मत्ती 18
18
स्वर्गे राज़ा दी बडअ कुंण आसा?
(मरकुस 9:33-37; लुका 9:46-48)
1तेभी नाठै च़ेल्लै ईशू सेटा लै पुछ़दै “स्वर्ग राज़ा दी सोभी का बडअ कुंण आसा?”
2एसा गल्ला शूणीं ईशू एक होछ़अ ज़िहअ लान्हअ आप्पू सेटा शादी करै तिन्नां मांझ़ै खल़अ किअ और बोलअ, 3“हुंह खोज़ा तम्हां का सत्त कि, ज़ै तम्हैं आपणीं ज़िन्दगी नांईं बदल़े और लान्हैं ज़िहै भोल़ै नांईं बणें, तै निं तम्हैं स्वर्ग राज़ा डेऊई सकदै। 4ज़ुंण बी आपणैं आप एऊ लान्हैं ज़िहअ होछ़अ बणें, सह हणअ स्वर्ग राज़ा दी बडअ।
5 “ज़ुंण बी मेरै नांओंआं करै एक इहै लान्हें कदर करा सह करा मेरी कदर।
पाप करने परिक्षा
(मरकुस 9:42-48; लुका 17:1,2)
6 “ज़ुंण मुंह दी विश्वास करनै आल़ै का पाप कराऊआ तेऊ लै दैणीं परमेशरा सज़ा। च़ाऐ सह मणछ इना लान्हैं ज़िहअ किल्है निं होए। तेऊ लै हणअ त इहअ ठीक कि तेऊए गल़ै बडी टोल्ह बान्हीं करै पाणअ त सह डुघै समुंदरै डबेऊई।
7 “तिन्नां लै एछणी बडी भारी खरी! ज़ुंण दुजै का पाप कराऊआ। परिक्षा रहा संसारा दी एछदी लागी पर तेऊ मणछा लै एछणी खरी ज़ुंण दुजै का बी पाप कराऊआ।
8 “ज़ै तूह आपणैं हाथा खूरा करै पाप करा, ता तिन्नां कर आप्पू का दूर च़ाऐ ताह तिंयां काटणै किल्है निं पल़े। टुंडअ लाट्टअ हई सदा रहणैं आल़ी ज़िन्दगी लै डेऊणअ आसा ताल्है एता का भलअ कि दुही हाथा और दुही खूरा संघै तूह नरके आगी दी पल़े।
9 “ज़ै तेरी आछी का कई गल्ला भाल़ी तूह पाप करा, ता तिन्नां पापा दी पाणै आल़ी गल्ला भाल़णैं छ़ाड। च़ाऐ ताह सह पोर्ही किल्है निं पल़े काढणीं। कांणै हई करै आसा ज़िन्दगी लै डेऊणअ एता का राम्बल़अ कि दूई आछी रहंदी तूह नरके आगी दी पल़े।
लुक्की दी भेडे कथ्या
(लुका 15:3-7)
10 “धैन डाहै तम्हैं निं इना होछ़ै लान्हैं मांझ़ै कोही बी नकाम्मअ समझ़ी। किल्हैकि हुंह बोला तम्हां लै इहअ कि इने हेर-सभाल़ करनै आल़ै स्वर्ग दूत रहा स्वर्गै हर बगत मेरै बाप्पू परमेशरा सेटा। 11किल्हैकि हुंह मणछो शोहरू आसा शोठुऐ दै बच़ाऊंदअ आअ द।
12 “तम्हैं किज़ै समझ़ा? ज़ै कसा मणछे शौ भेडा होए, और तिन्नां मांझ़ै एक भेड़ कबाता पेठे, तै कै नडिनुंऐं भेडा छ़ाडी सह नाल़ै-धारा हर ज़ैगा तेसा लुक्की दी भेडा लोल़अ निं डेऊणअ?
13 “ज़ांऊं सह भेड़ भेटी जाए, ता हुंह खोज़ा तम्हां का सत्त कि सह निं तिन्नां नडिनुंऐं भेडा लै ज़ुंण तेऊ ई सेटा ती, तेतरी खुशी निं तेऊ हणीं, ज़ेतरअ कि एसा भेडा लै खुश हुअ। 14इहअ ई थारै बाप्पूए ज़ुंण स्वर्गै भेडा आसा, सह निं इहअ च़ाहंदअ कि इना होछ़ै मांझ़ै एक बी बरैबाद होए।
ज़ुल्म करनै आल़ै संघै बर्ताअ
15 “ज़ै तेरअ साथी भाई ताल्है ज़ुल्म करे, ता कांगनरांगै डेऊई करै तेऊ संघै गल्ला; संघा दैऐ तेऊ समझ़ाऊंणी। ज़ै सह तेरी शुणें, तै गअ ताह आपणअ भाई भेटी। 16ज़ै सह नांईं शुणें, तै निंऊं दूई मणछ आप्पू संघै होर किल्हैकि बधाने साबै लोल़ी हरेक गल्ला दूई या चिई गवाहीए सम्हनै हूई।
17 “ज़ै सह तिन्नें बी नांईं शुणें, तै खोज़ एसा गल्ला विश्वासीए मंडल़ी मांझ़ै। पर ज़ै सह तिन्नें बी नांईं शुणें, तै समझ़ै तेऊ तूह होरी ज़ातीओ कारै मांगणैं आल़ै मणछा ज़िहअ।
रोकणअ और मोक्कअ दैणअ
18 “हुंह खोज़ा तम्हां का सत्त कि ज़ुंण बी तूह पृथूई दी तिन्नां लोगा लै रोके, सह रोकणअ स्वर्गै और ज़ुंण बी तूह पृथूई दी ज़ाज़त दैए, तेता लै भेटणीं स्वर्गै ज़ाज़त।
19 “तेखअ बोला हुंह तम्हां लै इहअ बी कि, ज़ै तम्हां मांझ़ै दूई ज़ण्हैं पृथूई दी कोई बी गल्ला लै; ज़ुंण तिन्नां मांगणीं, एकी मनें होए, तिंयां गल्ला हेरनी स्वर्गै रहणैं आल़ै बाप्पू परमेशरा तिन्नां लै दैई। 20किल्हैकि ज़िधी दूई या चअन ज़ण्हैं मेरै नांओंऐं कठा हआ, तिधी हआ हुंह आप्पू तिन्नां संघै।”
नर्दैई टैहलूए कथ्या
21तेखअ बोलअ पतरसै, “हे प्रभू, ज़ै मेरअ साथी भाई मुल्है ज़ुल्म करे, तै हुंह केतरी बारी छ़ाडूं तेऊ लै माफी? कै साता बारी तैणीं” 22ईशू दैनअ तेऊ लै ज़बाब, “हुंह निं ताल्है बोलदअ कि सात बारी कर तेऊ माफ। पर साता बारीए सत्तर गुणा करी करै छ़ाडै तेऊ लै माफी।
23 “तैहीता स्वर्गो राज़ आसा तेऊ राज़ै ज़िहअ, ज़ुंणी आपणैं टैहलू का साब-कताब करनअ च़ाहअ। 24ज़ांऊं सह साबा-कताबा लंदअ लागअ ता एक मणछ आअ तेऊ सेटा लै इहअ; तेऊ त राज़ैओ दसा हज़ारा सुन्नें सिक्कैओ धुआर। 25पर तेऊ का नांईं त धुआर भरना लै एक धेल्लअ बी आथी! तेखअ बोलअ तेऊए मालकै तेऊ लै इहअ, ‘अह और एऊए बेटल़ी और एऊए सारी ज़ैदात पाआ बेच़ी और तेता करै करा एऊओ धुआर पूरअ।’
26 “इहअ शूणीं तेऊ टैहलू मालक सेटा माथअ टेक्कअ और धरनीं नाका करै रेखा दैनी और मालक सेटा की एही अरज़, ‘हे मालक, मन मार, हुंह भरूं तेरअ सारअ धुआर।’ 27तेखअ फिरी तेऊ मालका तेऊ टैहलूए झींण और तेऊओ धुआर माफ करी करै छ़ाडअ सह तिधा का घरा लै।
28 “पर ज़ांऊं सह टैहलू बागै निखल़अ ता तेऊ भेटअ आपणअ साथी च़ाकरी करनै आल़ै मांझ़ै एक ज़ण्हअ। ता तेऊ तै तेऊए शौ च़ंदीए सिक्कै धुआर दैनै दै, ज़ेते किम्मत चिई भिन्नैं दसा धैल़ीए मज़दूरी बराबर हआ ती और तेऊ ढाकअ सह गल़ा का संघा बोलअ तेऊ लै इहअ, ‘ज़ुंण किछ़ बी ताह मेरअ धुआर आसा, तेऊ दैऐ एभी मुल्है बापस।’
29 “एसा गल्ला शूणीं लागअ तेऊओ साथी टैहलू तेऊ सेटा माथअ टेकी करै लेरा लाई अरज़ करदअ, ‘मन मार, हुंह भरूं तेरअ सारअ धुआर।’ 30पर तेऊ निं तेऊए गल्ला मनी और सह किअ तेऊ इहअ बोली करै कैद खानै दी बंद, ‘ज़ेभै तैणीं तूह मेरअ धुआर नांईं भरे, तेभै तैणीं रहणअ तूह इधी बंद।’
31 “तेऊए होरी साथी टैहलू ज़ुंण तेऊ संघै हुअ त, तेता भाल़ी करै हुऐ बडै भारी दुखी और तिन्नैं बी खोज़ी ईंयां सारी गल्ला आपणैं मालका का। 32तेखअ शादअ सह टैहलू तेऊए मालकै और तेऊ लै बोलअ, ‘हे कदुष्ट, तंऐं ज़ेभै मुखा अरज़ की ती, मंऐं ता तेभै तेरअ पूरअ धुआर माफ किअ! 33ता ज़ेही मंऐं ताल्है झींण की, तंऐं बी त आपणैं साथी टैहलू संघै इहअ ई करनअ!’
34 “मालका आई तेऊ लै बडी भारी रोशै और सह पाअ कैद खानै दी सज़ा दैणैं आल़े हाथै। संघा डाहअ तिन्नां लै इहअ बोली कि ज़ेभै तैणीं अह पूरअ धुआर नांईं भरे; तेभै तैणीं निं एऊ बागै छ़ाडी।
35 “ठीक इहअ ई करा तम्हैं बी आपणैं साथी भाई लै आपणैं दिला मना का पाप माफ। ज़ुंण दिला मना का माफ नां करे, ता मेरअ बाप्पू परमेशर ज़ुंण स्वर्गै आसा तेऊ बी करनअ तम्हां संघै इहअ ई।”
Айни замон обунашуда:
मत्ती 18: OSJNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.