Mwanzo 35
35
Yaakhumpa oninjeka alitaari wa Nluku Beetele
1Nluku khumuuza Yaakhumpa yoori: “Olankhe olawe Beetele weekhale ottuukho, wanjekewo alitaari wa Nluku otu oopuweleliyeeyo wakathi waari ontthiraavo ttwiiyo Ezawu.”
2Yaakhumpa khuwooza ajamaaze na atthu apale aariina yoori: “Mweeselele okho miluku zenu epo zoohifwayi mwiriinaazo, mwijitwaharishe mwiwale kuwo kiina. 3Nilankhe nilawe Beetele, ottuukho kinlawa kanjekewo alitaari wa omwaaputuvo Nluku otu aakipuweleliyeeyo siikhu epile kaari mmashakha, otu aakilokoziyeeyo tarikhi zooshi kiviriyeezo.” 4Yo khumwinkha Yaakhumpa miluku zaya zooshi epile zoohifwayi aariinaazo, na pirinku epile aawaliyeeyo aakha ooshi, ye khuthuula khuthipela nshini wa muutthi nwulweene waari nti wa Shekemu. 5Wakathi yo alankhiyeevo alawaka, Nluku khuwaapatthisa woova atthu a sitati epile aattamananiyeezo, mphule aari oviraamo, khuhiweekarisi aana a Yaakhumpa.
6Yaakhumpa khufiya na atthu awe ooshi nti wa Luuzhu oniitthiwaaye Beetele, tuniya ya Kanaani. 7Khunjeka alitaari, puuro yaya etile khutthajavo nzina la Nluku wa Beetele mwaasa yoori Nluku aajithoonyeziye attaaphale wakathi opule Yaakhumpa aari ontthiraavo ttwiiye.
8Deebora, yaaya wa Rapekha khufwa, khuzikhiwa kharipu ya Beetele nshini wa muutthi nwulweene oniitthiwaaye Alooni-Pakuuti#35:8 Nzina ntthi la Alooni-Pakuuti lina maana la muutthi zaakwisiweevo mishozi. .
9Yaakhumpa nooruti Paata Araamu, ari Beetele, Nluku ampuweleliye swaafu ya phiiri khumparikhiya. 10Khumuuza yoori: “Nzina lawo o Yaakhumpa ila waaza leelo walikha, aphano nzina lawo o Ezirayiilu.” Ti nanna Nluku antthajiyeeyo nzina la Ezirayiilu.
11Nluku khumuuza theenya araka:
“Miiyo ki Nluku Nwahi zooshi,
mwivokolelane na mwaattelane.
Khwa ojama awo weeyo
enteela opuwa khapila
na khuntti ya khapila za waatta
na anlawa apuwevo afwalume.
12Nti kimwinkhiyeeyo Eburahiima na Esiyaakha
kiniwinkha weeyo na theenya ojama awo ontaaye kininkha nti otthuupu.”
13Nawiisha ottakhulana Yaakhumpa, Nluku khulaavo puuro yaya etile.
14Yaakhumpa khweemesa nripu la mawe vahali attaaphale aattakhulaniyeevo Nluku. Khwiitthela viinyu nripu laya ntthile na khuvaaza mafuttha. 15Ye khutthaja nzina la Beetele puuro yaya etile aari ottakhulanaavo Nluku.
Ovokoliwa wa Bejami na ofwa wa Rakeele
16Yo khulankha Beetele, nalelo ahinafiye Efwarati Rakeele khwiiyana tafwawuthi khuluyeene ya woona olwaaza asaleelaka ompattha mwaana. 17Oonaka olwaaza channu, namavokoza khumuuza yoori: “Ohoove! Weeyo wampattha mwaana nkina theenya wanlume.” 18Eettaka oshakhi ahinattiye phuumu, khuntthaja nzina mwaana otule la Benooni#35:18 Nzina ntthi la Benooni lina maana la mwaana woopattikhana na tafwawuthi. , ila papaawe na ye khuntthaja nzina la Bejami#35:18 Nzina ntthi la Bejami lina maana la mwanaka wa nkhono nlume. .
19Aphano Rakeele khufwa khulawa khuzikhiwa tarikhi ya Efwarati, wiiyiyeeyo Belemu. 20Yaakhumpa khutthaavo alama ya nshuhuti vakhapuri ya Rakeele, mpakha leelo eti liwaapho.
21Ezirayiilu khulankha khuvikana korofwa ya Eeteri khulawa khweemesa heema zawe.
22Siikhu moote, Ezirayiilu eekhalaka nti otthuupule, mwanawe Ruubeni khulawa khulala na Biila, njichaana wa papaawe, ila hapari epile khunfiyela papantthu. Ezirayiilu aarina aana khumi na awiri.
Aana a Yaakhumpa
23Aana aavokoleliweeyo Liiya ti Yaakhumpa pi apa: wamwanzo ti Ruubeni, alottiwaka ti Simiyooni, Leevi, Yuuda, Ezakaari na Zebulooni.
24Apa aari aana anvokoleliyeeyo Rakeele: Yuusufu na Bejami.
25Apa aari aana anvokoleliyeeyo Biila karumeya wa Rakeele: Daani na Nafitaali.
26Apa aari aana anvokoleliyeeyo Ziilipa karumeya wa Liiya: Gaati na Asheeri.
Aari atthaapo aana a Yaakhumpa awaapatthiyeeyo nti wa Paata Araamu.
27Aphano Yaakhumpa khurutela wa papaawe nti wa Manre kharipu na Kiriyati-Aarapa wiiyiye Heporooni, ohali aari wiikhalaawo Eburahiima na Esiyaakha. 28Esiyaakha eekhaliye nyaakha miiya na thamaaniini. 29Afwa ari wa wuuluvala arina nyaakha za waatta, aanaawe Ezawu na Yaakhumpa khunzikha.
Айни замон обунашуда:
Mwanzo 35: eko
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.