YOHANES 1
1
Yub Anyek Nimi Dangamok Yuba
1Hyak men youbuka, nidyaʾ uyiwanggom bok, yub ara seleb ulumok. Yub ara, Imik Neyung ablaboka ulureekanya, yub ara Imik Neyung ulumok. 2Hyak men youmaʾ enyek ab moruwoka, yub ara Imik Neyung ablaboka ulurek.
3Yokaʾ-yokaʾ nidyaʾ ara al adya uyimok. Yoknya nedya, hnonok sibin anaba uyiwanggumok. 4Al lomok ara embeng unaʾ damok ulumlakanya, ban embeng unaʾ ara nim ek dilinaʾ yebellilisil. 5Ban dilinaʾ adya gunaʾ ak sam yeblamlakanya, gunaʾ adya dilinaʾ ak sikleldinggulumla.
6 #
Mat. 3:1; Mrk. 1:4; Luk. 3:1-2 Nimi ben hnon alja si nera Yohanes, Imik Neyung adya wa weblulaʾ aboka bokol yeilimok. 7Al pik uboka nimi nidyaʾ dib senewanokaʾ aboka, ban dilinaʾ enyek, geklewoka neksununaʾ aboka yeilimok. 8Al nong ak dara, ban dilinaʾ nong unggulumok jok, ban dilinaʾ enyek, anya aboka neksunun aboka yeilimok. 9Ban dilinaʾ ara dib nongnya ulumookanya, yeindeboka, nimi nidyaʾ ak sokok an yebellilisil.
10Alda sokok an ulumookanya, soko ara aladya uyimok bok, soko nim edya dara, alak elgom ulumek. 11Aljinya nek yeilimok bok, alja meneng mok nim edya dara, alak perobaʾ leboka dobnenggumek. 12Bok, alak dib domek nanga nidyaʾ ara, alja si nek dib senemek nim era, Imik Neyung mabo dangalamak migiba elegosuk. 13Dara, nimi lunuwoka beillilisakaʾ adya gom, soko nang ganya seininaʾ adya gom, nimi unuwanamna senelamla adya gom, Imik Neyung adya ok Imik Neyung mabo nenesuk.
14Yub ara soko nimi nong dangamookanya, wanaʾ uboka eleksinaʾ hnon, dib yub hnon, alak deknewoka, nun gangganek ulumok. Dara, alak imik nenemok nong senedyaʾ migib era, Imik Neyung alja hnonok me ulumokaʾ adya nong senedyaʾ eiyimouba.
15Yohanes bedya alsamba geklewoka nekesuk. Hnon wenyaro lelemokaʾ ara, ”Nak dara eimik, alda orowek men ulumokaʾ anasa, al eimik yanalanya bera, alak dara senenggomnya, nak dara meknya, wenyamsaʾ ara, ban benyek lemsa,” hyok. 16Dara, alja deknewoka ulumlaʾ ak ab, nunda nidyaʾ domouba. Alja wanaʾ uboka eleksinaʾ elegel sounulusilekanya, sobaʾ dolmorulumab. 17Imik Neyung adya unuwanalum an yub ara Musa bedya elegesuk bok, wanaʾ uboka eleksinaʾ hnon, dib yub damoka hnon dara, Yesus Kristus adya bo yeilisuk.
18Nimi hnonok adya, Imik Neyung bek heng eilinaʾ sibin anaba orok bok, Imik Neyung alja me hnonok ara, alja neyung beb neikaʾ lelewoka uluraakanya, nadya neyung bera ban anaso ulumla aboka nuk amasuk.
Yohanes Bera Laga Lebdok Yuba
(Mat. 3:1-12; Mrk. 1:1-8; Luk. 3:1-18)
19Yerusalem heikik ulumek Yahudi nang edya, yuba gak nang ab, Lewi nang ab, anda heknya do aboka Yohanes bek heil bululum aboka orugomek dara, Yohanes bedya ban wenyaboka laga lebok, 20”Nara Kristus nimi blebsinaʾ dubnya unggulumna,” hyok. Alda gununaʾ loboka, laga poboka lebok. 21#Ul. 18:15, 18; Mal. 4:5Dara, alak heimek, ”Ban wenyalam dara, heknya ululam do? Anda Elia de?” aboka heibek bok, ”Nara Elia benyaʾ gomaʾ,” hyok. Dara, anda eimik yanamla alanjaknya ununumnaʾ lenya bera anda an de?” hyek. Bok, ”Orok,” hyok. 22Dara onoʾ ”Dara, anda heknya ululam do? Orugosak nang ak ban wenyamla henemabaʾ anasa, nara benyaʾ aboka neksilom. An dam nang ak hekaʾ aldalalam do? aboka heibek. 23#Yes. 40:3Alda wenhyok, ”Ununumnaʾ lelemoknya Yesaya wenyamok sok lebsin, Nara gasak sokok ulumnakanya, Wenelesilnya alja pik jong peiyiwolulum aboka lelenanya ulumna,” hyok.
24Heil bululum aboka orugosik nang danera, Parisi nang ulumek. 25Dara, sikda Yohanes bek, ”Anda Kristus unggululam, Elia unggululam, eimik yanamla alamek ununumnaʾ lenya unggululam jok dara, hekasa meka dalasilim do?” aboka heibek. 26Alda wenhyok, ”Nara mek dem adya ok dalasin bok, ugun gangganek sam ara, ugumba elgom ululumnya ben hnon ulumla. 27Alda eimik nak yanalanya bera, alda senenggomnya bek anasa, nara meksonya bedya dara, alja yan ongonaʾ henga loboka gwiriwanggunusinya,” hyok. 28Ban nidyaʾ unulumoknya nera, Yordan meka gobuka eer sam Betania heikek Yohanes bedya meka dalasukaʾ ak ab ulumok.
Yohanes Bera Yesus Ara Imik Neyung Domba Pam Hyok Yuba
29Ampum ara, Yohanes bedya Yesus ara alak yalamokaʾ eiyimok dara, ”Soko nimi malya unaʾ doboka boboganesilnya Imik Neyung domba pam ara kendululum. 30Nak eimik yanalanya ara, alda men ulumok anasa, alda senenggomnya amsaʾ ara, ban benyek lemsa. 31Nababya alak men ella unggulusebok, alda Israeli nim eibnokaʾ aboka meka dabgiga yeilimsa,” hyok.
32Dara, Yohanes bedya ban laga lebokaʾ ara, ”Geisinya ara yalma wining anasoʾ imik ab yingginiboka alak bul yeilimokaʾ eiyimsa. 33Alak ella ubnenggusinya bok, mek adya dalalom aboka orugonyoknya bera nak wenyanyok, Geisinya yingginiboka bul yalyaʾ eibnelamnya bera, wera alja ugunuk Geisinya adya mek dibaʾ dalamnesilnya bera alan, henyok. 34Dara, ban eiyimsakanya, ban benera, Imik Neyung alja me ulumlaʾ ara alan aboka laga lelesin,” hyok.
Yesus Adya Men Diriga Ban Nang Yuba
35Ampum ara, onoʾ anyagan Yohanes beb, alak diriga balarekaʾ penya nang eb, neikaʾ ulumek. 36Dara, Yesus ara ono sam yabalamokaʾ eiyimok dara, alda wenhyok, ”Kendururum, Imik Neyung alja domba pam ara alan,” hyok. 37Alak diriga balarek nang penya alja lebokaʾ kerek dara, sikda Yesus bek diriga balarek. 38Yesus al kemel samalamookanya, al weilik sam yalarekaʾ eibuk dara, wenyhusuk, ”Ugunda hekaʾ aboka do?” hyok. ”Rabi o, anda har sam malalam do?” arek. (Rabi ara nunja yub era, neklesilimnya aboka lerek). 39Alda wenyasuk, ”Or yorurum. Eibnerum,” hyok. Dara, sikda onoʾ yalareekanya, al ulumokaʾ eiyireekanya, ban sum neikik ulumek. Sinik jam empat so ulumok.
40Ban kereekanya, Yesus bek diriga bilirek nang penya ak dara, ben hnon Simon Petrus alja weis Andreas be ulumok. 41Alda men unumokaʾ ara, alja dong Simon be eboka alak wenhyok, ”Nunda Mesias seleb eiyimab,” hyok. (Kristus anasa lebok). 42Dara, Simon benyek Yesus bek bo yeilimok dara, Yesus adya Simon bek henga keemookanya wenhyok, ”Anda Yohanes bedya me Simon ululam. Wera Kefas aboka si silimnenjak,” hyok. (Kefas si ara, Petrus andanasa lelemak).
43Nenyek sum ara, Yesus ara Galilea sokok binimna senemok. Dara, Pilipus bek eibuk dara, ”Anda nak diriga yananelem,” hyok. 44Pilipus bera, Andreas beb Simon beb, sikda neik Betsaida heik nang ulumek. 45Pilipus bedya Natanael be eiyiboka alak, ”Musa bedya unuwanalum an yub sam alak weboknya bera, ununumnaʾ lelemek nang alak wemeknya bera, eiyimab. Nazaret heik nang Yusuf bedya me Yesus alak eiyimab,” hyok. 46Natanael wenhyokaʾ ara, ”Nazaret alam de? Perobaʾ ara, Nazaret heik ab lanawanamso de?” hyok. Wenyek Pilipus bedya, ”Kemel yalom,” hyok.
47Yesus adya Natanael oka yokaʾ eibuk dara, wenhyok, ”Israeli nang yokaʾ ara alan. Sondaʾ ara al lomok hyak unggulumla,” hyok. 48Natanael bedya, ”Anda hekadya nak ella ulunelem do?” hyok. Wenyek Yesus adya, ”Pilipus bedya youbnenggubmagel bok, anda ara gal damak ulmalama wenyek eiyinggen,” hyok. 49Dara, Natanael bedya, ”Rabi o, anda Imik Neyung me ululam, anda Israeli nang edya senenggom dubnya ululam,” hyok. 50Yesus alak, ”Ara gal damak ulmalama eibgenekanya lebgenaʾ adya, dib senelam de? Anda hyak senenggom so unaʾ eillilemnelam,” hyok. 51#Kej. 28:12Onoʾ Yesus alak, ”Ugunuk dib lebsin, ugunda nidyaʾ ara im pik bakoka, Imik Neyung lero nang adya nimi dibaʾ me ak wele golugoka ulumnamakaʾ eibnelum,” hyok.
Айни замон обунашуда:
YOHANES 1: LAINLC
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in