Mattheos 19
19
1Unkan Jesus wicoie kin hena heya ayaśtan, hehan Galile makoce kin etanhan iyaye c̣a Juda makoce, Jordan wakpa akasanpa tanhan he en hi:
2Qa wicaśta ota ḣinca ihakam unpi; unkan hen asniwicaya.
3Pharisee kin iś nakun en hipi, qa iyutanyanpi kta heciyapi; Taku owasin on wicaśta tawicu eḣpekiye kta iyececa he.
4Unkan waayupte c̣a hewicakiya; Tuwe otokahe ekta wicakage cin he wica winyan ahna wicakaga, he tohinni dawapi śni he:
5Qa heya; Heon etanhan, wicaśta atkuku hunku ko eḣpewicaye kta, qa tawicu kin en iyaihdaśke kta; qa henaoza ceḣpi wanjidan kta.
6Heon, hetanhan nonpapi śni, tuka wicaceḣpi wanjidan ece. Heon, taku Wakantanka yuokonwanjidan kin he ihnuhan wicaśta kiyuśpe cinhan.
7Hehan heciyapi; Itancan, Moses kpaganpi wowapi wan qu kta, qa eḣpeye kta, tokeca heconwicaśi hwo.
8Unkan hewicakiya; Nicantepi suta kin heon winoḣinca eḣpewicayayapi kta, Moses iyowinniciyapi; tuka otokaheya tanhan hecetu śni.
9Qa miś heciciyapi ce; Tuwe, wawiciḣaḣapi econ kin on etanhan śni, tawicu eḣpekiye c̣a wanji tokeca yuze cinhan, he wawiciḣaḣapi econ ece; qa tuwe winyan eḣpeyapi kin yuze cinhan, he nakun wawiciḣaḣapi econ ece.
10Unkan waonspewicakiye cin heciyapi; Wicaśta winoḣinca kici hecetu kinhan, tawicu tonpi kin he waśte śni.
11Tuka hewicakiya; Wicoie kin he owasin okihipi śni, tona wicaqupi kin henana okihipi.
12Yunokos heca yukan; hunḣ hunku tezi kin etanhan heca icagapi; qa hunḣ wicaśta on heca wicakagapi; qa hunḣ maḣpiya wokiconze kin on heca icicagapi. Tuwe he icu okihi kinhan he icu kta.
13Hehan hokśiyoqopa en awicahipi, nape awicaputake c̣a cekiye kta e heon; unkan waonspewicakiye cin teḣindapi.
14Tuka Jesus heya; Hokśiyoqopa en mahipi kta iyowinwicakiya po, qa teḣindapi śni po; maḣpiya wokiconze kin he hetanhanpi ece.
15Unkan nape awicaputake c̣a hetanhan tokan iyaya.
16Unkan iho, wanji en hi qa heciya; Waonspekiye waśte, taku waśte ecamon kta, on wiconi owihanke wanica mduhe kta, tukte e he.
17Unkan heciya; Tokeca waśte emayakiya he; tuwedan waśte śni, wanji heceedan waśte, Wakantanka hee. Tuka wiconi en yai kta yacin kinhan woahope kin hena ahopa wo.
18Hehan heciya; Tukte e he. Unkan Jesus heya; Dena, Tinwicayakte kte śni; Wawiciḣaḣapi ecanon kte śni; Wamayanon kte śni; Woitonśni odake kte śni;
19Niyate nihun kici wicahduonihan wo; qa, Niye inihdacin nikiyedan un kin waśteyadake kta.
20Kośka kin he heciya; Imacaga ehantanhan dena owasin ecen ecamon ece; taku hinaḣin iyotpani waun he.
21Jesus heciya; Owotanna yaun kta yacin kinhan, hde c̣a taku nitawa wiyopeye c̣a waḣpanicapi kin wicaqu wo; kinhan maḣpiya ekta woyuha duhe kta; hehan ku qa mihakam un wo.
22Tuka kośka kin he wicoie kin de naḣon qehan iyokśica kihda; taku ota ton kin heon etanhan.
23Unkan Jesus waonspewicakiye cin hewicakiya; Awicakehan heciciyapi; Tuwe wijica un kin he kitan se maḣpiya wokiconze kin en i kta.
24Qa ake heciciyapi; Kamel wan tahiniśpaciqadan oḣdoka ohna iyaye kte cin he teḣike śni, qa wicaśta wijica Wakantanka tokiconze kin en ye kte cin he teḣika.
25Waonspewicakiye cin he naḣonpi, hehan nina yuśinyayapi qa heyapi; Tuwe hehan ni okihi kta he.
26Unkan Jesus ekta etonwe c̣a hewicakiya; Wicaśta ekta he okihipica śni; tuka Wakantanka ekta taku owasin okihipica ece.
27Hehan Inyan ayupte ca heciya; Iho, taku owasin eḣpeunyanpi qa nihakam unyakonpi; hecen taku unhapi kta he.
28Unkan Jesus hewicakiya; Awicakehan heciciyapi; Niyepi tona teca ni en wicatonpi kin de en omayapapi kin, tohan Wicaśta Cinhintku kin wowitan oiyotanke tawa kin en kiyotanke cinhan, niś eya oiyotanke akenonpa akan idotankapi kta, qa Israel wicoun akenonpa wicadacopi kta ce.
29Qa tuwe kaśta, tipi, qa hunkawanjitku, qa tawinoḣtin, qa atkuku, qa hunku, qa tawicu, qa cinca, qa maga, micaje on etanhan eḣpeye cinhan, he opawinge akihde hduhe kta, qa nakun owihanke wanin wiconi mnaiciye kta.
30Tuka tokaheya unpi kin wicota ehake unpi kta; qa ehake unpi kin hena tokaheyapi kta.
Айни замон обунашуда:
Mattheos 19: DAKOTANT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.