe kamhonya kulawa mu muwoko wa Helode, na muli zose zono wanhu wa Isilayeli wali walawiliye.”
12Nayo yaza kukondya kumanya nhavivyo, yakabita sunga ko ku kaya ya Malyamu nyina ya Yohana, mono kacemagwa Maluko. Na mu kaya yiyo, wali wekonghoye wanhu wenji wakulomba. 13Nayo Petelo yakakongʼonha mulango, no mwitumami yumonga we cihinza litagwa lyakwe Loda, yakabita ku mulango kwidika. 14Nayo yuyo muhinza yakalitanga lizi lya Petelo, yakasangalala muno, sunga yakaleka na zo wudigula mulango, umwene kanyhi yakawamanyhila kugati, yakawalonjela vyono Petelo yemile ha mulango hanze. 15Wakamutya yuyo muhinza, “Alo wina lukwale!” Ninga mwene yakacila kulonga du, vyono yili mbeka. Nawo wakamutya, “Ayo yo Malayika wakwe.” 16Na mu cipango cico, Petelo nayo yakasimbilila kukongʼonha. Hanyuma nhondo wakawudigula mulango, wakamuwona, vyono yo mweneco, wakezina. 17Nayo Petelo, yakawayunziza u muwoko, wanyamale, nayo yakawasimuliziza vyono Muwaha yamulavizye mu jela. Yakawatya wamulonjele zinghani zizi Yakobo, na we zindugu wanji, hodu u mwene yakawa kulawila, yakawa kubita hanhu hanji.
18Wali weza kwela, hakawa na mahwele mawaha, muli wawalya iwasilikale muli yono yimuweye Petelo. 19Helode yakalajiliza yalondolwe muno, ninga hamba nhavivyo si wasuma kumuwona. Holeka yakawa kulajiliza wawalya wasilikale wawuzwe, yakalajiliza wawulagwe. Hanyuma Petelo yakawuka kuko ku Yudiya yakabita ku Kayisaliya, yakekala kuko.
U wufwe wa Helode
20Nayo Helode yakakozwa likuwo muno na wanya Tulo na Sidoni. Ninga wene wakamutumila wanhu. Nawo wakasuma kumutaga Balasito yawe ku lubavu lwawo. Balasito yali mulanjilizi muwaha we likulu lyo mutemi. Wakamubitila Helode, wakamulomba hawe mulamu, vyono yisi yawo, yali yitumbiye kutuga zindigwa kulawa ku yisi yo mutemi. 21Na mwizuwa linji lyono lyali yihagulwe, Helode lono yali yavwala myenda mitambule, yekala mwigoda lyo wutemi, yakawalonjela wanhu nghani. 22Iwanhu wakazoza kwa nyemo wakutya, “Lizi ali lya Mulungu, hamba si lya munhu.” 23Ho baho baho Malayika wo Muwaha yakamugwisa Helode hasi, vyono si yamupela Mulungu lilumbo lilyo. Yakaligwa ne mangʼonyo, yakafwa. 24Ninga inghani yo Mulungu yikacila kukangala no konjelezeka.
25Balanaba na Sawulo waza kukondya kukwiza u witumami wawo, wakawuka kanyhi ku Yelusalemi, wakamusola na Yohana mono hanji kacemagwa Maluko.
Айни замон обунашуда:
Metumo ge Watumwa 12: GOG91
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.