LUKAS 10
10
Yesus Ara Yok Yuba Lenaʾ Nang Boksuk Yuba
1Onoʾ yok sum era, Wenelesilnya Yesus ara, nimi yok yuba len nang denga penya uboka ebdobnya goklomdaraʾ badya nang era penya-penya yandara nang uboka, yok-yok heikek al yibinemok heik me nidyaʾ heikek binilum aboka boksuk. 2#Mat. 9:37-38Anya Yesus adya sikenek lebsukaʾ ara, ”Nonga daknemak ara nauba ululabok, alda nonga dakne nang enyek mek ok ulumak. Anasa wera, ugunda wa damnya bek, masa nonga daknemeija nang era, bokol yousululaʾ aboka molowolulum. 3#Mat. 10:16Wera ugunda or bululum! Nara ugunuk domba pam eneso ak bei gam hnoum boksin. 4#Mat. 10:7-14; Mrk. 6:8-11; Luk. 9:3-5Ugunda dem akleng eb, rupiah bonaʾ ab, yan ongonaʾ bonaʾ ara mem. Ugunda yok nim ek gibnobaʾ aboka pikek anya dek-deka sonaʾ ara mem. 5Ugunda yok nim edya ek weknelum dara, Ban e nenyek an perobaʾ dalom, henelum. 6E nenyek anara, e damnya bedya ugunub ganya hekoka ulumnemab senewanamla dara, ugunja perob aboka gibnelumnya nera alak sobaʾ ulumnamla, bok orok dara, ugunja hekoka gibmunya nera onsok ugun damnya yanesil. 7#1Kor. 9:14; 1Tim. 5:18Ugunda ban hnonok ek ok ulumnelum. Wa welemna nim era deknaʾ doboka delemakaʾ anasa, ugun ulumun ek anya denaʾ beibnesak dara, doboka delelulum. Yok-yok e pik salyaʾ welem-welem aro yabanaʾ ara mem.
8Ugunda yok senenggom heikek gom yanalum danyek, youmunaʾ anasa perobaʾ lebsijekanya, denaʾ ugunsamba aboka beibnesak dara, or doboka denelum. 9Dara heik enyek an, nimi neiknaʾ nimi or hwebnelum, hnonda Imik Neyung adya eimik ugun gangganek sam wenelemnesilaʾ ara oka yal aro leb eleganesulum. 10#Kis. 13:51Bok ugunda yok heikek yanalum enyek, heik en nim edya ugunuk perobaʾ leboka dobnenggunusak dara, ugunda pikek sam sekel yibiniboka lebnelumja, 11Ugunja heikek ab nunjaʾ yan ak sam oumesilya blesa era ugunuk beknaʾ dibaʾ hab lobsab. Bok ugunuk dara, wera Imik Neyung adya ugun gangganek sam wenelemnesilaʾ anyek oka yalamla anyek ella danalum, henelum. 12#Kej. 19:24-28; Mat. 10:15, 11:24Wera, ugunuk lebsin. Soko sidyaʾ daknamla sum era, Sodom nim ek dara, malya unaʾ amba mek so obnesil bok, ban sikja unuwanamak heik nim malya unaʾ amba nauba so obnesil,” hyok.
Imik Neyung Ak Dib Senenaʾ Orok Heikek Yuba
(Mat. 11:20-24)
13 #
Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 ”Korazim heik o, anak dara hyak omomaʾ ak ululam! Betsaida heik o, anak dara hyak omomaʾ ak ululam! Ugun gangganek an unulamla migib ununaʾ enyek, Sidon heikek hnon Tirus heikek seleb unusobok dara, wera heik enyek an nim era seleb nidyaʾ malya unaʾ loboka ganya dangawoka, sikda soloma kweboka engelemak anaʾ dibaʾ ara, sikja huk era aso lobgoulob dangamnaseng. 14Soko denghenemla sum era, Sidon nim eb, Tirus nim eb dadya, malya unaʾ amba mek so obnesil bok, ugunuk dara, nauba obnesil. 15#Yes. 14:13-15Alda Kapernaum heik o, anak dara, im nongok eini nenewananel senelelam de? Orok! Alda anda gobdo somoknaʾ nim heikek boboganenggel!” hyok.
16 #
Mat. 10:40; Mrk. 9:37; Luk. 9:48; Yoh. 13:20 Anya Yesus ara alja yuba doro diriga ban nang ek, ”Nim ugunja yuba kelesak nim era, sikda nadya yub ek kelenyak. Alda ugunuk lek alasak nim era, sikda nak lek alanyak. Anya wera, nak lek alanyak nim era, sikda nadyaʾ neyung be na bokol yeilinyoknya bek, lek alamak,” hyok.
Bokosuk Nang Yeilimek Yuba
17Nimi denga penya uboka eb loboka bokosuk yuba len nang era, ganya hyak eiya daboka onoʾ yek. Anya sikja dara, ”Wenelesilimnya o, wera bisaʾ anaba nunja anja si sibuka goboka bilom wenyal yaban dara, nunja yub era pe kelesak!” hyek. 18Danyek Yesus adya sikenek lebnesukaʾ ara, ”Bisaʾ dubnya Satan ara ebnaʾ langam-langam aboka, imik abaʾ ara malyinggyukaʾ ak eibsa. 19#Mzm. 91:13Ugunda banyek pe kebnalum! Ugunda bagaʾ ab, siribnaʾ ab, yok isaʾ nang migib ab, ugunuk sam hnon malya nenesinaʾ orokaʾ anyek, yan ingib saboka hmenga nenelelulumaʾ aboka nadya migib era ugunuk elegeisisa. 20Ban seleb bisaʾ ara ugunja yuba keboka goboka balamlaʾ amba leboka perob senewoka ei-ei ganya bonaʾ ara mem. Alda ugunja si nenyek imik heikek sam momnya dolosilaʾ anasa leboka ei-ei ganya bololulum,” hyok.
Yesus Nong Anaba Eiya Dabok Yuba
(Mat. 11:25-27, 13:16-17)
21Dara ban neik salek Yesus anaba, alda ei-ei ganya bomokaʾ ara, Imik Neyung Geisinya adya deknemokaʾ adya umok. Anasa Yesus adya dara, ”Neyung, Wenelesilimnya o, anda soko ab im ab dubnya ululam! Nara anak perob aboka gibgenaʾ ara, ban nidyaʾ unulusilimaʾ ara, geremseng nang eb, yokaʾ-yokaʾ ella danganaʾ dolomak nim ek ara gunuweisinjok, alda mek so nim ek anyek laga nekoka amalesilimaʾ anasa gibgen. Ban unululamaʾ ara, anja ganya adya uboka, perob senelelamaʾ anasa perob,” hyok.
22 #
Yoh. 3:35, 10:15 ”Yokaʾ-yokaʾ nidyaʾ ara neyung bedya nak lebnyok. Nimi nidyaʾ ara me ak ara elgom ulumak bok, neyung anak ok hnonok ella ulunelem. Nim adya dara, anak elgom ulunjak bok, anja me nedya danyek, hnonok ella ulunggen. Anya hek nim ek, me nenedya neyung bera ban aboka neksin nang edyaʾ anaba ella ulunjak,” hyok.
23Dara Yesus ara alja yuba doro diriga ban nang ek keeboka, onoʾ sikba youkowek lebsukaʾ ara, ”Ugunda wen an eiblumnya nenyek, yok nim anaba eillilimak nim era pe ulumak. 24Anasa ban nenyek lebsin, Youmaʾ ununumnaʾ lelemek nang eb, dub nang eb dara, ugun an wen eiblumnya nenyek eibnob senewoka diri ulumek bok, hyak mekaʾ eruwanggubek. Sikda ugun wen an kelelumnya nenyek, kebnob senen diri ulumek bok, kebnenggubek,” hyok.
Samaria Nanga Hnon Pe Unumok Aboka Sunuwok Yuba
25 #
Mat. 22:35-40; Mrk. 12:28-34 Dara onoʾ Yahudi yuba neksinya ben hnon Yesus ak sene sunuwonunaʾ aboka goboka sekel yeilimok. Benedya Yesus ak, ”Neyung neklesilimnya o, nara hekaʾ ak hubnyaʾ adya embeng unaʾ ara dobnamna do?” aboka heibuk. 26Danyek Yesus adya benyek an lebokaʾ ara, ”Imik Neyung adya unuwanalum an yuba bukuk sam ara, hekaʾ aro momnya dobok do? Anja dara, nera hekaʾ ak lebok senelelam do?” aboka saaboka heibok. 27#Im. 19:18; Ul. 6:5Wenyek benedya lebokaʾ ara, ”Anda Imik Neyung bek ganya gebman adya wanaʾ ululom, anja nong unaʾ gebman adya wanaʾ ululom, anja nong migib gebman adya wanaʾ ululom, anja ganya seininaʾ gebman adya hnon wanaʾ ululom. An dam nang wanaʾ uldalalam sok, an kabo nim ek wanaʾ ululom, wenhyok,” hyok. 28#Im. 18:5Danyek Yesus adya, ”Anja leblamaʾ dara, dib leblam. Ban nenyek nidyaʾ unulumen dara, wera anda embeng unaʾ dib dobnelam,” hyok.
29Bok Yahudi yuba neksinya bedya perobnya benyaʾ beknaʾ donulul senewok. Anasa, ”Na kabo nim era hek nim ek lelam do?” aboka heibuk. 30Dara, Yesus adya benyek an lebokaʾ ara, ”Nimi ben hnon alda Yerusalem heikek abaʾ ara Yerikho heikek yanggalamok. Pikek anam yanggalamok bok, beiyek nim edya pika weboka, alja bonaʾ nidyaʾ dorowoka, al nonga hyakaʾ oboka, anya wera pik ganggan ob loyi byik. 31Wera onoʾ neik pikek ara, yuba wa gaknya ben hnon yanggalamok. Dara benyek oboka pikek meiyimekaʾ eibuk dara, bera pika leiboka byuk. 32Anasonya neikek, Lewi nang ben hnon al on pik enyek an yanggalamokaʾ anaba, ben mamokaʾ eibuk dara, wera neikso mok so geboka byuk. 33#2Taw. 28:15Bok, onoʾ neik pik era, Samaria nanga ben hnon balamok. Wera ban ben oboka beiyimekaʾ eibuk dara, alja ganya hyak angoo aboka yadyeka wanaʾ dabok. 34Dara ok berem biniboka, alja omek menengaʾ mek elegoka, ngiknaʾ mek adya ngikoka, kenaʾ adya keboka hwemok. Ban nen seleb unubgogowok dara, alja abaksin pam ek bukiyiwok dara, dekoka man ek bo biniboka, meewoka hwero bo mabok. 35Ampum maboka gwelegok dara, hweboka bo mamoknya bedya e damnya bek rupiah penya doboka elegoka lebokja, Anyagan hweboka bo ululom. Dara, rupiah nauba so dalya dara, yok sum yanggannya dara, eleganenggen,” hyok.
36Dara Yesus ara ban sununaʾ enera ban nenyek sidyaʾ heiboka lebokaʾ ara, ”Ban winilya nang danara, har berek oboka beiyimeknya alkabo dangamok senelam do?” hyok. 37Dara, Yesus ak sene heil yeilimoknya bedya dara, ”Oblomekaʾ anyek angoo yadyek senewoka arawoknya benyek alkabo dangamok, senewan,” hyok. Yesus adya benyek lebokaʾ ara, ”Wei, wera anasa, ambabya biniboka anaso unulumnulam!” hyok.
Marta Geb Maria Gekdak Kemel Busuk Yuba
38 #
Yoh. 11:1
Wera onoʾ Yesus ab alja yuba doro diriga ban nang era, pikek balamekaʾ ara, yok mek heikek wekel byik. Heik enyek anyeb gela hnon alja si nera Marta gedya, Yesus ak nadya ek yalom aboka e byuk. 39Marta gera alja weisa yak gel, anya gel genedya si nera Maria. Ban Maria genera Yesus dam oka bukoka, Yesus adya lelemok yub enyek, pe kero bulumok. 40Bok Marta gek dara, gelewa ek welemak wa nenyek yeiriwoka webdibigemok. Danyek Marta gedya Yesus ak biniboka lebokaʾ ara, ”Wenelesilimnya o, anja Marta gera albeyok unululaʾ aboka, Maria gera alda or eiblolam de? Alda nak arawonululaʾ aboka orugalom,” hyok. 41Danyek Wenelesilnya bedya lebokaʾ ara, ”Marta, Marta o. Anak dara, yokaʾ-yokaʾ ganya ok dokoka seiniro balalam. 42Bok alda dib nongaʾ ara hnonok ulumla. Anya Maria gek dara, alak ab yokaʾ adya salyaʾ dobnenggunumlaʾ perobaʾ anyek, weboka dobla,” hyok.
Айни замон обунашуда:
LUKAS 10: LAINLC
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in