Jɑ̂ŋ 5
5
Yɛ́su ɡɛ wɛcɔ́ ŋɡɑŋkẅíꞋlɛ fíitɛ
1Yɔ nu lɛɛ, ŋkɑ́ yɛcɔ́ ndínɑ-pɑyúdɑ pɔ́ ŋ́kuꞋ, Yɛ́su pʉʉ ŋ́ɡʉ nɛ́ Yɛlúsɑlɛm. 2Ɛ́ ɡɔ́ ḿbɔ́, yɛcɔ́ ɡʉ́ɔ-ŋki suk mbʉʉ pɔ́ Yɛlúsɑlɛm, pɛ́ fúŋ nǔu sẅiŋɛ pʉɔ-Hɛbɛlʉ́ ŋɡɔ Bɛtɛ́sdɑ, ɛ́ pɔ́ mbʉʉ ntsundɑ́-mɛnjinjɔ, mbɔ pɛ́ kɑ lɔk mɛŋɡɔꞋ ḿbɔ́ɔ mɛmbɔp-ndúŋ mɛ́ntɑɑ ńdɔk ńzɛmɛ ŋki ɛ̂wɑ́. 3Gɑŋ-mɛɡɔɔ ntɛ́ nɛ́ ntɛ́ nɔɔtɛ nǔu mɛmbɔp-ndúŋ ɛ̂mɑ́. Pɛfʉmík, pɛpʉ̈ɔ́Ꞌtɛ mɛku, mbɑ ɡɑŋkẅíꞋlɛ nɔɔtɛ zúꞋu, [ḿbɔ́ ńzẅíꞋlɛ pɑ́Ꞌ ŋki ɡʉ ńtsʉ́Ꞌnɛ.#5.3 Yɔ kɛm yi ɛ́ tsɛt ŋkɑ́Ꞌ lɑɑ kɑ́ pɔ́ tsɛt mɛcɔ́ mɛŋwɑꞋnɛ pɔ́. 4MbíꞋŋɡɔ, wɛcɔ́ Cʉ̈ɔꞋ-Sɛ́ kɑ pɔ́ ńnɑ́ŋ ḿbɔ́ ńcúŋ ḿbʉʉnɛ ŋki, ŋɡɔɔ ẅí ɑ piitɛ́nɛ ŋ́kúu tsɛt ŋki ŋkɑ́ yi ɛ́ tsʉ́Ꞌnɛ́nɛ, ɑ fíitɛ nǔu yɛ́ ɡɔɔ mbɑ pɑ́Ꞌ ɛ́ lɑɑ ḿbɔ́ pɔ yɛ́tɛ́ ntɛ́ lɑ́.] 5Wɛcɔ́ ŋu pɔ́ zúꞋu, mbɔ ɑ ɡɔɔ ɡɔɔnɛ ŋɡuꞋ ntsɔ̌pɛ́nɛ́fɔ́m nɛ́ mɛɡɛ́mɛ́ntɑ́t. 6Yɛ́su jʉ́ɔ pɑ́Ꞌ ɑ nɔɔnɛ, ńjí ŋɡɔ ɑ tswɛ́ zúꞋu tɛꞋ, ḿbíkŋɛ wɛ́ ŋɡɔ tɛ ɔ sɛ́ ŋ́kɔŋ nɛfíitɛ? 7Ŋɡɔɔ pʉ̈ɔt ŋɡɔ: «Ndɛ, wɑɑ ŋu ẅí ɛ́ lɑɑ ḿbɔ́ ɑ tíi wɑ́ɑ ńníꞋ tsɛt ŋki ŋkɑ́ yi ɛ́ sɛ́ ńtsʉꞋnɛ kɑ́ pɔ́ ɡú pɔ́. Ŋ ŋɑkŋɛ tɛ ŋ́ɡɔ ńtɔ́, mbɔ wɛcɔ́ ŋu piitɛ mɔ́ ŋki.» 8Yɛ́su cú mbɔ̌ wɛ́ ŋɡɔ: «Lɔ sɛ́, ḿbɛ́ɛ mɑ́tɑ wu, ńnɛn.» 9Ŋu wɑ́ ɡɔ́ɔ ɛ́fíitɛ pɔ ŋkɑ́ ɛ̂yɑ́, ḿbɛ́ɛ mɑ́tɑ wɛ, ńzɛ nɛnɛn.
Yɔ nu ɡɔ́ ńdɛɛ pɑ́Ꞌɑ, ɛ́ pɔ́ lɛ́Ꞌnji-pɑyúdɑ. 10Pɑsɑ́Ꞌlɑ́Ꞌ-pɑyúdɑ cú mbɔ̌ ŋu ẅí ɑ fíitɛ́nɛ lɑ́ ŋɡɔ: «Ɔ kɑ́ ɡẅɛɛ nɛtíi mɑ́tɑ ńdɔk ńnɛn pɑ́Ꞌɑ pɔ́. MbíꞋŋɡɔ yɔ lɛ́Ꞌnji.» 11A tsɔ́Ꞌ mbɔ̌ pɔ́p ŋɡɔ: «Ŋu ẅí ɑ ɡɛnɛ ɛ fíitɛ cú mbɔ̌ mɔ ŋɡɔ: Pɛ́ɛ mɑ́tɑ wu, ńnɛn.» 12Pɔ́p píkŋɛ wɛ́ ŋɡɔ: «Ŋu ẅí ɑ cúnɛ mbɔ̌ wu ŋɡɔ pɛ́ɛ mɑ́tɑ wu ńnɛn ɑ wɔ̌?» 13Lɑ́ ŋu ẅí ɑ lɑ́Ꞌnɛ ɛ́fíitɛ lɑ́ kɛ́ ḿbɔɔ ḿbɔ́ ńjí ŋɡɑŋ pɔ́. MbíꞋŋɡɔ Yɛ́su lɑ́Ꞌ ńcú pɔ́Ꞌɔ, ḿbɛ́ tsɛtsɛt lɑ́Ꞌ yi ɛ́ ḿbɔ́nɛ zúꞋu. 14Yɛ́su ɡɛ ńjʉ́ɔ wɛ́ tsɛt ndɑ́-nɔŋpɔꞋ, ńcú mbɔ̌ wɛ́ ŋɡɔ: «Ɔ lɑ́Ꞌ ɛ́fíitɛ sʉ́Ꞌnɛ, kɔɔ lɑ́Ꞌ ḿbɛn ŋ́ɡɛ nu kɛpɔŋ ḿbɔ́k yɛcɔ́ ŋɡʉ̈ɔ́Ꞌ nɛpɛn ŋ́kúu wú, tɛ ńtsɑ yi ɔ kɑ zɛɛnɛ ḿbɔ́ tsɛtú.» 15Ŋu wɑ́ ɡʉ ɛ́sẅíi pɑsɑ́Ꞌlɑ́Ꞌ-Pɑ́yúdɑ ŋɡɔ ŋu ẅí ɑ kɑ zɔŋnɛ wɛ́ lɑ́, kɑ pɔ́ Yɛ́su. 16Pɔ́p zúꞋ pɔ́Ꞌɔ, ńzɛ nɛpɑɑ Yɛ́su, mbíꞋŋɡɔ ɑ lɑ́Ꞌ ŋ́ɡɛ yɔ nu, lɛ́Ꞌnji yɔ́p. 17Yɛ́su tsɔ́Ꞌ mbɔ̌ pɔ́p ŋɡɔ: «Tɑ̌ɑ mɔ pɛ́t ɛ́fɑꞋ pɔ fɑꞋnɛ tɛ ŋ́kúu ŋkɔ̂ɔnɛ, mbɑ mɔ yɑ́ɑ m bɛn ḿbɔ́ ɛ́fɑꞋ pɔ fɑꞋnɛ.» 18Ɛ́ fú ŋkɑ́ ɛ̂yɑ́, pɑyúdɑ mɛkŋɛ ŋ́ɡɑ́Ꞌ nɛlɔɔ yúu mi pɔ́p ɡʉ ɛ́fú nǔu ńjẅí Yɛ́su, mbíꞌŋɡɔ ɑ ŋkɑɑ fɑɑnɛ pɔ nɛpʉ́ʉ lɛ́Ꞌnji yɔ́p ndɑꞋ pɔ́, ɑ kɑ pɛn ḿbɔ́ ńcú ŋɡɔ Sɛ́ kwɑꞋ Tɑ́t wɛ, ńdɔk pɔ́Ꞌɔ, ńcú ŋɡɔ pɔ́p Sɛ́ pɔ́ pɔ ndʉ́ŋndʉŋ.
Mɛtʉʉ-Mɔ́ɔ-Sɛ́
19Yɛ́su pɛn ńcú mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, mɔ́ɔ-Sɛ́ kɑ́ ɡɛ yɛcɔ́ yúu pɔ nɛ́ yɛ́ tú pɔ́, ɑ ɡɛ pɔ yúu mi ɑ sɛ́ ńjʉ́ɔ Tɑ́t wɛ ɡɛ. Kʉ̈ɔ́ lɑ́ yi Tɑ̌ɑ ɡɛnɛ, Mɔ́ɔ pɛn ŋ́ɡɛ pɔ yɛ́tɛ́. 20MbíꞋŋɡɔ Tɑ̌ɑ kɔŋ Mɔ́ɔ tɛꞋ, ńnyɛt wɛ́ nɛ́ mbɑ kʉ̈ɔ́ lɑ́ yi ɑ ɡɛnɛ. A pɛn ḿbɔ́ ŋ́ɡʉ ńnyɛt wɛ́ nɛ́ yúu mi ɛ́ ɡúꞋnɛ tɛ pʉʉ jʉ́ɔ ɛ́ tsuŋ ŋ́kʉꞋnɛ wʉ́ʉ. 21Pɑ́Ꞌ Tɑ́t wɛ ɡɛnɛ pʉɔ pí pɔ́p pfúnɛ zẅíimɛ pɔ́ ɡú lɑ́, ɛ́ ndʉ́ŋndʉŋ pɑ́Ꞌ Mɔ́ɔ pɛn ŋ́kuꞋ yɛ́ nɛɡɛ ŋu ẅí jʉ́ mɔ́ɔ kɔŋnɛ pɔ́ ɡú. 22Sɛ́ Tɑ́t, lɔ̌ɔ ńzɑ́Ꞌ ntsɑŋ ŋu pɔ́, ɑ kɑ nɑ́ yîyɑ́ zʉꞋ mbɔ̌ Mɔ́ɔ nɛ. 23Ɛ́ lɛɛ pɔ́Ꞌɔ, pʉɔtsʉʉ ɡɑ́ mɛkuꞋ-Mɔ́ɔ nɛ pɔ ndʉ́ŋndʉŋ pɑ́Ꞌ pɔ́p sɛ́ ŋ́ɡɑ́ mɛ́ Tɑ̌ɑ wɛ. Ŋu ẅí ɑ kɑ́ ɡɑ́ mɛkuꞋ-Mɔ́ɔ-Sɛ́ pɔ́, ŋɡɑŋ lɔk ḿbɔɔ ŋ́ɡɑ́ mɛkuꞋ-Tɑ́t wɛ ẅí ɑ kɑ túunɛ wɛ́ pɔ́.
24Lɑ́ ɛ sẅíi wʉ́ʉ, kwɑꞋ nɛ́nẅín, ŋu lɑɑ ńzúꞋ sẅiŋɛ yɑ́ɑ, ḿbɛn ńzɑ́p tʉ́m nǔu ŋu ẅí ɑ kɑ túunɛ wɑ́ɑ, mbɔ ŋɡɑŋ ɡẅɛɛ luk kɛ́mɛ. Pɛ́ kɛ́ ɡɛ ḿbɛn ŋ́ŋɑk wɛ́ pɔ́, ɑ luk nɛvú ńtsʉ́Ꞌ ŋ́ɡẅɛɛ pɔ luk kɛ́mɛ. 25Lɑ́ ɛ sẅíi wʉ́ʉ, kwɑꞋ nɛ́nẅín, ŋkɑ́ sɛ́ ŋ́kuꞋ, ɛ́ zɛɛ mɔ́ ńdɑ́Ꞌ ŋ́kuꞋ, pɑ́Ꞌ pɛpfúsɛ́ ɡʉ ńzúꞋ ŋɡi mɔ́ɔ-Sɛ́, pʉɔ pí pɔ́p zúꞋnɛ yîyɑ́ ŋɡi luk. 26Ɛ́ pɔ́Ꞌɔ mbíꞋŋɡɔ Sɛ́ Tɑ́t ẅi ɑ nɛsɑ́Ꞌ-kwɑꞋ luk, ɑ kɑ ɡɑ́ mîmɑ́ mɛtʉʉ mbɔ̌ mɔ́ɔ nɛ. 27A kɑ pɛn ŋ́ɡɑ́ wɛ́ nɛ́ mɛtʉʉ nɛlɔk ńzɑ́Ꞌ mɛtsɑŋ-pʉɔmɛsɔŋ, mbíꞋŋɡɔ jʉ́ pɔ́nɛ Mɔ́ɔ-Ŋu.
28Lɑ́, kɔɔ ɛ́ kʉꞋnɛ wʉ́ʉ kʉꞋnɛ́nɛ, mbíꞋŋɡɔ ŋkɑ́ sɛ́ ŋ́kuꞋ pɑ́Ꞌ pɛpfúsɛ́ pɛtsʉʉ pinɛ pɔ́p nɔɔnɛ tsɛt mɛshi ɡʉ ńzúꞋ ŋɡi yɛ́, 29ŋ́ɡɔ́ɔ ŋ́kɛ́ ɛ́fú tsɛt mɛshi ńcẅɛt. Pʉɔ pínɛ pɔ́p kɑ pɔ́ ŋ́ɡɛ nu sʉ́Ꞌnɛ zẅíimɛ nǔu nɛvú ńcẅɛ́ɛ kwɑꞋ luk, lɑ́ pʉɔ pínɛ pɔ́p kɑ pɔ́ ŋ́ɡɛ nu kɛpɔŋ zẅíimɛ ḿvu ntsɑŋ.»
Ŋ kɑ́ ɡɛ yɛcɔ́ nu pɔ nɛ́ yɑ́ɑ tú pɔ́.
30Ŋ kɛ́ zɑ́Ꞌ ntsɑŋ-ŋu kɛ́ píkŋɛ Sɛ́ pɔ́. Ɛ́ yɑɑ ntɛ́ nɛŋɑk, ɛ́ pɔ́ nɛ́nẅín, mbíꞋŋɡɔ ŋ kɑ́ pɔ́ ńdɔɔ pɔ nɛɡɛ yúu mi ŋ kɔŋnɛ pɔ́, ŋ ɡɛ yɑ́ɑ pɔ yúu mi ŋu ẅí ɑ kɑ túunɛ wɑ́ɑ sɛ́ ŋ́kɔŋ.
Mɛnu mí ɛ́ nyɛtnɛ ŋɡɔ Yɛ́su kwɑꞋ mɔ́ɔ-Sɛ́
31Mɔ ḿbɔ́ pɛ́Ꞌnɛ ḿbɔ́ ńcú pɔ nu yí n jínɛ nɛ́ túmbʉʉ yɑ́ɑ, mbɔ ɛ́ lɑɑ ḿbɔ́ pɛ́ pɔɔ yîyɑ́ nu pɛ́m. 32Ŋu ndɛꞋ cúnɛ nu yí ɑ jínɛ nǔu mɔ, m bɛn ḿbɔ́ ńjí ŋɡɔ nu yí ɑ cúnɛ nǔu mɔ ɛ́ nɛ́nẅín. 33Pʉʉ ŋkɑɑ túu pʉɔ mbɔ̌ Jɑ̂ŋ pɔ́ ɔɔ? A kɑ cú nu nɛ́nẅín yí ɑ jínɛ nǔu mɔ. 34Ɛ́ ɡʉ nǔu mɔ, mbɔ ŋ kɑ́ pɔ́ ńtsɑ́ɑ ŋɡɔ ŋumɛsɔŋ cúnɛ nu yí ɑ jínɛ nǔu mɔ pɔ́. Lɑ́, n cú yɔ nu nɛpɔ́ yi pʉʉ ɡʉ ńdɛɛ nǔu ńduk. 35Jɑ̂ŋ kɑ pɔ́ pɔ pɑ́Ꞌ kyɛꞌ yí pɛ́ lyɛtnɛ ńtík ɛ́ pɔ́ ŋ́kyɛꞋ zʉꞋ lɑ́. Ɛ́ kyɛꞌ zʉꞋ, nu pɔŋ wʉ́ʉ lɑ́ ɛ́ pɔɔ nɑ́ŋ.
36Lɑ́ mɔ, ŋ kɛ́ ḿbɔ́ pɑ́Ꞌɑ ŋ́ɡẅɛɛ yɛcɔ́ nu yí ɛ́ tsɑnɛ yɛ́ Jɑ̂ŋ: MɛfɑꞋ mí Tɑ̌ɑ mɔ kɑ ɡɑ́nɛ ŋɡɔ ɛ fɑꞋ, kwɑꞋ mɛfɑꞋ ɛ̂mɑ́ nyɛtnɛ ŋɡɔ Tɑ̌ɑ mɔ kɑ túunɛ wɑ́ɑ. 37Tɑ̌ɑ mɔ ẅí ɑ kɑ túunɛ wɑ́ɑ, kwɑꞋ jʉ́ sɛ́ ńcú nu yí ɑ jínɛ nǔu mɔ. Pʉʉ ŋkɑɑ ŋɡi yɛ zúꞋ, ŋ́kɛ́ mbɔɔ shʉ́ wɛ́ jʉ́ɔ. 38Sẅiŋɛ yɛ́ kɑ́ pɔ́ tʉ́m pʉʉ pɔ́, mbíꞋŋɡɔ pʉʉ ŋkɑɑ zɑ́p tʉ́m nǔu mɔ ẅí ɑ kɑ túunɛ pɔ́. 39Pʉʉ mɔɔ ŋwɑꞋnɛ ndɛn kɑɑ-Sɛ́ tɛꞋ, mbíꞋŋɡɔ pʉʉ sɛ́ ŋ́kwɑŋɛ ŋɡɔ pʉʉ ɡʉ ńdɛɛ nǔu ŋ́ɡẅɛɛ luk kɛ́mɛ. Yɛ́tɛ kɛ́ nɛ cú ŋu ẅí mɔ jʉ́ pɔ́! 40Lɑ́, Pʉʉ pɛn ŋ́kɛ́ ḿbɔɔ ḿbɔ́ ŋ́kɔŋ nɛtɔ́ mbɔ̌ mɔ ŋ́ɡẅɛɛ kwɑꞋ luk pɔ́.
41Ŋ kɑ́ pɔ́ ńtsɑ́ɑ yɛcɔ́ nɛŋwɑ́ŋɛ ẅí ɛ́ fúnɛ mbɔ̌ pʉɔmɛsɔŋ pɔ́. 42Lɑ́, mɔ pɔ́nɛ ńjí wʉ́ʉ, pʉʉ tʉ́m pʉʉ mbɔɔ Sɛ́ kɔŋ. 43Ŋ kɑ lɔk lík-Tɑ̌ɑ mɔ ńtɔ́, pʉʉ lʉꞋ nɛpɛ́m yɑ́ɑ nu. Lɑ́ ḿbɔ́ yi wɛcɔ́ ŋu ndɛꞋ lɑɑ ńtɔ́ ŋkɔ̂ɔnɛ pɔ nǔu yɛ́ lík, mbɔ pʉʉ ɡʉ ḿbɛ́m yɛ́ nu. 44Mbɔ pʉʉ zɑ́p tʉ́m nǔu mɔ ŋɡɔ́ku? Pʉʉ lɔɔ pɔ ŋɡɔ ŋumɛsɔŋ ɡɑ́nɛ nɛŋwɑ́ŋɛ wɛcɔ́, pʉʉ kɑ́ lɔɔ ŋɡɔ Sɛ́ zɛ́nɛ́jʉ́ ɡɑ́nɛ nɛŋwɑ́ŋɛ wʉʉ pɔ́, ɑ ndɑꞋ jʉ́ ḿbɔ́ Sɛ́. 45Kɔɔ pʉʉ kwɑŋɛ ŋɡɔ ŋ ɡʉnɛ ńdɑ́Ꞌ ńtʉ́ʉ mbi Tɑ̌ɑ, ńzɑ́p nu tú pʉʉ. Nzɑ́pnu tú pʉʉ ɡʉ ńdɑ́Ꞌ ḿbɔ́ pɔ Mɔ̌sɛ̂ɛ ẅí pʉʉ kwɑŋɛ yʉ́ʉ kʉ̈ɔ́ lɑ́ ńtík pɔ nǔu wɛ́. 46Pʉʉ kɑ zɛɛ ḿbɔ́ pɛ́Ꞌnɛ ḿbɛ́m nu yí Mɔ̌sɛ̂ɛ kɑ cúnɛ, mbɔ pʉʉ pɛ́m yɑ́ɑ, mbíꞋŋɡɔ ɑ kɑ ŋwɑꞋnɛ nu ntɛ́ wɑ́ɑ. 47Pɑ́Ꞌ pʉʉ kɑ́ pɔ́ ḿbɛ́m nu yí Mɔ̌sɛ̂ɛ kɑ ŋwɑꞋnɛ́nɛ pɔ́ lɑ́, pʉʉ ɡʉ ŋ́ɡɛ pɑ́Ꞌɑ lɑ́ ḿbɛ́m nu yí n cúnɛ?
Айни замон обунашуда:
Jɑ̂ŋ 5: JGO
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
CABTAL, 2017