Matiu 6
6
Ineeꞌkou mampopetóiá ane motulungikou hángká rángámi
1Iesu mopaliliu laluitaNa, Nauliꞌ, “Maroꞌa-roꞌakou bona ineeꞌkou mampopolumao poágámámi i lindoꞌraꞌ tauna to handaꞌ bona raita pekou. Bábehiámi to noꞌonoꞌ tiꞌara ina nawátiꞌ Pueꞌ Ala Umámi to ara i surugáꞌ. 2Mewaliꞌ, ane motulungikou tauna to meahiahiꞌ, ineeꞌ nipopaisá i tauna to handaꞌ, nodo to rabábehi tauna to mampe to maroꞌa peheꞌ, láwiꞌ hira mampopaita peheꞌ kamaroꞌana bábehiáraꞌ i lalu támbi penómbáꞌá ba i rárá to mahile bona ratóiá peheꞌ tauna. Bona niꞌisá: tauna to noꞌonoꞌ bábehiáraꞌ, tiꞌara ina molámbiꞌ apa-apa hangko i Pueꞌ Ala, láwiꞌ ralámbiꞌ miꞌi petóiá hangko i tauna. 3Agáiáná ane mampeweꞌikou apa peá i hángká rángámi, hangaa-ngaa nipeweꞌi ngkániiꞌ-niiꞌ hangko i kabulána lalumi, 4bona tiꞌara raisá tauna ntániꞌna. Umámi to ara i surugáꞌ moisá kamaroꞌana bábehiámi kehapiꞌ tiꞌara tongawaꞌ i tauna ntániꞌna, hai ina nilámbiꞌ háwángina.”
Ineeꞌkou mampopetóiá ane mekakaekou
(Luk. 11:2-4)
5“Ane mekakaekou, ineeꞌ nodo tauna to mampe to maroꞌa. Raundeꞌ meángkáꞌ mekakae i lalu támbi penómbáꞌá ba i porompengaꞌá rárá bona raitaheꞌ hai ratóiá tauna ntániꞌna. Bona niꞌisá: tauna to noꞌonoꞌ bábehiáraꞌ, tiꞌara ina molámbiꞌ apa-apa hangko i Pueꞌ Ala, láwiꞌ ralámbiꞌ miꞌi petóiá hangko i tauna. 6Agáiáná kómu, ane mekakaekou, mesuaꞌkou i lalu lintuꞌmi, nituko babaꞌ, hangko mekakaerakou i Umámi to tiꞌara niꞌita. Láwiꞌ Ia moita mpuꞌu bábehiámi kehapiꞌ tiꞌara tongawaꞌ i tauna ntániꞌna, hai ina nilámbiꞌ háwángina.
7Ane mekakaekou, ineeꞌ nipopenggoli-nggoli nodo tauna to tiꞌaraheꞌ moisá Pueꞌ Ala. Hira mampekiri peheꞌ ina tebukeki pembiáꞌraꞌ ánti kakálángána pekakaeraꞌ. 8Ineeꞌkou mampeuláꞌi bábehiáraꞌ, láwiꞌ Umámi to i surugáꞌ moisá miꞌi ami apa to niparaluu hangko tiꞌara mani nipembiáꞌ. 9Mewaliꞌ, mekakaekou node:
Umángkiꞌ to i surugáꞌ,
kipomahile hangaꞌMu to magasaꞌ.
10Kipembiáꞌ bona Nupatongawaꞌ popárentáMu,
bona upu-upu tauna mampeuláꞌi peundeꞌáMu i duniáꞌ
nodo to mewaliꞌ i surugáꞌ.
11Nuweꞌiangkaiꞌ pandeꞌkiꞌ i alo dehangaloá i kagáná-gánáꞌána,
12hai Nuámpungiangkaiꞌ hangko i kamasalaꞌkiꞌ,
nodo woꞌo kaiꞌ moámpungi hángká rángángkiꞌ to masalaꞌ i kaiꞌ.
13Hai ineeꞌangkaiꞌ Nupatodáhi nakeloꞌ to kadake
agáiáná Nukámpáiangkaiꞌ hangko i Topekeloꞌ.
[Láwiꞌ Io miꞌi Datu to mepárentá,
hai makuasaꞌ,
hai meawaꞌ
duuꞌna i rue-ruena. Ami.]#6:13 Kahópóꞌána wátiꞌ iti teukiꞌ peá i bahangapa surana Matiu to teukiꞌ huleꞌ i bókóꞌ.
14Ane niámpungi tauna to masalaꞌ i kómu, Umámi to i surugáꞌ ina moámpungikou.#6:14 Básá Matiu 18:21-35; Marakusi 11:25; Epesu 4:32. 15Agáiáná ane tiꞌara niámpungi tauna to masalaꞌ i kómu, Umámi to i surugáꞌ tiꞌara woꞌo ina moámpungi salaꞌmi.”
Ineeꞌkou mampopetóiá ane mopuasaꞌkou
16“Ane mopuasaꞌkou, ineeꞌkou mampe to masusa lalumi, nodo tauna to mampe to maroꞌa peá. Ane mopuasaꞌheꞌ, ratunggái tiꞌara membahoꞌ ba mekarabiꞌ, bona raisá tauna kamopuasaꞌraꞌ. Bona niꞌisá: tauna to noꞌonoꞌ bábehiáraꞌ, tiꞌara ina molámbiꞌ apa-apa hangko i Pueꞌ Ala, láwiꞌ ralámbiꞌ miꞌi petóiá hangko i tauna. 17Agáiáná kómu, ane mopuasaꞌkou, hangaa-ngaa membahoꞌkou hai mekarabiꞌkou, 18bona tiꞌara raisá tauna kamopuasaꞌmi. Bateꞌna peá Umámi i surugáꞌ to tiꞌara niꞌita to moisá kamopuasaꞌmi. Ia moita mpuꞌu bábehiámi, kehapiꞌ tiꞌara tongawaꞌ i tauna, hai ina nilámbiꞌ háwángina.”
Ineeꞌ morámpu párewá ngkáduniáꞌ
19“Ineeꞌkou morámpu párewá ngkáduniáꞌ, láwiꞌ párewá ngkáduniáꞌ peisá naꞌandeꞌ epi ba tágárá. Pemboliá párewámi peisá rabungkáhi hai óntóꞌna rapanako. 20Rángina miꞌi rárá katueꞌmi hintotoꞌ hai peundeꞌána Pueꞌ Ala,#6:20 Básá Matiu 6:33; 1 Timotiu 6:18-19. bona Pueꞌ Ala ina mopatimama háwángimi i surugáꞌ. Párewá to noꞌonoꞌ tiꞌara ina matántá, láwiꞌ indoreá tiꞌara ara to mopamatágárá, tiꞌara ara to mopabubuꞌ, tiꞌara ara to mopakarugiꞌ, hai tiꞌara woꞌo ara to mopanako. 21Mewaliꞌ apa to nipaioru i lalu katueꞌmi, bateꞌna iti oaꞌ to nipekiri.
22Mátámi ia miꞌi nodo huluꞌna wátámi. Ane maroꞌa mátámi, maroꞌa woꞌo wátámi. 23Agáiáná ane huluꞌ to ara i wátámi mewaliꞌ makáindi, modediꞌ ntepuꞌu pekirimi. Mewaliꞌ ane mátámi makáindi, kadake pekirimi, kadake woꞌo bábehiámi.”
Ineeꞌ morompenga lalumi
24“Tiꞌara ara hadua tauna to nabuku mobágóꞌ i rodua tuá, láwiꞌ hadua ina nabiláꞌ, hai hadua tiꞌara ina nabiláꞌ. Hadua ina napeuláꞌi hawaꞌna, hai to haduána tiꞌara ina nauláꞌ. Noꞌonoꞌ woꞌo kómu: tiꞌarakou peisá mampeuláꞌi peundeꞌána Pueꞌ Ala ane mampeliꞌ pekou párewá ngkáduniáꞌ.”
Ineeꞌ bata-bata lalumi
(Luk. 12:22-31)
25“Mewaliꞌ Kuhángáꞌáꞌákou: ineeꞌ nipokaraoꞌ inao kana i katueꞌmi, apa to ina niandeꞌ hai niꞌinu. Ineeꞌ woꞌo nipokaraoꞌ inao kana i pewaruꞌmi. Tiꞌara paꞌi katueꞌmi melumbuꞌ hangko i pandeꞌ hai pewaruꞌ? 26Peita tádáhi to membara-mbara i laerawa. Tiꞌaraheꞌ mantudaꞌ, tiꞌaraheꞌ mepare, hai tiꞌaraheꞌ woꞌo mamboli powiáꞌraꞌ i buhoꞌ. Agáiáná kehapiꞌ noꞌonoꞌ, Umámi to ara i surugáꞌ bateꞌna mopaꞌandeꞌheꞌ. Apa mani kómu. Tiꞌara paꞌi katueꞌmi melumbuꞌ hangko i katueꞌraꞌ tádáhi? 27Apa miꞌi pobunduꞌána handaꞌ to nipekiri? Kehapiꞌ karaoꞌ inaomi mampekiri mampopengaa, tiꞌarakou peisá motámbái tinuwuꞌmi kehapiꞌ hantódiꞌ peá.
28Moapa riꞌi haneꞌi karaoꞌ inaomi mampekiri pewaruꞌmi? Peita bungaꞌ i pádá. Tiꞌaraheꞌ mobágóꞌ, hai tiꞌaraheꞌ woꞌo mandau. 29Agáiáná Kuhángáꞌáꞌákou: mogalo riꞌi Datu Salomo to pebuku ntepuꞌu,#6:29 Básá 1 Datu-datu 3:12-13; 10:23; 1 Tuntukáná Datu 29:25. waruꞌna tiꞌara hibali kamababena hai bungaꞌ iti. 30Mewaliꞌ, ane Pueꞌ Ala mampomababe rumpuꞌ i pádá, to ara i alo deꞌe hai rahunu kahalo, apa mani kómu! Melumbuꞌ mani pekádipurána Pueꞌ Ala i kómu haneꞌi rumpuꞌ. Moapa riꞌi haneꞌi tiꞌara nihárungá pekádipuráNa? 31Ineeꞌ karaoꞌ inaomi ba niuliꞌ, ‘Apa miꞌi to ina taꞌandeꞌ hai tainu? Apa miꞌi to ina tapowaruꞌ?’ 32Upu-upuna iti rapepekiri oaꞌ tauna to tiꞌara moisá Pueꞌ Ala. Agáiáná iti ineeꞌ nipokalááꞌ, láwiꞌ upu-upu to niparaluu, naisá miꞌi Umámi to i surugáꞌ. 33Mewaliꞌ hangaa-ngaa nipaioru popárentána Pueꞌ Ala i lalu katueꞌmi, hai hangaa-ngaa niundeꞌ oaꞌ mobábehi apa to manótó i peitáNa. Ane nibábehi noꞌonoꞌ, upu-upu to niparaluu bateꞌna ina Naweꞌikou.
34Mewaliꞌ, ineeꞌ nipokaraoꞌ inao mampekiri apa to ina mewaliꞌ i alo-alo to ina haweꞌ. Alo deꞌe gáná miꞌi kamapárina, ineeꞌ wopiꞌi nitámbái mampekiri apa to ina mewaliꞌ kahalo.”
Айни замон обунашуда:
Matiu 6: NTBEP
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.