Metumo ge Watumwa 10
10
Petelo na Kolineliyo
1Kwali na munhu ku Kayisaliya, litagwa lyakwe Kolineliyo, muwaha we mhuga ye wasilikale igana, yono yacemagwa “Mhuga ye ci Italiya.” 2Yali munhu mwihuwilwa, u mwene hamonga na wa mu nyumba yakwe wose, wali wehuwilwa na kanyhi wali wogopo Mulungu, nayo yetuma zi nyinji, ko kuwataza iwaciwa we Ciyahudi, kanyhi yali yendile kumulomba u Mulungu nhondo zose. 3Yali nha saa tisa ne misi, yakawona ciwonelela mu wupumulilwe, Malayika wo Mulungu yakwinjila mugati no kumutya, “Kolineliyo.” 4Nayo Kolineliyo yakamunugulila meso yuyo Malayika kuno yakogopa, yakatya, “Alo ko cilici Muwaha?” Nayo Malayika yakamutya, “Mulungu kawubocela wulombe wako, hamonga no wulavye wako kuli waciwa. 5Alu, wutume wanhu wabite ku Yopa, wakamusole yunji Simoni, litagwa linji kacemagwa Petelo. 6Yekaye kwa yunji Simoni munoza zinyhingo, kaya yakwe yili ha mwejelele we lilenga.” 7Yuyo Malayika mono vyalonganaga nayo, yaza wuka, Kolineliyo yakawacema iwetumami wakwe wejete, no musilikale mwihuwilwa, muyagwe na wono wamwitumamilaga nhondo zose, 8yakawasimuliziza zizo zose, yakawatuma wabite ku Yopa.
9Imitondo yaco, lono wanhu wawalya i wadatu wali wakali mu muhinzo, ninga wali wali behi no kufika ku Yopa, Petelo yakabita kucanyha ku golofa mu saa sita ye misi, kulomba. 10Yakadabuka, yakasaka kulya zindigwa, na lono zali zikali kunozelezwa, yakebatwa na nhongo nzito, yakapumulilwa. 11Yakawona wulanga wudiguce, na cinhu kotya yimwenda yiwaha, likutimywa mu mamhembo gayo mane ho hasi. 12Na mugati ye limwenda lilyo, mwali mogali mawala gose ge vilimu, ivilimu vye migulu mine, ne vilimu vyono vitambalaga hasi, ne zindeje za mucanyha. 13Yakahulika lizi likumutya, “Petelo, winuce wuwulaje vilimu vivyo, wulye.” 14Petelo yakatya, “Ngʼo, Muwaha, hambi ane nha nghali sinalya co cose icisemunwa, hamba cavu.”
15Ilizi lililya likahulikwa kanyhi likamutya “Ulece kutya visemunwa, ivinhu vyono Mulungu yakondizye kuvyeza.” 16Inghani yiyi, yiketumwa nghanghulo yidatu, hanyuma limwenda lilya, likagomolwa ku wulanga.
17Petelo lono yali yakali kwizina muli zono yapumuliywe, nhunizo yayo cici, wawalya wanhu wono wali watumwa na Kolineliyo waza kuyiwona nyumba ya Simoni, wakema ha mulango, 18wakacema kwe lizi wakutya, “Ati ho yuli mujenzi baha mono yakucemwa Simoni Petelo?”
19Na Petelo lono yali yakali kwihwesa zo wupumulilwe, ho baho u Muhe yakamutya, “Hulicize! Howali wanhu wadatu baha wono wakukulondola. 20Ale winuce mbela mubitane nawo, hamba wulece kwihwelela, hambi nha nene niwatumile.” 21Hobaho Petelo yakatima hasi, yakawatya wawo wanhu, “Ane baha mono mukunondola, nhawulenyi muza?” 22Wanhu wawo wakamutya, “Kolineliyo u muwaha we wasilikale igana, munhu mono yali lingʼani, kanyhi mwihuwilwa mono kamogopago Mulungu, kanyhi mono yena lilumbo mu nghungugo yose ye Wayahudi, kacituma. Yalonjelwa na Malayika mono yelile, yakuceme wubite ku kaya yakwe, ho yahulice nghani yo yose yono kowa wina nayo yo kumulonjela.” 23Petelo yakawacemela kugati, yakawapela hanhu ho kugona mu cilo cico. Imitondo yaco, Petelo yakenuka yakabitana nawo, na wenji we zindugu wa ku Yopa wakajendana nayo. 24Na mwizuwa lye kejete, wakenjila ku Kayisaliya. Nayo Kolineliyo yawalindilizaga, yali yawakonghola ne wendece wakwe. 25Baho Petelo lono yenjliaga, Kolineliyo yakamuhinjliiza, yakafugama ha mwande yakwe, yakenama ho hasi. 26Ninga Petelo yakamwinula, yakamutya, “Winukaje, hambi nane nha nili munhu du.” 27Na Petelo walonganaga na Kolineliyo, akuno wakwinjila mu nyumba, na mumo mu nyumba, wakawagana wanhu wenji wekonghoye. 28Petelo yakawatya, “Nyenye nyo weneco mumanyile vyono Muyahudi wo wose, wulajilize wakwe we dini wukumulemeza yalece kwilunza ne wanhu we makungugo ganji. Ninga u Mulungu kandajilila ʼne vyono ndece kumutya yunji musemunwa, lunji mwavu.” 29Ku soko yiyo holeka mweza kunyhema si nemile kuza. Holeka alu nghusaka kumanya cono munyhemeye? 30Kolineliyo yakatya, “Alu vyapuluta vilo vidatu vyono mwipango kotya lili, lye saa tisa ne misi, nalombaga mu nyumba yangu, kumbe kwa nhinicizo du, munhu mono yali yavwalile vivwalo vyono vikungʼalala, yakema hali nene, 31yakatya, Kolineliyo, Mulungu kawubocela wulombe wako, hamonga ne vilavya vyako kuli waciwa.” 32Alu, wutume munhu yabite ku Yopa, yakamuceme munhu yunji litagwa lyakwe Simoni, ne litagwa linji kacemagwa Petelo, yekaye mu nyumba ya Simoni munoza zinyhingo, ha mwejelele we lilenga. 33Holeka nane nghawa kukutumila wanhu lwa kamonga, nagwe kunoza viswanu kuza, alu ase wose cili baha hali Mulungu, cizihulicize zose zono Muwaha yakulajilize wulonje.
U wuganule wa Petelo
34Hobaho Petelo yakatya, “Alu mbeka ho natanga vyono u Mulungu yasina wuwaguzi. 35Ninga munhu we nghungugo yo yose, mono kamogopago Mulungu, ho kwituma ze lingʼani yo yakubocelwa nayo. 36Ayi yo nghani yo Mulungu yono yawategulila iwana wa Isilayeli, yakuganula u Luganuzi Luswanu lono lukule ta mulamu muli Yesu Kilisito, mono yo Muwaha wa wose. 37Anye muyimanyile inghani yilya yono yejela mu yisi yose ye Wayahudi, kuwulawilila ku Galilaya, hanyuma yo wubaputizo wono waganulwa na Yohana. 38Yo Yesu wa Nazaleti, mono mumumanyile vyono u Mulungu yamwitila Muhe Mono Yelile ne vilungo. U Mulungu yali yali hamonga nayo, umwene yakola ako na ako yakwituma viswanu, no kuwaponya wose wono wagazagwa na Setani. 39Nase cili wahomelezi wa zose, zono yatendaga mu yisi ye Wayahudi, na mu Yelusalemi. Wamuwulaga, wakamutumbika mu musalaba, 40ninga u Mulungu, yakamuzukula mwizuwa lye kadatu, yakamunoza yejele, 41ninga si kuli wanhu wose, langa kuli wawo wono u Mulungu yali yakondya kuwahagula wawe wahomelezi wakwe, wo wutya, yo sese mono calizana no kungʼwezana hamonga nayo, lono yali yazuka muli wafu. 42Yakacilajiliza ciwaganulile wanhu wose u Luganuzi Luswanu, no kuhomelela vyono u mwene yo yahagulwa no Mulungu, yawe Mulingʼanizi we womi ne wafu. 43Sunga ne wawizi wose walonga zo Mwene, vyono munhu wo wose mono komwihuwila, kopegwa wunenelwe wo wubi wakwe mwitagwa lyakwe.”
Kolineliyo na wa mu nyumba yakwe, wakuniubocela Muhe Mono Yelile
44Na lono Petelo yali yakali yakulonga zinghani zizi, u Muhe Mono Yelile yakawatimila wose wono wayihulicizaga nghani yiyo. 45Wawalya Iwayahudi wono wali wehuwila, wono wazana na Petelo kulawa ku Yopa, wakezina muno, waza wona vyono Mulungu yawetiye icipegwa co Muhe Mono Yelile iwanhu we makungugo ganji nha vivilya, 46hambi nha wawahulika wakulonga munhu na nonga yakwe yono yisimile, wakumukumyo Mulungu. Hobaho Petelo yakatya, 47“Wanhu wawa wamubocela u Muhe Mono Yelile nha vyono sese co weneco vyono camubocela. Wulenyi hoyuli yunji mono kosuma kuwemila wawa ho walece kubaputizwa?” 48Hobaho yakawatya, wabaputizwe mwitagwa lya Yesu Kilisito. Wakamunena yekale nawo baho vilo vitela tele.
Айни замон обунашуда:
Metumo ge Watumwa 10: GOG91
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.