Jɑ̂ŋ 8
8
Ŋɡɑŋ ɡɑ́ɑ mɑŋɡɛ́
1Yɛ́su fú yɛ́ zúꞋu, ŋ́ɡʉ nɛ́ ndǔ nɛŋkɔ́Ꞌ-mɛtʉ́-mɛɡwɛ́t-ɔliivɛ, 2ŋ́ɡɛ ḿmʉ́ʉ mbɑ́ꞋmbɑꞋɑ́ ḿbɛn ndɑ́-nɔŋpɔꞋ. Lɑ́Ꞌ pɔ́ ńtɔ́ nɛ́ nɛjɔ́ŋ yɛ́, ɑ nɑ́ŋ sɛ́, ḿbɔ́ ńzíꞋ wɔ́p nɛ́ yúu. 3Pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́p pɑfɑlísɑy nɑ́ŋ tɛ ńdɔk wɛcɔ́ mɑŋɡɛ́ ńtɔ́, mbɔ pɛ́ kɛm wɛ́ ɑ pɔ́ ŋ́ɡɛ ɡɑ́ɑ. Pɔ́p tík wɛ́ mbi pʉɔ tsʉʉ. 4Ńcú mbɔ̌ Yɛ́su ŋɡɔ: «Cícɑ, pɛ́ kɛm mɑŋɡɛ́ wɔ, ɑ pɔ́ ŋ́ɡɛ ɡɑ́ɑ. 5Mɔ̌sɛ̂ɛ kɑ ŋwɑꞋnɛ tsɛt ŋwɑꞋnɛ nɛpʉ́ʉ, ŋ́ɡɑ́ mbɔ̌ pɛkŋɛ ŋɡɔ pɛkŋɛ lɔk mɛŋɡɔꞋ ńtɛ́mtɛ ntɛ́ pɑŋɡɛ́ pɑ́Ꞌ wɔ ńjẅí. Ɔ cú yú ŋɡɔ kʉ̈ɔ́?» 6Pɔ́p cú pɔ́Ꞌɔ, ɛ́ pɔ́ pɔ ŋkʉ nɛlɔk ŋ́ɡẅɛɛ wɛ́. Pɔ́p lɔɔ mbɛ̌tntɑ́ŋ nɛlɔk ɛ́fɛn wɛ́. Lɑ́ Yɛ́su ŋɔ́Ꞌnɛ sɛ́, ńzɛ nɛlɔk mɔ́ɔ-tɔ̂pɔ́ wɛ, ŋ́ŋwɑꞋnɛ yúu sɛ́. 7Pɔ́p kɛ́ ḿbɔ́ ḿbíkŋɛ wɛ́ píkŋɛnɛ, ɑ nɑ́ŋ tɛ ḿbʉꞋ mbʉʉ yɛ́ ńcú mbɔ̌ pɔ́p ŋɡɔ: «Ŋu ẅí ɑ tsɛtsɛt pʉʉ, mbɔ ɑ ŋkɑɑ mɔ nu kɛpɔŋ ɡɛ, ɑ piitɛ ńzɛ nɛlɔk ŋɡɔꞋ ńtɛ́m wɛ́.» 8Ńcú pɔ́Ꞌɔ, ḿbɛn ŋ́ŋɔ́Ꞌnɛ sɛ́, ḿbɛn ńzɛ nɛlɔk mɔ́ɔ-tɔ̂pɔ́ wɛ, ŋ́kɑtɛ yúu sɛ́. 9Pʉɔ zúꞋ yɔ sẅiŋɛ, ńzɛ nɛɡʉtɛ pɔ wɛ́mɔ́Ꞌɔ wɛ́mɔ́Ꞌɔ, ńzɛ nǔu pɛlʉ́m. Tɛ ɑ tsʉꞋ Yɛ́su zɛ́nɛ́jʉ́, mɑŋɡɛ́ ɛ̂wɑ́ kɛ́ ḿbɛ́t ńtʉ́ʉ pɔ zúꞋu. 10Yɛ́su pʉꞋ mbʉʉ yɛ́, ńcú mbɔ̌ wɛ́ ŋɡɔ: «Mɑ́ɑmɑɑ, pɔ́p pɔ́ ɡɔ́? Sɑ̌ɑ ŋu kɑ́ tɛ́m wú pɔ́ ɔɔ?» 11A pʉ̈ɔt mbɔ̌ wɛ́ ŋɡɔ: «Sɑ̌ɑ ŋu mbɑ̌ɑ Ndɛ.» Yɛ́su cú mbɔ̌ wɛ́ ŋɡɔ: «Mbɑ mɔ yɑ́ɑ, ŋ kɛ́ tɛ́m wú pɔ́. Gʉ, kɔɔ lɑ́Ꞌ ḿbɛn ŋ́ɡɛ nu kɛpɔŋ.»#8.11 Nɛzɑ́ɑ mɛlwɛn ŋwɑꞋnɛ kɑ́ ɡẅɛɛ zʉꞋ yɔ pɔ́.
Yɛ́su kyɛꞋ-ndǔmbí
12Yɛ́su pɛn ńzɛ nɛzíꞋ yúu mbɔ̌ lɑ́Ꞌ, ńcú ŋɡɔ: «Kyɛꞌ yi ɛ́ kyɛꞋnɛ zʉꞋ ŋ́ɡɑ́ mbɔ̌ pʉɔmɛsɔŋ ndǔmbí ɑ pɔ́ mɔ. Ŋu lɑɑ ńcʉ́ɔ nzʉʉ mɔ, mbɔ ŋɡɑŋ kɛ́ lɑ́Ꞌ ńnɛn tsɛt nzɛ́nzʉ́ʉ pɔ́. Mbɔ ɑ ɡẅɛɛ kyɛꞌ yi ɛ́ kyɛꞋnɛ sɛ̂ndúŋ kwɑꞋ luk.» 13Pɑfɑlísɑy cú mbɔ̌ wɛ́ ŋɡɔ: «Ɔ cú nu yí ɔ jínɛ nǔu túmbʉʉ yú, ɛ́ pɔɔ nɛ́nẅín pɔ́.» 14Yɛ́su tsɔ́Ꞌ mbɔ̌ pɔ́p ŋɡɔ: «N dɑɑ ńzɛɛ ḿbɔ́ ńcú nu yi n jínɛ nǔu túmbʉʉ yɑ́ɑ lɑ́, nu yi n cúnɛ kɛ́ ḿbɔ́ nɛ́nẅín, mbíꞋŋɡɔ mɔ sɛ́ ńjí zʉꞋ yí ŋ kɑ fúnɛ zúꞋu, ḿbɛn ḿbɔ́ ńjí zʉꞋ yí ŋ ɡʉnɛ nɛ́ zúꞋu. Lɑ́ ŋ́ɡʉ nǔu pʉʉ, mbɔ pʉʉ kɑ́ pɔ́ ńjí zʉꞋ yí ɛ fúnɛ nɛ́ zúꞋu pɔ́, ḿbɛn ŋ́kɛ́ ḿbɔɔ ńjí zʉꞋ yí ŋ ɡʉnɛ nɛ́ zúꞋu pɔ́.» 15Pʉʉ ŋɑk pʉɔ pɔ nǔu ntɛ́ yɛ́ pʉɔmɛsɔŋ. Ɛ́ ɡʉ nǔu mɔ, mbɔ n dɔɔ ŋ́ŋɑk ŋu pɔ́. 16N dɑɑ zɛɛ ŋ́ŋɑk pɔ ntsɑŋ, mbɔ wɑɑ nɛŋɑk wɛ nɛ́nẅín, mbíꞋŋɡɔ n zɛɛ ḿbɔɔ zɛ́nɛ mɔ pɔ́. Pɛk Tɑ̌ɑ mɔ pɔ́nɛ. A jʉ́ ẅi ɑ kɑ túunɛ wɑ́ɑ. 17Pɛ́ kɑ ŋwɑꞋnɛ tsɛt ŋwɑꞋnɛ-nɛpʉ́ʉ nʉ́ʉ ŋɡɔ: «Pʉɔ pɛ́pɑ́ lɑɑ ńcẅɛt, ḿbɔ́ tɑ́Ꞌ ntsu nǔu nu, mbɔ pɛ́ ɡʉ ḿbɛ́m ŋɡɔ ɛ́ nɛ́nẅín. 18Mɔ pɑ́Ꞌɑ ńcú nu yí n jínɛ nǔu túmbʉʉ yɑ́ɑ, Tɑ̌ɑ mɔ ẅí ɑ kɑ túunɛ wɑ́ɑ, ɑ pɛn ḿbɔ́ ńcú yɛ́ nu yí ɑ jínɛ nǔu mɔ.» 19Pɔ́p píkŋɛ wɛ́ ŋɡɔ: «Tɑ́t wu ɡɔ́?» Yɛ́su pʉ̈ɔt ŋɡɔ: «Pʉʉ kɑ́ pɔ́ ńjí wɑ́ɑ pɔ́, ḿbɛn ḿbɔɔ ḿbɔ́ ńjí mbɑ Tɑ̌ɑ mɔ pɔ́. Pʉʉ kɑ zɛɛ ḿbɔ́ pɛ́Ꞌnɛ ḿbɔ́ ńjí wɑɑ, mbɔ pʉʉ kɑ pɛn ńjí Tɑ̌ɑ mɔ ɡúu.»
20Yɛ́su kɑ ɡɔ́ ńcú mɔnɛ mɛnu pɑ́Ꞌɑ, ḿbɔ́ tsɛt ndɑ́-nɔŋpɔꞋ, ḿbɔ́ ńzíꞋ pʉɔ nɛ́ nu-Sɛ́, ḿbɔ́ mbʉʉ zʉꞋ yi pɛ́ níꞋnɛ ŋkɑ́p yi pɛ́ ɡɑ́nɛ mbɔ̌ Sɛ́ zúꞋu. Ŋu kɛ́ mbɔɔ wɛ́ ɡẅɛɛ, mbíꞋŋɡɔ ɛ́ kɑ ɡɔ́ ḿbɔ́, mbɔ yɛ́ ŋkɑ́ kɑ́ kuꞋ.
Yɛ́su sɛ́ ńcú ŋɡɔ ɑ ŋ́ɡɛ ŋ́ɡʉ ŋ́kẅɛ́ɛtɛ Tɑ́t wɛ
21Yɛ́su pɛn ńcú mbɔ̌ lɑ́Ꞌ ŋɡɔ: «Ŋ ɡʉ ŋ́ɡʉ, pʉʉ tsʉ́Ꞌ ḿbɔ́ ŋ́kɑ́t ńdɔɔ wɑ́ɑ. Lɑ́, pʉʉ ḿpfú nǔu nu kɛpɔŋ yʉ́ʉ. Pʉʉ kɑ́ kuꞋ nɛɡʉ zʉꞋ yi ŋ ɡʉnɛ nɛ́ zúꞋu pɔ́.» 22Pɑyúdɑ zúꞋ pɔ́Ꞌɔ, ńcú ŋɡɔ: «Jʉ́ ɡʉnɛ ńjẅí mbʉʉ yɛ kɛkʉ̈ɔ́? MbíꞋŋɡɔ ɑ cú ŋɡɔ: “Pʉʉ kɑ́ kuꞋ nɛɡʉ zʉꞋ yi ŋ ɡʉnɛ nɛ́ zúꞋu pɔ́.”» 23A pɛn ńcú nɛ́ pɔ́p ŋɡɔ: «Ɛ́ ɡʉ nǔu pʉʉ, mbɔ pʉʉ pʉɔ-ndǔ tsɛ́tsɑ́Ꞌ, m bɔ́ ŋu tʉ́nɛ́pú. Pʉʉ pʉɔ ndǔ mbí, mɔ m bɔɔ ŋu yɔ mbí pɔ́.» 24Ɛ́ yúu mi ɛ́ lɑ́Ꞌnɛ ŋ́ɡɛ lɑ n cú mbɔ̌ pʉʉ ŋɡɔ: Pʉʉ ɡʉ ŋ́ɡɛ ḿpfú tsɛt mɛnu kɛpɔŋ mʉ́ʉ. MbíꞋŋɡɔ pʉʉ lɑɑ ḿbɛ́m ŋɡɔ ŋu ẅí pɛ́ fúŋnɛ wɛ́ ŋɡɔ Mɔ ɡú#8.24 Mɔ ɡú ɛ́ lík yi Sɛ́ lɔk ɛ́shɔtnɛ ɛ́fúŋ mbʉʉ yɛ. ɑ mɔ pɔ́, mbɔ pʉʉ ɡʉ ḿpfú tsɛt mɛnu kɛpɔŋ mʉ́ʉ.
25Pɔ́p píkŋɛ wɛ́ ŋɡɔ: Ɔ pɔ́ pɔ wɔ̌? Yɛ́su pʉ̈ɔt mbɔ̌ pɔ́p ŋɡɔ: Mɔ ŋu wɑ́ ẅi ŋ kɑ lɑ́Ꞌ ńzɛ nɛsẅíi wʉ́ʉ tɛ ɛ́fú nzɛnɛ lɑ́. 26Ŋ ɡẅɛɛ mɛnu mi ŋ ɡʉ ńcú mbɔ̌ pʉʉ tɛ ɛ́ zɑ́ɑ zɑ́ɑnɛ, mbɑ mi ŋ ɡʉ ŋ́ŋɑk wʉ́ʉ nǔu. Lɑ́ n cú mbɔ̌ pʉɔ ndǔmbí pɔ yúu mi ŋ kɑ zúꞋnɛ mbɔ̌ ŋu ẅí ɑ kɑ túunɛ wɑ́ɑ. A kɛ́ ńcú yɛ́ pɔ nu nɛ́nẅín. 27Yɛ́su cú pɑ́Ꞌɑ, pɔ́p pɔɔ jí ŋɡɔ nu yí ɑ cúnɛ mbɔ̌ pɔ́p, ɑ cú pɔ nǔu Sɛ́ Tɑ̌ɑ pɔ́. 28Yɛ́su cú mbɔ̌ pɔ́p ŋɡɔ: Pʉʉ lɑɑ ŋ́ɡɛ ŋ́kɑꞋ Mɔ́ɔ-Ŋu tɛ ŋ́ɡɑ́ tʉ́ nǔu tʉ́ mɛkʉ́Ꞌ, mbɔ pʉʉ ɡʉ ŋ́kɛ́ ńjí ŋɡɔ Mɔ ŋu ẅí «mɔ jʉ́», ɑ pɔ́ mɔ, ḿbɛn ńjí ŋɡɔ mɔ ŋ́ɡɛ yɛcɔ́ yúu pɔ nɛ́ yɑ́ɑ tú pɔ́. N cú pɔ yúu mi Tɑ̌ɑ mɔ kɑ zíꞋnɛ wɑ́ɑ. 29Ŋu ẅí ɑ kɑ túunɛ wɑ́ɑ, pɛkŋɛ pɔ́nɛ, ɑ kɑ́ nɑ́ wɑ́ɑ zɛ́nɛ mɔ pɔ́, mbíꞋŋɡɔ mɔ ŋkɑ́ kʉ̈ɔ́ lɑ́, ŋ́ɡɛ pɔ yúu mi ɛ́ pɔŋnɛ wɛ́. 30Yɛ́su cú mɔnɛ mɛnu pʉɔ tɛ ńzɑ́ɑ zɛ nɛzɑ́p tʉ́m nǔu wɛ́.
KwɑꞋ njẅɛt-Ábɛlɛhɑ̂m
31Yɛ́su cú mbɔ̌ pɑyúdɑ pínɛ pɔ́p zɑ́pnɛ tʉ́m nǔu wɛ́ ŋɡɔ: «Pʉʉ lɑɑ ŋ́kúꞋlɛ sẅiŋɛ yɑ́ɑ, mbɔ pʉʉ ɡʉ ḿbɔ́ kwɑꞋ ɡɑŋku pɑ́ɑ. 32Mbɔ pʉʉ ɡʉ ńjí nu nɛ́nẅín, nu nɛ́nẅín ńtsúꞋ wʉ́ʉ.» 33Pɔ́p pʉ̈ɔt mbɔ̌ wɛ́ ŋɡɔ: «Pɛk pʉɔ nǔu njẅɛt-Ábɛlɛhɑ̂m, pɛk ŋkɑɑ zɛɛ ḿbɔ́ pɛkwɑɑ wɛcɔ́ ŋu pɔ́. Ɔ ɡɛ pɑ́Ꞌɑ ńcú ŋɡɔ nu nɛ́nẅín ɡʉ ńtsúꞋ wɛk?»
34Yɛ́su pʉ̈ɔt mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, pʉɔtsʉʉ pinɛ pɔ́p ɡɛnɛ nu kɛpɔŋ, pɔ́p pɛkwɑɑ nu kɛpɔŋ. 35Ŋkwɑɑ kɛ́ lɑ́Ꞌ ńtswɛ́ pɔ njɛ́Ꞌ ŋu ẅí ɑ ɡẅɛɛnɛ wɛ́ pɔ́, Mɔ́ɔ-njɛ́Ꞌ ńdɑ́Ꞌnɛ ńtswɛ́ zúꞋu. 36Ɛ́ pɔ́Ꞌɔ, lɑ́ ḿbɔ́ yi mɔ́ɔ-Sɛ́ lɑɑ ńcẅɛɛtɛ wʉ́ʉ ndɑ́-kwɑɑ, mbɔ pʉʉ ɡʉ ɛ́fú zúꞋu ńcẅɛt, kwɑꞋ nɛ́nẅín. 37Mɔ sɛ́ ńjí ŋɡɔ pʉʉ njẅɛt-Ábɛlɛhɑ̂m, lɑ́ pʉʉ sɛ́ ńdɔɔ nɛjẅí wɑ́ɑ, mbíꞋŋɡɔ pʉʉ sɛ́ ńdʉꞋ sẅiŋɛ yɑ́ɑ lʉꞋnɛ. 38Mɔ, n cú pɔ yúu mi ŋ kɑ jʉ́ɔnɛ mbɔ̌ Tɑ̌ɑ mɔ, lɑ́ pʉʉ pɛn ŋ́ɡɛ yʉ́ʉ pɔ yúu mi pʉʉ kɑ zúꞋnɛ mbɔ̌ tɑ̌ɑ wʉʉ.»
39Pɔ́p pʉ̈ɔt mbɔ̌ wɛ́ ŋɡɔ: «Tɑ̌ɑ wɛk ɑ Ábɛlɛhɑ̂m.» Yɛ́su cú mbɔ̌ pɔ́p ŋɡɔ: «Pʉʉ pɛ́Ꞌnɛ ḿbɔ́ pɔ́ɔ-Ábɛlɛhɑ̂m, mbɔ pʉʉ ɡɛ pɑ́Ꞌ jʉ́.» 40Ɛ sẅíi wʉ́ʉ nɛ́ nu nɛ́nẅín yi ŋ kɑ zúꞋnɛ mbɔ̌ Sɛ́, pʉʉ pɛn ḿbɔ́ ŋkɔ̂ɔnɛ ḿbɔ́ ńdɔɔ nɛjẅí wɑ́ɑ, mbɑ Ábɛlɛhɑ̂m ŋkɑɑ pɔ́Ꞌɔ ɡɛ. 41Pʉʉ fɑꞋ pɔ mɛfɑꞋ wʉʉ tɑ́t, pɔ́p pʉ̈ɔt mbɔ̌ wɛ́ ŋɡɔ: «Pɛk kɑ́ pɔ́ pɔ́ɔɡɑ́ɑ pɔ́, pɛk ɡẅɛɛ pɔ tɑ́Ꞌ Tɑ́t wɛ́mɔ́Ꞌ, ɑ pɔ́ Sɛ́.» 42Yɛ́su cú mbɔ̌ pɔ́p ŋɡɔ: «Sɛ́ lɑ́Ꞌnɛ pɛ́Ꞌnɛ ḿbɔ́ tɑ̌ɑ wʉʉ, mbɔ pʉʉ kɔŋ wɑ́ɑ. Ŋ kɑ zɛɛ ɛ́fú pɔ mbɔ̌ Sɛ́ ńtɔ́. Ŋ ɡɔ́ ḿbɔ́ zɑꞋnɛ jʉ́ cúnɛ. Mɔ ŋkɑɑnɛ zɑ́p ŋɡɔ ŋ ɡʉ ńtɔ́ pɔ́, jʉ́ kɑ túunɛ wɑ́ɑ. 43Pʉʉ pɛn ŋ́kɛ́ ḿbɔɔ ḿbɔ́ ńzúꞋ sẅiŋɛ yɑ́ɑ pɔ́ mɛlɑ́Ꞌ kʉ̈ɔ́? MbíꞋŋɡɔ pʉ́ʉ kɑ́ kuꞋ nɛzẅíꞋlɛ sẅiŋɛ yɑ́ɑ pɔ́.» 44Wʉʉ tɑ́t ɑ sɑ́ttɑ, pʉ́ʉ pɛn mbɔ̌ ŋ́kɔŋ nɛɡɛ yúu mi ɑ sɛ́ ńtsɑ́ɑ. Ɛ́ ɡʉ nǔu wɛ́, mbɔ tɛ ɛ́fú nzɛnɛ, ɑ pɔ́ pɔ njẅíŋu. A ŋkɑɑ mɔ́ ńnɛn tsɛt nu nɛ́nẅín pɔ́. MbíꞋŋɡɔ ɑ kɑ́ ɡẅɛɛ nu nɛ́nẅín tsɛt tʉ́m yɛ́ pɔ́, tɛ kɑ́ɑ mɔ́zʉꞋ. A pɔ́ tɛ ḿbɔ́ ńcɔt nu, ɛ́ pɔ́ pɔ kwɑꞋ sẅiŋɛ yɛ́, mbíꞋŋɡɔ ɑ ŋɡɑŋ cɔtnu, ḿbɔ́ ŋu ẅi jʉ́ kɑ nɔŋnɛ cɔtnu. 45Lɑ́ ŋ́ɡʉ nǔu mɔ, pʉʉ pɔɔ ńzɑ́p tʉ́m nǔu mɔ pɔ́, mbíꞋŋɡɔ ɛ sẅíi nu nɛ́nẅín. 46Mbɔ́ wɔ̌ tsɛtsɛt pʉʉ lɛꞋlɛ nu kɛpɔŋ yi mɔ ŋ́ɡɛ mɔ́? N dɑɑ ḿbɔ́ yi ɛ sẅíi nu nɛ́nẅín, mbɔ pʉʉ pɛn ŋ́kɛ́ ḿbɔɔ ḿbɛ́m pɔ́ mɛlɑ́Ꞌ kʉ̈ɔ́? 47Ŋu ẅí ɑ ŋu-Sɛ́ ɑ zẅíꞋlɛ sẅíŋɛ-Sɛ́. Pʉʉ pɛn ḿbɔɔ ńzẅíꞋlɛ sẅiŋɛ yɑ́ɑ pɔ́, mbíꞋŋɡɔ pʉʉ kɑ́ pɔ́ pʉɔ-Sɛ́ pɔ́.
Yɛ́su pɔ́p Ábɛlɛhɑ̂m
48Pɑyúdɑ cú mbɔ̌ Yɛ́su ŋɡɔ: «pɛk lɑɑ ɛ́fúŋ wú ŋɡɔ ŋu-Sɑmɑlîi, mbɔ pɛk kɑ́ ɛ́fɑɑnɛ pɔ́. Mbɑ nɛcú ŋɡɔ zẅikŋɛ kɛpɔŋ nǔu wu.» 49Yɛ́su tsɔ́Ꞌ mbɔ̌ pɔ́p ŋɡɔ: «zẅikŋɛ kɛpɔŋ kɑ́ pɔ́ nǔu mɔ pɔ́. Ŋ ɡɛ yɑ́ɑ pɔ mɛkuꞋ-Tɑ̌ɑ. Pʉʉ pɛn ŋ́kɛ́ ḿbɔɔ ŋ́ɡɛ mɛkuꞋ mɑ́ɑ pɔ́. 50Ŋ kɑ́ pɔ́ ńdɔɔ pɔ wɑɑ nɛɡúꞋ pɔ́. Wɛcɔ́ ŋu ndɛꞋ pɔ́nɛ ḿbɔ́ ńdɔɔ wɑɑ nɛɡúꞋ, jʉ́ ɡʉnɛ ńzɑ́Ꞌ ntsɑŋ.
51Tsʉ́Ꞌnɛ ɛ sẅíi wʉ́ʉ, kwɑꞋ nɛ́nẅín, ŋu lɑɑ ńnɛn nǔu sẅiŋɛ yí n cúnɛ, mbɔ ŋɡɑŋ kɛ́ lɑ́Ꞌ ḿpfú pɔ́.» 52Pɑyúdɑ cú mbɔ̌ Yɛ́su ŋɡɔ: Ɛ́ nǔu ŋkɔ̂ɔnɛ, mbɔ pɛk jí ŋɡɔ zẅikŋɛ kɛpɔŋ nǔu ɡu. Ábɛlɛhɑ̂m kɑ pfú, pɛŋɡɛ́mndʉ̈ɔ́Ꞌ-Sɛ́ pɛn ḿpfú yɔ́p, ɔ pɛn ḿbɔ́ ńcú ŋɡɔ: Ŋu lɑɑ ńnɛn nǔu sẅiŋɛ yú, mbɔ ɑ kɛ́ lɑ́Ꞌ ḿpfú pɔ́. 53Ńjí ŋɡɔ ɔ lɔk ŋ́ɡúꞋ ńtsɑ tɑ́t wɛk Ábɛlɛhɑ̂m kíi? A kɑ pfú, pɛŋɡɛ́mndʉ̈ɔ́Ꞌ-Sɛ́ pɛn ḿpfútɛ yɔ́p. Ɔ kwɑŋɛ ŋɡɔ ɔ pɔ́ pɔ kʉ̈ɔ́? 54Yɛ́su tsɔ́Ꞌ mbɔ̌ pɔ́p ŋɡɔ: Ŋ kɑ́ pɔ́ ńdɔɔ wɑɑ nɛɡúꞋ pɔ́, n dɑɑ ŋ́ɡɛ pɔ́Ꞌɔ, wɑɑ nɛɡúꞋ pɔɔ yɛcɔ́ nu pɔ́. Ŋu ẅí ɑ ɡɑ́nɛ nɛɡúꞋ wɑɑ ɑ tɑ̌ɑ mɔ. Pʉʉ pɔ́ ńcú yʉ́ʉ ŋɡɔ ɑ Sɛ́ wʉʉ. 55Ŋ́kɛ́ ḿbɔɔ ḿbɔ́ ńjí wɛ́ pɔ́, lɑ́ mɔ sɛ́ ńjí wɛ́. N dɑɑ ŋɡɔ Ŋ kɑ́ pɔ́ ńjí wɛ́ pɔ́, mbɔ mɔ ńtsʉ́Ꞌ ŋɡɑŋ cɔtnu pɑ́Ꞌ pʉʉ. Lɑ́ mɔ sɛ́ ńjí wɛ́, ḿbɛn ḿbɔ́ ńnɛn nǔu sẅiŋɛ yɛ́. 56Tʉ́m tɑ́t wʉ́ʉ Ábɛlɛhɑ̂m kɑ pɔ́ ńtsɑ́ɑtɛ ŋɡɔŋ ŋ́kɑ́ tsʉʉ yi ɑ kɑ pɔ́ ńtsɑ́ɑ nɛjʉ́ɔ ŋkɑ́ yi mɔ ŋ́ɡɛ ńtɔ́. A kɑ kɛ́ ńjʉ́ɔ, ńtsɑ́ɑtɛ tɛꞋ. 57Pɑyúdɑ cú mbɔ̌ Yɛ́su ŋɡɔ: Gu ẅí ɔ zɛɛ ḿbɛ́t pɔ kɛ́ ɡẅɛɛ ŋɡuꞋ mɛɡɛ́mɛ́ntɑɑ, ɔ kɑ jʉ́ɔ Ábɛlɛhɑ̂m? 58Yɛ́su tsɔ́Ꞌ mbɔ̌ pɔ́p ŋɡɔ: Tsʉ́Ꞌnɛ ɛ sẅíi wʉʉ, kwɑꞋ nɛ́nẅín, Ábɛlɛhɑ̂m kɑ ɡɔ́ ḿbɔ́ ɡú, mbɔ kɑ pɔ́ mɔ́ ɡú. 59Pɔ́p zúꞋ pɔ́Ꞌɔ, ńdɑk mɛŋɡɔꞋ nɛlɔk ńtɛ́mtɛ Yɛ́su ńjẅí. A sɔ́ ḿbɛ́, ɛ́sɔ́ ɛ́fú tsɛt ndɑ́-nɔŋpɔꞋ ńcẅɛt.
Айни замон обунашуда:
Jɑ̂ŋ 8: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017