Mwanzo 31
31
Yaakhumpa onintthira Labani
1Yaakhumpa khuuziwa mattakhuzi aari olupaaye aana a Labani araka: “Yaakhumpa athuula zooshi paapa aariinaazo, areela mwaasa wa maali za paapa.” 2Yaakhumpa khoona yoori Labani khaari omweettettisa saana nkhama aari omweettettisaazo raku.
3Nnyizinku khumuuza Yaakhumpa yoori: “Orutele nti wa apapazo okhu ovokoliweewo, miiyo kinttela wiiya vamote na weeyo.”
4Yaakhumpa khuruma okhuweliwa Rakeele na Liiya yoori alawe otthuttu okhule aari ojisaawo nyama zawe. 5Noofiya khuwooza yoori: “Kinoona yoori papeenu khanikeettettisa saana nkhama raku. Ila Nluku wa paapa ori vamote na miiyo siikhu zooshi. 6Mweeyo mwinjuwa yoori kakhola khaazi ya papeenu khwa kuvu zaka zooshi. 7Papeenu khukittettekha na khuzukulisa phakari yaka swaafu khumi, ila Nluku khuhintakheli yoori akirettele zootakhala. 8Noolupa yoori nyama epile zooshi za wiiyana malepa phakari yaka, nyama epile khusala ziwaapattha aana awiiyana malepa paasi. Noolupa yoori nyama zoottweleela pi zawo, nyama epile khusala ziwaapattha aana oottweleela. 9Nluku othuuto ti ye athuuliyeeyo nyama za papeenu khukinkha miiyo.
10“Noofiya wakathi zaari wiimitthaavo nyama epile, kooniye muulottha mirurumpi zaari opepheraaye ziri za mikhwenyenye, zoottweleela na za malepa. 11Nlayikha la Nluku khukikhuwela muulottha liraka: ‘Yaakhumpa!’ Miiyo khujipu: ‘Lapeekha!’ 12Nlayikha ntthile khulupa yoori: ‘Olanse maasho awo woone nyama zimpepheriwa pi mirurumpi za mikhwenyenye, zoottweleela, na za malepa. Koona zooshi epile Labani ooretteliyeezo. 13Miiyo ki Nluku otule oopuweleliyeeyo Beetele okhule waavaaziyeewo mafuttha liwe na khukaahiti. Oleemo mmuti mphu nasaapi ethiiti orutele nti ovokoliweewo.’ ”
14Rakeele na Liiya khujipu araka: “Fweeyo khanina hatha etthu yoorithi mmakhono wa papeetthu. 15Ye onnitthantta nkhama amalapo! Anuuzanyisa, nzurukhu eetthu wa mahari wooshi aja. 16Maali epi zooshi Nluku alaziyeeyo mmakhono wa papeetthu pi zeetthu na aaneetthu. Apho orette zooshi epi Nluku awuuziyeeyo.”
17Yaakhumpa khuwaapakhira aanaawe na aakhaawe vankamiiya. 18Khuthuula nyama zawe na maali zawe zooshi aapatthiyeezo Pata Ara, khusala arutela wa papaawe Esiyaakha tuniya ya Kanaani.
19Wakathi Labani aalawiyeeyo okasa ovuzi wa pwittipwitthi zawe, Rakeele khwiiya sanamu za papaawe aarettiyeeyo wiiya miluku zawe. 20Ti nanna Yaakhumpa anttettekhiyeeyo Labani wa nti wa Aramu, khutthirawo owawe woohinleezi. 21Khutthirisa vitthu zawe zooshi arinaazo, khulokha muuttho wa Efwarati khusala alawa nti wa nyaako za Gileyaati.
Labani onimwiikarisa Yaakhumpa
22Eviriyeevo siikhu ttatthu, Labani khuuziwa yoori Yaakhumpa atthira. 23Ye khuwaathuula ajamaaze khusala amwiikarisa Yaakhumpa mpakha siikhu sapa, khunsikana onyaako wa Gileyaati. 24Aphano Nluku khunlotthisa Labani osikhu eettaka olala yoori: “Phoole! Ohimuuze hatha etthu yooshapweya Yaakhumpa ama yootakhala.”
25Labani khunsikana Yaakhumpa eemesiye heema zawe onyaako wa Gileyaati ye na ajamaaze, noofiya khumaka kharipu na attaaphale aamakiyeevo Yaakhumpa. 26Ye khumuuzela Yaakhumpa yoori: “Epi okiretteliyeezo niini, zookittettekha khuwaathuula aanaaka nkhama atthu ookholiwa viittha? 27Wakittettekhela ni khutthira sirini? Okuuziye khaneetta oleezana na furaha niipaka maliipo, koma na tthakare? 28Weeyo khuhikiweji khapula kileezanana aanaaka na atuulwaka! Epi orettiyeezo vitthu zoololo. 29Miiyo kinaaye owahi wa wuuhoowisa, ila osikhu wa taana Nluku wa papaawo khukuuza yoori: ‘Phoole! Ohimuuze hatha etthu yootakhala ama yooshapweya.’ 30Aphano nkhama weeyo watthira mwaasa wa wuunukhela wa papaawo, miluku zaka weeyela ni?”
31Yaakhumpa khunjipu Labani araka: “Keetta woova, kaari wuupuwela yoori mwintta okinyakanya aaneenu. 32Amana mwinsikanana ntthu miluku zenu, ahiiye haayi. Mashaahiti ajamaazetthu apa; noosikana etthu ya wiiya yenu kirina miiyo mwithuule.” Yaakhumpa khaajuwiye yoori Rakeele ti eeyiyeeyo miluku epile.
33Labani khuvira nheema wa Yaakhumpa na nheema wa Liiya na etile ya akarumeya apale awiri, ila khuhisikanimo. Noosaruwamo nheema wa Liiya, khweetta nheema wa Rakeele. 34Rakeele aarettiye atthiiye vathi wa nsaawu wa enkamiiya eekhaleliye. Labani khuthola nheema wooshimo khuhipatthi. 35Rakeele khumuuza papaawe yoori: “Mwihikatipukhe mbwanaaka mwaasa woohilankhi noowoonani, keetta wiiya mmweezi.” Ye khweekesa miluku zawe epile ila khuhipatthi.
36Yaakhumpa khwiiphiiriwa, khusala ammaruwela Labani yoori: “Niini kitthekiyeeyo? Wala kakosa ni yoofiyelela okiikarisa mwiri wookatipukha? 37Mapwattha aka ooshi mwathola, mwasikanamo niini ya wiiya yenu? Nkhama mwasikanamo etthu yenu mwitiise apha ariivo attwiizaku na attwiizenu aniphuke fweeyo awiri.
38“Neekhala vamote nyaakha eshiriini. Khina pwittipwitthi yenu wala puuzi yenu enaharipweye erukulu yaya na akinarafune hatha pwittipwitthi moote ya nliphanko mweenu. 39Akinootiseleni hatha nyama moote yoovulalisiwa khufwa; miiyo keetta oriphelaka. Mweeyo mwaari oveka oriphiwa wakhula nyama yaari wiiyiwaaye osikhu na nthana. 40Nthana keetta ohoowa mwaasa wa haari, osikhu keetta ohoowa mwaasa wa ozizima, osikizi khawaari okikhola. 41Ti nanna miiyo keekhaliyeeyo vaje venu nyaakha eshiriini. Kookholelani khaazi nyaakha khumi na mine yoori eeye mahari a aaneenu oowiiri, na nyaakha sitha kishukisaka nyama zenu, phakari yaka yiiyaka nyama etthiipo, ila mweeyo khuzukulisa phakari yaka swaafu khumi. 42Eriwaka khaari Nluku wa paapa, Nluku wa Eburahiima otu amooviyeeyo Esiyaakha, wiiya vamote na miiyo, mweetta okiikara woohikinkhi hatha etthu. Ila Nluku khoona ohoowa waka na khaazi kikholiyeeyo, taana osikhu ye ooshowerani.”
Wahati wa Yaakhumpa na Labani
43Labani khunjipu Yaakhumpa yoori: “Aakha apa aanaaka, aanaaya atuulwaka, nyama epo oriina pi zaka. Zooshi epi onoonaazo pi zaka. Miiyo kiwaarettele niini aanaaka na aanaaya apa awaavokoliyeeyo? 44Apho, nirette wahati miiyo na weeyo, otthuupo wiiye oshaahiti eetthu.”
45Aphano Yaakhumpa khuthuula liwe khweemesa nkhama nripu. 46Ye khuwooza ajamaaze yoori: “Mwilokotthele mawe muukele.” Yo khulokotthela, khwiikhala khusala aja nshini wa mawe atthaapale ookeliyeeyo. 47Labani khutthaja nzina puuro etile la Yakaare Sahatuuta, naye Yaakhumpa khutthaja nzina la Kaleeti.
48Aphano Labani khulupa yoori: “Mawe apa nuukeliyeeyo apha leelo, oshaahiti eetthu miiyo na weeyo.” Tiito yaari wiittheliwaaye nzina la Kaleeti. 49Khusala yiittheliwa theenya nzina la Misipha, mwaasa wa ye olupa araka: “Nnyizinku asala aneekesela amana naattuwana. 50Amana owaahazula aanaaka na khuweekesa aakha akina ohiiyi yo, hatha nkhama khajuweeni ntthu, wuupuwele yoori Nluku shaahiti eetthu.”
51Labani khumuuza Yaakhumpa yoori: “Woone mawe apa ariiye apha na nripu ntthi keemesiyeeyo vakatthi veetthu miiyo na weeyo. 52Kulu eti ya mawe na nripu, oshaahiti yoori akinteela wiirukhela kaapu yawo oteela wuuharipwela, wala weeyo ohiirukhe otaaka kaapu yaka oteela okiharipwela. 53Nluku wa Eburahiima, Nluku wa Nahoori, Nluku wa papaawo ti aniphuke.”
Yaakhumpa khulapha khwa nzina la Nluku wa Esiyaakha otule aari omoovaaye. 54Yaakhumpa khuretta twaha vamwaako khuwaakhuwela ajamaaze ooshi aariinaaye yoori aje vamote, nooja nawiisha khulala vamwaako attaapho.
55Mmeesho mwaya lifwajiri Labani khulankha khuwaapatikha aanaawe na atuuluwe, khuwaaparikhiya, khusala arutela owawe.
Айни замон обунашуда:
Mwanzo 31: eko
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.