Kisah Rasul-rasul 3
3
Si tou lailai liné'os ni Petrus
1I sana endo witu un jam katelu im wengindo, un oras i mengaléi, si Petrus wo si Yohanes é nimangé witi Walé ni Opo Empung. 2Im witu ém wéwéhan si tuama un a'éna é lailai rengan i nimatoumé, ni sia ém pahwulé-wulénganokan. Sekez in endo ni sia ém pengangaliné witu rété um pepenet um Walé ni Opo Empung um pahkuan Pepenet Wangun. Ni sia im witu é mengangaléi wia sé tou mémuntep witu um Walé ni Opo Empung. 3I ni sia nimileka si Petrus wo si Yohanes i mahuuntepo witu um Walé ni Opo Empung kumiit um pepenet itii, a sia mahaléi wia ni séra.
4Si Petrus wo si Yohanes nimileka wia ni sia, ang kuan ni Petrus wia ni sia, “Mileké wia ni kai!”
5Si tou itii rengan nimileka wia ni séra karia i mahéré'la im wéwéhan un iwéhé néramé.
6Taan si Petrus éng kimuama, “Ni aku én zéi'kan siapa mas kaapa péra'. Taan apa um wia ni aku iwéhéku wia ni ko: Witu u ngaran ni Yesus Kristus si tou Nazaret itii, rumendaiomé wo lumampangoma!”
7A si Petrus tumiona u lengen kakan ni tou itii a sumawanga ni sia i rumendaié. In toro niitukan a maenté'mé an a'é wo am wukuna an a'é ni tou itii. 8A si tou itii kumonta'mé, melampa-lampang wayaan ung kawurian, a sia kumiita ni séra nimuntepa witu um Walé ni Opo Empung. Ni sia é melampa-lampang karia i mengonta-ngonta' wo kasii mahlooz si Opo Empung. 9Péléng sé tou é mahilek ni sia i mahlampango wo meloo-looz si Opo Empung. 10A sia kana'uan nérala i ni sia é si tou mengangaléi witi Pepenet Wangun um Walé ni Opo Empung. Ni séra é mengusi-ngusingsing wo menganga-ngangamokan i nimilekla u nimamuali wia si tou itii.
Si Petrus mahnuwu' witi Loloangan Salomo
11Si tou lailai woan itii é mengii-ngiit uman si Petrus wo si Yohanes. Pahpaano niitu péléng sé tou sé mengusi-ngusingsingpé' itii mérimimbung wia ni séra telu witi loloangan u makangaran ‘Loloangan Salomo’. 12I si Petrus nimileka sé tou lakez itii, a sia kumuala wia ni séra, “É kamu in tou Israel, kaa kamu mengompo' i nimileka un taré mamualima kenu? Kaa kamu mengile-ngileké wia ni kai tanumokan ni kai sé nimangun ni sia in toromo mahlampang pahpaan ung kawasa kaapa pahpaan ni kai sekezé é mahwangun ung kapaaz ni Opo Empung? 13#Kel. 3:15 Si Opo Empung si pa'émanen ni Abraham, ni Ishak wo ni Yakub wo kasii si pa'émanen né nimaopota, ni Sia é simigi' wo limoozola si Ata-Na, si Yesus si méikasoo nioula wo méiayo nioula wia si gubernur Pilatus, zozo' si Pilatus in esa timotozola i milot ni Sia. 14#Mat. 27:15-23; Mrk. 15:6-14; Luk. 23:13-23; Yoh. 19:12-15 Ni kamu nimahaléila wia si gubernur i milot si memumunu' tou. Taan ni Sia si Lenas wo Ulit é méikasoo niouola. 15Ni Sia si mahwéhémé un uli-ulit katou-touan wia péléng sé tou ém winunu' niouola. Taan ni Sia é méitoumomé sumaup ni Opo Empung im wia sé nimatémo. Ni kaimo sé nimilek a nimamuali itii.
16In tarékan, pahpaan si tou kata'uan niou wo pengile-ngileken niou kenu ma'éman witu u ngaran ni Yesus, niitumo u Ngaran itii nimangun ni sia nimaenté'. Wo um pa'émanenna itii u nimangun ni sia nimalé'os witu u sinaru niou péléng.
17Katuari-katuari, kata'uangku am winangun niou wo né tonaas niou i nimunu'mola si Yesus ém pahpaan um winangun niou itii én zéi'kan kata'uan niou. 18Taan karia in téntu si Opo Empung é limekepola u méikua-Na im puuna mengiité sé nabi, i si Mesias é léwo'zéi' mazézéha. 19Niitumo, itula'umola a singkéla' niou wo kumiitola si Opo Empung. Karia in téntu, a singkéla' niou ém pali'en ni Opo Empung. 20Ni Sia é mangun ni kamu maena'. Wo si Opo Empung kasii é matumé si Yesus, si rengané im puuna én tinotoz-Namo i maéndo Kristus niou. 21Taan in tarékan si Yesus Kristus é léwo'zéi' i mento' witi kasendukan, makaz péléng am péléng ém pinakawerumoma ni Opo Empung. Niitu é mémoikua ni Opo Empung rengané im puuna mengiité sé nabi-Na sé lenas.
22 #
Ul. 18:15, 18-19 Zéi'kankuaa si Musa éng kimuamola in téntii, ‘Si Opo Empung é méhé si nabi wia ni kamu wo si nabi itii é méyé im wia sé tahsasana wanua niou, tanu ni Sia i niméhémé ni aku.’ Péléng an ipahkua ni nabi itii wia ni kamu é léwo'zéi' im pahwéhan nioula genang. 23Séi si zéi'kan mahwéhé genang im wana an ipahkua ni nabi itii, si tou itii ém patampasen im wia sé tou ni Opo Empung wo mawunu'en.
24Péléng sé nabi walina kasii, rengané wia si nabi Samuel makaz wia sé nabi timondongé ni sia éng kimuamo kasii a méikuamé ni Opo Empung tumoro u mamuali witu un oras kenu. 25#Kej. 22:18 Ni kamu é makailek a méitaaz ni Opo Empung a méikua-Na mengiité sé nabi-Na. Wo kasii um pinataazan winangun ni Opo Empung karia né nimaopo niou é makailekan niou. Um pinataazan itii ém winangun ni Opo Empung i ni Sia kimua wia si Abraham, ‘Péléng sé tahsasana wanua wia ung kaayahan éng kamangen mengiité si suzumu.’
26Niitumo, si Opo Empung ing kataré-taré én timoumé sumaup si Ata-Na an iatu-Nama i mangé wia ni kamu, wo ni Sia kumamang ni kamu karia i nimangun ni kamu timula'ula péléng a singkéla' niou, a mawuri sumaup wia si Opo Empung.”
Айни замон обунашуда:
Kisah Rasul-rasul 3: LAITOM
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in