लूका 18
18
न्यायी होर विधवा रा उदाहरण
1फेरी एक ध्याड़े यीसूए आपणे चेले जो उदाहरण देई किन्हें बोल्या कियां हमेसा प्रार्थना करणा होर हिम्मत नी छाडणी चहिए। 2“केसी सैहरा मन्झ एक न्यायी रैंहयां था, जो ना परमेसरा ले डरहा था होर ना केसी माह्णुं री परवाह करहा था। 3होर तेस सैहरा मन्झ एक विधवा भी रैंहयां थी, जो तेस वाले आई किन्हें बोल्या करहा ई थी कि, ‘मेरा न्याय कर होर मुंजो मेरे दुस्मणा ले बचा।’ 4होर बौह्त ध्याड़े तक से न्यायी आनाकानी करदा रैंहयां पर बादा मन्झ तिन्हें मना मन्झ सोची किन्हें बोल्या, ‘जेब्की हांऊँ ना ता परमेसरा ले डरहा, होर ना माह्णुं री कुछ परवाह करहा। 5तेबे भी ये विधवा मुंजो परेसान करहा ई, इधी कठे मां तेस्सा रा न्याय चुकाणा केथी एह्ड़ा नी हो कि घड़ी-घड़ी आई किन्हें बादा मन्झ मेरी नाका मन्झ दम करहे।’”
6प्रभु यीसूए बोल्या, “सुणा कि ये पापी न्यायी ले सिखा। 7एता कठे क्या परमेसरा आपणे चुणिरे लोका रा न्याय नी चुकाणा, जो राती ध्याड़ी तेसरी दुहाई देहां ऐं, होर क्या तेस तिन्हारे बारे मन्झ देर करणी? 8हांऊँ तुस्सा किन्हें बोल्हा, तेस झटपट तिन्हारा न्याय चुकाणा, तेबे भी मां माह्णुं रे मह्ठे जेबे आऊंणा, ता धरती पर मुंजो कितने मिलणे जिन्हा मेरे पर विस्वास रखणा?”
फरीसी लोक होर चुंगी लैणे वाल़े रा उदाहरण
9फेरी यीसूए तिन्हा जो उदाहरण दितेया, जेह्ड़े लोक आपणे आपा जो धर्मी मन्हां ऐं थे, होर केसी जो भी कुछ नी समझ्दे थे। 10“दो माह्णुं मन्दरा मन्झ प्रार्थना करणे रे कठे गये, एक फरीसी लोका मन्झा ले एक था होर दूजा चुंगी लैणे वाल़ा। 11से फरीसी माह्णुं खड़ा हुई किन्हें आपणे मन्झ इंहां प्रार्थना करदा लग्या कि, ‘हे परमेसर, हांऊँ तेरा धन्यावाद करहा कि, हांऊँ होरी माह्णुं साहीं डाकू, ठग होर व्यभिचारी नी आ, होर ना एस चुंगी लैणे वाल़े साहीं आ। 12हांऊँ हप्ते मन्झा ले दो बार ब्रत करहा; हांऊँ आपणी सभ कमाई रा दसुंआ हिस्सा भी तुजो देहां।’ 13पर चुंगी लैणे वाल़े दूर खड़ी किन्हें, ऊपर स्वर्गा वखा जो देखणे री हिम्मत नी हुई, पर आपणी छाती पिटी-पिटी किन्हें बोल्या, ‘हे परमेसर मुझ पापी पर दया कर।’ 14हांऊँ तुस्सा किन्हें बोल्हा कि, से फरीसी नी आ, पर से चुंगी लेणे वाल़ा जो परमेसरा रे साम्हणें धर्मी हुई किन्हें घरा जो गया। क्यूंकि जो कोई आपणे आपा जो बडा बणान्घा, से छोटा कितेया जाणा; होर जो आपणे आपा जो छोटा बणान्घा, से बडा कितेया जाणा।”
बच्चे जो आसरीवाद
(मत्ती 19:13-15; मरकु. 10:13-16)
15फेरी लोक आपणे बच्चे जो भी यीसू वाले ल्याउंदे लगे, ताकि से तिन्हा पर हाथ रखी किन्हें तिन्हा जो आसरीवाद दे; होर चेले तिन्हा माऊ-बापू जो बक्के। 16पर यीसूए बच्चे जो नेडे सादी किन्हें बोल्या, “बच्चेया जो मेरे वाले आऊणें देआ, होर तिन्हा जो नांह नी करा। क्यूंकि परमेसरा रा राज एह्ड़े लोका रा आ, जो बच्चे साहीं नम्र ऐं। 17हांऊँ तुस्सा किन्हें सच्च बोल्हा कि, जो कोई परमेसरा रे राजा जो बच्चेया साहीं ग्रैहण करा, तेस तेता मन्झ दाखल हूंणां।”
अमीर माह्णुं होर अनंत जिन्दगी
(मत्ती 19:16-30; मरकु. 10:17-31)
18केसी मुखिये यीसू ले पूछेया, हे खरे गुरु, अनंत जिन्दगी पाणे रे कठे हांऊँ क्या करूं? 19यीसूए तेस किन्हें बोल्या, “तू मुंजो खरा कि बोल्हा? परमेसरा जो छाडी किन्हें कोई खरा नी आ। 20पर तू हुक्मा जो ता जाणहां कि, व्यभिचार नी करणा, हत्या नी करणा, चोरी नी करणा, झूठी गुआही नी देणा, होर आपणे माऊ बापू री इज्जत करणी।” 21तिन्हें बोल्या, “हांऊँ ता इन्हा गल्ला जो बचपना ले ई मन्नदा आईरा।” 22ये सुणी किन्हें यीसूए तेस किन्हें बोल्या, “तुध मन्झ ऐबे भी एक गल्ला री कमी ई, आपणा सभ कुछ बेची किन्हें गरीबा जो बांडी दे, होर आई किन्हें मेरा चेला बण। होर तुजो स्वर्गा मन्झ धन मिलणा।” 23से ये सुणी किन्हें बौह्त दुआस हुएया, क्यूंकि से बौह्त अमीर था, होर आपणी जायदाद नी बेचणा चाहन्दा था।
24यीसूए तेस जो देखी किन्हें बोल्या, “अमीरा रा परमेसरा रे राजा मन्झ दाखल हूंणा कठण आ? 25ऊंटा रा सुई रे नाके मन्झा ले निकल्ना असान हुई सक्हा पर परमेसरा रे राजा मन्झ अमीरा रा दाखल हूंणां बौह्त कठण आ।” 26होर तिन्हें सुणने वाल़े बोल्या, अगर अमीरा रा परमेसरा रे राजा मन्झ दाखल हूंणां बौह्त कठण आ, ता फेरी केसरा उद्धार हुई सक्हा? 27पर यीसूए बोल्या, “जो माह्णुं ले नी हुई सक्दा, से परमेसरा ले सभ कुछ हुई सक्हा।” 28पतरसे बोल्या, “आस्से ता घर-बार छाडी किन्हें तेरे चेले बणी गईरे।” 29यीसूए बोल्या, “हांऊँ तुस्सा किन्हें सच्च बोल्हा कि, जिन्हें परमेसरा रे राजा रे कठे घर-बार या भाई-बैहण या माऊ-बापू या बाल बच्चे छाडी दितिरे हो। 30तिन्हो एस युगा मन्झ कई ज्यादा मिलणा, होर आऊणें वाल़े युगा मन्झ तिन्हा जो अनंत जिन्दगी मिलणी।”
आपणी मौता रे बारे मन्झ यीसू री त्रीजी भविस्यवाणी
(मत्ती 20:17-19; मरकु. 10:32-34)
31फेरी यीसूए आपणे बारा चेले लग जे लई किन्हें तिन्हा किन्हें बोल्या, “आस्से यरुस्लेम सैहरा जो जाहें, होर जितनी गल्ला हांऊँ माह्णुं रे मह्ठे मेरे बारे मन्झ नबिया रे ज्रीए लिखी गईरी स्यों सब पूरी हूणीं। 32क्यूंकि से अन्यजाति लोका रे हाथा मन्झ पकड़ाया जाणा, होर तिन्हा मेरा मजाक डूआणा; होर मेरी बेज्जती करणी, होर मेरे पर थूकणा। 33होर मुन्जो कोड़े मारणे, होर मुकाई देणा, होर तेस त्रीजे ध्याड़े जिउंदे हुई जाणा।” 34होर तिन्हें इन्हा गल्ला मन्झा ले कोई गल नी समझी। होर ये गल तिन्हा ले लुखिरी रही, होर जो बोल्या गईरा था से तिन्हारी समझा मन्झ नी आया।
काणे भिखारी रा ठीक हूंणा
(मत्ती 20:29-34; मरकु. 10:46-52)
35जेबे यीसू होर तेसरे चेले यरीहो सैहरा रे नेडे पुज्हे, ता एक काणा सड़का रे बाढे बैठी किन्हें भीख मान्गेया करहा था। 36होर से भीड़ा री चलणे री अवाज सुणी किन्हें पुछदा लग्या, ये क्या हुएया करहा? 37तिन्हें तेस जो बोल्या कि, “नासरता रा यीसू जाया करहा?” 38तेबे तिन्हें जोरा किन्हें बोल्या, “हे यीसू, राजे दाऊदा रे मह्ठे (यीसू दाऊदा रे बंसा रा था), मेरे पर दया कर।” 39जो अगे जाया करहा ऐं थे, स्यों तेस जो प्रुआचदे लगे कि चुपचाप रह, पर से होर भी च्लान्दा लग्या कि, “हे राजा दाऊदा रे मह्ठे, मेरे पर दया कर!” 40तेबे यीसूए खड़े हुई किन्हें हुक्म दितेया कि तेस जो मेरे वाले ल्याऊआ, होर जेबे से नेडे आया, ता तिन्हें तेस ले ये पूछेया, 41“तू क्या चाहां कि, हांऊँ तेरे कठे करूं?” तिन्हें बोल्या, “हे प्रभु, हांऊँ ये चाहां कि, हांऊँ देख्दा लगी जाऊँ।” 42यीसूए बोल्या, “देख्दा लगी जा, तेरे विस्वासे तू ठीक करी दितेया।” 43होर से झटपट देख्दा लगी गया, होर परमेसरा री बड़ाई करी किन्हें तेसरे साउगी रस्ते मन्झ चली पया, होर सभ लोके देखी किन्हें परमेसरा री बड़ाई किती।
Айни замон обунашуда:
लूका 18: MJLNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.