Matana Enjil 22
22
Bag. 22.
1Owittiged Yesu meteliged tirgodon weregi ugudi bainsum: 2„Simechina mulki zol or wer galgin, tenna todti erkene wekki aawtiril wekki. 3Ter wide tenna nugdigi ishinirsum, azmebuligi uwedtaw an erkener. Tir tararki monossan. 4Owittiged nugdi echeli werigi ishinirsum. Wide wetidirsum: ‚Azmebuligi uwetidirwe: Ahan anna gada azumandi jehizebun. Anna gurigon wide anna komborigon gojburan. Wide haja malegon kiketakkibun. Erkener tawe.’ 5Ama azmebuli balemendigi nogsan, wer tenna gugir, owitti wekkon tenna janosark abidi. 6Kewdeligon orna nugdigi morogrir wide digrir wide berosirsan. 7Or gijredirgi gadbossum. Wide tenna askarigi ishinir, man gatiligi kaiwosirsan. Wide tinna nejagi jugrossan. 8Tenna nugdigi wide wetidirsum: ‚Erkeneg ankin, jehizebun. Ama azmebuli kidir tekki hugebumnan. 9Bel jurgi darbir ellun malegi erkenegir uwedtaïrwe.’ Man nugdi darbigir belligi tir elsan malegi jamegredtasan, milichirton, adelirton. 10Erkenena ka eyossum uwedtaïrsann idirton. 11Or wide to tasum, tareligi nalli an. Ikke aürungon zol wekki elsum, erkenena kadegi unduredamenil wekki. 12Wide wetirsum: ‚Wo tiwri, mine er indo to tam erkenena kadegi degarkiyir?’ Agilgi kobed tegossum. 13Mani wattigi or tenna nugdigi wetidirsum: ‚Tenna osichigon wide ichigongi digrosir wide arejjurgi duluma bochindir luf undurwe. Mandogon oyarkon wide nelina duskarkon belin.’ 14Mine uwebuli digrichim, ama barbuli gelilima.“
15Mangodon Farisichi talossan, shureru an, were wekked morogirw an. 16Tekk abidi tinna hiranigi ishintirsan Hirudusdichigodon. Wide wetirsan: „Wo arif, ar iyirrun er sadig engi wide artina darubki akurkidingi aleged, wala zol wekki abalemeningi. Mine zolin koyigi aürumeningad. 17Argi wedecchir enn ergir dalgi: Juzena gaisarki haracchi tirar wala ila?“ 18Yesu tinna habiskanegi iyired wesum: „Ir ma aigi ajeriberun, wo koi owikoni? 19Aigi amindenwe harajna dugu wekki.“ Tiri wide dinar wekki soketirsan. 20Ter wetidirsum: „In sura nindire wide in bacchigon?“ 21Tir tekki wetirsan: „Gaisarduma.“ Ter wide wetidirsum: „Gaisardanilgi gaisarki tiroswe. 22Artindanilgon artigi tiroswe!“ Ingi gijred ajibos tekki wakos nogsan.
23Man ugrosirgon tennai tasan Sadugichi, imbelar wer diarroton damnum an aweli. 24Wide tekki isig wesan: „Wo arif, Muse wesum: ‚Wer on dioskin affikiyir, timbes tenna engi jamegrin, timbeski diriye wekki wahiretir an.’ 25An̄nai timbes kolod dasan. Tiddeton koyaldi en wekki edos diossum diriyekiyir. 26Tenn engi timbeski mugtirsum. Ikkegon owittigodon awtakkisum, widegon toskittigodon, kolodittir junbokon. 27Kemallo, malen agabir, engon diossum. 28Imbelarro nina benanin? Mine kolodingarina en esinged.“ Yesu widegirtidirsum: „Iri tohir daburun. 29Mine iri kitabigi aïyirmendungad, wala artina gudragi. 30Diarroton imbelili la edminan wala edkirminan. Mine tiri simen tur bimalaikarigalgandan. 31Diarroton imbelark ankingon, in weregi kidir geryekomnun arti irgi wetidirsingi?: 32‚Ai Ebrehinna tir terrin, Isaagna tir terrin, Yagubna tir terrin.’ Arti dielina tirmunum, aïlina tir teran.“ 33Jemachi agijrili desenkiyr tenna kurkidarked kumitakkossan.
34Farisichi Sadugichina agligi kobsingi gijred ittiwrigodon jame tasan. 35Tiddeton wer tekki isigsum. Tekkon sherian idirton esum. 36Yesugi jeriberi an wesum: „Wo arif, sheria edi saï dul terre sheriar?“ 37Yesu tekki wetirsum: „Arti enna tirki enna a maleged dolu, wide ennewerti maleged wide enn erig maleged. 38In teran sheria koyaldi wide edi dul. 39Owittigon ter galgin: Enn awtindigi ennewerti nawre dolu. 40In sheria owiged sheria kamilgon nebichigon soliburan.“
41Farisichi jameburangon, Yesu tirgi isigir wide wesum: 42„Mingi inn ergir awerun komisbulna jihar? Nina tod terre?“ Tekki wetirsan: „Dawudna tod terum.“ 43Ter tirgi wetidirsum: „Won mine Dawud, newertiged eyebungon, tekki tirm an awen, in werechigi awengon: ‚Tir anna tirki wetirsum: 44Anna iyinneged tegos, ai enna aduwichigi enn osichin togor uskurirrinbokon.’ 45Dawud on tekki tirm an awekin, won minegon tenna todre?“ 46Wekon tiddeton eskergi were habbekked widegirtirkomnum. Man ugrosirton tiddeton wekkon tekki eske isigkomnum.
Айни замон обунашуда:
Matana Enjil 22: XNZ1912
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published by the British and Foreign Bible Society in 1912.