Mwanzo 27
27
Esiyaakha onimparikhiya Yaakhumpa na Ezawu
1Esiyaakha ooluvaliye, maasho awe aashokheriye khuhisala oona. Khunkhuwela Ezawu mwanawe otu nwulu araka “Mwanaka!”
Ye khujipu: “Lape!”
2Khumuuza yoori: “Miiyo kooluvala siikhu kinfwaavo akijuweeni. 3Othuule nttetthe lawo olawe ntthuttu wasaye nyama. 4Wiipikhe saana wookituvelavo okitiisele kije, kuuparikhiye kihinafwe.”
5Ezawu khulankha khulawa ntthuttu osaya nyama yoori antiisele papaawe. Rapekha aari onsiila Esiyaakha attakhulanaka mwanawe Ezawu, 6Rapekha khumuuza mwanawe Yaakhumpa araka: “Weyo! Kansiila papaawo amuuzaka ttwiiyo Ezawu yoori: 7‘Okitiisele nyama yawiipikhiwa wookituvelavo kije, kuuparikhiye mmakhono wa Nnyizinku kihinafwe.’ 8Apho mwanaka, osiileze mattakhuzi apa kinuurumaaye, nasaapi eti 9olawe oliphanko la nyama wawaathuule aana a puuzi awiri ooneneva, kite kiweepikhe saaneene anttelaaye ontuvela papaawo. 10Onlawanele aje, ooparikhiye ahinafwe.”
11Yaakhumpa khunjipu mamaawe Rapekha yoori: “Ezawu tu wa waattana ovuzi, ila miiyo wala. 12Paapa amana akipapasela ahikisikanani ovuzi kinttela wiiya ntthu woohata, toowo khankiparikhiya ontta okilaani.”
13Mamaawe khumuuza yoori: “Laana yaya eto ti ekikwele miiyo mwanaka. Ila orette eti kiwuuziyeeyo: weettele puuzi epile kuurumiyeezo.”
14Aphano ye khulawa khuthuula puuzi khuntiisela mamaawe, khwiipikha wootuvavo yaari weettelaaye ontuvela papaawe. 15Rapekha khuthuula kuwo epile zooshapweya za Ezawu mwanawe otule nwulu zaari owawe, khunwalisa Yaakhumpa mwaana nttiitthi. 16Khunfinikha na shapala ya puuzi makhono awe na phantte etile yoohiina ovuzi ya mmwisiko mwawe. 17Khuthuula etthu yoojiwa yootuva eepikhiyeeyo na phaawu khumwinkha mwanawe Yaakhumpa.
18Ye khulawana aphale aariivo papaawe khunkhuwela: “Paapa!”
Ye khujipu: “Lape! Weeyo o mwanaka ni?”
19Yaakhumpa khumuuza papaawe yoori: “Miiyo ki Ezawu mwanenu wa mwanzo. Katiisa eti mwaakirumiyeeyo. Mwilankhe mwije nyama eti kitiisiyeeyo, nawiisha mwikiparikhiye.”
20Esiyaakha khumuuzela mwanawe yoori: “Wapattha toovi nasaapiru mwanaka?”
Ye khujipu yoori: “Nnyizinku, Nluku enu eetta okiperekheza.”
21Khumuuza yoori: “Nkakisusele apha kuupapasele, kuujuwe nkhama khweele o mwanaka Ezawu.”
22Yaakhumpa khunsusela papaawe. Esiyaakha khusala ampapasela, khumuuza yoori: “Huula ti ya Yaakhumpa, ila makhono pa Ezawu.” 23Ye khuhinjuwi mwaasa wa makhono awe wiiyana ovuzi nkhama apa a ttwiiye Ezawu na khumparikhiya.
24Khumuuzela theenya yoori: “Weeyo o mwanaka Ezawu?”
Ye khujipu: “Aaa, ti miiyo.”
25Aphano khuri: “Okitiisele apha nyama yaya eto osayiyeeyo kije, yoori kuuparikhiye.”
Yaakhumpa khumweettisela khuja na khumwinkha viinyu khunywela. 26Aphano Esiyaakha khumuuza yoori: “Okaattame mwanaka okipatikhe.”
27Yaakhumpa khumwaattama papaawe khumpatikha. Esiyaakha khusiila muuru wa kuwo zawe, aphano ye khumparikhiya araka:
“Muuru wa mwanaka
muuru wa nshapa
looparikhiyiwa ti Nnyizinku.
28Nluku awinkhe
mmatte wa pinkuuni
na oruwera wa vathi,
peewu zawaatta na viinyu yawaatta.
29Khapila zawaatta zuurumeele weeyo,
na mahimo awaatta ookokhorele.
Wiiye Mbwana wa attwiizo,
na aana a mamaawo ookokhorele weeyo.
Oolanikha pi apale anttelaaye wuulaani,
na ooparikhiyiwa
pi apale anttelaaye wuuparikhiya.”
30Paata Yaakhumpa oparikhiyiwa ti Esiyaakha papaawe, ye alaakavo aphale, nasaapiru ttwiiye Ezawu khufiya alankhaka wuusaya. 31Naye khwiipikha etthu yoojiwa yootuva khuntiisela papaawe, khumuuza yoori: “Mwilankhe paapa mwije nyama eti keetteliyeeyo osaya mwikiparikhiye.”
32Papaawe khumuuzela yoori: “Weeyo o paani?” Ye khuri: “Ti miiyo Ezawu, mwanenu otu wa mwanzo.”
33Esiyaakha khusuthuwa channu khusala athukumela khulupa yoori: “Khi otule apatthiyeeyo nyama khukitiisela ti paani? Weeyo ohinate miiyo kaja keesha. Kamparikhiya, ti wooparikhiyiwa!”
34Ezawu noosiila mattakhuzi apale a papaawe khwiiphiiriwa khulila venkivene, khunvekela papaawe yoori: “Na miiyo paapa mwikiparikhiye!”
35Ye khulupa yoori: “Aatiiyevo ttwiiyo apha khukittettekha, khuthuula parakha yawo.”
36Ezawu khulupa yoori: “Eto swaafu ya phiiri akittettekhaka. Ti maana ootthajiwa nzina la Yaakhumpa. Yamwanzo akinyakanya lifunku laka la omwaana wamwanzo. Apho theenya akinyakanya parakha yaka. Paapa khamwipweheeni hatha parakha khwa miiyo?”
37Esiyaakha khujipu: “Miiyo kanthawaza Yaakhumpa yoori eeye Mbwana awo weeyo na ajamaazo ooshi anttela onrumeyela. Onteela wiiyana tiriku yawaatta na viinyu. Kuurettele niini miiyo mwanaka?”
38Ezawu khumuuzela papaawe: “Mweeyo paapa khamwisalaneeni hatha parakha? Na miiyo mwikiparikhiye!” Khusala alila anyakulaka.
39Aphano Esiyaakha khunjipu:
“Weeyo onttela wiikhala
ohali woolepelana na miti za oruweriwa,
ohali woothowawo mmatte wa pinkuuni.
40Weeyo onttela wiikhala khwa phanka yawo
na onttela onrumeyela ttwiiyo.
Amana weeyo ovilela theenya,
ontta olaamo nthwaapu#27:40 Thwaapu yaya eti olaamo nhukhumu. mwaya mphu.”
41Ezawu khwiiphiiriwa ti ttwiiye mwaasa wa parakha etile enkhiweeyo ti papaawe. Khusala oopuwela toono: “Siikhu za matthaka a paapa ziri kharipu. Amana afwa miiyo kintta omuula ttwiiyaku Yaakhumpa.”
42Wakathi asiiliyeevo Rapekha mattakhuzi apale aari ottakhulaaye mwanawe otu wamwanzo Ezawu, ye khunkhuwela mwanawe Yaakhumpa otu nttiitthi aya khumuuza yoori: “Woone, shawuri ariinaazo Ezawu pi zootakha owuula. 43Apho weeyo mwanaka osiile eti kiniwuuzaaye. Otthire nasaapi ethiiti, weette wa nlupwaaka Labani aniikhalaaye nti wa Harani. 44Weekhale ottuukho mpakha ttwiiyo omwiishe okatipukha wawe. 45Amana omwiishela okatipukha wawe na asahawu eti onretteliyeeyo miiyo kintta wuuperekheza nhupi yoori ote. Akintakha okipwetheya aanaaka oowiiri siikhu moote!”
46Aphano Rapekha khulawa omuuza Esiyaakha yoori: “Akituveliweeni ohaayi aka wooshi mwaasa wa aakha a ahiiti apa awaaraliyeeyo Ezawu. Amana Yaakhumpa na ye awaarala aakha a tuniya ethiiti miiyo kinhithari ofwa.”
Айни замон обунашуда:
Mwanzo 27: eko
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.