Lúkɑ́shi 15
15
Sɑknɛkɛt nǔu njinjɔ wí pɛ́ kɑ pɛnnɛ ńjʉ́ɔ
(Mɑtʉ̈ɔ 18.12-14)
1Pɑcẅɛ́ɛntsup-Pɑlɔ́mɑ pɔ́p pɛcɔ́ pʉɔ pi pɛ́ kɑ pɔ́ ŋ́kʉ́ʉnɛ wɔ́p ḿbɔ́ ńtɔ́ pɛtsʉʉ, nɛjɔ́ŋ Yɛ́su nɛzúꞋ nu yɛ́. 2Pɑfɑlísɑy pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ jʉ́ɔ pɔ́Ꞌɔ, ḿbɔ́ ńcútɛ tsɛtsɛt pɔ́p ŋɡɔ: «Ŋu ẅi lɔ ńcúꞋlɛ pʉɔ kɛpɔŋ tɛ pɔ́p pɛpɔ́p tɛmtɛ ńjʉ́ yúujʉ́.»
3Yɛ́su kɛ́ ŋ́ɡɔ́ɔ ńdɔk sɑknɛkɛt ńcú mbɔ̌ pɔ́p ŋɡɔ: 4«A wɛ́t ŋu tsɛtsɛt pʉʉ ẅi ɑ lɑɑ ŋ́ɡẅɛɛ mɛnjinjɔ mɛ́ ŋkʉ, ŋ́ɡʉ tɛt tsiinɛ wɔ́p, tɑ́Ꞌ wɛ́mɔ́Ꞌ pɛ́, mbɔ ɑ ŋ́ɡɛ pɑ́Ꞌɑ? Mbɔ ɑ kɛ́ nɑ́ pɛcɔ́ ntsɔ̌pɛ́nɛ́pfuꞋú mɛɡɛ́mɛ́nɛ́pfúꞋú tɛt, ŋ́ɡʉ ńdɔ́ɔ ẅinɛ ɑ pɛ́nɛ lɑ́ tɛ ńjʉ́ɔ wɛ́ pɔ́ ɔɔ? 5A ɡɛ ńdɔ́ɔ tɛ ńjʉ́ɔ, ŋ́ɡɔ ńtsɑ́ɑtɛ, ńtíi wɛ́ ńzɑ́p ŋkɑmbʉ̈ɔꞋ wɛ, 6ńdɔk ḿbɛn tɛ ŋ́kúu njɛ́Ꞌ yɛ. Ŋ́kúu njɛ́Ꞌ yɛ pɔ́Ꞌɔ, ɛ́fúŋ pɛsúu pɛ́ mbɑ pɛtɑ̌ɑlɑ́Ꞌ pɛ́ ńcú mbɔ̌ pɔ́p ŋɡɔ: Pɛkŋɛ tsɑ́ɑtɛ mbíꞋŋɡɔ n jʉ́ɔ njinjɔ wɑɑ ẅi ɑ kɑ pɛ́nɛ lɑ́. 7Ɛ́ pɔ́Ꞌɔ, lɑ́ ɛ sẅíi wʉ́ʉ ŋɡɔ: Tɑ́Ꞌ ŋu kɛpɔŋ lɑɑ ŋ́kúp mɑt wɛ, pɛ́ tsɑ́ɑtɛ tʉ́nɛ́pú tɛꞋ, ńtsɑ pɑ́Ꞌ ɛ́ lɑɑ ḿbɔ́ pɛ́ tsɑ́ɑtɛ nǔu pʉɔ ntsɔ̌pɛ́nɛ́pfuꞋú mɛɡɛ́mɛ́nɛ́pfúꞋú pi pɔ́p jʉ́ɔnɛ ŋɡɔ pɔ́p nɛ́nẅín tɛ ḿbɔ́ pɔ́p pɔɔ kíi ŋ́kúp mɑt wɔp pɔ́.»
Sɑknɛkɛt nǔu pɑk-ŋkɑ́p yi mɑŋɡɛ́ kɑ pɛnnɛ ńjʉ́ɔ
8Pʉʉ pɛn ńzúꞋ yɛcɔ́, mɑŋɡɛ́ lɑɑ ŋ́ɡẅɛɛ ŋkɑ́p yɛ pɑk nɛɡɛ́m, tɑ́Ꞌ pɑk pɛ́, mbɔ ɑ ŋ́ɡɛ pɑ́Ꞌɑ? Mbɔ ɑ kɛ́ lyɛt kyɛꞌ ńzʉk ndɑ́, ńtɑꞋ kyɑŋɛ, ḿbɔ́tnɛ ńdɔ́ɔ tɛ ńdɑ́Ꞌ ńjʉ́ɔ pɔ́ ɔɔ? 9A ɡɛ ńjʉ́ɔ, ɛ́fúŋ pɛsúu pɛ́ mbɑ pɛtɑ̌ɑlɑ́Ꞌ pɛ́, ńcú mbɔ̌ pɔ́p ŋɡɔ: «Pʉʉ tɔ́ pɛkŋɛ tsɑ́ɑtɛ, mbíꞋŋɡɔ n jʉ́ɔ pɑk-ŋkɑ́p yɑɑ yi ɛ́ kɑ pɛ́nɛ lɑ́. 10Tsʉ́Ꞌnɛ, ɛ sẅíi wʉʉ: Ɛ́ pɛn ḿbɔ́ pɔ pɔ́Ꞌɔ, pɛcʉ̈ɔ́Ꞌ-Sɛ́ tsɑ́ɑtɛ ntɛ́ tɑ́Ꞌ ŋu kɛpɔŋ wɛmɔ́Ꞌ ẅi ɑ kúpnɛ mɑt wɛ.»
Sɑknɛkɛt nǔu mɔ́ɔ ẅi tɑ́t wɛ kɑ pɛnnɛ ńjʉ́ɔ wɛ́
11Yɛ́su pɛn ńcú ŋɡɔ: «Wɛcɔ́ ŋu kɑ ɡẅɛɛ pɔɔ pɛ́ mbɛ́ɛnɛ pɛ́pɑ́. 12Wɛ mbɑ́ɑtɛ nɑ́ŋ tɛ ńcú mbɔ̌ wɛ ŋɡɔ: Tɑ̌ɑ mɔ, ɡʉ nǔu yúu pɛkŋɛ, ŋ́ɡɑ́ wɑ́ɑ ntʉ̈ɔt ŋkɔ̂ɔnɛ.» Tɑ́t wɛ lɔk yúu pɛ́ ŋ́ɡɑp wɔ́p pɛ́pɑ́. 13Ɛ́ ɡɔ ńdɛɛ mɛcɔ́ mɛlɛ́Ꞌ, mɔ́ɔ ɛ̂wɑ́ fɛn pɛ́ yúu, ńdɔk ŋkɑ́p ŋ́ɡʉ nɛ́ túu; ńtɔ́ zúꞋu, ḿbʉ́ʉpɛ ŋkɑ́p ɛ̂yɑ́, 14ḿbʉ́ʉpɛ ŋkɑ́p tɛ ɛ́ ɡɔ ḿmɛ, cʉ́ vu tsɛt ẅîwɑ́ ŋɡɔŋ. A zɛ nɛjɑ́k yɛ kwɛ́tnɛ. 15Ńtɛplɛ tɛ ŋ́ɡʉ ŋ́kúu fɑꞋ mbɔ̌ wɛcɔ́ ŋu-ŋɡɔŋ ɛ̂wɑ́. A túu wɛ́ ŋkɑ́Ꞌ nɛpyɛ́p mɛnjínɑɑ. A túu wɛ pɔ́Ꞌɔ 16A ɡʉ ḿbɔ́ ḿbyɛ́p, ńnɑ́ŋ kɛ́ kwɛ́t yúu. Njí zɑ́ŋ wɛ́, tɛ ɑ tsɑ́ɑ yúu-mɛnjínɑɑ#15.16 A kɑ ɡẅɛɛ yɛ́ pɔ nɛlɔk mɛnjínɑɑ ḿbɔ́ ńnɛn tɛt nɛnɛm, ḿbɛn ntsuŋkẅɛ́Ꞌ ńdɔk wɔ́p ńtɔ́ nɛ́ lɑ́Ꞌ lɑ wɛcɔ́ ŋu ɡɑ́ yúujʉ́ mbɔ̌ pɔ́p., lɑ́ ŋu pɔɔ sɑ̌ɑ fʉ̈ɔplɛ nǔu yúu-mɛnjínɑɑ mbɔ̌ wɛ́ ɡɑ́. 17A nɑ́ŋ tɛ ŋ́kwɑŋɛ tʉ́m yɛ́ ŋɡɔ: «GɑŋfɑꞋ-Tɑ̌ɑ mɔ njɛ́Ꞌ pɛk ńjʉ́ yúu tɛ ḿmɛꞋ yɛcɔ́, m bɔ́ zɑꞋnɛ ḿpfú njí lɑɑnɛ! 18Mɔ ŋ́ɡɛ ɛ́fú zɑꞋnɛ ḿbɛn nzʉʉ nɛ́ njɛ́Ꞌ-Tɑ̌ɑ mɔ, ńtɔ́ ńcú mbɔ̌ wɛ́ ŋɡɔ: Tɑ̌ɑ mɔ, ŋ kɑ ɡɛ nu kɛpɔŋ mbɔ̌ Sɛ́, mbɑ mbɔ̌ ɡu. 19Pɔ́Ꞌɔ, ŋ kɑ́ pɛn ŋ́kuꞋ pɑ́Ꞌ ɛ́ lɑɑ ḿbɔ́ ɔ fúŋ wɑ́ɑ nɛ́ mɔ́ɔ nu pɔ́. Sǐi ńdɔk wɑ́ɑ ŋ́ɡɛ wɛcɔ́ ŋɡɑŋfɑꞋ wu lɑ́.»
20«Ŋ́kwɑŋɛ pɔ́Ꞌɔ, ńcʉ́ɔ sɛ̂ndúŋ, ḿbɔ́ ḿbɛn nɛ́ njɛ́Ꞌ pɔ́p. Tɑ́t wɛ tʉ́ʉ ńjʉ́ɔ wɛ́, tɛ ɑ pɛ́t pɔ ŋɡɑ sɛsɑ, mɛjʉ́ŋ mɛ́ kɔ́ wɛ́, ɑ nɑ́ɑtɛ wɛ́, ɛ́sɛntɛ wɛ́, ŋɡɔ: Yɔ kwɑꞋ ɡu lɑɑ?» 21Mɔ́ɔ cú mbɔ̌ tɑ́t wɛ ŋɡɔ: «Tɑ̌ɑ mɔ, ŋ kɑ ɡɛ nu kɛpɔŋ mbɔ̌ Sɛ́, mbɑ mbɔ̌ wu, ŋ kɑ́ pɛn ŋ́kuꞋ pɑ́Ꞌ ɛ́ lɑɑ ḿbɔ́ ɔ fúŋ wɑ́ɑ nɛ́ mɔ́ɔ nu pɔ́.» 22Lɑ́, tɑ́t wɛ cú mbɔ̌ pɛɡɑŋfɑꞋ ŋɡɔ: «Pʉʉ fɛ́Ꞌnɛ ŋ́ɡʉ ńdɔ́ɔ ndẅí sʉ́Ꞌnɛ ńdɔk ńtɔ́ ḿmɑꞋ mbʉʉ yɛ́, ńdíŋɛ fyɛt ńzẅík nǔu mɔ́ɔ tɔ̂pɔ́ wɛ, ńdɔ́ɔ mɛtɑp ńzẅík mɛku yɛ́! 23Pʉʉ lɔ́ɔ mɔ́ɔ-fɔŋ ẅinɛ ɑ ɡúꞋ tɛꞋ lɑ́, ńjẅí pɛkŋɛ kwɛ́t, ńtsɑ́ɑtɛ, 24mbíꞌŋɡɔ mɔ́ɔ wɑɑ wɔnɛ kɑ pfú, ɑ pɛn ḿbɛnɛ, ɑ kɑ pɛ́, m bɛn ńjʉ́ɔ wɛ́.» A cú pɔ́Ꞌɔ, pɔ́p ɡɔ́ɔ ńzɛ nɛtsɑ́ɑtɛ.
25«Ɛ́ ɡɔ ḿbɔ́, mɔ́ɔ nɛ wɛ ndʉ́m pɛ́t pɔ ŋkɑ́Ꞌ. Ŋ́ɡɔ ḿbɔ́ ḿbɛn, ŋ́ɡʉ tɛ ńtsʉ́Ꞌ nɛkúu lɑ́Ꞌ, ńzúꞋ pɛ́ pɔ́ lɑ́Ꞌ ńzɔp ńnʉŋ. 26A fúŋ wɛcɔ́ ŋɡɑŋfɑꞋ, ḿbíkŋɛ wɛ́ ŋɡɔ: A ku lɑ́Ꞌ?» 27ŊɡɑŋfɑꞋ cú ŋɡɔ: «Mɔ́ɔmɑ́ wu tsʉ́Ꞌ nzʉʉ ńtɔ́ tɛ ḿbɔ́ pɔ sʉ́Ꞌnɛ. Tɑ́t wu jẅí mɔ́ɔ-fɔŋ ẅi ɑ ɡúꞋ tɛꞋ lɑ́, pɛ́ sɛ́ ńdɔk ńtsɑ́ɑtɛ.» 28Ndu wɛ zúꞋ pɔ́Ꞌɔ, ńzɑ́ŋ lɔ́ŋ tɛ ńdʉꞋ nɛkúu ndɑ́. Tɑ́t wɛ cẅɛt píi, ḿbúꞋ mbɔ́ mbɔ̌ wɛ́ ŋɡɔ ɑ kúu ndɑ́. 29A tsɔ́Ꞌ mbɔ̌ wɛ́ ŋɡɔ: «Tɑ̌ɑ, ɛ fɑꞋ mbɔ̌ wu ŋɡuꞋ yɛ́sʉ́Ꞌʉ́? Mɔ ńdɑ́Ꞌ mɔ́ ŋ́kɛ́ ɛ́fɑɑnɛ nɛpʉ́ʉ nú? Lɑ́ ɔ mɑ́ɑ mɔ́ ŋ́ɡɑ́ wɑɑ mɔ́ɔ-mɔ̂mbí ndɑꞋ ŋɡɔ pɛk pɛsúu pɑ́ɑ jẅí ńdɔk ńtsɑ́ɑtɛ? 30Mɔ́ɔ nu ẅi pɔ́p pɛkwɑlɑ kwɛ́tnɛ ŋkɑ́p yu, ɑ lɛɛ tɛ ńtɔ́, ɔ ɡɔ́ɔ ńjẅí mɔ́ɔ-fɔŋ ẅi ɑ ɡúꞋ tɛꞋ ntɛ́ wɛ́?» 31Tɑ́t wɛ cú ŋɡɔ: «Mɔ́ɔ wɑɑ, pûu júknɛ. Kʉ̈ɔ́ lɑ́ yi ŋ ɡẅɛɛnɛ pɔ yú. 32Lɑ́, ɛ́ ḿbɔ́ ḿbɔŋ ŋɡɔ pɛkŋɛ tsɑ́ɑtɛ kwɑꞋ sʉ́Ꞌnɛ, mbíꞋŋɡɔ mɔ́ɔmɑ́ wu wɔnɛ kɑ pfú, ɑ pɛn ḿbɛnɛ, ɑ kɑ pɛ́, m bɛn ńjʉ́ɔ wɛ́.»
Айни замон обунашуда:
Lúkɑ́shi 15: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017