PAMUNGKAAN 5
5
Pomparan ni si Adam
1On ma goar ni pomparan ni si Adam. (Di na manompa jolma i Debata, songon Debata sandiri do dijadihon Debata halahi. 2Halaklahi dohot dadaboru do halahi ditompa Ia. Dipasupasu Ia do halahi jana digoari Ia ma halahi “Jolma”.) 3Dung marumur si Adam 130 taon, maruli anak halaklahi ma ia na suman tusia, gabe digoari ia ma i si Set. 4Dung i martamba dope umur ni si Adam 800 taon nari. Adong dope angka dakdanaknia na asing. 5Jana marumur ma ia 930 taon di parmondingnia.
6Di na marumur si Set 105 taon, adong ma anaknia na margoar si Enos. 7Dung i tamba dope umurnia 807 taon nari. Adong dope angka dakdanaknia na asing. 8Jana di na marujung ngolunia marumur ma ia 912 taon.
9Di na marumur si Enos 90 taon, adong ma anaknia si Kenan goarna. 10Dung i tamba dope umur ni si Enos 815 taon nari. Adong dope angka dakdanaknia na asing, 11jana marujung ma ngolunia di na marumur 905 taon.
12Di na marumur si Kenan 70 taon, adong ma anaknia na margoar si Mahalalel. 13Tamba dope umur ni si Kenan 840 taon nari. Adong dope angka dakdanaknia na asing, 14jana jumolo ma ia di na marumur 910 taon.
15Di na marumur si Mahalalel 65 taon, adong ma anaknia na margoar si Jared. 16Dung i tamba dope umur ni si Mahalalel 830 taon nari. Adong dope angka dakdanaknia na asing, 17jana jumolo ma ia di na marumur 895 taon.
18Di na marumur si Jared 162 taon, adong ma anaknia na margoar si Henokh. 19Dung i tamba dope umur ni si Jared 800 taon nari. Adong dope angka dakdanaknia na asing, 20jana marujung ma ngolunia di na marumur 962 taon.
21Di na marumur si Henokh 65 taon, adong ma anaknia na margoar si Metusalah. 22Dung i mangolu di bagasan pardonganon dohot Debata ma si Henokh 300 taon honokna jana adong dope angka dakdanaknia na asing. 23Marumur ma ia 365 taon. 24Jana sai marpardonganon dohot Debata do ngolunia, dung i nada haidaan be ia, angke madung dibuat Debata ia.
25Di na marumur si Metusalah 187 taon adong ma anaknia na margoar si Lamekh. 26Dung i martamba dope umur ni si Metusalah 782 taon nari. Adong muse dope angka dakdanaknia na asing, 27jana marujung ma ngolunia di na marumur 969 taon.
28Di na marumur si Lamekh 182 taon adong ma anaknia. 29Didok si Lamekh ma, “Dakdanak on ma na paluahon hita sian karejonta na dokdok on, i ma na manjama tano na dung niburaan ni Tuhan.” Hara ni i, digoari si Lamekh ma goar ni dakdanak i si Noak. 30Dung i martamba dope umur ni si Lamekh 595 taon nari. Adong muse dope dakdanaknia na asing, 31jana jumolo ma ia di na marumur 777 taon.
32Dung marumur si Noak 500 taon adong ma tolu anaknia, i ma si Sem, si Ham dohot si Jafet.
Айни замон обунашуда:
PAMUNGKAAN 5: LAIAKB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Indonesian Bible Society