मत्ती 14
14
यूहन्ना बपतिस्मा दिणैबाळै री हत्या
(मरकुस 6:14-29; लूका 9:7-9)
1तैस टैमैं चोथै हेस्सै रै देशा रै राजा हेरोदेसै यीशु री चर्चा हुणी। 2अतै अपणैं सेवका सीतै बल्लू यह यूहन्ना बपतिस्मा दिणै बाळा हा, सो मरुरै थऊँ जी ऊठु आ, ठेरेतांई तैस थऊँ सामर्थ रै काम प्रगट भुन्दै।
यूहन्ना री हत्या
3क्योकि हेरोदेसै अपणै भाई फिलिप्पुस री लाड़ी हेरोदियास रै कारण, यूहन्ना जो पकड़करी बनू अतै जेलखानै मन्ज पाई दित्ता थू। 4क्योकि यूहन्नै तैस सोगी बलुरा थू की ऐहा जो रखणा तिजो तांई ठीक निया। 5अतै हेरोदेस यूहन्ना जो मारना चाहन्दा थू, पर मणु थऊँ डरदा थू क्ओकि सो तैसिओ भविष्यवक्ता मन्दै थियै। 6पर जैहणै हेरोदेस रा जन्मदिन आ, ता हेरोदियास री कुल्ळी हेरोदेस रै जन्मदिना रै जशना मन्ज नची करी हेरोदेस जो खुश करू। 7ता तिनी तैहा सितै सौगन्द खाई करी बचन दिता कि, “तू जैडा कुछ मंगली, अऊँ तिजो दिला।” 8तैहै अपणी माता हेरोदियास रै बहकाणै पुर बल्लू कि, “मिन्जो यूहन्ना बपतिस्मा दिणैबाळै रा सिर थाळा मन्ज ऐठीये ही मँगवाई देय्आ।” 9हेरोदेस दुखी भूआ, पर अपणी सौगन्द री वजह थऊँ, अतै अपणै सोगी बैहुरै मणु री वजह थऊँ, हूक्म दिता कि; दि देय्आ। 10अतै तिनी जेला मन्ज ही सपाई भैजी करी यूहन्ना रा सिर कटवाई दिता; 11अतै तसेरा सिर थाळा मन्ज रखी करी अन्दा अतै कुल्ळी जो दी दिता, तैतिओ सो अपणी माता बलै लेई गई। 12ता यूहन्ना रै चेलै आये अतै तसेरी लाशा जो लेई गै अतै दब्बी दिता, अतै गिचीकरी यीशु जो ऐह खबर दिती।
पँज हजार मणु जो खुआणा
(मरकुस 6:30-44; लूका 9:10-17; यूहन्ना 6:1-14)
13जैहणै यीशुऐ ऐह हुणु ता सो किस्ती पुर चढ़ी करी कसकि सुनसान जगहा जो, एकान्त मन्ज चली गो। मणु ऐह हुणी करी नगरा नगरा थऊँ पैदल ही तसेरै पिचो चली पै। 14तिनी सो भीड़ हेरी अतै तियां पुर तरस खाऊ, अतै तियां मन्ज बमारा जो ठीक करू। 15जैहणै सँझ भूई ता तसेरै चेलै तैस बलै ईच्ची करी बलणा लगै, “ऐह अक्क सुनसान जगह हा अतै देर भी भूचु करदी हा; मणु जो भैजी दिन्दै कि ऐह ग्राँ मन्ज गिच्ची करी अपणै तांयें खाणै जो लैईन।” 16पर यीशुऐ चेलै सितै बल्लू, “ईआंरा गाणा जरूरी निय्आ! तुहै ही ईयां तांयें खाणै जो देय्आ।” 17चेलै यीशु सोगी बल्लू, “असु बलै पँज रोटी अतै दूँ मछली जो छड़ी करी होर कुछ भी निय्आ।” 18तिनी बल्लू, “तियां जो मिन्जो बलै लेई अईआ।” 19ता तिन्यै मणु जो घा पुर बैहणै जो बल्लू, अतै तियां पँज रोटी अतै दूँ मछली जो लैऊ; अतै स्वर्गा री कनारी हेरी करी धन्यवाद करू अतै रोटी त्रोड़ी त्रोड़ी करी चेलै जो दिती, अतै चेलै मणु जो दिन्दै गै। 20जैहणै सब खाई करी रजी गै ता चेलै बचुरी टुकड़ै री रोटी री बारह टोकरी चुकी। 21अतै खाणैबाळै मन्ज जनानी अतै बच्चै जो छड़ी करी लगभग पँज हजार सिर्फ मर्द ही मर्द थियै।
यीशु रा पाणी पुर चलना
(मरकुस 6:45-52; यूहन्ना 6:15-21)
22ता, जैहणै तक कि यीशु मणु थऊँ विदा लैन्दा, तिनी झट अपणै चेलै जो किस्ती पुर चढ़णै तांयें मजबुर करू कि सो पैहलै पारा जो चली गान 23सो मणु थऊँ विदा लेई करी, प्रार्थना करना अलग पहाड़ा पुर चली गो; अतै संझा सो तैड़ी अकेला थू। 24तैहणै तक किस्ती झीला री लैहरा मन्ज डगमगाऊ करदी थी, क्ओकि सामणै थऊँ हवा लगू करदी थी। 25यीशु राती रै चोथै पैहरै झीला पुर चलदा चलदा तियां बलै आ। 26चेलै तैसिओ झीला पुर चलदै हेरी करी ड़री गै। अतै बलणा लगै, “ऐह भूत हा।” अतै ड़रा रै लेरा पाणा लगै। 27ता यीशुऐ झट तियां सितै गल्ला करी अतै बल्लू, “हिम्मत रखा! अऊँ हा ड़रा मत!” 28पतरसै जवाव दिता, “हे प्रभु, अगर तुहै हिन ता, मिन्जो पाणी पुर चली करी अप्पू बलै ईणा देय्आ।” 29यीशुऐ वलु, “अई” ता पतरस किस्ती थऊँ ओसी करी पाणी मन्ज चलना लगा। 30पर जैहणै पतरसै तेज हवा री कनारी ध्यान करू ता सो ड़री गो, अतै जैहणै डुबणा लगा ता लेरा पाणा लगा, “हे प्रभु, मिन्जो बचा!” 31यीशु झट अपणा हत्थ अगो करी कै तैसिओ पकड़ी लैऊ अतै तिनी बल्लू, “हे थोड़ा विस्वास रखणै बाळै, तू कजो शक करदा हा?” 32जैहणै सो किस्ती पुर चढ़ी गै, ता हवा रूकी गई। 33ऐह हेरी करी जैड़ै किस्ती पुर थियै, तैसिओ प्रणाम करीके बलणा लगै, “सच मन्ज ही तू प्रमात्मैं रा पुत्र हा।”
गन्नेसरत मन्ज रोगी जो ठीक करना
(मरकुस 6:53-56)
34सो गलील झीला पार गन्नेसरत नां रै ग्राँ मन्ज पुजै। 35तैड़ीआ रै मणुऐ तैसिओ पछैणी लैऊ अतै अखै-ब्रखा रै सब देशा मन्ज समाचार भैजु, अतै सब बमारा जो तैस वलै लेई आये, 36अतै तैस सोगी बिनती करणा लगै कि सो तियां जो अपणै कपड़ै रै पल्लै जो छुणा दे, अतै जैतणै तैसिओ छुन्दै गै सो सब ठीक भुन्दै गै।
Айни замон обунашуда:
मत्ती 14: GBKNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.