Mattheos 21
21
1Unkan Jerusalem ikiyedan yapi, qa Bethpage ehan ipi, Oliwe paha kin etu, hehan Jesus waonspewicakiye cin nom yewicaśi;
2Qa hewicakiya; Dukanpi kin otonwe iyotakons wanke cin he ekta ya po; kinhan kohanna śonśonna wan cinca iyahna han iyeyayapi kta; kiyuśkapi qa makaku po.
3Qa tuwe taku eniciyapi kinhan, Itancan kin hena cin ce, eya po; kinhan kohanna awicau niśipi kta.
4Dena owasin econpi, wicaśta wokcan oie qon yuecetupi kta, he kaken eya;
5Zion cunwintku kin heciya po; Iho, Wicaśtayatapi nitawa en niu, waḣbadan qa śonśonna wan akan iyotanka, śukcinca wan, śonśonna cinca kin akan u ce.
6Unkan waonspewicakiye cin yapi, qa Jesus econ wicaśi kin ecen econpi;
7Qa śonśonna cinca iyahna awicahipi, qa iye tasina akan eḣpeyapi, qa hena iakan Jesus ehnakapi.
8Unkan wicota canku ohna śina eḣpeyapi; qa apa canwapa kaksapi qa canku ohnahna owinśyapi.
9Qa wicota tokata yapi, qa tona ihakam upi kin, howayapi qa heyapi; Dawid Cinhintku woohiye yuha nunwe. Tuwe Itancan Caje on u kin yawaśtepi nunwe: Maḣpiya ekta woohiye yuha nunwe.
10Unkan Jerusalem en hi qehan otonwe kin ocowasin śkanśkanpi, qa heyapi; De tuwe he.
11Unkan wicota kin heyapi; Jesus wicaśta wokcan Galile en Nazareth otonwe kin etanhan he dee.
12Unkan Jesus tipi wakan Wakantanka tawa kin en i, qa tipi wakan ohna wiyopeyapi ece, wopetonpi ko, hena tankan iyewicaya; qa mazaska tokiyopeyapi ahna econpi kin hena yuahdapśinyan eḣpeya, tona wakiyedan wiyopeyapi oiyotanke tawapi koya;
13Qa hewicakiya; Tipi mitawa kin he wocekiye tipi eciyapi kta, eya wowapi en kagapi; tuka niye wamanon tipi yakagapi.
14Hehan iśtagongapi huśtepi ko tipi wakan kin en hipi; unkan okiziwicaya.
15Unkan wośnapi kagapi wowapi kagapi ko taku wowapetokeca econ kin hena wanyakapi, qa hokśiyoqopapi tipi wakan kin ohna, Dawid Cinhintku kin woohiye yuha nunwe, eya howayapi, hehan nina śihdapi:
16Qa heciyapi; Dena taku eyapi kin nayaḣon he. Unkan Jesus hewicakiya; Han; Hokśiyoqopa, tona azinpi ko ipi kin etanhan wowitan duśtan ce, eyapi kin he tohinni dawapi śni he.
17Hehan awicayuśtan, qa otonwe kin etanhan tankan iyaye c̣a Bethani ekta i, qa hen wanka.
18Unkan hanḣanna ḣinca otonwe kin ekta icicawin hda, unkan wotektehda;
19Qa suken can wanji canku ohna han wanyake c̣ehan, he en i, tuka takudan iyeye śni, ape eceedan aicaga; unkan heya; Icimana waskuyeca ainicage śni nunwe. Unkan suken can kin kohanna śnija aya.
20Unkan waonspewicakiye cin he wanyakapi qehan yuśinyayapi qa heyapi; Ehanqon suken can kin kohanna śnija aya.
21Jesus waayupte c̣a hewicakiya; Awicakehan heciciyapi; Wowacinye duhapi qa waceṭunyahdapi śni kinhan, taku suken can kin de ecakiconpi kin heceedan ecanonpi kte śni, tuka paha kin de, Tokan iyaye c̣a miniwanca kin en iyoḣpeniyanpi nunwe, eyakiyapi kinhan, ecetu kta.
22Qa taku tona wocekiye eya yadapi, qa wicayadapi kinhan, hena owasin duhapi ece e kta.
23Unkan tipi wakan kin en hi, qa waonspewicakiya icunhan, wośnapi kagapi, qa oyate kin en wicaśta tankapi ko, en hipi qa heciyapi; Wicookihi tukte e on dena ecanon he; qa tuwe wicookihi kin de nic̣u he.
24Unkan Jesus waayupte c̣a hewicakiya; Miś eya taku wanji iciwangapi kta; he omayakidakapi kinhan, hehan wicookihi kin tukte on dena ecamon kin ociciyakapi kta.
25Johannes baptem wicaqu qon he tokiyatanhan he; maḣpiya eciyatanhan qa iś wicaśta eciyatanhan. Unkan he iyakitedan aiapi qa hekiciyapi; He maḣpiya eciyatanhan, unkeyapi kinhan; Tokeca he wicayadapi śni he, eye kta:
26Tuka, He wicaśta eciyatanhan, unkeyapi kinhan, oyate kin kowicunkipapi; owasin Johannes wicaśta wokcan heca kecinpi.
27Unkan ayuptapi qa Jesus heciyapi; Sdonunyanpi śni ye Unkan iś hehan hewicakiya Miś nakun wicookihi tukte on dena ecamon kin ociciyakapi kte śni.
28Tuka token idukcanpi he: Wicaśta wan cinhintku nonpa: unkan tokapa kin en hi qa heciya; Cinś, anpetu kin de hastanhanka iyuwi ojupi mitawa kin en ḣtani ya wo.
29Unkan ayupte c̣a heya; Ecamon kte śni ye. Tuka iyohakam iyopeic̣iye c̣a iyaya.
30Unkan hakakta kin en hi, qa iyecen eciya; Unkan iye ayupte c̣a; Itancan, mde kta ce, eya. Tuka ye śni.
31Denaoza unma tukte atkukupi tawacin kin ecen econpi he. Unkan, Tokapa kin, eciyapi. Hehan Jesus hewicakiya; Awicakehan heciciyapi; Wamnayanpi qa wawiciḣaḣapi econpi sa niyepi nitokam Wakantanka tokiconze kin en yapi kta.
32Johannes wicoowotanna canku kin ohna en niupi, tuka wicayadapi śni; tuka wamnayanpi qa wawiciḣaḣapi econpi sa, hena wicadapi; he wandakapi eśta nukun iyohnkam wicayadapi kta e on nihduhomnipi śni.
33Wiyacinpi wan tokeca naḣon po; Wicaśta wan tipi yuhe cin he hastanhanka iyuwi ojupi wan oju, qa ihdukśan natake c̣a ohna iyuśkice wan qe c̣a nakun cowahe wan en kaga; qa wicaśta kicanyanpi kta owicaqu, hehan icimani iyaya.
34Unkan wanna waskuyeca suton kta, hehan wowidake wicayuhe cin wicaśta kicanyanpi kin ekta yewicaśi; waskuyeca etanhan icupi kte cin heon.
35Unkan wicaśta kicanyanpi kin wowidake unpi kin hena wicayuzapi; wanji apapi, wanji ktepi, qa wanji inyan on kininpi.
36Akes wowidake toktokeca ota ekta yewicaśi; unkan iś iyecen wicakuwapi.
37Hehan ehake iye cinhintku kin ekta yeśi, qa heya; Micinksi yuonihanpi kta.
38Tuka maga kicanyanpi kin cinhintku wanyakapi, hehan hekiciyapi; Tawa kte cin he dee; iho po, unktepi kta, hehan taku yuhe cin he unkicupi kta.
39Hecen yuzapi qa hastanhanka iyuwi ojupi kin etanhan tankan eḣpeyapi qa ktepi.
40Hecen tohan hastanhanka iyuwi ojupi tawa kin hi kinhan kicanyanpi kin hena token ecawicakicon kta he.
41Unkan heciyapi; Wicaśta śikśice cin hena teḣiya ihangwicaye kta, qa kicanyanpi toktokeca tohan iyehantu eca waskuyeca kicupi ece e kta hena hastanhanka iyuwi ojupi kin owicaqu kta.
42Hehan Jesus hewicakiya; Inyan wan tipi kagapi kin eḣpeyapi qon he oise pa kin icaga; he Itancan kin eciyatanhan hecetu, qa unkiśapi en taku wowapetokeca kin hee, eyapi kin he tohinni wowapi wakan kin en dawapi śni he.
43Heon etanhan heciciyapi; Wakantanka tokiconze kin eniciyakupi kta, qa oyate wan waskuyeca icaḣyapi kte cin he wicaqupi kta.
44Unkan tuwe inyan kin de ahinḣpaye cinhan kamden eḣpeyapi kta; qa tuwe he akan iḣpaye cinhan tanyan kamdu kta.
45Unkan wośnapi kagapi hena, qa Pharisee ko wiyacinpi tawa kin naḣonpi qehan, iye wicaka e heya sdonyapi.
46Qa heon yuze wacinpi, tuka oyate kin kowicakipapi; owasin wicaśta wokcan heca kecinpi.
Айни замон обунашуда:
Mattheos 21: DAKOTANT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.