लूका 10
10
स्हत्र चेले भेजे जाणे
1होर इन्हा गल्ला ले बाद प्रभु यीसूए स्हत्र होर चेले नियुक्त किते होर जेस गांऊँआं होर जगहा जो जाणे रे बारे मन्झ सोचिरा था, तेथी तिन्हें स्यों दो-दो करी किन्हें आपणे आगे भेजे। 2होर यीसूए तिन्हा किन्हें बोल्या, “पक्किरी डोहर्रिया ता बौह्त ई पर मजदूर थोह्ड़े ऐ, इधी कठे खेता रे माल्का किन्हें अर्ज करा कि से आपणी डोहर्रिया री कट्टाई रे कठे मजदूर भेजी दे। 3जाऊआ, हांऊँ तुस्सा जो भेडा साहीं एह्ड़े लोका वाले भेज्या करहा जो भेड़िये साहीं खतरनाक ऐं। 4इधी कठे होर ना बटुऐ मन्झ ढब्बे, ना ता झोला, ना ता बूट लैया; होर ना पैंडे मन्झ केसी जो नमस्कार करा। 5जेस केसी रे घरा मन्झ जाऊआ, सभी ले पैहले ये बोला, ‘एस घरा मन्झ सांति हो।’ 6पर तेस घरा मन्झ कोई परमेसरा री सांति पाणा चाहां, ता सांति रे कठे कितरी प्रार्थना तिन्हा जो आसीस देणा। पर तेस घरा मन्झ एह्ड़ा कोई नी आ ता तुस्सा री प्रार्थना री वजहा ले तुस्सा जो सांति मिलणी। 7तेस घरा मन्झ ई रहुआ, होर जो कुछ तिन्हा ले मिले, सेई खाऊआ पिऊआ, क्यूंकि मजदूरा जो आपणी मजदूरी मिलणी चहिए। होर एक घरा ले दूजे घरा मत फिरदे। 8होर जेस गांऊँआं मन्झ तुस्से जाओ, होर तेथी रे लोक तुस्सा जो ग्रैहण करहे, ता जो कुछ स्यों तुस्सा जो खाणे जो दे तेता जो ग्रैहण करा। 9तेथी जो ब्मार हो तिन्हा जो ठीक करा: होर तिन्हा किन्हें बोला कि, ‘परमेसरा रा राज तुस्सा रे नेडे आई गईरा।’ 10पर जेस गांऊँआं मन्झ जाऊआ, होर तेथी रे लोक तुस्सा जो नी अपनांदे, ता तेथिरी गल्लिया मन्झ जाई किन्हें बोला 11कि, ‘तुस्सा रे गांऊँआं री धूल भी, जो आस्सा रे पैरा मन्झ लगिरी, आस्से तुस्सा रे साम्हणें झाड़ी देंहा ऐं, तेबे भी तुस्से ये जाणी लऊआ कि, परमेसरा रा राज तुस्सा रे नेडे आई गईरा।’ 12हांऊँ तुस्सा किन्हें सच्च-सच्च बोल्हा कि, तेस ध्याड़े तेस गांऊँआं रे लोका री हालत सदोम सैहरा रे लोका री हालत ज्यादा खराब हूणीं।”
विस्वास नी करणे वाले लोका पर सजा
(मत्ती 11:20-24)
13“हे खुराजीन गांऊँआं, होर बैतसैदा गांऊँआं मन्झ रैहणे वाल़े लोको! तुस्सा जो बौह्त सजा मिलणी। जो चमत्कारा रे काम तुस्सा मन्झ किते गये, अगर स्यों सुर होर सैदा रे सैहरा मन्झ किते जांदे, तेथी रे लोक बौह्त पैहले ही स्यों टाट ढखी किन्हें, होर सुआही मन्झ बैठी किन्हें, ये दसदे कि तिन्हें पाप करना छाडी दितरा। 14पर न्याय रे ध्याड़े तुस्सा री हालत सुर होर सैदा रे सैहरा रे लोका ले ज्यादा खराब हूणीं। 15होर हे कफरनहूम सैहर रे लोको, क्या तुस्से स्वर्गा तक ऊँचा किते जाणे? तुस्से ता पताल लोका तक नीचे किते जाणे।”#10:15 यसा. 14:13,15 16“जो तुस्सा री सुणहां, से मेरी सुणहां होर जो तुस्सा जो बेकार जाणहां, से मुंजो बेकार जाणहां; होर जो मुंजो बेकार जाणहां, से मेरे भेजणे वाल़े परमेसरा जो बेकार जाणहां।”
सह्त्र चेले री वापस आऊंणा
17स्यों स्हत्र चेले खुसी किन्हें दबारा आई किन्हें बोल्दे लगे, “हे प्रभु, जेबे आस्से तेरे नांऊँआं ले हुक्म दितेया ता दुस्टात्मे भी आस्सा री गल मनी ली।” 18तिन्हें तिन्हा किन्हें बोल्या, “हांऊँ जेबे दुस्टात्मे तुस्सा री गल मनी ली तेबे मैं सैताना जो बिजली साहीं स्वर्गा ले पऊन्दा देख्या करहा था।#10:18 प्रका. 12:7-9, यसा. 14:12 19सुणा, मैं तुस्सा जो कीड़े होर बिछुआ जो रौन्दणे रा, होर दुस्मणा री सारी सामर्था पर हक दितिरा, होर केसी चीजा ले तुस्सा जो कुछ नुक्सान नी हूंणां। 20फेरी भी इधी कठे खुस मत हुआ कि दुस्टात्मा तुस्सा री गल्ला मना ई, पर एता ले खुस हुआ कि तुस्सा रे नांऊँ स्वर्गा मन्झ लिखिरे।”
मह्ठे रे ज्रीए बापू जो जाहिर करणा
(मत्ती 11:25-27; 13:16-17)
21तेस ई टैम से पवित्र आत्मा मन्झ हुई किन्हें खुसी किन्हें भर्ही गया, होर बोल्या, “हे बापू, स्वर्गा होर धरती रे प्रभु, हांऊँ तेरा धन्यावाद करहा कि, तैं ये गल्ला बुद्धिमाना होर समझदारा लोका ले ल्कोई किन्हें रखी, होर छोटे बच्चेया साहीं लोका पर जाहिर किती। हां, हे बापू, क्यूंकि तुस्सा जो येई खरा लग्या। 22मेरे बापूए मुंजो सब कुछ सौंपी दितिरा; होर कोई नी जाणदा कि मह्ठा कुणहां, सिर्फ बापू होर बापू कुणहां ये भी कोई नी जाणदा, सिर्फ मह्ठा होर मह्ठा ई बापू जो जाहिर करी सक्हा।”
23होर तिन्हें चेले री तरफ मुड़ी किन्हें चुपके जे बोल्या, “धन्य ई स्यों हाखिया, जो तिन्हा गल्ला जो देख्हा ई जिन्हा जो तुस्से देख्हा ऐं। 24क्यूंकि हांऊँ तुस्सा किन्हें बोल्हा कि, बौह्त नबिये होर राजेया चाहेया कि स्यों गल्ला देखे जो गल्ला तुस्से देख्हा ऐं, पर नी देखी सके; होर स्यों गल्ला सुणें, जो गल्ला तुस्से सुणहां ऐं; पर नी सुणी सके।”
दयालु सामरी रा उदाहरण
25होर एक व्यवस्था स्खाणे वाल़ा यीसू वाले आया, होर ये बोली किन्हें तेसरी परखणी करदा लग्या कि, “हे गुरु, अनंत जिन्दगी पाणे रे कठे हांऊँ क्या करूं?” 26यीसूए तेस किन्हें बोल्या कि, “मूसा री व्यवस्था मन्झ क्या लिखिरा? तुस्से एता ले क्या समझे?” 27तिन्हें जवाब दितेया कि “तू प्रभु आपणे परमेसरा किन्हें आपणे सारे मन होर आपणे सारे प्राण होर आपणी सारी सामर्थ होर आपणी सारी बुद्धि साउगी प्यार रख। होर आपणे पड़ोसी किन्हें आपु साहीं प्यार कर।”#10:27 मत्ती 22:37-40, व्य. 6:5, व्य. 10:12, यहो. 22:5 28यीसूए तेस किन्हें बोल्या, “तैं ठीक जवाब दितेया। एह्ड़ा ई कर, तेबे तुध अनंत जिन्दगी पाणी।” 29पर व्यवस्था स्खाणे वाल़े आपणे आपा जो सही बणाणे चाहां था। इधी कठे तिन्हें यीसू ले पूछेया, “ता मेरा पड़ोसी कुणहां?”
30यीसूए तेस जो कहाणी सुणाई किन्हें जबाब दितेया कि, “एक माह्णुं यरुस्लेम सैहरा ले यरीहो सैहरा जाया करहा था। से डाकुए घेरी लया तेसरे कपड़े तुआरी दिते, होर तेस जो मारी पिटी किन्हें अधमुआ छाडी किन्हें चली गये। 31होर एह्ड़ा हुआ कि तेस ई पैंडे ले एक यहूदी याजक जाया करहा था, पर तेस जो देखी किन्हें से बिना मदद करी किन्हें चली गया। 32इंहां ई लेवी लोका रे घराने रा (जो मन्दरा मन्झ काम करा था) एक तेस जगहा आया, से भी तेस जो देखी किन्हें बिना मदद करी किन्हें चली गया। 33पर एक सामरिया ईलाके रा मूसाफर तेथी ले निकल्या, होर तिन्हें तेस अधमुए माह्णुं जो देखी किन्हें तरस खाध्या। 34होर तिन्हें तेस वाले आई किन्हें होर तेसरे जख्मा पर तेल होर अंगूरा रा रस ल्गाई किन्हें पट्टिया बान्ही। होर तेस जो आपणी सुआरी पर चढ़ाई किन्हें सराया मन्झ लई गया, होर तेसरा ख्याल रख्या। 35दूजे ध्याड़े तिन्हें दो ध्याड़े री कमाई रे बराबरा री कीमत काढी किन्हें सराया रे रखवाले जो दिती होर तेस किन्हें बोल्या कि, ‘तेसरा ख्याल रख्या, होर जो कुछ कीमत लगघी, से मां वापसी पर तुजो देई देणी।’ 36तेबे यीसूए पुछेया, तुजो क्या लगहा जो डाकुए मारिरा था, इन्हा तीना मन्झा ले तेसरा पड़ोसी कुण हुआ?” 37व्यवस्था स्खाणे वाल़े बोल्या, “सेई जिन्हें जे तेस अधमुए पर दया किती।” यीसूए तेस किन्हें बोल्या, “जा, तू भी एह्ड़ा ई कर।”
मार्था होर मरियमा रे घरा यीसू
38फेरी जेबे यीसू होर तेसरे चेले यरुस्लेम वखा जो जाया करहा ऐं थे, ता से एक गांऊँआं मन्झ आये। होर तेथी मार्था नांऊँआं री एक ज्नाने आपणे घरा मन्झ तेसरा स्वागत कितेया। 39होर तेस्सा री मरियम नांऊँआं री एक बैहण थी; से प्रभु रे पैरा वाले बैठी किन्हें जेह्ड़ा यीसू स्खाहां था तेता जो सुणहां ईं थी। 40पर मार्था खाणा बणान्दे-बणान्दे परेसान हुई गईरी थी। होर से यीसू वाले आई किन्हें बोल्दी लगी, “हे प्रभु, क्या तुस्सा जो कुछ फिकर नी ई कि मेरी बैहणीऐं हांऊँ सारे काम करणे रे कठे छाडी दितिरी? एता कठे तेस्सा किन्हें बोल कि, आई किन्हें मेरी मदद कर।” 41पर प्रभु यीसूए तेस्सा जो जवाब दितेया, “मार्था, हे मार्था; तू बौह्त चीजा रे कठे फिकर करहा ई होर परेसान हुंहाँ ईं। 42सच्चमुच एक गल ही जरूर ई, होर मरियमे तेस एक गल्ला जो चुणी लईरा: जो तेस्सा ले कधी वापस नी लया जाणा।”
Айни замон обунашуда:
लूका 10: MJLNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.