1 Musa 8
8
Mentadi laè mengeraja i
1Oda ngo lupa Dèbata taba si Noak dekket binatang-binatang silot ibas keppel i. Menempul mo angin ibaing Dèbata gabè mulai mo surut laè i. 2Ipètut mo karina takal laè i terruh tanoh dekket pèntu laè i langit. Udan pè enggo leggo 3janah makin surutna mo laè i. Enggo kessa 150 ari oda sadikè ndates nè laè i. 4Tupung anggara kolom bulan pekepitu, songket mo keppel i i sada pucuk delleng Ararat. 5Terrus mo makin surut laè i, asa tupung antia bulan pekesipuluh, mulai mo taridah pucuk-pucuk delleng.
6Enggo kessa empatpuluh ari nai nola, ibuka si Noak mo jendèla keppel i, 7janah ipaluah mo sada kak. Oda ngo balik kak i mi keppel, tapi mayap-ayap ngo, soh surut kalohon laè i. 8Ningan bagidi ipaluah si Noak nola mo sada ndarapati asa ibettoh tah enggo tuhu surut laè i. 9Tapi kumarna iremrem laè i dèng ngo sisik tanoh i oda lot jupa ndrapati i bekkasna seggep. Nai balik ngo ia mi keppel i; idoroken si Noak mo tanganna, ninganna kipebengket mi keppel i. 10Ipèma si Noak mo pitu ari nai, nai ipaluah nola mo ndarapati i. 11Cibonna, balik ngo ndarapati i mendahisa merembah serambar bulung Zaitun meratah dèng i pagutna. Ibettoh si Noak mo enggo keppè surut laè i. 12Enggo kessa ipèma pitu ari nai, ipaluah nola mo ndarapati i sikali nai, ukum sikali èn, oda balik nè ndarapati i mendahisa.
13Tikan merumur si Noak 601 tahun, tupung Antia bulan pekesada, enggo surut laè i karina. Ibuka si Noak mo saong keppel i, janah itatap kuliling. Idah mo, enggo ngkerrah sisik tanoh i. 14Ari Cukerra duduk bulan pekedua, enggo ngo ngkerrah tanoh èn.
15Nai nina Dèbata mo taba si Noak, 16“Ruar mo ko i keppel i nai rebbak dekket sinibagesmu, anakmu dekket sinibagesna. 17Pedarat mo karina manuk-manuk dekket binatang sidèbanna i, mbelgah barang kètèk pè, asa meppar kalak i janah mèrap mi suberri tanoh èn.” 18Nai karuar mo si Noak i keppel i nai rebbak dekket sinibagesna, anakna dekket sinibages kalak i. 19Karina manuk-manuk dekket binatang darat karuar ma i keppel i nai, gennep mersiteppet horongna.
Si Noak memèlè
20Ipajek si Noak mo sada langgaten pemèlèen bai Dèbata. Itangkup mo gennep matcam manuk-manuk dekket binatang halal, nai ipèlèken mo mahan pèlèen situtungen i babo langgaten i. 21Meliup mo baungkus pèlèen i pesennangken ukur Jahowa, nai nina mo ibas ukurNa, “Oda nè Kuhukum dunia èn ukum kumarna ulah-ulah jelma; Kubettoh mulai bajar dèng pè enggo mo jahat sura-sura jelma i. Oda nèngè Kuripasken karina singgelluh bagè sienggo Kubaing i. 22Sidekkah lot dunia èn, kennah masa mo mosim menuan dekket mosim merani, mosim mbergoh dekket mosim mpeddas, mosim leggo dekket ari perudan, berngin dekket mahar.”
Айни замон обунашуда:
1 Musa 8: LAIBTD
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)