Matana Enjil 26
26
Bag. 26.
1In bainidi malegi Yesu kikos tenna hiranigi wetidirsum: 2„Iri iyirburun ugros owin agabir basana kore teraningi, wide zolna tod biselimtakkitidiringi, berro solitakk an.“
3Mani wattigi fegirina samli duli wide gebilana samli deti jamesan Kayafa fegirina samil dulna kar, ka bochindir. 4Wide urki digirsan, Yesugi hila wekked morogirru an, wide tekki beru an. 5Ama tir wesan: „Korermunum, mine lagaj wekki gebilan tur agismendunna jiradilo.“
6Betanir, Siman baraskolna kar, Yesu dabungon, 7en wer bata iris dugu digrikol wekki kagingon, to targi, Yesu kaler agingon, tenn urdogor bogsum. 8Tenna hirani man awidti nalosirgi musulsan. Wide wegongessan: „In dabrar minde? 9In iriski ma janosirgi tenna dugugi hajebuligi atidirmendan?“ 10Yesu iyired tirgi wetidirsum: „Ir ma engi amusulkidirun? Ter aiged awid adel wekki awsum. 11Minerg ankomnun, hajebuli irgodon dime daran. Ama ai dime irgodon damnim. 12Ter in iriski anna jitan dogor bog shugud undursum anna kuyrarna jiradilo. 13Aleged irgi wetidirrin, in enjil beshirtakkinn agar maler alamir, ter awsinna awidted bibainkandan, tenna jilegidtir.“
14Mani wattir wer diminde owingarirton, Yahuda Isharyutiy an aweran, jurgi fegirina samli duligi elligi wide wetidirsum: 15„Min wekki iri aigi bidendun, ai on irgi tekki kiyetidirkiri?“ Tiri tekki tirsan riyal telatingi. 16Mani wattirton akasshum, mine tekki tirgi kiyetidirarki.
17Kalfitin ugrosin owollo hirani Yesug abidi talin torgi tekki wetirsan: „Sayer awersin ekki alletirrungi, basana kalgi kalinna jiradilo?“ 18Ter wesum: „Juwe nejagir, mankirinai. Wide tekki wetirwe: ‚Arif awen: Anna watti awtanossum. Ennai basana kalgi kalarki awerisrin anna hiranigodon.’ 19Hirani Yesu wetidirsin nawite awsan. Wide basana kalegi allesan.
20Gu shareyaningad diminde owingarigodon tegsum. 21Wide akallangon wesum: „Aleged irgi wetidirrin, iddeton wer aigi biselimen.“ 22Desenkiyr arusan. Wide ugudisan tiddeton wer nutin tekki isigarki: „Ai ter eria, wo tir?“ 23Ter widegir wesum: „Ter teran aigodon kisbir atabel. 24Ter aigi biselimen. Zolna tod nogbun, tendogor bajbun nawite. Ama man ogij tekked zolna tod biselimtakkinna tirtin dogor urmud bitebin. Man ogijnai gen esum uskitakkimenkokin.“ 25Yahuda, tekki biselimel, widegirtir wesum: „Ai ter eria, wo rabi?“ Tekki wetirsum: „Er werossum.“
26Tir kalgi akallangon, kal wekki injirgi wide barkosirgi wide birtosirgi hiranigi tidiros wide wesum: „Ar kalwe, in anna jita teran.“ 27Wide dibitegi injirgi barkosirgi tirgi tidiros wesum: „Ar niwe ir male teddoton. 28Mine in anna gew teran, gew tariga erdi, bibogtakkil digrichi werin jiradilo, zenbichina komsarnajoro. 29Widegon irgi wetidirrin, elekenton ai binimnim in enebna oliserton, man ugros ai irgodon tekki erkir, abona mulkir, nirinbokon.“
30Wide sebihos zetunna gunagir belsan. 31Teddo Yesu wide wetidirsum: „In ugun tur ir male aigi wakos bidososrun anna ayaraged, bajbun nawite: ‚Ai egedigi aïwilgi jomkirin, egedina doh bigulitakkin.’ 32Ama anna imbelarn agabir Jelilgir inn owolgi barrin.“ 33Butrus widegirtir wesum: „Male ekki wakos nogkrangon, ai ekki biwakemnim.“ 34Yesu tekki wetirsum: „Aleged ekki wetirrin, in ugun tukollo, darbadn ondi kililemeningon, er gir toskigi aigi bigubkanin.“ 35Butrus tekki wetirsum: „Ai on diarro ekkodon jukringon, ekki bigubminim.“ Ikkegon hirani male wesan.
36Terin agabir Yesu tenna hiraniged jinena Jatsamanim an awerander bijurgi wetidirsum: „Indo tegoswe, ai jurgi mando salirinbokon.“ 37Ter wide tekkodon Butruskon Zabadina tod owigongi aredir, musulkaner wide galabadir tosum. 38Tirgi wide wetidirsum: „Annewerti muslarked eyossum diarro junbokon. Indo tegos welesos aigodon bichi tegwe!“ 39Terin agabir kuluna lufad wekkir tinnaiton warianos teddokollo ungos wide koigi aridtir obred sali wesum in werechiged: „Wo abo, ter on in dibite binogtakkoskin annaiton, nog an. Ama ai awerisrin nawremnum, er awersin awtakk agad.“ 40Hiranig abidi wide lefte targi nerburangon eledirsum. Wide wetidirsum: ‚Ikke terre ir eskergi aigodon shobbekki bichi tegarki marossure? 41Bichi tegos saliwe jeribadir tomendunna joro. Aleged, newerti ayelum, ama jita jagadum. 42Wide owittiged lefte jurgi sali wesum: „Wo ambab, in dibitey on, ai tekki nimendingon, binogmenkin, er awersin awtakk agad.“ 43Ter owittiged tinnai lefte targi nerburangon eledirsum, tinna misichi naluged dullanbusanged. 44Tirgi mugosir rejae jurgi toskittiged salisum, werechi ter owollo wesinged. 45Terin aharro hiraninai targi wide wetidirsum: „Eleken ner welesewe. Ahan watt awtanossum, tedder zolna tod biselimtakkin zenbikolina ichin barer. 46Imbel kute tebwe, wide nogrun. Ahan aigi biselimel awtanbun.“
47Elgon ter abainingon Yahuda, dimind owirton wer, talin tosum wide tekkodongon jamatti dul wer siwdiged wide wichirigonged. Fegirina samli dulinaiton wide gebilana samlinaiton ishinbusan. 48Tekki biselimelgon amara wekki amnossidir wetidirsum: „Ai dogrinna tirti ter teran. Tekki morogirwe!“ 49Tenna lehdayen talin targi Yesug abidi, wide wesum: „Salam wo tirti.“ 50Wide tekki dogsum. Yesu tekki wetirsum: „Wo tiwri, er ma ta?“ Mani wattigi talin torgi Yesundogor tinn ichigi kujur wide tekki morogressan. 51Yesugodon dalirton wer tenna siwidti tenna karton soch osirgi fegirin samil dulna nugudna ulugki merossum. 52Yesu tekki wetirsum: „Enna siwidti tenn agarkir widegir. Mine siwidti aril male siwidted bidabran. 53Enn ergir er awena ai eskergi eleken, abonaiton birigkirin, desh dimind owin dogor digrigi tenna malaikarirton battamendingi? 54Won minegon kitabi bitimetakkiran, wereli ikke bitaturubn an?“ 55Man saan tur Yesu kel tekk abidi tarelgi wetirsum: „Ir magaskirig abidi bel tasure, inna siwdiged wide wichiriged aigi arw an? Won ai irgodon ugros nutin jamar agsim. Ir aigi arkomnun. 56Ama in male ta nogsum, nebichi bajsangi timer an.“ Teddo hirani tekki mugos dosossan.
57Yesugi morogredeli Kayafa fegirin samil dulnai kiyejjusan, abajiligon wide samligon ajamerann agarro. 58Ama Butrus wariged tebaedasum fegirina samil dulna kagir. Teddo aregir torosirgi tegossum hadamina barer, mine bawtakkingi nalli an.
59Fegirina samli duli wide samli malegon akasshan shahada mursindi wekki Yesundogor, tekked tin beru an. 60Tiri wekkongi elkomnan, shahidi mursaji digrichi weri takokrangon. 61Malen aharro owi talin torgi wesan: „In ogij wesum: Ai eskergi artina jamagi borkidos ugros toskir bigoiri an.“ 62Fegirina samil dul imbel kute tebos wesum: „Er urti wekki awidegirmunum in zoli endogor ashehedelig abidi?“ 63Yesu bainmen welesesum. Fegirina samil dul wetirsum: „Ai ekki arti aïbulged adigirrin. Argi wedecchir, er on komisbul, artina tod, ter ekin.“ 64Yesu tekki widegir wetirsum: „Er werossum. Wide aigon irgi awetidirrin, elekenton ir binallun zolna todti artina gudran iyinneged agingi, widegon simena gemir tabungi.“ 65Mani wattigi fegirina samil dul tenna kadechigi bashijos wesum: „Ter jedifossum! Ar shahadagi elgon minder awerisrun? Ahan eleken iri gijressun tenna jedifadti. 66Ir mingi werun?“ Tir widegir wesan: „Ter diarki werisbun.“
67Tenna wattikollo tenna koir jumbud wekki sichisan wide lukamiyeged jomsan. Echeli werigon wichiriged tukos wesan: 68„Argi nebyedecchir, wo komisbul, ekki ni jomsingi!“
69Butruskon bochiged hoshn agillo agsum. Tennai nogo wer targi wesum: „Ekkon teran Yesu Jelildigodon dasum.“ 70Ter malen owollo gubos wide wesum: „Ai aïyirminim er mingi awengi.“ 71Terin aharro hohag abidi belbungon owitti wer tekki nalos, mando agiligi wetidirsum: „Ingon teran Yesu Nasirandigodon dasum.“ 72Owittiged gubossum: „Ai in ogicchi aïyirminim an.“ 73Shobbenn agabir mando tebili targi Butruski wetirsan: „Aleged ekkon tiddetonum. Mine enna bainid ekki ashehren.“ 74Ter wide ugudisum naladton jedifadton: „Ai in ogicchi aïyirminim an.“ Tenna lehdayen darbadn ondi kililesum. 75Butrus wide jilesum Yesuna weregi, tekki wetirsingi: „Darbadn ondi kililemeningon, er aigi gir toskigi bigubn an.“ Ter wide bochigir bolos arwijsum arwijar nadi wekki.
Айни замон обунашуда:
Matana Enjil 26: XNZ1912
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the British and Foreign Bible Society in 1912.