Lalaḡova 1
1
Giḡo Tiovilas
1Lol muan noḡu buka nan ravae huri ginau duluai gabe Jisas nu lolia i nu vagahi huria lol mahavana be nu tau bwatun non rovoga, 2vaivotui gubwen̄i gabe mwa laia vai amare. Amua mwa siv laia vai amare, kea nu lai avoan dura gin muramura non Vui Sabuga lalainira gi non hala. 3Huri gubwen̄ n̄avul gaivasi atagun mateanana mwa lol bisirainia sibona vaivusi, la hala gabe mwa dovon̄ainia huri mwasigi alun binihiv lalan̄a be kea nu rahu mulei i kera ran gitae, mwa avo lalainira huri rahuan gara gabe God mwa bora Ratahigi alolona. 4Haḡe mahavana be ram mai ute gaituvwa, kea mwa lai avoan dau geki lalainira mwa bevea be, “Gisav van te nin vanua Jerusalem, take giv hohovi huri hogoi gabe Tamaḡu nu tatauleo huria, kea gabe nan vevea lalai kimiu. 5Huri be Jon nu garuhisabuga gin wai, take atagun gubwen̄i mulei rituai giv lai garuhisabuga gin Vui Sabuga.”
God mwa Lai Jisas vai Amare
6Mahavana be ira hala ram ḡoḡo ute gaituvwa mai Jisas ram hudalinia ram bevea be, “Matuke gomen lai mulei ute Ratahigi lalai Israel kadogaha gi non Ratahigi lavoa?” Matuke kadogaha gomen tomuai Israel kun gabe non Ratahigi lavoa sibona.
7Jisas mwa bevea lalainira be, “Mahavan tanona i gubwen̄i mwa du alun muramura non Tamaḡu sibona i mwa hav vora te nomiu be gimen ilo mahavana be baten hano rav loli. 8Take giv masiri gin muramura mahavana be Vui Sabuga vi himai alumiu, i kimiu giv vora gaituraku lol vanua Jerusalem, i lol vanua Judia duluai mai Samaria vava vi votui nogonan ureure.” 9Mahavana be mwa bev vuvuria kun geki, God mwa laia vai lol ute atamare ran tu ram ḡitae, radu ten lan̄i nu haravuinia ḡoro lolmatara, i gam hav mom ḡitae tehe.
10Haḡe matara mwa dutu radu vai lol mahao huria darihou atatu gairua ramuru du abera gaisagara nu maita. 11Ira tarua geki ramuru bevea lalainira be, “Ata Kalili, huri hano gim du gim ḡarere vai hae lol mahao? Jisas geki, gabe God mwa laia nin kimiu hae vai lol mahao, vi himai mulei la hala n̄an kunia be gim ḡitae mwa hae vai lol ute atamare.”
Atatu vi lai Tanon Judas
12Haḡe ira hala ram dabagilu mulei nin vusin gai Oliv mulei vai Jerusalem, nu dadariha kun kilo meta gaituvwa. 13I kera ram haroro Jerusalem i ram hae lol vwavwan imwa amare i ram dogo aia, Pita, Jon, Semes mai Andru, Vilip mai Tomas, Batolomiu mai Matiu, Semes nitun Alvius, Saimon gabe ata lol tatan̄ana gabe ram doron be rav goro dagai ata Rom mai Judas gabe nitun Semes. 14Haḡe kera duluai ram bulu ute gaituvwa be ramen tataro, maira vavine, i Mere gabe ratahin Jisas, mai ira tuana.
15Haḡe gubwen̄ gaituvwa n̄an ataguna, ḡoḡoana non ira binihimwasigi, i kera duluai kun vudolu vatuvwa vena n̄avul gairua ram du ute gaituvwa, haḡe Pita mwa du amare be men avo. 16I mwa bevea be, “Ira tuaku, mwa du be Ravrava Sabuga vi visirae la halan Vui Sabuga, gabe nu avo sivi Deved, mwa bev sera huri Judas, tomuai ḡoro atatu gabe ran haḡo batugehi Jisas. 17Judas kea vwate bul mai kamai, huri be Jisas nu uloi lua kamai be gav lol non rovoga, take mwa domare mwa lin̄ia la liman non ivwalu.”
18(Mai homu gea be Judas nu laia huri non lalaḡov lete i mwa bol tavihen tano vwat ginia i kea mwa hovi liuliu haḡe mwa mate gin bwatuna i mwa maheresi i tabwan̄ina alolona mwa masalan̄ai kaburai. 19Haḡe sinombu duluai Jerusalem ran ron̄oe, haḡe la mwasin nora avoana ram uloi ute gea be Akeldama, gin binihiva be, “Tanon Daga.”)
20Pita mwa bev rahurahuinia be “Bwatuna mwa ravae lol buka Sam be,
‘Imwana na tu bovon̄ai,
i atatu sihav togo te alolona.’
Haḡe mwa ravae mulei be,
Atatu dolua na lai tanona la rovoga.”
21-22“Haḡe kunia mwa du be atatu vi bulu mai kamai kun gabe gaitura huri tomarean mulei non Ratahigi Jisas. Atatu gea vi vora atatu vwate lol nomai vatugigi ata lol mahavana duluai be Ratahigi Jisas nu lagolago mai kamai lol ute duluai, i nu tau bwatuna lol mahavana be Jon nu toretore huri non garuhisabuga vaivotu gubwen̄i be nu lai Jisas nin kamai vai lol ute atamare.”
23Haḡe ram ḡita lua atatu gairua, Josep gabe mwa uloinia be Basabas i mwa uloinia be Jastas, i Matias. 24Haḡe ram dataro ram bevea be “Ratahigi, gom ilo vuvuri lolon atatu duluai. Haḡe kadogaha, Ratahigi gov lol bisirainia lalai kamai ihei alolora gairua uhu gom ḡita luae 25be vi lai tanoi geki alun rovoga gi hala gabe Judas nu derainia mwa bano vai lol mwasin tanona.” 26Haḡe ataguna geki ram lol dovon̄ana be vi hovi alun iha gairua. I kea gabe ram ḡita luae Matias, i kea mwa buluinira mai tatan̄ara hala han̄vul domwan gaituvwa.
Айни замон обунашуда:
Lalaḡova 1: HNB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Bible Society of the South Pacific