Mateu 4
4
Kunyengererwa kwa Yezu
(Marku 1:12,13; Luka 4:1-13)
1Buluka penepo, Yezu akwatiwa na Nzimu Wakucena mbaenda n'thando, kuti aende kanyengererwe na Dyabu. 2Pidamala iye kupimana cakudya ntsiku makumanai, masiku na masikati, Yezu abva njala. 3Penepo, Dyabu nyakunyengerera, afendedzera Yezu dhuzi mbampanga tenepa: “Ngakhala iwe ndiwedi Mwana wa Mulungu sanduza myala iyi idze mikate.”
4 # Lang'anambo: Dt. 8:3. Mbwenye Yezu antawira tenepa: “Pyalembwa m'Bukhu ya Mulungu kuti: ‘Si cakudya basi tayu cinapulumusa munthu, mbwenye na mafala onsene anabuluka pa mulomo wa Mulungu’”
5Buluka penepo, Dyabu ankwata mbaenda na iye ku nzinda wakucena, ankwiza padzulu kakamwe pa Nyumba ya Mulungu, 6#Lang'anambo: Mas. 91:11,12.mbampanga tenepa: “Ngakhala iwe ndiwe Mwana wa Mulungu, numpha padzulu pano ugwe pantsi, thangwi pyalembwa kuti:
“ ‘Mulungu anadza kapanga anju zace pa thangwi yako,
pontho iwo anakugampha na manja awo,
toera ukhonde kuphekeka
na myala.’”
7 # Lang'anambo: Dt. 6:16. Mbwenye Yezu antawira tenepa: “Pyalembwambo n'kati mwa Bukhu kuti: ‘Leka kunyengerera Mbuya Mulungu wako.’”
8Penepo Dyabu akwata Yezu mbaenda na iye pa phiri yakulapha kakamwe, mbampangisa umambo onsene wa pantsi pano na mbiri zawo, 9mbampanga kuti: “Pyonsene ipi ndinakupasa, male ungandigodamira mbundilambira.”
10 # Lang'anambo: Dt. 6:13. Yezu ampanga kuti: “Buluka, Sathani! Thangwi pyalembwa m'Bukhu ya Mulungu kuti: ‘Lambira Mbuya, Mulungu wako, pontho phatira basa iye ekha basi’”
11Penepo Dyabu ansiya, mbabwera maanju kudza kaphatira basa Yezu.
Kutoma kwa Basa ya Yezu
(Marku 1:14,15; Luka 4:14,15)
12Yezu na kupibva kuti Juwau Bhatixta afungirwa n'kaidi, abwerera mbaenda ku Galileya. 13Yezu abuluka ku Nazareti kukhakhala iye, mbaenda kakhala ku nzinda wa Kafaranaumi, ukhagumanika n'khundu-n'khundu mwa nyandza ya Galileya, ku dziko ya Zebhuloni na ya ku Nafitali, 14toera pisimbiswe pikhadalongwa na mporofeta Izaya kuti:
15Iwe dziko ya Zebhuloni
na ya Nafitali,
dziko inagumanika mu mbale mwa nyandza ya Galileya
na ntunda unango wa nyandza ya Djorodani,
iwe Galileya ya anthu adakhonda kukhala madjuda!
16 # Lang'anambo: Iz. 9:1,2. Mbumba ikhakhala n'cidima,
yaona cieza cikulu.
Pontho kuna ale akhakhala
mu mbuto ya cidima ca kufa,
amwanikirwa na cieza.
17Kutomera n'dzidzi unowu kwenda kutsogolo, Yezu atoma kupfundzisa Mphangwa Zadidi mbakhalonga tenepa: “Chunyukani kudawa kwanu, thangwi Umambo wa kudzulu uli dhuzi.”
Kucemerwa kwa Anyakupfundza
18Yezu pikhafamba iye dhuzi na nyandza ya Galileya, aona anyakokota awiri muubale mwawo, mbakhagwisira makokota awo n'nyandza. M'bodzi ndi Simau, anadziwika pontho na dzina ya Pedhru. Unango ndi Andereya. 19Yezu aapanga kuti: “Nditowereni, Ine ndinakucitani anyakokota a anthu.” 20Na tenepo, iwo pa n'dzidzi ubodzi-bodzi, asiya makokota awo mbantowera.
21Yezu pakufamba pang'ono kutsogolo, aona pontho anthu awiri muubale mwawo. Akhali Tiyago na Juwau, ana a Zebhedheu. Iwo akhali pabodzi na baba wawo m'bote mbakhasona makokota awo, Yezu mbaacemera. 22Penepo pene, iwo asiyiratu bote na baba wawo ene, mbaenda na Yezu.
Yezu Asapfundzisa Mbumba
23Na tenepo, Yezu akhafamba dziko yonsene ya Galileya, mbakhapfundzisa n'kati mwa nyumba za kuphemberera, mbakhalonga Mphangwa Zadidi za Umambo wa kudzulu, pontho mbakhawangisa nthenda zonsene na ale akhaduwala pakati pa mbumba. 24Mbiri yace yamwazika dziko yonsene ya Sirya. Na tenepo, anthu onsene akhaenda kuna Yezu na atenda awo akhathabuka na nthenda zakusiyana-siyana, ninga za mizimu yakuipa, za njiri, na za mpfutete. Zonsene izi Yezu akhaziwangisa. 25Na tenepo, mwinji ukulu wa anthu ukhantowera, kubulukira ku dziko ya Galileya, na ya Dhekapoli, na anthu a ku nzinda wa Djerusalema, na a ku Djudeya, pontho na anthu a ntunda unango wa nyandza ya Djorodani.
Айни замон обунашуда:
Mateu 4: CCHNT13
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Cibverano Cipsa Cisena © Bible Society of Mozambique, 2013.