Mɑtʉ̈ɔ 8
8
Yɛ́su ɡɛ wɛcɔ́ ŋɡɑŋkɑꞋpɑ́p fíitɛ
(Mɑ́lɛ́kúshi 1.40-45; Lúkɑ́shi 5.12-16)
1Yɛ́su pɛn ŋ́ɡɔ́ ɛ́fú ndǔ nɛŋkɔ́Ꞌ ḿpfúu, nɔɔ-lɑ́Ꞌ tɛ ńzɑ́ɑ cʉ́ɔ nzʉʉ yɛ́. 2Wɛcɔ́ ŋɡɑŋkɑꞋpɑ́p tɔ́ ŋ́kẅíꞋlɛ sɛ́ mbi yɛ́, ńcú ŋɡɔ: «Tsɑpʉɔ n jí ŋɡɔ ɔ lɑɑ ŋ́kɔŋ, mbɔ ɔ kuꞋ nɛɡɛ ɛ fíitɛ.» 3Yɛ́su zúꞋ, ńcɑklɛ pɔ́ ŋ́ɡẅɛɛ wɛ́, ńcú mbɔ̌ wɛ́ ŋɡɔ: «Ŋ kɔŋ pɔ́Ꞌɔ, fíitɛ.» ŊkɑꞋ ɡɔ́ɔ ḿmɛ nǔu wɛ́, ɑ ɡɔ́ɔ ɛ́fíitɛ. 4Yɛ́su cú mbɔ̌ wɛ́ ŋɡɔ: «Pɑ́ɑ nɛkɛ́ ŋ́kẅíi tɛ ŋu zúꞋ, lɑ́ kɛ́ ŋ́ɡʉ ńnyɛt mbʉʉ yu, mbɔ̌ nɔŋpɔꞋ, ḿbɛn ŋ́ɡɑ́ yúu mi nɛpʉ́ʉ-Mɔ̌sɛ̂ɛ sɛ́ ḿbíkŋɛ mbɔ̌ ŋu ẅí ŋkɑꞋ mɛnɛ nǔu wɛ́, pʉɔ tsʉʉ jí ŋɡɔ ɔ fíitɛ.»
Yɛ́su ɡɛ mɔ́ŋkʉ̈ɔ́-fɑꞋ-wɛcɔ́ tɑ́tndɑ́-ntsɔ-Pɑlɔ́mɑ fíitɛ
(Lúkɑ́shi 7.1-10; Jɑ̂ŋ 4.43-54)
5Yɛ́su ɡʉ tɛ ŋ́kúu tʉ́sɔŋ-Kɑpɛɛnɑwúm. Wɛcɔ́ tɑ́tndɑ́-ntsɔ-Pɑlɔ́mɑ zɑ́Ꞌ wɛ́, ḿbúꞋ mbɔ́ mbɔ̌ wɛ́, 6ńcú ŋɡɔ: «Tsɑpʉɔ, mɔ́ŋkʉ̈ɔ́-fɑꞋ wɑɑ nɔɔ ndɑ́, mbɔ kẅíꞋlɛ ɡẅɛɛ wɛ́, ɑ pɔ́ ńjʉ́ɔ ŋɡʉ̈ɔ́Ꞌ tɛꞋ.» 7Yɛ́su cú mbɔ̌ wɛ́ ŋɡɔ: «Mɔ ŋ́ɡʉ zúꞋu ŋ́ɡɛ ɑ fíitɛ.» 8Lɑ́ tɑ́tndɑ́-ntsɔ pʉ̈ɔt ŋɡɔ: «Tsɑpʉɔ, n zɑŋɛ ŋu ẅí ɛ́ lɑɑ ḿbɔ́ ɔ tɔ́k tɛ ŋ́kúu ndɑ́ yɛ́. Tʉ́ʉ pɔ pɑ́Ꞌɑ, ńcú nɛ́ ntsu wú mɔ́ŋkʉ̈ɔ́-fɑꞋ wɑɑ fíitɛ. 9N cú pɑ́Ꞌɑ, ḿbɔ́ yɑ́ɑ nzʉʉ-ŋu, ńzúꞋ ntsu wɛ́. Ḿbɛn ŋ́ɡẅɛɛ yɑ́ɑ pɑlʉ̈ɔ́Ꞌntsɔ nzʉʉ mɔ, pɔ́p pɔ́ ńzúꞋ wɑ́ɑ. N dɑɑ ńcú mbɔ̌ wɛcɔ́ ŋɡɔ: “Gʉ!” A ɡʉ, ńcú mbɔ̌ wɛcɔ́ ŋɡɔ: “Tɔ́!” A tɔ́, ḿbɛn ńcú mbɔ̌ ŋkwɑɑ wɑɑ ŋɡɔ: “Gɛ pɑ́Ꞌɑ!” A ɡɛ.» 10Yɛ́su zúꞋ yɔ sẅiŋɛ yí ɛ́ cẅɛtnɛ ntsu-tɑ́tndɑ́-ntsɔ ŋ́ɡʉ̈ɔꞋtɛ wɛ́, ɛ́shɔtnɛ ńcú mbɔ̌ lɑ́Ꞌ yi ɛ́ nzʉʉ yɛ́ ŋɡɔ: «Ɛ sẅíi wʉ́ʉ, kwɑꞋ nɛ́nẅín, mbɑ tsɛt ŋɡɔŋ Pɑíslɑyɛ̂l, ŋ kɑ́ jʉ́ɔ wɛcɔ́ ŋu ẅí ɑ zɑ́pnɛ tʉ́m nǔu mɔ pɑ́Ꞌ jʉ́ pɔ́. 11Mɔ ńzɛɛ ḿbɛn ɛ́sẅíi wʉ́ʉ ŋɡɔ pʉɔ tɛ ńzɑ́ɑ ɡʉ ńdɑ́Ꞌ ɛ́fú mɛshʉ́ mɛshʉ́ ndǔ tsɛ́tsɑ́Ꞌ, ńtɔ́ ŋ́kúu tsɛt ŋɡɔŋ fí ẅi Sɛ́ sɑ́Ꞌnɛ, pɔ́p pɛ́ Ábɛlɛhɑ̂m, nɛ́ Ɛsɑk, mbɑ Yɑkɔ̂p tɛmtɛ ńjʉ́ ndínɑ. 12Pɛɡʉʉ ɡɔ́ ḿbɔ́ zúꞋu, mbɔ pɛ́ cẅɛɛtɛ pʉɔ pínɛ nɛfɔɔ m̄bɔ́ nɔ́p ŋ́ɡɑ́ píi tsɛt fɛ́m nzɛ́nzʉ́ʉ. Pɔ́p pɔ́ zúꞋu ḿbɔ́ ńdɑɑ, ḿbɔ́ ŋ́kwɛ́t mɛsɔŋ.» 13Yɛ́su pɛn ńcú mbɔ̌ tɑ́tndɑ́-ntsɔ ŋɡɔ: «Pɛn nɛ́ njɛ́Ꞌ wu! Pɑ́Ꞌ ɔ zɑ́pnɛ tʉ́m nǔu mɔ lɑ́, yúu mi ɔ tsɑ́ɑnɛ ɡʉ ḿbɔ́ pɔ́Ꞌɔ.» Ńcú pɔ́Ꞌɔ, mɔ́ŋkʉ̈ɔ́-fɑꞋ-tɑ́tndɑ́-ntsɔ ɡɔ́ɔ ɛ́fíitɛ pɔ ŋkɑ́ ɛ̂yɑ́, ŋkɑ́ ɛ̂yɑ́.
Yɛ́su ɡɛ mɑ́kẅiꞋ-Pyɛ̂ fíitɛ
(Mɑ́lɛ́kúshi 1.29-34; Lúkɑ́shi 4.38-41)
14Yɛ́su fú zúꞋu ŋ́ɡʉ ndɑ́-Pyɛ̂, ŋ́kúu zúꞋu ńjʉ́ɔ mɑ́kẅiꞋ-Pyɛ̂ nɔɔ, mbʉʉnút pɔ́ nǔu wɛ́. 15Yɛ́su ɡẅɛɛ pɔ́ yɛ́, mbʉʉnút zɑ́Ꞌnɛ. A lɔ sɛ́ ńniitɛ yúu ńdɔk ńdíŋɛ wɛ́. 16Ntsuŋkẅɛ́Ꞌ ɡɛ ḿbɔ́, pɛ́ lɔk pʉɔ tɛ ńzɑ́ɑ pínɛ mɛzẅikŋɛ kɛpɔŋ sɛ́ ŋ́ɡɑ́ɑnɛ wɔ́p ńtɔ́ mbi Yɛ́su, ɑ cú nu tɑ́Ꞌ ŋkɑ́. Mɛzẅikŋɛ kɛpɔŋ fú nǔu pʉɔ ńcẅɛt, ɡɑŋɡɔɔ pɛn ɛ́fíitɛ ɡúu. 17Ɛ́ lɔk pɔ́Ꞌɔ, ḿbuutɛ nǔu nu yí Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ cúnɛ ŋɡɔ: «Jʉ́ kɑ tíinɛ mɛlɔ́Ꞌ mɛkŋɛ mbíꞋ, ḿbɛn ɛ́fú nǔu pɛkŋɛ ńcẅɛɛtɛ mɛɡɔɔ mɛkŋɛ ḿbiꞋ.»
Ntɛ́ nɛlɔk ńcʉ́ɔ nzʉʉ Yɛ́su
(Lúkɑ́shi 9.57-62)
18Yɛ́su jʉ́ɔ pɑ́Ꞌ lɑ́Ꞌ cúꞋlɛ́nɛ nɛjɔ́ŋ yɛ́ tɛ ńzɑ́ɑ, ńcú mbɔ̌ ɡɑŋku pɛ́ ŋɡɔ pɔ́p pɛ́pɔ́p túu nǔu yɛcɔ́ njʉ́n-ŋki. 19Wɛcɔ́ ŋkyɛ́Ꞌtɛ nɛpʉ́ʉ-Mɔ̌sɛ̂ɛ tɔ́ nɛjɔ́ŋ yɛ́ ńcú mbɔ̌ wɛ́ ŋɡɔ: «Cícɑ, ɔ ɡʉ ŋ́ɡʉ ɡɔ́ lɑ́, ŋ kɛ́ ḿbɔ́ pɔ nzʉʉ wu.» 20Yɛ́su pʉ̈ɔt mbɔ̌ wɛ́ ŋɡɔ pɛkwɛt ɡẅɛɛ mɛmbʉ́, pɛshʉ́ŋ pɛn ŋ́ɡẅɛɛ mɛŋkɑɑ mɔ́p. Lɑ́ Mɔ́ɔ-Ŋu kɑ́ ɡẅɛɛ zʉꞋ yí ɛ́ lɑɑ ḿbɔ́ ɑ jẅiitɛ zúꞋu pɔ́. 21Wɛcɔ́ tɑ́Ꞌ nǔu pʉɔ pí pɔ́p nzʉʉ yɛ́ cú mbɔ̌ wɛ́ ŋɡɔ: «Ndɛ tsʉ́Ꞌ n zɛɛ ŋ́ɡʉ ńtẅíi tɑ̌ɑ mɔ.» 22Yɛ́su pʉ̈ɔt mbɔ̌ wɛ́ ŋɡɔ: «Cʉ́ɔ pɔ nzʉʉ mɔ, ńnɑ́ pɛpfú pɔ́p tẅíi pɛpfú pɔ́p.»
Yɛ́su ɡɛ fɛfʉ̈ɔt pɔ́p ŋki nɑꞋ
(Mɑ́lɛ́kúshi 4.35-41; Lúkɑ́shi 8.22-25)
23Yɛ́su ŋ́kúu tsɛt kɑnúꞋ, ɡɑŋku pɛ́ kúu yɔ́p tsɛtú. 24Ḿbɔ́ ŋ́ɡʉ, ɛ́ ɡɔ́ ḿbɔ́ yɛcɔ́ ŋkɑ́ mɑ́mɑ́ fɛ́m vu ndǔ ŋki, ńzɛ nɛtsʉꞌnɛ ńtíi ŋki tíinɛ tɛ ɛ́ tsʉꞋ ńdɔɔ pɔ nɛkẅíipɛ kɑnúꞋ. Ɛ́ ɡɔ ḿbɔ́ Yɛ́su pɔ́ ńdɛ́. 25Pɔ́p tɔ́ nɛjɔ́ŋ yɛ́, ḿbɔ́ ńjʉɔmɛ wɛ́, ńcú ŋɡɔ: «Tsɑpʉɔ, cẅɛ́ɛ wɛ́k mbɔ̌ nɛvú. Pɛ́kŋɛ pfú tɛ ńdɛm.» 26A cú mbɔ̌ pɔ́p ŋɡɔ: «Pʉʉ pɔ́k kʉ̈ɔ́? Pʉʉ lɔɔ ńzɑ́p tʉ́m nǔu Sɛ́ ŋkɑ́ tsʉʉ pɔ́!» Ńcú pɔ́Ꞌɔ, ńdɔ sɛ́, ńcʉ̈ɔ́k fɛ́m pɔ́p ŋki. ZʉꞋ nɑꞋ ŋ́ɡɔ kɛ̂m. 27Pɔ́p pɛtsʉʉ tɛmtɛ ḿmɑɑ, ńcú tsɛtsɛt pɔ́p ŋɡɔ: «Yɔ yɛ́tɛ́ ntɛ́ ŋu tɛ mbɑ fɛ́m pɔ́p ŋki zúꞋ ntsu wɛ́?»
Yɛ́su ɡɛ pʉɔ pɛ́pɑ́ pínɛ mɛzẅikŋɛ kɛpɔŋ nǔu pɔ́p fíitɛ
(Mɑ́lɛ́kúshi 5.1-20; Lúkɑ́shi 8.26-39)
28Yɛ́su ɡʉ tɛ ŋ́kúu nǔu yɛcɔ́ njʉ́n. Ɛ́ pɔ́ ŋɡɔŋ-pʉɔ-Ŋɡɑndɑlɑ, pɛcɔ́ pʉɔ pɛ́pɑ́ pínɛ mɛzẅikŋɛ kɛpɔŋ kɑ kúunɛ nǔu pɔ́p fú zʉꞋ pɛ́ tẅínɛ pʉɔ zúꞋu ńcẅɛt ńzɑ́Ꞌ wɛ́, mbɔ pɔ́p kɑ fʉꞋ mɔ nu fʉꞋnɛ tɛ ŋu pɔɔ ḿbɛn ńdɛɛ ẅîwɑ́ shʉ́ pɔ́. 29Pɔ́p kíi ńcú mbɔ̌ Yɛ́su ŋɡɔ: «Ɔ lɔɔ nɛɡɛ ŋɡɔ́ku nǔu pɛk, mɔ́ɔ-Sɛ́? Ɔ kɑ tɔ́ zɑꞋnɛ pɔ nɛzɑ́Ꞌ njí ńníꞋ wɛ́k tsɛt ŋɡʉ̈ɔ́Ꞌ kɛkʉ̈ɔ́?» 30Ɛ́ ɡɔ́ ḿbɔ́ yɛcɔ́ kɑt-mɛnjínɑɑ pɔ́ mbʉʉ zúꞋu ḿbɔ́ ŋ́kɑ́t ŋ́kwɛ́t yúu. 31Mɛzẅikŋɛ kɛpɔŋ púꞋ mbɔ́ mbɔ̌ Yɛ́su ŋɡɔ: «Ɔ lɑɑ ńzuŋ wɛ́k, ɔ pɛ́m pɛk ɡʉ ŋ́kúu nǔu kɑt-mɛnjínɑɑ mí.» 32Yɛ́su cú mbɔ̌ pɔ́p ŋɡɔ: «Pʉʉ ɡʉ!» Pɔ́p ɡɔ́ɔ ŋ́kɛ́ ɛ́fú nǔu pʉɔ pɑ́ ńcẅɛt, ŋ́ɡʉ ŋ́kúu nǔu mɛnjínɑɑ. Pɛ́ ɡɔ́ ńjʉ́ɔ, kɑt-mɛnjínɑɑ ɛ̂mɑ́ fú zúꞋu ŋ́kʉŋtɛ, ńtɑ́kŋɛ, ńzɔt ḿbʉ̈ɔtnɛ tsɛt nɛkʉŋ-ŋki, ńnɔ́ ŋki ḿpfútɛ. 33Pʉɔ pí pɔ́p kɑ pɔ́ ḿbyɛ́p mɛnjínɑɑ jʉ́ɔ pɔ́Ꞌɔ, ńtɑ́kŋɛ ŋ́kʉɔtɛ, ŋ́ɡʉ tʉ́sɔŋ ḿbɔ́ ḿbɛ́ɛtɛ mbɑ kʉ̈ɔ́lɑ́ yi ɛ́ lɛɛnɛ, ḿbɛn ḿbɛ́ɛtɛ yɛ́ pʉɔ pínɛ mɛzẅikŋɛ kɛpɔŋ kɑ pɔ́nɛ nǔu pɔ́p lɑ́. 34Lɑ́Ꞌ zúꞋ, ɛ́fú tʉ́sɔŋ ńcẅɛt, ńtɔ́ nɛjʉ́ɔ Yɛ́su, ḿbɔ́ tɛ ńjʉ́ɔ wɛ́, ḿbúꞋ mbɔ́ mbɔ̌ wɛ́ ŋɡɔ ɑ fú lɑ́Ꞌ pɔ́p ŋ́ɡʉ.
Айни замон обунашуда:
Mɑtʉ̈ɔ 8: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017