Jon 4
4
Jisas mai Vavine ata Samaria
1Haḡe ira Varise ram ron̄oe be Jisas mwa lai ira roron̄tai ivusi liu Jon i mwa Ḡaruhisabugainira. 2(Jisas nu hav garuhisabugai te atatu gaituvwa. Non roron̄tai n̄an ran garuhisabugai atatu.) 3Haḡe batena be Jisas mwa iloe be roroi huria nu votui ira Varise mwa domare nin Judia mwa dabagilu vai Kalili; 4mwa lago be vi van sivi vanua Samaria.
5Lol vanua Samaria bwatutun vanua vwate ihana Sika, aben talu gabe Jekob nu laia lalai nituna Josep, Jisas mwa mai vai lol ute gea. 6Jekob nu gel lulu vwate aia huri wai, Jisas mwa mai mwa domahuri aben wel gea bwatuna mwa sav maragainia gin lagoana. Geki mahavana kun bobon alo.
7Vavine ata Samaria vwate mwa mai be men utu wai, haḡe Jisas mwa bevea lalainia be, “Lai te maḡu wai.” 8(Non roron̄tai ran van vai lol bwatutun vanua be ramen lol ginaganiana.)
9Haḡe vavine mwa bwaliua mwa bevea be, “Giḡo Jius i inau ata Samaria, huri hano be gom hudali wai huri mwinu niniau?” (Ira Jius ram hav mwin te wai lol pankeni gabe ata Samaria ram mwinu alolona.)
10Jisas mwa bwaliua mwa bevea be, “Be gos ilo havanau God mwa laia i ihei gabe mwa hudalinigo be men mwin te wai gos hudalinia huri wai gabe vi lai rahuana lalainigo.”
11Haḡe vavine mwa bevea be, “Ratahigi gov lai wain rahuana gea halabehe, lulun wai uhu nu roro i gom hav haḡo te bakiti maigo. 12Sibimai Jekob nu lai wai uhu lalai kamai. Kea mai ira nituna mai bilan buluki duluai ran mwinu alun wel uhu. Matu giḡo lavoa liu Jekob?”
13Jisas mwa bwaliua mwa bevea be, “Ihei tehe gabe mwa mwin wai uhu vi mandou mulei. 14Take ihei tehe gabe vi mwin wai gabe inau nav laia lalainia sihav mandou te mulei. Wai uhu gabe nav laia lalainia vi mai lalainia gi matavuravuran wai alolona i kea vi laia ninia wain rahuana i rahuana vai tuai.”
15Haḡe vavine mwa bevea lalainia be, “Ratahigi lai wai gea lalaiau! Huri be nasav mom mandou tehe, i nasav mom mai te teti ba mom utu wai.”
16Ta Jisas mwa bevea lalainia be, “Van mulei ba bevea lalai ahoamwa na mai teti.”
17Haḡe vavine mwa bevea be, “Ahoaku sigai.”
Jisas mwa bwaliua be, “Gom bev didininia mwasigi be ahoamwa sigai. 18Gon lagi vai aben atatu gailima i atamwani gabe gom dogo maia kekadogaha mwa hav vora te mwasin ahoamwa. Gom bev mwasigi mahaḡea lalaiau.”
19Vavine mwa bevea be, “Nam ḡitae be giḡo atatun vevsera vwate, Ratahigi. 20Ira sibiku lol vanua geki Samaria ran tataro lalai God la vusi uhu ta kimiu ira Jius gim bevea be Jerusalem n̄ano ute gabe tav tataro lalai God aia.”
21Jisas mwa bwaliua mwa bevea be, “Vavine gov binihimwasigiau, mahavana vi mai batena sinombu rasav mom dataro tehe lalai Tata la vusi uhu sa Jerusalem. 22Kimiu ata Samaria gim hav iloe tehe be gim dataro lalai ihei, take kamai ira Jius gam iloe be gam dataro lalai ihei, bwatuna varahuva mwa mai nin ira Jius. 23Take mahavana vi mai, i nu votu huba batena be sinombu rav tataro lalai tata gin muramura non Vui Sabuga non God, rav lol lalainia mwasin tataro gabe kea mwa doronia, gin avoana gabe mwa mwalue ninira sibora. 24God kea Vui, i nin muramura non Vui Sabuga n̄ano be atatu rav tataro dum lalainia gin avoan mwasigi, be mwa mai lol binihira.”
25Haḡe vavine mwa bevea lalainia be, “Nam iloe be Mesaea vi mai i batena be vi mai vi seserai ginau duluai lalai gida.”
26Jisas mwa bwaliua be, “Inau haḡea kea, inau haḡe geki nam avo lalainigo.”
27Haḡe lol mahavan n̄an gea ira roron̄tai non Jisas ram dabagil mulei i batena be ram ḡitae be mwa avo mai vavine ram dan̄an̄a maragai. Take ihei ninira mwa hav hudali te vavine gea be, “Gom doron hano?” Sa ram hav hudali te Jisas be, “Huri hano gom avo mai vavine uhu?”
28Haḡe vavine mwa lin̄ non bwelehun wai atagu i mwa ban mulei vai lol bwatutun vanua i mwa bevea lalai sinombu aia be, 29“Gin mai ba ḡita atatu gabe mwa bev lua ginau duluai gabe nan lolia lalaiau. Daga kea haḡea Mesaea?” 30I ram lin̄ bwatutun vanua ram ban be ramen gita Jisas.
31La mahavana gea ira roron̄tai ram navohi mamaragai Jisas ram bevea be, “Vagahi, gan te ginau!” 32Take kea mwa bwaliura be, “Gaku ginau abena gabe gim hav ilo te ginau huria.”
33Haḡe non roron̄tai ram dau bwatuna ram hudali mulmuleinira be, “Atatu vwate nu lai gan ginau?”
34Haḡe Jisas mwa bevea lalainira be, “Gaku ginau gabe nav tabe silon wani gabe nu horau mai i be nav lol nogonogoi rovoga be nu laia lalaiau be nav lolia. 35Nomiu avoana vwate abena be mwa bevea be, ‘Vula gaivasi mulei haḡe gubwen̄ harahara.’ Take inau nam bevea lalai kimiu be gin gita didinini talu duluai; ririvuana ran metue huba i mwa du huri harahara kadogaha! 36Atatu gabe mwa harahara kea mwa habwe tavwena huria i kea mwa hara ginaganiana huri rahuana vai tuai. Atatu gabe mwa ririvu i wani gabe mwa harahara kera saraḡo raru vi samsamwara. 37Kunia avoana be, ‘Atatu vwate vi ririvu i vwate vi harahara,’ mwa mai gi mwasigi. 38Nam hora lua kimiu be giv harahara lol talu gabe gin hav lol te rovoga aia. Atatu dodolua ran lol rovoga aia amua, i kimiu gim lai vurovuroi ginau nin nora rovoga.”
39Ata Samaria ivusi lol bwatutun vanua gea ran binihimwasigi Jisas bwatuna be vavine nu vevea be, “Mwa bev lua ginau duluai gabe nan lolia.” 40I batena ata Samaria ram mai vai abena, ram hudalinia be vi to huba maira i Jisas mwa do maira gubwen̄ gairua.
41Sinombu ivusi ram binihimwasigi non avoana haḡe ram bevea lalai vavine be, 42“Kamai gam binihimwasigi kekadogaha, mwa hav vora te huri hano n̄an be gon vevea, take bwatuna be kamai gan ron̄oe sibomai, i gam iloe be kea mwasigi Varahun Ureure.”
Jisas mwa Barahu Nitun Lavoa Vwate Atamwani
43Ataguna be nu togo gubwen̄ gairua aia, Jisas mwa derai ute gea mwa ban vai Kalili. 44Amua kea nu vevea be, “Atatun vevsera sihav binihian te marahi lol mwasin vanuana.” 45Mahavana gabe mwa botui Kalili sinombu aia ram lai ḡoḡoe bwatuna be ran vano lol Samsamwaran Halbisḡalau Jerusalem i ran gita ginau duluai gabe nu lolira aia.
46Haḡe Jisas mwa dabagil mulei vai Kena lol vanua Kalili, ute gabe nu lol wai mwa mai gi waen. Lavoa vwate non Kavman mwa do aia, nituna mwa do Kapanium i mwa haro. 47Batena be mwa ron̄oe be Jisas mwa mai nin Judia vai Kalili, kea mwa ban vai abena, mwa hudalinia be vi van vai Kapanium ba barahu nituna gabe mwa abena be men mate. 48Jisas mwa bevea lalainia be, “Vwate nin kimiu sihav binihi te mwasigi dum vaivotu be kea vi gita dovon̄a mai ginau dan̄an̄a.”
49Lavoa mwa bevea lalainia be, “Ratahigi, mai maiau amua nituku gim siv mate.”
50Haḡe Jisas mwa bevea lalainia be, “Vano nitumwa vi rahu.”
Wani gea mwa binihimwasigi avoana non Jisas i mwa dabagil mulei. 51I la hala mwa bisogari mai non atatun rovoga rituai ram mai mai roroi ram bevea be, “Nitumwa mwa rahu.”
52Mwa hudalinira be la mahavan behe be nituna mwa daubwatun ron̄ mwandavuha, i ram bwaliua ram bevea be, “La alo gaituvwa ninovi atagun bobon alo batena rurutia mwa lin̄ia.” 53Haḡe Tamana mwa binihi dumwia be la mahavan alo haḡe gea be Jisas nu vevea be, “Nitumwa vi rahu.” Haḡe kea mai ira havana duluai ram binihimwasigi.
54Geki gairuan ginau dan̄an̄a gabe Jisas mwa lolia ataguna gabe mwa dabagil mulei nin Judia vai Kalili.
Айни замон обунашуда:
Jon 4: HNB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bible Society of the South Pacific