1 Musa 25
25
Pemparen si Abraham tarap sinibagesna sidèban
(1 Kron. 1:32-33)
1Ukum si Abraham kabin nola ngo dekket sada daberru mergerar si Ketura. 2Tubuhen anak ngo sinibagesana i, gerarna: si Zimran, si Joksan, si Medan, si Midian, si Isybak dekket si Suah. 3Si Joksan anakna si Syeba dekket si Dedan janah pemparen si Dedan mo kalak Assur, kalak Letus dekket kalak Leum. 4Dukak-dukak si Midian imo: si Efa, si Efer, si Henokh, si Abida, dekket si Eldaa. Karinana mo i pemparen si Ketura.
5Tukasi pè ipesoh si Abraham karinana hartana taba si Isak, 6tapi sinderrang nggelluh dèng ia mbuè ma ngo iberèken taba dukak-dukakna situbuh arap sinibagesna sidèban. Nai ipasulak mo dukak-dukakna i lompat mi suak kan kebincaren tanoh Kanaan, asa ndaoh bai anakna si Isak nai.
Matè si Abraham janah ikubur
7-8Enggo mo tua-tua kalohon asa matè si Abraham ai sanga umurna 175 tahun. 9Ikubur dukak-dukakna mo ia, imo si Isak bak si Ismael i liang Makhpela imo i juma kan kebincaren Mamre. Ukum juma i milik si Efron anak si Zohar kin ngo i, kalak Het, 10#1 Ms. 23:3-16 tapi enggo itokor si Abraham bai kalak Het i nai. Si Sara sinibages si Abraham pè i sidi ma ngo ikubur. 11Enggo kessa matè si Abraham, ipasu-pasu Dèbata mo si Isak anak si Abraham. Tikanna i, merian i gembar telaga mergerar “Ia ngo memperdatèken Aku” ngo si Isak.
Pemparen si Ismael
(1 Kron. 1:28-31)
12Si Ismael imo anak si Abraham dekket si Hagar daberru Mesir, hamba si Sara. 13-16Sipuluh dua ngo anak si Ismael, gerarna mulai i situaen nai imo: si Nebayot, si Kedar, si Adbeel, si Mibsam, si Misyma, si Duma, si Masa, si Hadad, si Tema, si Jetur, si Napis dekket si Kedma. Dukakna i gabè empung sipuluh dua bangsa, kuta bak ladang kalak i pè ibaing ngo mengèkutken gerar kalak i. 17Merumur 137 tahun mo si Ismael, tikan matè ia. 18Pemparenna merian i aur kellang-kellang Hawila bak Sur, kan kebincaren Mesir, mayak Assur. Pedaoh-daoh ngo kalak i dekket pemparen si Abraham sidèban i.
Tubuh si Esau dekket si Jakob
19Bagèen ngo sejarah si Isak anak si Abraham. 20Merumur empatpuluh tahun mo si Isak tikan jejap ia dekket si Rebekka turang si Laban, berru si Betuel kalak Aram i Mesopotamia nai. 21Kumarna oda merdukak si Rebekka, mersodip mo si Isak taba Jahowa tersèngèt sinibagesna i. Iuèi Jahowa ngo sodip si Isak i, ai mengkandong mo si Rebekka. 22Dua kalak ngo anak i dagingna i, janah tikan madèng tubuh anak i, kumadah ngo kalak i ibas kurungen manik dèng pè. Nina si Rebekka, “Kasa mo kennah masa bagèn bangku?” Nai ipido mo peddah bai Jahowa nai.
23 #
Rm. 9:12
Idokken Jahowa mo tabasa,
“Dua bangsa ngo nidagingmi;
dak merselisih ngo sidua bangsa sinaing nitubuhkenmi
gegohen ngo anggina daripada kakana
situaen ngo merkebbas taba sikèdèken.”
24Dapet ketikana ketaring si Rebekka, itubuhken mo leppa dua daholi. 25Situaen bagè simbara ngo, janah kolingna mbukbuk. Kerna i ibaing mo gerarna si Esau. 26Tikan tubuh kessa sipeduaken, ijèmak mo tukul-tukul si Esau. Kerna i ibaing mo gerarna si Jakob. Merumur ennempuluh tahun mo si Isak tikan tubuh anakna i.
Idea si Esau hakna anak situaen
27Makin mbelgah mo anak sidua kalak i. Ukum si Esau gabè sada kalak perburu pandè ngo janah lemmo atèna merian i rambah, tapi ukum si Jakob kalak persip ngo janah lemmo atèna merian i bages. 28Kellengen ngo atè si Isak midah si Esau, kerna kucul ngo si Isak kipangan jukut niburu. Tapi ukum si Rebekka, ngkellengen ngo atèna midah si Jakob.
29Tikan sidari iroroh si Jakob mo kacang mbara, roh mo si Esau mulak merburu. Melèhè mo iakap. 30Nina mo taba si Jakob, “Melèhè kalohon kuakap. Dikè mo situk kacang mbara mi.” (I ngo sebabna idokken ia Edom).
31Ialoi si Jakob mo, “Selloh, asal mo lebbèen berèken bangku hakmu situaen i.”
32Nina si Esau mo, “Man kadèngku mo hak i bangku ukum matè ngo aku kumara lèhèngku.”
33 #
Heb. 12:16
Idokken si Jakob dèng ma, “Sumpahken mo lebbè, magahken iberèken kono hakmu i bangku.”
Imangmangken si Esau mo merèken hakna i bai si Jakob. 34Kessa i iberèken si Jakob mo roti dekket dèba roroh kacang mbara i. Nai mangan mènum mo si Esau, kessa i laus mo ia. Bagi mo si Esau oda menghargai hakna situaen.
Айни замон обунашуда:
1 Musa 25: LAIBTD
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)