Mwanzo 39
39
Yuusufu ari owawe Potifwaari
1Yuusufu aathuuliwe khulawaniwa Misuri pi annya esumayila. Noofiya khuuzanyeziwa Potifwaari mmisuri, karumeya nwulu wa Firawuuna, namalokozela wa anamweekesela.
2Nnyizinku aari vamote na Yuusufu, khumparikhiya khusala eekhalaka Misuri vaje wa mbwanaawe. 3Mbwana awe otule khoona yoori Nnyizinku ori vamote na Yuusufu, wakhula etthu aari orettaaye Nnyizinku eetta onjaaliwa. 4Potifwaari khumoona Yuusufu wiiya woofwayi, khumwinkha ottunkhulu wa weettettisela vaje vawe na maali zawe zooshi. 5Paata yoomwinkha ottunkhulu wa vaje vawe na wa maali zawe zooshi, Nnyizinku khuparikhiya vaje aphale mwaasa wa Yuusufu. Parakha ya Nnyizinku yeeshukheliye khwa zooshi epile aariinaazo, waaza vaje mpakha mmashapa mwawe. 6Zooshi aariinaazo nttunkhulu aya khwiiya Yuusufu, Potifwaari khaari ojali hatha etthu yohiiyi etthu yooja etile ari ojakaaye. Yuusufu aari wooshapweya wumpo na weeziwa.
7Noorettikhana vitthu epile, muukha wa Potifwaari khwaaza ontakha Yuusufu. Siikhu moote khumuuza yoori: “Weeyo nlawe wakilalane.” 8Ye khukatthala, khumuuza muukha wa Mbwana awe yoori: “Moone! Mbwanaaka khanjali vitthu za vaje apha; zooshi ariinaazo, ziri mmakhono mwaka. 9Khaavo mmote akizitiyeeyo miiyo vaje apha, khayiivo hatha etthu moote akikhattaziyeeyo ila mweeyo wala, mwaasa wa wiiya muukhaawe. Etthu yootakhala nkhama eto, kirette mwaasa wa niini? Toowo kintta onkosa Nluku!” 10Wakhula siikhu muukha otule eetta onkhanyarela yoori alawe anlalane, ila Yuusufu khuhisala ansiileza na khusala anwerawera.
11Siikhu moote, ye khuvira nnyupa olawa okhola khaazi zawe, aarettiye ahiwo hatha mwiitthwaana mmote. 12Muukha wa Potifwaari khukhola orempo awe khumuuza yoori: “Haya okilalane!” Yuusufu khunlikhela orempo awe mmakhono mwawe khutthirela vaje.
13Muukha otule ooniyeevo yoori atthira khulikha orempo awe, 14khuwaakhuwela akarumeya khuwooza yoori: “Mmoone! Mwiipereewu otu atiisiweeyo ti mannaka aaza onittukhana. Aaviriye okatthi waka khusala atakha okilalana, ila miiyo khusala kikhuwa kinyakulaka. 15Ye nawoona yoori keetta onyakula khukilikhela orempo awe khutthirela vaje.”
16Ye khupweha orempo opule mpakha Mbwana awe ota. 17Wakathi atiiyeevo khumuuza mattakhuzi apale araka: “Mwiitthwaana awo otule wa mwiipereewu onitiiseliyeeyo apha aakiteeliye yoori anittukhane. 18Kikhuwiyeevo, ye khukilikhela orempo awe khutthira.”
19Paata yoosiila mattakhuzi apale aari wuuziwaaye ti muukhaawe, araka: “Mwiitthwaana awo vitthu akiretteliyeezo pi epo,” ye khukafilikha venkivene. 20Khuruma weetteliwa Yuusufu khutthiiwa nkalapooso, antthiwakaamo anamafukeliwa a mfwalume Firawuuna; nttumpho ye khwiiya woofukeliwa. 21Ila Nnyizinku ari vamote na Yuusufu anthoonyezaka pheta ya waamineya, nttunkhulu wa anamweekesela kalapooso khunkhola saana. 22Khumwinkha ottunkhulu Yuusufu wa anamafukeliwa ooshi, khwiiya namalokozela vitthu zooshi za nkalapooso mphule. 23Nttunkhulu wa anamweekesela a kalapooso etile khuhisala ajali hatha etthu, zooshi zaari mmakhono wa Yuusufu mwaasa yoori Nnyizinku aari vamote na ye; na wakhula etile aari orettaaye aari ojaaliwa.
Айни замон обунашуда:
Mwanzo 39: eko
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.