लूका 20
20
यीसू रे हका रे बारे मन्झ सुआल
(मत्ती 21:23-27; मरकु. 11:27-33)
1एक ध्याड़े एह्ड़ा हुएया कि जेबे यीसू मन्दरा मन्झ लोका जो उपदेस देंदा होर खुसी री खबर सुणाया करहा था, ता मुख्य याजके होर व्यवस्था स्खाणे वाल़े होर यहूदी मुखिये तेस वाले आये। 2होर बोल्दे लगे कि, “आस्सा जो दस कि, तू इन्हा कामा जो केस हका किन्हें करहा, होर से कुणहां, जिन्हें जे तुजो ऐं हक दितिरा?” 3तिन्हें तिन्हा जो जवाब दितेया कि, “हांऊँ भी तुस्सा ले एक गल पूछ्हा; मुंजो दसा, 4यहून्ना जो बपतिस्मा देणे रा हक परमेसरा री वखा ले था या माह्णुं वखा ले?” 5तेबे स्यों आपु मन्झ बोल्दे लगे कि, “अगर आस्से बोलिए कि, ‘परमेसरा री वखा ले,’ ता तेस बोलणा, ‘फेरी तुस्से तेसरा विस्वास कि नी कितेया?’ 6होर अगर आस्से बोलिए, ‘माह्णुं री वखा ले,’ ता सब लोका आस्सा पर पत्थरवाह करणा, क्यूंकि स्यों सच्चे जाणहां ऐं कि, यहून्ना बपतिस्मा देणे वाल़ा नबी था।” 7होर तिन्हें जवाब दितेया, “आस्से नी जाणदे कि ये केस वखा ले था।” 8यीसूए तिन्हा किन्हें बोल्या, “ता मैं भी तुस्सा जो नी दस्दा कि, हांऊँ ऐं काम केस हका ले करहा।”
दुस्ट किसाना रा उदाहरण
(मत्ती 21:33-46; मरकु. 12:1-12)
9तेबे यीसू लोका किन्हें ये उदाहरण बोल्दा लग्या कि, “केसी माह्णुंऐ अंगूरा रा बगीचा ल्गाया, होर किसाना जो तेता रा ठेका देई दितेया होर बौह्त ध्याड़े रे कठे परदेसा जो चली गया। 10फेरी अंगूर काढणे रा टैम आया ता तिन्हें माह्णुंऐ आपणा एक नौकर किसाना वाले भेज्या कि, से अंगूरा रे बगीचे रे कुछ फल रा हिस्सा तेस जो दे, पर किसाने से मारेया पिटेया होर खाली हाथ भेजी दितेया। 11फेरी तिन्हें एक होर नौकर भेज्या, होर तिन्हें से भी मारेया पिटेया होर तेसरी बेज्जती करी किन्हें खाली हाथ भेजी दितेया। 12फेरी तिन्हें त्रिजा भेज्या, होर तिन्हें से भी मारी पिटी किन्हें काढी दितेया।”
13“तेबे अंगूरा रे बगीचे रे माल्के बोल्या, ‘ऐबे हांऊँ क्या करूं? मां आपणा प्यारा बेटा भेजणा होर जरुर तिन्हा मेरे बेटे री इज्जत करणी।’
14किसान तेस जो देखी किन्हें आपु मन्झ सोच विचार करदे लगे कि, ‘ये ता वारस आ; आऊआ, आस्से एस जो मुकाई देहां ऐं, ताकि जमीन-जायदाद आस्सा रा हुई जाए।’ 15होर तिन्हें से अंगूरा रे बगीचे ले बाहर काढी किन्हें मारी दितेया: इधी कठे अंगूरा रे बगीचे रे माल्का तिन्हा साउगी क्या करणा? 16तेस आई किन्हें तिन्हा किसाना रा नास करी देणा, होर अंगूरा रा बगीचा होरी जो देई देणा।” ये सुणी किन्हें तिन्हें बोल्या, “परमेसर एह्ड़ा ना करहे।” 17पर यीसूए तिन्हा वखा जो देखी किन्हें बोल्या, “पवित्र सास्त्रा मन्झ ये लिखिरा कि;
‘जेस पात्थरा जो मिस्त्रिए बेकार जाणेया था,
सेई कुणे रा पात्थर बणी गया।’
18जेस केसी तेस पात्थरा पर पऊणा तेस चकनाचूर हुई जाणा,
होर जेस पर तेस पऊणा, तेस से पीसी किन्हें रखी देणा।”
महाराजे जो कर देणा
(मत्ती 22:15-22; मरकु. 12:13-17)
19तेस टैम व्यवस्था स्खाणे वाल़े होर मुख्य याजके यीसू जो पकड़णा चाहेया, क्यूंकि स्यों समझी गये कि, यीसूए आस्सा रे बरखलाप ये उदाहरण बोल्या, पर स्यों लोका ले डरी गये। 20होर स्यों तेस ताका मन्झ लगी रहे होर स्यों जासूस भेजे जो ईमानदारी रा ढोंगी करी किन्हें यीसू री कोई ना कोई गल पकड़ी ले कि, स्यों यीसू जो हाकमा रे हका मन्झ सौंपी दे। 21तिन्हें यीसू ले ये पूछेया कि, “हे गुरु, आस्से जाणहां ऐं कि तू ठीक बोल्हा, होर स्खाहां, होर केसी रा भेदभाव नी करदा; बल्कि परमेसरा री गल्ला सच्चाई किन्हें दसा आ। 22क्या आस्सा जो महाराजे जो कर देणा चहिए कि नी?” 23पर यीसूए तिन्हारी चलाकी समझी किन्हें तिन्हा किन्हें बोल्या, 24“मुंजो रोम देस रा एक सिक्का दसा जेसरी कीमत एक ध्याड़े री कमाई रे बराबर ई। एस सिक्के मन्झ रूप होर नांऊँ केसरा? तिन्हें बोल्या, ये रूप होर नांऊँ महाराजे रा।” 25यीसूए तिन्हा किन्हें बोल्या, “जो महाराजे रा आ, से महाराजे जो देआ, होर जो परमेसरा रा आ, से परमेसरा जो देआ।” 26स्यों लोका रे साम्हणें तेस गल्ला जो पकड़ी नी सके, पर यीसू रे जवाबा ले हरान हुई किन्हें चुप रही गये।
जी उठणा होर ब्याह
(मत्ती 22:23-33; मरकु. 12:18-27)
27फेरी सदूकी लोक जो यहूदी थे स्यों एह्ड़ा बोल्हा ऐं थे कि, मरणे वाल़े रा जी उठणा नी हुंदा, होर स्यों यीसू वाले आई किन्हें पुछदे लगे। 28कि “हे गुरू, मूसा जेह्ड़ी आस्सा रे कठे व्यवस्था लिखीरी कि, ‘अगर केसी रा भाई बगैर बच्चे मरी जाए, होर तेसरी लाड़ी पीछे रही जाए, ता तेसरा भाई तेसरी लाड़ी किन्हें ब्याह करी ले होर आपणे भाई रे कठे बच्चे पैदा करहे।’ 29ऐबे उदाहरणा रे कठे, सात भाई थे, पैहला भाई ब्याह करी किन्हें बगैर बच्चे मरी गया। 30फेरी दूजे होर त्रीजे भाई भी तेस्सा ज्नाने किन्हें ब्याह करी लया। 31इंहां करी किन्हें स्यों साता रे सात भाई बगैर बच्चे मरी गये। 32तिन्हा ले बाद से ज्नाने भी मरी गयी। 33ता मरिरे मन्झा ले जिउंदे हूंणे ले बाद से तिन्हा मन्झा ले केसरी लाड़ी हूणीं, क्यूंकि से साता रे सात भाईया री लाड़ी हुई चुकीरी थी।”
34यीसूए तिन्हा किन्हें बोल्या कि, “एस संसारा रे लोक ब्याह सादी करहा ऐं। 35पर जो लोक एस लायक हुन्घे तिन्हा एस संसारा जो, होर मरिरे मन्झा ले जिउंदे हो, तिन्हा मरिरे मन्झा ले जी उठणा जो पाई लैणा, तिन्हा मन्झ ब्याह सादी नी हूणीं। 36तिन्हा फेरी नी मरणा, क्यूंकि तिन्हा स्वर्गदूता साहीं हूंणां, क्यूंकि मरिरे मन्झा ले जी उठणे रे बच्चे हूंणे रे नाते स्यों परमेसरा रे बच्चे हूंणे। 37पर एस गल्ला जो कि मरणे वाल़े जी उठा ऐं, मूसा नबी भी आपणी देखीरी भखी रे झाकड़ा रे गल्ला मन्झ ये जाहिर कितिरा कि, से प्रभु जो ‘अब्राहमा रा परमेसर, होर इसहाका रा परमेसर, होर याकूबा रा परमेसर’ बोल्हा। 38से मरिरे रा परमेसर नी आ पर जिउंदेया रा परमेसर आ, क्यूंकि ये सभ लोक तेसरे साम्हणें जिउंदे।” 39तेबे ये सुणी किन्हें व्यवस्था स्खाणे वाल़े ये मन्झा ले बौह्त लोके बोल्या कि, “हे गुरु तैं ठीक बोल्या।” 40होर तिन्हा जो तेस ले कुछ होर पूछणे री हिम्मत नी हुई।
म्सीह केसरा मह्ठा आ?
(मत्ती 22:41-46; मरकु. 12:35-37)
41फेरी यीसूए तिन्हा ले पूछेया, “मसीहा जो राजा दाऊदा रा मह्ठा किधियो बोल्हा ऐं? 42राजे दाऊद आपु भजन संहिता री कताबा मन्झ बोल्हा कि,
‘प्रभुए मेरे प्रभु किन्हें बोल्या,
कि मेरी सीधी तरफा बैठ।
43जेबे तक कि हांऊँ तेरे दुसमणा जो तेरे पैरा हेठ नी करी देऊं।’”
44राजा दाऊद आपु भी तेस जो प्रभु बोल्हा, ता से तेसरा मह्ठा किहाँ बणेया?
व्यवस्था स्खाणे वाल़े ले चतन्न
(मत्ती 23:1-36; मरकु. 12:38-40)
45जेबे लोक सुणेया करहा ऐं थे, ता यीसूए आपणे चेले किन्हें बोल्या, 46“व्यवस्था स्खाणे वाल़े ले चतन्न रैहया, जिन्हा जो लम्बे चोगे पैन्ही किन्हें घुमणा, होर बजारा मन्झ नमस्कार पाणा खरा लगहा। होर यहूदी सभा मन्झ खास जगहा पर बैठणा, होर धामा मन्झ खास जगहा पाणा बांका लगहा। 47स्यों विधवा जो ठगी किन्हें तिन्हारे घर-बार होर जायदाद आपणे कठे लई लैहां ऐं, होर दिखावे रे कठे बड़ी देरा तक प्रार्थना करदे रैंहयां ऐं, इन्हा लोका जो कड़ी सजा मिलणी।”
Айни замон обунашуда:
लूका 20: MJLNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.