Etatelu 28
28
1Okone Isaka aketi Jakoba, akotshokola Ndi akokomiya ati: Tosaki wadi uma lʼatei wʼana amantu wʼasi Kanana. 2Unela, keli utshu utsha la Padana-Arama, laka tsheye Betuele, kututshuki wadi uma lʼatei wʼana amantu wa Labana, nyo pami. 3Unyashungu Kanga-Wulu-Tshe akotshokole, akusha diwutshi, akafudia dia we ndjala lotshetshe la wedja efula wʼantu. 4Ndi akotshokole, we la tukanula taye, la etshoko wʼAbarahama,#28:4 Etat. 17:4-8. dia nyu nkita kete yudjashiye uku ongendangenda, yakasha Unyashungu Abarahama. 5Isaka akakendja Jakoba. Ku ndi akatshu utsha la Padana-Arama le Labana, onangu Rebeka, nyangu Jakoba la Esau, onʼa Betuele, usi Arama.
6Esau akenyi ati: Isaka akatshokola Jakoba. Ndi akutumi utsha la Padana-Arama dia ndi ntutshuka wadi uma leko. Ndi akenyi ntu ati: Isaka akokokomiya ati: Tosaki wadi uma lʼatei ana amantu wʼasi Kanana. 7Ndi akenyi ntu ati: Jakoba akakitanyia aui wa shi la nyangu, akatshu utsha la Padana-Arama. 8Esau akenyi ntu ati: Ana amantu wʼasi Kanana kongenyangenya utema wa Isaka, shi. 9Diako mbakatshu Esau utsha le Ishamele. Ndi akatutshuka onʼandi Mahalata ladiku dia wadi akina waki la ndi. Mahalata ako aki kadiya Nebayota lakuti Ishamele, onʼa Abarahama.
Unyashungu Ambene le Jakoba la Betele
10Jakoba akunela uma la Bere-Sheba utsha la Harana. 11Lamʼakadji unya, ndi akatulala lu mbuka. Ndi akose dive dimotshi, akadikitsha weko, aketama djo. 12Ndi akenyi do, enyi ku lukati lone lemadi uma la kete pulu ndu lʼulungu, ku andjelo wa Unyashungu wadela la wahulo lu lukati lako.#28:12 Joa. 1:51. 13Ku Latuya laka akemala lʼote alo; akati ati: Dimi leli Latuyalaka, Unyashungu a tsheye Abarahama, Unyashungu wa Isaka Kete ku yetamiye mbayumukusha, we la tukanula taye.#28:13 Etat. 13:14-15. 14Tukanula taye tayuyala efula uku ditshu dia la kete. Vo wayudiangana utsha lʼedjelu ndu utsha lʼehutwelu ka unya, la utsha la ngele ndu la diku dia kushi. Khumbu ya wedja tshe wa la kete yayotshokwama lu dikambu diaye, we la tukanula taye.#28:14 Etat. 12:3; 22:18. 15Enda, dimi leko la ye. Dimi layutakulamaka lu ahuli tshe wayuyutatshokaka. Ndu layukukaluya lu kete nye, ne dia dimi hankosekaki edja ndu lamʼayumushidiya akambu wamumukutela. 16Ku Jakoba akemo uma lu djo; akati ati Mete, Latuyalaka eko lu dihuli ne, keli dimi kumbeya. 17Ku ndi akuki woma; akati ati: Dihuli dia woma ne. Luudu la Unyashungu mbeli lane, suku diʼutsha lʼulungu ne.
18Jakoba akunela la pindju. Ndi akose dive diakandakitsha weko, akadieme uku ekoho ka euhwelu, akatela iso lʼote adio. 19Ndi akole dihuli diako ati: Betele (kitshimudi ati: luudu la Unyashungu). Keli lukumbu lakawetaka usumba ako ntundu, laki Luza. 20Jakoba akatshiki daka ati: Naka Unyashungu eko la mi, ndu ayutanamaka lu lokendo latamatshu lone, naka ndi ayutambishaka ma dia nde la ahondo wa ndota, 21ndu ayu nkaluya la ki lu luudu la papa, ku Latuyalaka ayuyala Unyashungu ami. 22Dive diamumeme ne, diayali uku luudu la Unyashungu. Ku uma lu diango tshe diayundumbishaka, dimi layukaluyaka etenyi ka dikumi le ndi.
Айни замон обунашуда:
Etatelu 28: TLL
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991